1, 2. F’din is-​sistema, għala dejjem se jkun hawn xi nies foqra?

ILLUM, is-​sistema ekonomika hi kiefra u inġusta. Pereżempju, għal ħafna żgħażagħ huwa diffiċli biex isibu xogħol. Xi nies jirriskjaw ħajjithom biex imorru joqogħdu f’pajjiżi sinjuri. U anke f’pajjiżi sinjuri, hemm ħafna nies foqra. Madwar id-​dinja, is-​sinjuri qed jistagħnew iktar waqt li l-​foqra qed jiftaqru iktar. Skont stimi reċenti, il-​1 fil-​mija tan-​nies li huma l-​iktar sinjuri għandhom flus daqs il-​kumplament tad-​99 fil-​mija f’daqqa. Biċ-​ċar, waqt li xi nies għandhom biżżejjed flus biex iservuhom għal mijiet taʼ snin, biljuni oħra huma foqra ħafna. Ġesù wera li kien jaf dan meta qal: “Il-​foqra dejjem magħkom.” (Marku 14:7) Għala teżisti inġustizzja bħal din?

² Ġesù kien jaf li s-​Saltna t’Alla biss setgħet tbiddel is-​sistema kummerċjali taʼ did-​dinja. Il-​Bibbja turi li “l-​merkanti,” jew is-​sistema kummerċjali, flimkien mas-​sistemi politiċi u reliġjużi, huma parti mid-​dinja taʼ Satana. (Rivelazzjoni 18:3) Il-​poplu t’Alla jistaʼ jissepara kompletament minn mal-​politika u r-​reliġjon falza. Madankollu, il-​biċċa l-​kbira mill-​poplu t’Alla ma jistax  jissepara kompletament minn mal-​parti kummerċjali tad-​dinja taʼ Satana.

3. Liema mistoqsijiet se nikkunsidraw?

³ Bħala Kristjani, għandna bżonn neżaminaw l-​attitudni li għandna lejn is-​sistema kummerċjali tad-​dinja. Biex nagħmlu dan nistgħu nistaqsu lilna nfusna: ‘Kif nistaʼ nuża l-​affarijiet materjali tiegħi biex nuri li jien leali lejn Alla? Kif nistaʼ nsir inqas involut fid-​dinja kummerċjali? Liema esperjenzi juru li l-​poplu t’Alla llum jafda fih kompletament?’

4, 5. (a) Xi ġralu l-​prokuratur fl-​istorja taʼ Ġesù? (b) Ġesù x’qalilhom jagħmlu lis-​segwaċi tiegħu?

⁴ Aqra Luqa 16:1-​9. L-​istorja taʼ Ġesù dwar il-​prokuratur li ma kienx raġel sewwa għandha ġġegħelna lkoll nieqfu u naħsbu. Il-​prokuratur kien akkużat li berbaq il-​ġid taʼ sidu, u dan iddeċieda li jkeċċih. * (Ara n-​nota taʼ taħt.) Imma l-​prokuratur uża “l-​għaqal taʼ moħħu,” jew l-​għerf prattiku. Qabel ma telaq l-​impjieg tiegħu, hu għamel ħbieb maʼ nies li maż-​żmien setgħu jgħinuh. Ġesù ma qalx din l-​istorja għax ried lid-​dixxipli tiegħu jaġixxu inġustament sabiex ikunu jistgħu jkampaw. In-​nies tad-​dinja jagħmlu hekk. Minflok, Ġesù uża din l-​istorja biex jgħallem lezzjoni importanti ħafna.

⁵ Ġesù kien jaf li bħalma l-​prokuratur f’daqqa waħda ġie f’sitwazzjoni diffiċli, il-​biċċa l-​kbira mis-​segwaċi tiegħu kienu se jsibuha diffiċli ħafna jmantnu lilhom infushom f’did-​dinja inġusta. Allura qalilhom: “Agħmlu għalikom ħbieb permezz taʼ l-​għana mhux ġust.” Dan il-​kliem jinkuraġġina biex nagħmlu ħbieb maʼ Ġeħova u Ġesù permezz tal-​għana jew rikkezzi tagħna. Għala? Ħalli meta dawn ir-​rikkezzi jispiċċaw, dawn il-​ħbieb, Ġeħova u Ġesù, “jilqgħukom fl-​għamajjar taʼ dejjem.” X’nistgħu nitgħallmu mill-​parir taʼ Ġesù?

6. Kif nafu li s-​sistema kummerċjali tal-​lum ma kinitx parti mill-​iskop t’Alla?

⁶ Għalkemm Ġesù ma jispjegax għala jsejjaħ l-​affarijiet materjali ‘mhux ġusti,’ il-​Bibbja tagħmilha ċara illi li tagħmel ħafna flus mill-​affarijiet ma kienx parti mill-​iskop t’Alla. Pereżempju, Ġeħova b’mod ġeneruż ta lil Adam u Eva iktar milli kellhom bżonn fil-​ġnien tal-​Għeden. (Ġenesi 2:15, 16) Iktar tard, meta Alla ta l-​ispirtu qaddis lill-​midlukin tiegħu, “ħadd minnhom ma kien jgħid li dak li kellu kien tiegħu; imma kienu jaqsmu kollox bejniethom.” (Atti 4:32) Il-​profeta Isaija qal li kien se jkun hemm żmien meta kull bniedem kien se jgawdi bl-​abbundanza kulma tipproduċi l-​art. (Isaija 25:6-​9; 65:21, 22) Imma sa ma jasal dak iż-​żmien, is-​segwaċi taʼ Ġesù kien se jkollhom bżonn ‘l-​għaqal taʼ moħħhom.’ Kien se jkollhom bżonn jgħixu billi jużaw l-​affarijiet materjali taʼ din id-​dinja li huma inġusti u, fl-​istess ħin, jipprovaw ukoll jogħġbu lil Alla.

7. Ġesù liema parir jagħti f’​Luqa 16:10-​13?

⁷ Aqra Luqa 16:10-​13. Il-​prokuratur fl-​istorja taʼ Ġesù għamel ħbieb għax kien jaqbillu. Madankollu, Ġesù ried lis-​segwaċi tiegħu jagħmlu ħbieb fis-​sema għal skopijiet mhux egoisti. Hu riedna nifhmu li l-​mod taʼ kif nużaw ir-​rikkezzi mhux ġusti tagħna jistaʼ juri jekk aħniex leali lejn Alla. Kif nistgħu nagħmlu dan?

8, 9. Agħti eżempji taʼ kif xi wħud qed juru lealtà fl-​użu tagħhom tar-​rikkezzi li mhumiex ġusti.

⁸ Mod wieħed kif nuru li aħna leali bl-​affarijiet materjali tagħna hu billi nagħtu donazzjonijiet għax-​xogħol tal-​ippritkar madwar id-​dinja li Ġesù bassar li kien se jsir. (Mattew 24:14) Tifla żgħira fl-​Indja żammet karus u bil-​mod il-​mod żiedet il-​muniti fih. Hi saħansitra waqfet tixtri l-​ġugarelli sabiex tagħmel dan. Meta l-​karus imtela, hi tat il-​flus kollha li kienet ġemmgħet biex jintużaw għax-​xogħol tax-​xandir. Ħu fl-​Indja għandu farm tal-​coconuts. Hu ta ħafna coconuts bħala donazzjoni lill-​uffiċċju tat-​traduzzjoni fil-​Malayalam. Peress li l-​aħwa tal-​uffiċċju jkollhom bżonn jixtru l-​coconuts, hu ħass li d-​donazzjoni tiegħu kellha iktar valur milli kieku ta l-​flus. Dan hu għerf prattiku. B’mod simili, aħwa fil-​Greċja regolarment jagħtu bħala donazzjoni żejt taż-​żebbuġa, ġobon, u ikel ieħor lill-​familja taʼ Betel.

⁹ Ħu ieħor għamel il-​proprjetà tiegħu fis-​Sri Lanka disponibbli għal-​laqgħat u l-​assembleat u biex qaddejja full-​time ikunu jistgħu joqogħdu hemm. Dan hu sagrifiċċju finanzjarju għall-​ħu, imma huwa t’għajnuna kbira għall-​pubblikaturi t’hemm, li ma tantx għandhom flus. F’postijiet fejn ix-​xogħol hu ristrett, aħwa jużaw djarhom bħala Swali tas-​Saltna. Dan jippermetti lill-​pijunieri u oħrajn li ma tantx għandhom flus sabiex ikollhom post fejn jiltaqgħu mingħajr ma jkollhom iħallsu l-​kera.

10. X’benefiċċji jkollna meta nagħtu b’ġenerożità?

¹⁰ Minn eżempji bħal dawn naraw li l-​poplu t’Alla juri “fedeltà fl-​inqas ħaġa.” (Luqa 16:10) Huma jużaw l-​affarijiet materjali tagħhom għall-​benefiċċju t’oħrajn. Dawn il-​ħbieb taʼ Ġeħova kif iħossuhom dwar li jagħmlu sagrifiċċji bħal dawn? Huma ferħanin ħafna għax jafu li meta jkunu ġenerużi, huma jiksbu rikkezzi ‘veri’ fis-​sema. (Luqa 16:11) Waħda oħt li tagħti donazzjonijiet b’mod regulari għax-​xogħol tas-​Saltna tispjega x’barka ngħatatilha matul is-​snin: “Sibt li iktar ma nkun ġeneruża materjalment, iktar insir  ġeneruża fl-​attitudni tiegħi lejn oħrajn. Jien iktar ġeneruża f’li naħfer, f’li nkun paċenzjuża m’oħrajn, u f’li nkun kapaċi naċċetta diżappunti u pariri.” Ħafna tgħallmu li l-​ġenerożità kienet taʼ benefiċċju għalihom persunalment.—Salm 112:5; Proverbji 22:9.

11. (a) Il-​ġenerożità tagħna kif turi l-​għerf prattiku? (b) X’inhu jiġri fost il-​poplu t’Alla llum? (Ara l-​ewwel stampa.)

¹¹ Aħna nuru wkoll l-​għerf prattiku meta nużaw l-​affarijiet materjali tagħna biex nappoġġjaw oħrajn fil-​ministeru. Imbagħad, anke jekk ma nistgħux naqdu full-​time jew immorru noqogħdu fejn il-​bżonn hu akbar, xorta nkunu qed ngħinu oħrajn jibbenefikaw. (Proverbji 19:17) Pereżempju, id-​donazzjonijiet tagħna jgħinu biex tiġi provduta letteratura u biex jiġi appoġġjat ix-​xogħol tal-​ippritkar fi nħawi fqar ferm fejn ħafna qed jidħlu fil-​verità. F’dawn il-​pajjiżi, bħall-​Kongo, il-​Madagaskar, u l-​Irwanda, il-​Bibbji jistgħu jkunu għaljin ħafna. Xi drabi kopja waħda tiswa daqs paga taʼ ġimgħa jew xahar. Għal snin sħaħ, ħutna kellhom jiddeċiedu bejn li jixtru ikel għall-​familji tagħhom u li jixtru Bibbja. Issa, minħabba d-​donazzjonijiet t’oħrajn u tqassim taʼ fondi “ndaqs,” l-​organizzazzjoni taʼ Ġeħova tittraduċi u tqassam Bibbji bla ħlas lil kull membru tal-​familja kif ukoll lill-​istudenti tal-​Bibbja. (Aqra t-​2 Korintin 8:13-​15.) Allura kemm dawk li jagħtu u kemm dawk li jirċievu jistgħu jsiru ħbieb taʼ Ġeħova.

12. Abraham kif wera li fada f’Alla?

¹² Aħna nistgħu wkoll insiru ħbieb taʼ Ġeħova meta nsiru inqas involuti fid-​dinja kummerċjali u nfittxu rikkezzi ‘veri.’ Ir-​raġel leali Abraham hekk għamel. Hu obda lil Ġeħova u telaq mill-​belt sinjura ħafna taʼ Ur sabiex jgħix fit-​tined għax ried ikun ħabib taʼ Ġeħova. (Ebrej 11:8-​10) Minflok ma fada fl-​affarijiet materjali, hu dejjem fada f’Alla. (Ġenesi 14:22, 23) Ġesù ħeġġeġ oħrajn biex jimitaw din it-​tip taʼ fidi. Darba minnhom, lil żagħżugħ sinjur qallu hekk: “Jekk trid tkun perfett, mur bigħ dak li għandek u agħti lill-​foqra u jkollok teżor fis-​sema, u ejja kun segwaċi tiegħi.” (Mattew 19:21) Dan iż-​żagħżugħ ma kellux fidi bħal t’Abraham. Imma kien hemm nies oħra li fdaw f’Alla.

13. (a) Pawlu liema parir ta lil Timotju? (b) Illum kif nistgħu napplikaw il-​parir taʼ Pawlu?

¹³ Timotju kien raġel taʼ fidi. Wara li Pawlu sejjaħ lil Timotju “suldat tajjeb taʼ Kristu Ġesù,” hu qallu: “Ebda raġel li jaqdi bħala suldat ma jinvolvi ruħu fin-​negozju tal-​ħajja ċivili, sabiex jikseb l-​approvazzjoni taʼ min ingaġġah bħala suldat.” (2 Timotju 2:3, 4) Is-​segwaċi taʼ Ġesù llum, inkluż l-​iktar minn miljun qaddej full-​time, jagħmlu kulma jistgħu biex japplikaw il-​parir taʼ Pawlu. Huma jirreżistu reklami taʼ tentazzjoni  taʼ did-​dinja rgħiba. Huma jiftakru l-​prinċipju: “Min jissellef hu l-​qaddej taʼ min isellfu.” (Proverbji 22:7) Satana jridna nużaw il-​ħin u l-​enerġija kollha tagħna sabiex naħdmu għad-​dinja kummerċjali tiegħu. Xi wħud jissellfu ammonti kbar taʼ flus biex ikollhom dar, karozza, edukazzjoni, jew saħansitra biex iħallsu tieġ. Jekk ma noqogħdux attenti, nistgħu nispiċċaw bid-​dejn għal ħafna snin. Aħna nuru l-​għaqal tal-​moħħ meta nissimplifikaw ħajjitna, nevitaw id-​dejn, u nonfqu inqas flus. B’dan il-​mod, minflok ma nkunu skjavi tad-​dinja kummerċjali tal-​lum, se nkunu ħielsa biex naqdu lil Alla.—1 Timotju 6:10.

14. X’għandna nkunu determinati li nagħmlu? Agħti eżempji.

¹⁴ Sabiex inżommu ħajjitna sempliċi, għandna npoġġu s-​Saltna t’Alla l-​ewwel. Raġel u mara miżżewġin kellhom negozju kbir li kien irendi l-​flus. Minkejja dan, huma riedu jerġgħu lura għall-​ministeru full-​time. Allura l-​koppja biegħu n-​negozju, id-​dgħajsa, u affarijiet materjali oħra li kellhom. Imbagħad huma vvolontarjaw biex jgħinu fil-​kostruzzjoni tal-​kwartieri ġenerali f’Warwick, New York. Dan kien speċjali ħafna għalihom għax kien ifisser li jaqdu f’Betel flimkien maʼ binthom u żewġha u, għal xi ġimgħat, mal-​ġenituri tar-​raġel tat-​tifla, li ħadmu wkoll fil-​proġett taʼ Warwick. Pijuniera f’Kolorado, l-​Istati Uniti tal-​Amerika, sabet xogħol part-​time f’bank. Dawk li impjegawha tant kienu ferħanin b’xogħolha li ġiet offruta pożizzjoni full-​time bit-​triplu tal-​paga li kellha. Madankollu, peress li x-​xogħol ma kienx se jħalliha tiffoka fuq il-​ministeru, hi rrifjutat din l-​offerta vantaġġuża. Dawn huma biss ftit eżempji tal-​ħafna sagrifiċċji li għamlu l-​qaddejja taʼ Ġeħova. Meta nkunu determinati li npoġġu l-​interessi tas-​Saltna l-​ewwel, dan juri li l-​ħbiberija t’Alla u r-​rikkezzi veri huma ħafna iktar taʼ valur għalina mill-​affarijiet materjali.

15. Liema rikkezzi jġibu l-​ikbar sodisfazzjon?

¹⁵ Li jkollna għana materjali ma jfissirx neċessarjament li għandna l-​approvazzjoni t’Alla. Ġeħova jbierek lil dawk “għonja f’għemejjel tajbin.” (Aqra l-​1 Timotju 6:17-​19.) Pereżempju, oħt jisimha Lucia saret taf li kien hemm bżonn taʼ predikaturi fl-​Albanija. * (Ara n-​nota taʼ taħt.) Allura fl-​1993, telqet mill-​Italja u marret toqgħod hemm. Ma kellhiex xogħol imma fdat li Ġeħova kien se jipprovdilha. Hi tgħallmet l-​Albaniż u għenet iktar minn 60 persuna jiddedikaw lilhom infushom. Aħna jistaʼ ma jkollniex l-​istess riżultati fit-​territorju li nippritkaw fih. Imma kwalunkwe ħaġa li nagħmlu biex ngħinu oħrajn jitgħallmu dwar Ġeħova u jsiru ħbiebu hi xi ħaġa li se ngħożżu għal dejjem.—Mattew 6:20.

16. (a) X’se jiġrilha s-​sistema kummerċjali tal-​lum? (b) Dan kif għandu jeffettwa l-​ħarsa tagħna lejn affarijiet materjali?

¹⁶ Ġesù għamilha ċara li s-​sistema kummerċjali tal-​lum se tispiċċa. Hu qal  ‘meta jispiċċa l-​għana materjali,’ mhux ‘jekk jispiċċa.’ (Luqa 16:9) F’dawn l-​aħħar żminijiet, xi banek fallew u xi pajjiżi kellhom problemi ekonomiċi serji. Iżda fil-​futur qarib, l-​affarijiet se jiggravaw. Is-​sistemi politiċi, reliġjużi, u kummerċjali li jagħmlu parti mis-​sistema taʼ Satana se jispiċċaw. Il-​profeti Eżekjel u Sofonija bassru li d-​deheb u l-​fidda, li minn dejjem kienu importanti għas-​sistema kummerċjali, se jsiru bla valur. (Eżekjel 7:19; Sofonija 1:18) Kif inħossuna jekk naslu lejn l-​aħħar taʼ ħajjitna f’did-​dinja u nirrealizzaw li nkunu ssagrifikajna rikkezzi veri għal affarijiet materjali mhux ġusti tad-​dinja? Nistgħu forsi nħossuna bħal raġel li ħadem ħajtu kollha biex iġemmaʼ ħafna flus, imma mbagħad isir jaf li l-​flus huma foloz. (Proverbji 18:11) L-​affarijiet materjali taʼ did-​dinja żgur se jispiċċaw. Allura titlifx l-​opportunità biex tuża l-​affarijiet materjali tiegħek biex tagħmel ħbieb fis-​sema. Dak li nagħmlu għal Ġeħova u s-​Saltna tiegħu se jagħmilna verament ferħanin.

17, 18. Il-​ħbieb t’Alla għal xiex iħarsu ’l quddiem?

¹⁷ Meta tiġi s-​Saltna t’Alla, ħadd mhu se jkollu jħallas kera jew jissellef il-​flus. L-​ikel se jkun b’xejn u abbundanti, u mhux se jkun hemm bżonn inħallsu għal tobba jew mediċina. Il-​ħbieb taʼ Ġeħova se jgawdu l-​aqwa mill-​prodotti tal-​art. Id-​deheb, il-​fidda, u l-​ħaġar prezzjuż se jintużaw għas-​sbuħija tagħhom, mhux biex jagħmlu lil xi ħadd sinjur. Materjal taʼ kwalità tajba ħafna tal-​injam, ġebel, u metall se jkun disponibbli b’xejn biex jinbnew djar sbieħ. Il-​ħbieb tagħna se jgħinuna għax iridu, mhux għax inħallsuhom. Aħna se naqsmu flimkien dak kollu li l-​art tipproduċi.

¹⁸ Dan hu biss parti mill-​premju imprezzabbli għal dawk li jagħmlu ħbieb fis-​sema. L-​aduraturi taʼ Ġeħova fuq l-​art se jgħajtu bil-​ferħ meta jisimgħu kliem Ġesù: “Ejjew intom, imberkin minn Missieri, irtu s-​saltna mħejjija għalikom mit-​tisjis tad-​dinja.”—Mattew 25:34.