Mistoqsijiet mill-Qarrejja
Jekk Kristjan jiddivorzja lill-mara tiegħu mhux fuq bażi Skritturali u mbagħad jerġaʼ jiżżewweġ, il-kongregazzjoni kif tqis iż-żwieġ li kien fih u ż-żwieġ il-ġdid?
F’din is-sitwazzjoni, għall-kongregazzjoni ż-żwieġ li kien fih ikun spiċċa meta r-raġel ikun reġaʼ żżewweġ u ż-żwieġ il-ġdid ikun jgħodd. Biex nifhmu r-raġunijiet għal din id-deċiżjoni, ejja naraw x’qal Ġesù dwar id-divorzju u li wieħed jerġaʼ jiżżewweġ.
Kif naraw f’Mattew 19:9, Ġesù semma l-unika raġuni għala żwieġ jistaʼ jispiċċa. Hu qal: “Kulmin jiddivorzja lil martu, ħlief minħabba ż-żína, u jiżżewweġ oħra jagħmel adulterju.” Mill-kliem li qal Ġesù nitgħallmu (1) li l-unika raġuni biex żwieġ jispiċċa b’divorzju hi l-immoralità sesswali u (2) li raġel li jiddivorzja lill-mara tiegħu mingħajr ebda bażi Skritturali u jerġaʼ jiżżewweġ, jagħmel adulterju. a
Il-kliem li qal Ġesù jfisser li raġel li jkun għamel l-immoralità sesswali u jiddivorzja lill-mara tiegħu jistaʼ, skont l-Iskrittura, jerġaʼ jiżżewweġ? Le, mhux bilfors. Jekk ir-raġel jagħmel adulterju, il-mara, għax hi innoċenti, tistaʼ tiddeċiedi jekk taħfirlux jew le. Jekk hi ma taħfirlux u jiddeċiedu li jiddivorzjaw, it-tnejn li huma jistgħu jerġgħu jiżżewġu meta jġibu d-divorzju.
Mill-banda l-oħra, jistaʼ jkun li l-mara jaf tkun tixtieq tibqaʼ mar-raġel tagħha u tgħidlu li lesta taħfirlu. Imma x’jiġri jekk ir-raġel li jkun għamel adulterju ma jaċċettax il-maħfra tal-mara tiegħu u hu jġib id-divorzju legali? Minħabba li hi lesta li taħfirlu u tibqaʼ miżżewġa miegħu, skont l-Iskrittura hu ma jistax jerġaʼ jiżżewweġ. Jekk hu jiddeċiedi li jiżżewweġ lil xi ħadd ieħor, minkejja li skont l-Iskrittura ma jistax jagħmel dan, ikun qed jerġaʼ jagħmel adulterju. Għalhekk, l-anzjani tal-kongregazzjoni jkollhom jerġgħu jifformaw kumitat ġudizzjali minħabba d-dnub li għamel.—1 Kor. 5:1, 2; 6:9, 10.
Meta raġel jerġaʼ jiżżewweġ mhux fuq bażi Skritturali, il-kongregazzjoni kif tqis iż-żwieġ li kien fih u ż-żwieġ il-ġdid? Skont il-Bibbja, iż-żwieġ li kien fih għadu jgħodd? Il-mara li hi innoċenti għadha tistaʼ taħfirlu jew tagħżel li ma tibqax miżżewġa lilu? Il-kongregazzjoni se tqis iż-żwieġ il-ġdid bħala żwieġ adulteruż?
Fil-passat, il-kongregazzjoni kienet tqis iż-żwieġ il-ġdid bħala żwieġ adulteruż sakemm il-persuna innoċenti tkun għadha ħajja, ma tkunx reġgħet iżżewġet, u ma tkunx għamlet l-immoralità sesswali. Però, Ġesù ma semmiex il-persuna innoċenti meta tkellem dwar raġel li jiddivorzja u jerġaʼ jiżżewweġ. Minflok, hu spjega li meta raġel jiddivorzja lill-mara tiegħu mingħajr bażi Skritturali u jerġaʼ jiżżewweġ, jagħmel adulterju. F’dan il-każ, id-divorzju u ż-żwieġ il-ġdid, li Ġesù qal huma eżatt bħal meta persuna tkun għamlet adulterju, itemmu ż-żwieġ taʼ qablu.
“Kulmin jiddivorzja lil martu, ħlief minħabba ż-żína, u jiżżewweġ oħra jagħmel adulterju.”—Mt. 19:9.
Meta raġel jiddivorzja l-mara tiegħu u jerġaʼ jiżżewweġ, il-mara li kellu, li hi innoċenti, m’għadux possibbli għaliha li taħfirlu jew b
tagħżel li tibqaʼ miżżewġa lilu. Għalhekk, hi m’għadx għandha r-responsabbiltà diffiċli biex tagħżel jekk taħfirlux jew le. Barra minn hekk, il-mod kif il-kongregazzjoni tqis iż-żwieġ il-ġdid ma jiddependix jekk il-persuna innoċenti tkunx mietet, reġgħet iżżewġet, jew għamlet l-immoralità sesswali.Fl-eżempju li semmejna, ir-raġel għamel adulterju li wassal biex hu u l-mara jiddivorzjaw. Imma x’jiġri jekk ir-raġel ma jkunx għamel adulterju, iġib id-divorzju, u jerġaʼ jiżżewweġ? Jew x’jiġri meta r-raġel ma jkunx għamel l-immoralità sesswali qabel id-divorzju, imma għamel l-immoralità sesswali wara d-divorzju u reġaʼ żżewweġ minkejja li l-mara tiegħu kienet lesta li taħfirlu? F’dawn l-eżempji kollha, id-divorzju u ż-żwieġ il-ġdid, li huma adulterju, itemmu ż-żwieġ taʼ qabel. Skont il-liġi, iż-żwieġ il-ġdid ikun jgħodd. Il-ħarġa taʼ It-Torri tal-Għassa bl-Ingliż tal-15 taʼ Novembru 1979, paġna 32, qalet hekk: “Issa li reġaʼ żżewweġ, hu ma jistax itemm dan iż-żwieġ u jerġaʼ lura mal-mara li kellu. Iż-żwieġ taʼ qabel spiċċa minħabba d-divorzju, l-adulterju, u ż-żwieġ il-ġdid.”
Il-bidla fil-fehma tagħna ma tfissirx li l-Kristjani m’għadhomx iqisu ż-żwieġ bħala sagru jew li l-adulterju mhuwiex dnub serju. Meta raġel jiddivorzja lill-mara tiegħu mingħajr bażi Skritturali u jerġaʼ jiżżewweġ meta skont l-Iskrittura ma jkunx jistaʼ jagħmel dan, l-anzjani jkollhom jifformaw kumitat ġudizzjali minħabba li hu jkun għamel adulterju. (Jekk fiż-żwieġ il-ġdid, il-mara li jiżżewweġ tkun Kristjana, l-anzjani jkollhom jifformaw kumitat ġudizzjali għaliha wkoll għax tkun għamlet adulterju.) Għalkemm il-kongregazzjoni ma tqisx iż-żwieġ il-ġdid bħala żwieġ adulteruż, ir-raġel ma jkunx jistaʼ jikkwalifika għal privileġġi speċjali fil-kongregazzjoni għal ħafna snin u sakemm ma jkunx hemm aħwa li jkunu għadhom iddiżappuntati minħabba dak li għamel jew ikunu għadhom qed jaħsbu li ma jixraqlux ir-rispett tagħhom. Qabel jingħata privileġġ, l-anzjani jridu jaħsbu wkoll dwar iċ-ċirkustanzi li tkun fihom il-mara li kellu, li jaf ġiet traduta bi skop, u xi tfal żgħar li forsi ġew abbandunati minnu.—Mal. 2:14-16.
Mela l-Kristjani jagħmlu tajjeb li jimitaw lil Ġeħova u jqisu ż-żwieġ bħala sagru, għax kif rajna hemm konsegwenzi serji għal dawk li jiddivorzjaw u jerġgħu jiżżewġu mingħajr bażi Skritturali.—Ekk. 5:4, 5; Ebr. 13:4.
a F’dan l-artiklu se nkunu qed ngħidu li r-raġel għamel adulterju u l-mara hija innoċenti. Però, kif naraw f’Marku 10:11, 12, Ġesù għamilha ċara li dan il-parir japplika kemm għar-raġel kif ukoll għall-mara.
b Dan ibiddel il-fehma tagħna. Qabel, konna nqisu ż-żwieġ il-ġdid bħala żwieġ adulteruż sakemm il-persuna innoċenti tmut, terġaʼ tiżżewweġ, jew tagħmel l-immoralità sesswali.