ARTIKLU GĦALL-ISTUDJU 8
Kif Tibqaʼ Ferħan Meta Tiffaċċja l-Provi
“Qisuh bħala ferħ mill-akbar, ħuti, meta tiltaqgħu maʼ diversi provi.”—ĠAK. 1:2.
GĦANJA 111 Ir-raġunijiet tagħna għall-ferħ
ĦARSA BIL-QUDDIEM *
1-2. Skont Mattew 5:11, kif għandna nqisu l-provi?
ĠESÙ wiegħed lid-dixxipli tiegħu li huma jistgħu jkunu ferħanin. U lil dawk li jħobbuh qalilhom ukoll li kienu se jiffaċċjaw il-provi. (Mt. 10:22, 23; Lq. 6:20-23) Aħna ferħanin li aħna dixxipli taʼ Kristu. Imma kif inħossuna meta l-familja tagħna tipprova twaqqafna milli naqdu lil Ġeħova? il-gvernijiet jippersegwitawna? il-kollegi tax-xogħol jew dawk fl-iskola jipprovaw iġegħluna nagħmlu xi ħaġa ħażina? Meta naħsbu dwar dawn l-affarijiet, jistaʼ jkun li nħossuna ansjużi.
2 Ħafna nies ma jqisux il-persekuzzjoni bħala xi ħaġa li tagħmlek ferħan. Però, il-Kelma t’Alla tgħidilna li għandna nkunu ferħanin. Pereżempju, Ġakbu kiteb li m’għandniex għalfejn naqtgħu qalbna għalkollox meta niffaċċjaw il-problemi, imma għandna għalfejn nifirħu. (Ġak. 1:2, 12) U Ġesù qal li għandna nkunu ferħanin meta n-nies jippersegwitawna. (Aqra Mattew 5:11.) Kif nistgħu nibqgħu ferħanin minkejja l-provi? Aħna nistgħu nitgħallmu ħafna billi nikkunsidraw xi punti mill-ittra li Ġakbu kiteb lill-Kristjani tal-bidu. L-ewwel, ejja nikkunsidraw l-isfidi li ffaċċjaw dawn il-Kristjani.
IL-KRISTJANI TAL-BIDU XI PROVI FFAĊĊJAW?
3. X’ġara ftit wara li Ġakbu sar dixxiplu taʼ Ġesù?
3 Ftit wara li Ġakbu, ħu Ġesù mill-omm, sar dixxiplu, il-Kristjani f’Ġerusalemm kienu ppersegwitati. (Atti 1:14; 5:17, 18) U meta d-dixxiplu Stiefnu ġie maqtul, ħafna Kristjani ħarbu mill-belt u ‘nxterdu mar-reġjuni tal-Lhudija u tas-Samarija,’ tant li marru Ċipru u Antjokja. (Atti 7:58-60; 8:1; 11:19) Id-dixxipli esperjenzaw ħafna problemi. Però, huma baqgħu jippritkaw l-aħbar tajba kull fejn marru u rnexxielhom jifformaw kongregazzjonijiet f’ħafna postijiet. (1 Pt. 1:1) Imma wara dan, huma ffaċċjaw ħafna provi oħra.
4. Il-Kristjani tal-bidu liema provi oħra kellhom jiffaċċjaw?
4 Il-Kristjani tal-bidu esperjenzaw ħafna provi. Pereżempju, madwar is-sena 50 wara Kristu (WK), l-Imperatur Klawdju ordna lil-Lhud biex jitilqu minn Ruma. Għalhekk, il-Lhud li kienu saru Kristjani kellhom jitilqu d-dar tagħhom u jmorru post ieħor. (Atti 18:1-3) Madwar is-sena 61 WK, Pawlu kiteb li n-nies insultaw lill-aħwa quddiem oħrajn, tefgħuhom fil-ħabs, u ħadulhom l-affarijiet tagħhom. (Ebr. 10:32-34) U bħal nies oħrajn, xi Kristjani kienu fqar u morda.—Rum. 15:26; Flp. 2:25-27.
5. Liema mistoqsijiet se nwieġbu?
5 Meta Ġakbu kiteb l-ittra tiegħu qabel is-sena 62 WK, hu kien jaf sew il-provi li kienu qed jiffaċċjaw l-aħwa. Ġeħova ggwida lil Ġakbu biex jikteb lil dawn il-Kristjani ħalli jagħtihom pariri tajbin li setgħu jgħinuhom jibqgħu ferħanin minkejja l-provi. Ejja neżaminaw l-ittra taʼ Ġakbu u nwieġbu dawn il-mistoqsijiet: X’inhu l-ferħ li Ġakbu kiteb dwaru? X’jistaʼ jġiegħel lill-Kristjani jitilfu l-ferħ tagħhom? U l-għerf, il-fidi, u l-kuraġġ kif jistgħu jgħinuna nibqgħu ferħanin minkejja l-provi li niffaċċjaw?
X’JISTAʼ JGĦIN LILL-KRISTJANI JKUNU FERĦANIN?
6. Skont Luqa 6:22, 23, għala l-Kristjani jistgħu jkunu ferħanin meta jiffaċċjaw il-provi?
6 In-nies jaf jaħsbu li jistgħu jkunu ferħanin biss jekk ikunu f’saħħithom, ikollhom ħafna flus, u l-familja tkun magħquda. Imma l-ferħ li kiteb dwaru Ġakbu hu aspett wieħed mill-frott tal-ispirtu t’Alla u ma jiddependix miċ-ċirkostanzi tal-persuna. (Gal. 5:22) Kristjan jistaʼ jkun ferħan billi jkun jaf li qed jogħġob lil Ġeħova u jimxi fuq l-eżempju taʼ Ġesù. (Aqra Luqa 6:22, 23; Kol. 1:10, 11) Il-ferħ tagħna jistaʼ jitqabbel maʼ fjamma ġo fanal. Il-fjamma tkun protetta mix-xita u r-riħ u b’hekk tibqaʼ mixgħula. Aħna wkoll nistgħu nibqgħu ferħanin minkejja dak li jkun qed jiġri fil-ħajja tagħna. M’aħniex se nitilfu l-ferħ tagħna meta nkunu morda jew meta ma jkollniex ħafna flus. Se nkunu ferħanin ukoll minkejja li n-nies iwaqqgħuna għaċ-ċajt jew tal-familja tagħna u oħrajn jippersegwitawna. Il-ferħ tagħna se jissaħħaħ kull darba li niffaċċjaw prova. Il-provi li niffaċċjaw minħabba l-fidi tagħna juru li aħna dixxipli veri taʼ Kristu. (Mt. 10:22; 24:9; Ġw. 15:20) Għalhekk Ġakbu kiteb: “Qisuh bħala ferħ mill-akbar, ħuti, meta tiltaqgħu maʼ diversi provi.”—Ġak. 1:2.
7-8. Il-fidi tagħna għala tissaħħaħ meta ngħaddu mill-provi?
7 Ġakbu semma għala l-Kristjani huma lesti li jissaportu l-provi. Hu jgħid: “Meta l-fidi tagħkom tgħaddi mill-provi tipproduċi s-sabar.” (Ġak. 1:3) Il-provi jistgħu jkunu mqabblin mal-proċess li jużaw biex xabla tiġi iktar b’saħħitha. Meta xabla jsaħħnuha u mbagħad ikessħuha, il-ħadida tiġi iktar b’saħħitha. Bl-istess mod, meta nissaportu l-provi, il-fidi tagħna tissaħħaħ. Għalhekk, Ġakbu kiteb: “Ħallu s-sabar iwettaq xogħlu għalkollox, sabiex b’hekk tkunu kompluti u sħaħ f’kull aspett.” (Ġak. 1:4) Meta naraw li l-provi qed isaħħu l-fidi tagħna, se nissaportuhom bil-ferħ.
8 Fl-ittra tiegħu, Ġakbu semma wkoll xi affarijiet li jistgħu jtellfuna l-ferħ. X’inhuma dawn l-isfidi, u kif nistgħu negħlbuhom?
XI RRIDU NAGĦMLU BIEX MA NITILFUX IL-FERĦ TAGĦNA?
9. Għala għandna bżonn l-għerf?
9 L-isfida: Meta ma nkunux nafu x’se nagħmlu. Meta jiġrilna dan, irridu nitolbu lil Ġeħova għall-għajnuna biex nieħdu deċiżjonijiet li jogħġbu lilu, jgħinu lil ħutna, u jgħinuna nibqgħu leali lejh. (Ġer. 10:23) Aħna għandna bżonn l-għerf biex inkunu nafu xi rridu nagħmlu u x’se ngħidu lil dawk li jippersegwitawna. Jekk ma nkunux nafu x’se nagħmlu, nistgħu nħossuna skuraġġiti u nitilfu l-ferħ malajr.
10. Skont Ġakbu 1:5, xi rridu nagħmlu biex ikollna l-għerf?
10 Is-soluzzjoni: Nitolbu lil Ġeħova għall-għerf. Jekk irridu nissaportu l-provi tagħna bil-ferħ, l-ewwel irridu nitolbu lil Ġeħova biex jagħtina l-għerf ħalli nieħdu deċiżjonijiet tajbin. (Aqra Ġakbu 1:5.) Xi rridu nagħmlu jekk inħossu li Ġeħova ma wiġibx it-talb tagħna mill-ewwel? Ġakbu qal li għandna ‘nibqgħu nitolbu lil Alla.’ Ġeħova ma jiddejjaqx meta nibqgħu nitolbu għall-għerf. Mhux se jkun irrabjat magħna. Missierna tas-sema ‘jagħtina b’mod ġeneruż’ meta nitolbuh għall-għerf ħalli nissaportu l-provi. (Salm 25:12, 13) Hu jara l-problemi li jkollna, jiddispjaċih meta nbatu, u ħerqan biex jgħinna. Dan jagħmilna ferħanin ħafna! Imma Ġeħova kif jagħtina l-għerf?
11. Xi rridu nagħmlu iktar biex ikollna l-għerf?
11 Ġeħova jagħtina l-għerf permezz tal-Kelma tiegħu. (Prov. 2:6) Biex ikollna dan l-għerf irridu nistudjaw il-Bibbja u l-pubblikazzjonijiet tagħna. Imma rridu nagħmlu iktar milli sempliċiment nistudjaw. Irridu npoġġu l-għerf fil-prattika billi nagħmlu dak li jitlobna Alla. Ġakbu kiteb: “Qisu li tagħmlu l-kelma, u mhux tisimgħuha biss.” (Ġak. 1:22) Meta napplikaw il-parir t’Alla, se nżommu l-paċi, se nkunu raġonevoli, u nuru ħniena. (Ġak. 3:17) Dawn il-kwalitajiet se jgħinuna niffaċċjaw kull prova mingħajr ma nitilfu l-ferħ.
12. Għala hu importanti li nkunu nafu sew dak li tgħid il-Bibbja?
12 Il-Kelma t’Alla hi bħal mera. Din tgħinna naraw x’għandna bżonn nagħmlu biex insiru persuna aħjar. (Ġak. 1:) Pereżempju, wara li nistudjaw il-Bibbja, nistgħu nindunaw li għandna bżonn nikkontrollaw ir-rabja tagħna. Bl-għajnuna taʼ Ġeħova, nitgħallmu nkunu kalmi meta niltaqgħu maʼ nies jew problemi li jirrabjawna. Jekk inkunu kalmi se nirreaġixxu aħjar meta jkollna l-problemi. Se nkunu nistgħu naħsbu sew u nieħdu deċiżjonijiet aħjar. ( 23-25Ġak. 3:13) Kemm hu importanti li nkunu nafu sew dak li tgħid il-Bibbja!
13. Għala għandna nistudjaw eżempji taʼ wħud li nsibu fil-Bibbja?
13 Kultant nitgħallmu l-lezzjoni wara li nagħmlu żball. Imma dan mhux mod tajjeb biex nitgħallmu. Mod aħjar kif niksbu l-għerf hu billi nitgħallmu mill-affarijiet tajbin u l-iżbalji t’oħrajn. Hu għalhekk li Ġakbu inkuraġġiena biex naqraw ir-rakkonti taʼ wħud li nsibu fil-Bibbja bħal Abraham, Raħab, Ġob, u Elija. (Ġak. 2:21-26; 5:10, 11, 17, 18) Dawn il-qaddejja leali taʼ Ġeħova rnexxielhom jissaportu l-provi li setgħu jtellfulhom il-ferħ. Dawn l-eżempji juruna li bl-għajnuna taʼ Ġeħova, aħna nistgħu nissaportu wkoll.
14-15. Għala m’għandniex ninjoraw id-dubji?
14 L-isfida: Meta jkollna d-dubji dwar dak li nemmnu. Kultant ma nkunux nistgħu nifhmu xi affarijiet mill-Kelma t’Alla. Jew forsi Ġeħova ma jweġibx it-talb tagħna bil-mod kif inkunu nixtiequ aħna. Minħabba f’hekk jaf jiġuna d-dubji. Jekk ninjoraw id-dubji, dawn se jdgħajfu l-fidi tagħna u jagħmlu ħsara l-ħbiberija tagħna maʼ Ġeħova. (Ġak. 1:7, 8) U dawn d-dubji jistgħu anki jtellfulna t-tama li għandna għall-futur.
15 L-appostlu Pawlu qabbel it-tama tagħna maʼ ankra. (Ebr. 6:19) Ankra żżomm il-vapur biex ma jaħbatx mal-blat meta jkun il-maltemp. Imma l-ankra se tkun utli biss jekk il-katina li tkun imqabbda mal-vapur ma tinqatax. Bħalma s-sadid jagħmel il-ħsara lill-katina tal-ankra, id-dubji jagħmlu l-ħsara u jdgħajfu l-fidi tagħna. Imbagħad, meta niffaċċjaw il-problemi, nistgħu nitilfu l-fiduċja tagħna li Ġeħova se jwettaq il-wegħdi tiegħu. Jekk nitilfu l-fidi, se nitilfu t-tama. Kif jgħid Ġakbu, wieħed li jiddubita “hu bħal mewġa tal-baħar immexxija mir-riħ u mitfugħa ’l hemm u ’l hawn.” (Ġak. 1:6) Persuna li tħossha hekk, x’aktarx li qatt mhu se tkun ferħana!
16. Xi rridu nagħmlu jekk ikollna d-dubji?
16 Is-soluzzjoni: Iffaċċja d-dubji u saħħaħ il-fidi tiegħek. Ħu azzjoni malajr. Fi żmien Elija, il-poplu taʼ Ġeħova ma kienx ċert dwar dak li kien jemmen. Elija qalilhom: “Kemm se ddumu zzappu fuq żewġ opinjonijiet differenti? Jekk Ġeħova hu l-Alla l-veru, morru warajh; imma jekk hu Bagħal il-wieħed veru, morru warajh.” (1 Slat. 18:21) Illum, aħna wkoll irridu nieħdu azzjoni malajr. Irridu nagħmlu riċerka biex inkunu konvinti li Ġeħova hu Alla, il-Bibbja hi l-Kelma tiegħu, u x-Xhieda taʼ Ġeħova huma l-poplu tiegħu. (1 Tess. 5:21) Jekk nagħmlu hekk, se nneħħu d-dubji u nsaħħu l-fidi tagħna. Jekk għandna bżonn l-għajnuna minħabba ċerti dubji, nistgħu nitkellmu mal-anzjani. Irridu nieħdu azzjoni malajr ħalli nibqgħu naqdu lil Ġeħova bil-ferħ!
17. X’se jiġrilek jekk taqtaʼ qalbek?
17 L-isfida: Meta nkunu skuraġġiti. Il-Kelma t’Alla tgħid: “Skuraġġejt ruħek fi żmien l-hemm? Ma tantx se jkollok qawwa.” (Prov. 24:10) Il-kelma Ebrajka tradotta “skuraġġejt ruħek” tistaʼ tfisser “taqtaʼ qalbek.” U jekk taqtaʼ qalbek, malajr se titlef il-ferħ.
18. X’jiġifieri li tissaporti?
18 Is-soluzzjoni: Strieħ fuq Ġeħova biex jagħtik il-kuraġġ ħalli tissaporti. Jekk irridu nissaportu l-provi se jkollna bżonn il-kuraġġ. (Ġak. 5:11) Il-kelma “ssaporti” li uża Ġakbu tgħinna naħsbu f’xi ħadd li qiegħed wieqaf u ma jiċċaqlaqx. Forsi nistgħu naħsbu dwar suldat kuraġġuż li jkun wieqaf u meta jiġi l-għadu tiegħu ma jaħrabx.
19. X’nistgħu nitgħallmu mill-eżempju taʼ Pawlu?
19 L-appostlu Pawlu kien eżempju eċċellenti taʼ xi ħadd li wera kuraġġ u baqaʼ jissaporti. Xi kultant, hu ħassu dgħajjef. Imma Pawlu setaʼ jibqaʼ jissaporti għax straħ fuq Ġeħova biex jagħtih is-saħħa li kellu bżonn. (2 Kor. 12:8-10; Flp. 4:13) Aħna nistgħu nkunu b’saħħitna u kuraġġużi jekk b’umiltà naċċettaw li għandna bżonn l-għajnuna taʼ Ġeħova.—Ġak. 4:10.
SAĦĦAĦ IL-ĦBIBERIJA TIEGĦEK MAʼ ĠEĦOVA U TIBQAʼ FERĦAN
20-21. Minn xiex nistgħu nkunu ċerti?
20 Nistgħu nkunu ċerti li l-provi li niffaċċjaw mhumiex kastig mingħand Ġeħova. Ġakbu jgħidilna: “Meta jkun għaddej minn prova, ħalli ħadd ma jgħid: ‘Alla qed jgħaddini minn prova.’ Għax Alla la jistaʼ jiġi provat u lanqas ma jipprova lil ħadd b’affarijiet ħżiena.” (Ġak. 1:13) Meta nkunu konvinti minn dan, il-ħbiberija tagħna maʼ Missierna tas-sema kollu mħabba se tissaħħaħ.—Ġak. 4:8.
21 Ġeħova “ma jinbidilx.” (Ġak. 1:17) Bħalma għen lill-Kristjani tal-bidu jissaportu l-provi tagħhom, hu se jgħin lilna llum. Kun determinat li titlob l-għajnuna taʼ Ġeħova biex ikollok l-għerf, il-fidi, u l-kuraġġ. Hu se jwieġeb it-talb tiegħek. Imbagħad tistaʼ tkun ċert li Ġeħova se jgħinek tibqaʼ ferħan waqt li tissaporti l-provi tiegħek!
GĦANJA 128 Nissaportu sat-tmiem
^ par. 5 Il-ktieb taʼ Ġakbu fih ħafna pariri tajbin li jgħinuna meta niffaċċjaw il-problemi. Dan l-artiklu se jiddiskuti xi pariri li jagħtina Ġakbu. Dawn il-pariri jistgħu jgħinuna nissaportu l-provi mingħajr ma nitilfu l-ferħ meta naqdu lil Ġeħova.
^ par. 59 X’TGĦIDILNA L-ISTAMPA: Ħu jiġi arrestat fid-dar tiegħu. Il-mara u t-tifla tiegħu jħarsu lejh waqt li l-pulizija qed joħorġuh mid-dar. Waqt li r-raġel tagħha qiegħed il-ħabs, aħwa mill-kongregazzjoni qegħdin mal-mara u t-tifla tiegħu għall-qima bħala familja. L-omm u t-tifla spiss jitolbu lil Ġeħova biex jgħinhom jissaportu l-prova tagħhom. Ġeħova jagħtihom il-kuraġġ u jgħinhom jibqgħu kalmi. B’hekk, il-fidi tagħhom tissaħħaħ u huma jistgħu jibqgħu jissaportu bil-ferħ.