ARTIKLU GĦALL-ISTUDJU 14
Imxi mill-Qrib Wara l-Passi taʼ Ġesù
“Kristu sofra għalikom, u ħallielkom mudell biex timxu mill-qrib wara l-passi tiegħu.”—1 PT. 2:21.
GĦANJA 13 Kristu, l-eżempju tagħna
ĦARSA BIL-QUDDIEM *
Ġesù ħallielna l-passi tiegħu biex nimxu mill-qrib warajh (Ara paragrafi 1-2)
1-2. Kif nistgħu nsegwu l-passi taʼ Ġesù? Agħti eżempju.
IMMAĠINAK qiegħed timxi maʼ grupp taʼ nies ġo foresta perikoluża mimlija borra. Gwida tal-esperjenza qed jimxi qabilkom. Waqt li jimxi hu qed iħalli warajh il-passi fil-borra. F’ħin minnhom, tfittex lill-gwida u ma tarahx! Imma ma tippanikjax. Minflok, inti u n-nies li qed jimxu miegħek issegwu l-passi li ħalla l-gwida fil-borra!
2 Bħala Kristjani veri, li ngħixu f’din id-dinja ħażina, sa ċertu punt aħna wkoll qed nimxu ġo foresta perikoluża. Imma aħna grati li Ġeħova tana l-aqwa Gwida—lil Ibnu, Ġesù Kristu, li nistgħu nimxu mill-qrib wara l-passi tiegħu. (1 Pt. 2:21) Skont studjuż tal-Bibbja, hawnhekk Pietru qed iqabbel lil Ġesù maʼ gwida. Bħalma dak il-gwida ħalla l-passi fil-borra, Ġesù ħallielna l-passi tiegħu li aħna nistgħu nsegwu. Ejjew nikkunsidraw it-tweġibiet għal dawn il-mistoqsijiet: Xi jfisser li nsegwu l-passi taʼ Ġesù? Għala għandna nagħmlu dan? U kif nistgħu nagħmluh?
XI JFISSER LI NSEGWU L-PASSI TAʼ ĠESÙ?
3. Xi jfisser li timxi wara l-passi taʼ xi ħadd?
3 Fil-Bibbja, il-kliem ‘timxi’ u “passi” ġieli jirreferu għall-mod kif persuna tgħix ħajjitha. (Ġen. 6:9; Salm 44:18) Il-mod kif persuna tgħix ħajjitha jistaʼ jiġi mqabbel mal-passi li tħalli warajha meta timxi. Għalhekk, li timxi wara l-passi taʼ persuna jfisser li timita l-eżempju tagħha.
4. Xi jfisser li nsegwu l-passi taʼ Ġesù?
1 Pt. 2:18-25) Ir-realtà hi li dak kollu li Ġesù qal u għamel fil-ħajja tiegħu huwa eżempju li għandna nsegwu.
4 Allura xi jfisser li nsegwu l-passi taʼ Ġesù? Dan ifisser li nimitaw l-eżempju tiegħu. Fl-iskrittura prinċipali taʼ dan l-artiklu l-appostlu Pietru jsemmi l-eżempju tajjeb li ħalla Ġesù meta ssaporta t-tbatija, però, hemm affarijiet oħra li Ġesù għamel u li aħna nistgħu nimitaw. (5. Nistgħu nimitaw l-eżempju perfett taʼ Ġesù minkejja li aħna imperfetti? Spjega.
5 Imma bħala nies imperfetti, nistgħu nimitaw l-eżempju taʼ Ġesù? Iva nistgħu. Pietru ma qalx li rridu nimxu wara l-passi taʼ Ġesù b’mod perfett. Minflok, hu ħeġġiġna ‘biex nimxu mill-qrib wara l-passi’ taʼ Ġesù. Jekk nimxu mill-qrib wara l-passi tiegħu bl-aħjar mod li nistgħu, minkejja li aħna imperfetti, se nkunu qegħdin napplikaw il-kliem tal-appostlu Ġwanni: ‘Ibqgħu mexjin bħalma mexa hu.’—1 Ġw. 2:6.
GĦALA GĦANDNA NIMXU MILL-QRIB WARA L-PASSI TAʼ ĠESÙ?
6-7. Għala nistgħu ngħidu li jekk nimxu wara l-passi taʼ Ġesù se nsaħħu l-ħbiberija tagħna maʼ Ġeħova?
6 Jekk insegwu l-passi taʼ Ġesù, se nsaħħu l-ħbiberija tagħna maʼ Ġeħova. Għala nistgħu ngħidu hekk? L-ewwel, Ġesù ħallielna l-aqwa eżempju taʼ kif wieħed jistaʼ jgħix ħajtu biex jogħġob lil Alla. (Ġw. 8:29) Mela, jekk insegwu l-passi ta’Ġesù se nogħġbu lil Ġeħova. U nistgħu nkunu ċerti li Missierna tas-sema mbagħad se jersaq qrib dawk li jagħmlu l-almu tagħhom biex isiru l-ħbieb tiegħu.—Ġak. 4:8.
Ġw. 14:9) Meta aħna nimitaw il-kwalitajiet u l-mod kif Ġesù tratta lin-nies inkunu qed nimitaw lil Ġeħova. Pereżempju, aħseb kif ħassu Ġesù għar-raġel li kellu l-marda tal-ġdiem, l-empatija li wera maʼ mara li kienet ilha marida għal ħafna snin, u kif ħassu meta wħud tilfu lill-maħbubin tagħhom fil-mewt. (Mk. 1:40, 41; 5:25-34; Ġw. 11:33-35) Iktar ma nimitaw il-kwalitajiet taʼ Ġeħova, iktar se nsaħħu l-ħbiberija tagħna miegħu.
7 It-tieni, Ġesù imita perfettament lil Missieru. Hu għalhekk li Ġesù setaʼ jgħid: “Min ra lili ra wkoll lill-Missier.” (8. Jekk nimxu wara l-passi taʼ Ġesù għala nistgħu ‘nirbħu’ d-dinja?
8 Jekk insegwu l-passi taʼ Ġesù, mhux se nħallu din id-dinja ħażina ttellifna milli nkomplu naqdu lil Ġeħova. Fl-aħħar lejl tiegħu fuq l-art, Ġesù setaʼ jgħid: “Jien irbaħt lid-dinja.” (Ġw. 16:33) B’dan il-kliem, Ġesù kien qed jgħid li hu ma ħalliex lin-nies jinfluwenzaw il-mod kif jaħseb, jaġixxi, u l-miri tiegħu. Ġesù qatt ma nesa r-raġuni għala ġie fuq l-art—biex jagħti prova li Ġeħova għandu dritt li jmexxi. Xi ngħidu għalina? F’din id-dinja hemm ħafna affarijiet li jistgħu jfixkluna milli nkomplu naqdu lil Ġeħova. Imma jekk bħal Ġesù nibqgħu determinati li nagħmlu r-rieda taʼ Ġeħova aħna wkoll se ‘nirbħu’ d-dinja.—1 Ġw. 5:5.
9. Xi rridu nagħmlu biex nibqgħu fit-triq li twassal għall-ħajja taʼ dejjem?
9 Jekk insegwu l-passi taʼ Ġesù nistgħu ngħixu għal dejjem. Meta żagħżugħ sinjur staqsa x’kellu jagħmel biex jiret il-ħajja taʼ dejjem, Ġesù wieġbu: “Ejja kun segwaċi tiegħi.” (Mt. 19:16-21) U lil xi Lhud li ma kinux jemmnu li hu l-Kristu, Ġesù qalilhom: “In-nagħaġ tiegħi . . . jiġu warajja. U nagħtihom il-ħajja taʼ dejjem.” (Ġw. 10:24-29) Anki lil Nikodemu, membru tas-Sinedriju, li ried ikun jaf aktar dwar dak li kien qed jgħallem, Ġesù qallu: “Kulmin jeżerċita l-fidi [fija] . . . jkollu l-ħajja taʼ dejjem.” (Ġw. 3:16) Aħna neżerċitaw il-fidi, jiġifieri nuru li għandna fidi f’Ġesù, billi napplikaw dak li għallem u nimitaw l-eżempju tiegħu. Jekk nagħmlu hekk, aħna se nibqgħu fit-triq li twassal għall-ħajja taʼ dejjem.—Mt. 7:14.
KIF NISTGĦU NSEGWU L-PASSI TAʼ ĠESÙ MILL-QRIB?
10. Xi rridu nagħmlu biex insiru nafu lil Ġesù aħjar? (Ġwanni 17:3)
10 Biex nimxu mill-qrib wara l-passi taʼ Ġesù l-ewwel irridu nsiru nafuh. Skont in-nota taʼ taħt taʼ Ġwanni 17:3 (Aqra.) li ‘nieħdu għarfien’ dwar Ġesù jinvolvi azzjoni kontinwa. Fi kliem ieħor, irridu nibqgħu nitgħallmu dwar il-kwalitajiet tiegħu, dwar il-mod kif jaħseb u dwar il-livelli tiegħu. Ilna kemm ilna fil-verità rridu nkomplu nieħdu għarfien dwar Ġeħova u Ibnu.
11. Xi nsibu fl-erbaʼ Evanġelji?
11 Biex insiru nafu sew lil Ibnu, fil-Kelma tiegħu Ġeħova bi mħabba inkluda l-erbaʼ Evanġelji. Fihom insibu r-rakkont tal-ħajja u l-ministeru taʼ Ġesù. Dawn il-kotba jgħidulna dak li qal, dak li għamel, u kif ħassu. Dawn jgħinuna biex ‘nirriflettu sew’ dwar l-eżempju tiegħu. (Ebr. 12:3) Tistaʼ tgħid li fihom insibu l-passi li ħalla warajh Ġesù. Għalhekk, jekk nistudjaw l-Evanġelji se nsiru nafu lil Ġesù aħjar. B’hekk, aħna se nkunu nistgħu nimxu mill-qrib mal-passi tiegħu.
12. X’nistgħu nagħmlu biex nibbenefikaw meta nistudjaw l-Evanġelji?
12 Biex nibbenefikaw bis-sħiħ mill-Evanġelji rridu nagħmlu iktar milli sempliċiment naqrawhom. Irridu nieħdu l-ħin biex nistudjawhom sew u nimmeditaw fil-fond dwarhom. (Qabbel Ġożwè 1:8 u n-nota taʼ taħt.) Ejja niddiskutu żewġ suġġerimenti li jistgħu jgħinuna biex nimmeditaw fuq l-Evanġelji u napplikaw dak li naqraw.
13. Kif tistaʼ tidħol iktar fir-rakkont tal-Evanġelju?
13 L-ewwel, idħol fir-rakkont tal-Evanġelju. Uża l-immaġinazzjoni tiegħek biex tara, tismaʼ, u tħoss dak li jkun qed jiġri. Biex tagħmel dan, agħmel riċerka fil-pubblikazzjonijiet provduti mill-organizzazzjoni taʼ Ġeħova. Eżamina l-kuntest billi tara dak li ġara qabel u wara r-rakkont li tkun qed taqra. Fittex iktar informazzjoni dwar in-nies u l-postijiet li jissemmew fir-rakkont. Qabbel ir-rakkont li qed taqra mal-istess rakkont li jissemma f’Evanġelju ieħor. Xi kultant, kittieb taʼ Evanġelju jsemmi dettalji interessanti li kittieb ieħor ma jsemmix.
14-15. X’għandna nagħmlu biex napplikaw dak li nitgħallmu dwar Ġesù?
14 It-tieni, applika r-rakkont tal-Evanġelju fil-ħajja tiegħek. (Ġw. 13:17) Wara li tkun studjajt sew ir-rakkont tal-Evanġelju, staqsi lilek innifsek: ‘X’lezzjoni nistaʼ napplika f’ħajti minn dan ir-rakkont? Kif nistaʼ nuża dan ir-rakkont biex ngħin lil ħaddieħor?’ Ipprova aħseb dwar xi ħadd li taf u mbagħad bi mħabba aqsam miegħu l-lezzjoni li tgħallimt.
15 Ejja nikkunsidraw eżempju taʼ kif nistgħu napplikaw dawn iż-żewġ suġġerimenti billi naraw ir-rakkont tal-armla fqira li Ġesù nnota fit-tempju.
L-ARMLA FQIRA FIT-TEMPJU
16. Aqra Marku 12:41 u ddeskrivi dak li qed jiġri.
16 Idħol fir-rakkont. (Aqra Marku 12:41.) Immaġina x’ġara. Il-ġurnata hi l-11 taʼ Nisan tas-sena 33. F’inqas minn ġimgħa Ġesù se jmut. Ġesù ilu ħafna ħin jgħallem fit-tempju. Imma l-mexxejja reliġjużi qed jopponuh. Ftit qabel, xi wħud staqsew lil Ġesù b’liema awtorità kien qed jagħmel dan ix-xogħol. Oħrajn staqsewh mistoqsijiet li ħasbu li mhux se jwiġibhom. (Mk. 11:27-33; 12:13-34) Issa Ġesù mar f’parti oħra tat-tempju. Hawnhekk, x’aktarx fil-parti li jsejħulha l-Bitħa tan-Nisa, jara l-kaxxi fejn jitfgħu d-donazzjonijiet. Hu jpoġġi bilqiegħda u jibda jinnota n-nies li jkunu qed jitfgħu d-donazzjonijiet tagħhom. Hu jara ħafna nies sinjuri jitfgħu ħafna muniti. Forsi qiegħed viċin biżżejjed biex jismaʼ l-ħoss li jagħmlu l-flus malli jinżlu fil-kaxxa.
17. X’għamlet l-armla fqira li tissemma f’Marku 12:42.
17 Aqra Marku 12:42. Wara ftit, Ġesù jinnota mara li hi fqira, “armla fil-bżonn.” (Lq. 21:2) Għandha ħajja vera diffiċli u x’aktarx m’għandhiex biżżejjed flus biex tixtri l-affarijiet li għandha bżonn. Minkejja dan, hi tersaq viċin dawn il-kaxxi tad-donazzjonijiet u mingħajr ma tagħti fl-għajn, titfaʼ żewġ muniti żgħar li x’aktarx bilkemm għamlu ħoss xħin tefgħethom. Imma Ġesù jaf x’tefgħet. Hi tefgħet żewġ muniti tal-lepta, l-iżgħar muniti li kienu jużaw dak iż-żmien. Bihom lanqas tixtri għasfur tal-bejt li kien l-iktar għasfur irħis li jinbiegħ għall-ikel.
18. Skont Marku 12:43, 44, Ġesù x’qal dwar id-donazzjoni li tefgħet l-armla fqira?
18 Aqra Marku 12:43, 44. Ġesù impressjonat b’dak li għamlet l-armla, isejjaħ lid-dixxipli tiegħu u dwarha jgħidilhom: “Din l-armla fqira tefgħet iktar minn dawk kollha li tefgħu l-flus fil-kaxxi tat-teżor, għax huma lkoll tefgħu miż-żejjed tagħhom, imma hi, min-nieqes tagħha, tefgħet kulma kellha, l-għajxien kollu tagħha.” L-armla leali tat dawk il-ftit muniti li kien baqgħalha għax kienet fiduċjuża li Ġeħova kien se jieħu ħsiebha.—Salm 26:3.
Meta tfaħħar lill-oħrajn għax qed jagħtu l-aħjar li jistgħu lil Ġeħova tkun qed timita lil Ġesù (Ara paragrafi 19-20) *
19. X’nistgħu nitgħallmu minn dak li qal Ġesù dwar l-armla fqira?
19 Applika dak li tgħallimt mir-rakkont. Staqsi lilek innifsek, ‘X’nistaʼ nitgħallem minn dak li qal Ġesù dwar l-armla fqira?’ L-armla kieku setgħet kienet tagħti iktar. Imma hi tat dak kollu li kellha; tat lil Ġeħova l-aħjar tagħha. Ġesù kien jaf li dan kien prezzjuż għal Missieru. Mela lezzjoni li nistgħu nitgħallmu hi: Ġeħova jieħu pjaċir meta aħna nagħtu l-aħjar tagħna, jiġifieri, meta nagħtu b’qalbna kollha u b’ruħna kollha. (Mt. 22:37; Kol. 3:23) Ġeħova jifraħ meta jarana nagħmlu dak kollu li nistgħu! Dan japplika għal dak kollu li nagħmlu għalih, inkluż il-ministeru u l-laqgħat.
20. Kif tistaʼ tapplika dak li tgħallimt mir-rakkont tal-armla? Agħti eżempju.
20 Kif tistaʼ tapplika dak li tgħallimt dwar l-armla? Aħseb f’aħwa li se jiġu inkuraġġiti jekk tfakkarhom li Ġeħova jieħu pjaċir b’dak li jistgħu jagħtu. Pereżempju, taf b’xi oħt imdaħħla fiż-żmien li għandha saħħa batuta u tħossha li mhix qed toħroġ biżżejjed fuq il-ministeru? Jew taf b’xi ħu li hu marid u b’hekk ma jistax jiġi għal kull laqgħa u allura jħossu skuraġġit? Għin l-uħud bħal dawn bi kliem li jinkuraġġihom. (Efes. 4:29) Aqsam magħhom il-ħsieb inkuraġġanti li tgħallimt mir-rakkont tal-armla fqira. Il-kliem inkuraġġanti tiegħek jistaʼ jfakkarhom li Ġeħova jieħu pjaċir meta huma jagħtu l-aħjar li jistgħu, anke jekk għalihom jidher ftit. (Prov. 15:23; 1 Tess. 5:11) Meta tagħmel dan, tkun qed timxi mill-qrib wara l-passi taʼ Ġesù.
21. X’int determinat li tagħmel?
21 Kemm għandna għaliex nirringrazzjaw lil Ġeħova li provdielna l-Evanġelji li fihom dettalji dwar il-ħajja taʼ Ġesù! Dawn jgħinuna biex inkunu nistgħu nimitawh, jiġifieri nimxu mill-qrib wara l-passi tiegħu. Għax ma tagħmilhiex mira li tistudja iktar dwar l-Evanġelji forsi fl-istudju personali tiegħek jew fil-Qima Bħala Familja? Mela ejja niftakru li biex nibbenefikaw minn studji bħal dawn irridu nidħlu fir-rakkont u napplikaw dak li nitgħallmu f’ħajjitna. Apparti li rridu nimitaw dak li għamel Ġesù, irridu wkoll nisimgħu dak li qal. Fl-artiklu li jmiss se naraw dak li nistgħu nitgħallmu mill-kliem li qal Ġesù qabel miet.
GĦANJA 15 Faħħru l-Ewwel Imwieled taʼ Ġeħova!
^ par. 5 Bħala Kristjani veri, aħna rridu nimxu mill-qrib mal-passi taʼ Ġesù. Dawn “il-passi” x’inhuma? Dan l-artiklu se jwieġeb din il-mistoqsija. Se naraw ukoll għala għandna nimxu mill-qrib wara l-passi taʼ Ġesù u kif nistgħu nagħmlu dan.
^ par. 60 X’TGĦIDILNA L-ISTAMPA: Wara li timmedita fuq dak li qal Ġesù dwar l-armla fqira, l-oħt tfaħħar lill-oħt imdaħħla fiż-żmien li qed tagħti l-aħjar li tistaʼ lil Ġeħova.