L-​appostlu Pawlu kien jaf li l-​propaganda taʼ Satana kienet perikoluża ħafna. Imma mhux il-​Kristjani kollha kienu konxji tal-​periklu. Pereżempju, jidher li xi wħud f’Korintu ħasbu li tant kienu sodi fil-​verità li qatt ma setgħu jiġu mqarrqin minn Satana. (1 Korintin 10:12) Huwa għalhekk li Pawlu ta din it-​twissija: “Nibżaʼ li b’xi mod, bħalma s-​serp qarraq b’Eva bil-​makakkerija tiegħu, moħħkom isir korrott u jitbiegħed mis-​sinċerità u s-​safa li jistħoqqlu l-​Kristu.”—2 Korintin 11:3.

Il-​kliem taʼ Pawlu juri kemm hu importanti li ma nsirux kunfidenti żżejjed. Biex tirbaħ il-​ġlieda kontra l-​propaganda taʼ Satana, għandek tagħraf kemm hi perikoluża u mbagħad tipproteġi lilek innifsek minnha.

F’dan il-​kuntest, il-​propaganda hi informazzjoni mhix eżatta jew qarrieqa li tiġi użata biex tinganna lin-​nies jew biex tikkontrolla l-​mod kif jaħsbu u jaġixxu. Skont il-​ktieb Propaganda and Persuasion, il-​propaganda hi “bla prinċipji, taʼ ħsara, u inġusta.” In-​nies jiddeskrivuha bi kliem bħal “gideb, rappreżentazzjoni ħażina, qerq, manipulazzjoni, [u] kontroll tal-​moħħ.”

Il-​propaganda hi perikoluża ħafna għax bil-​mod il-​mod tistaʼ taffettwa l-​ħsibijiet tagħna saħansitra mingħajr ma nindunaw. Aħna nistgħu nqabbluha maʼ gass velenuż li la nistgħu naraw u lanqas inxommu. Vance Packard, espert fl-​imġiba tal-​bniedem, qal li l-​propaganda taffettwa l-​mod kif naġixxu  “ħafna iktar milli nirrealizzaw.” Espert ieħor qal li l-​propaganda ġiegħlet lil ħafna nies jaġixxu b’modi perikolużi ħafna u mhux raġunevoli u wasslet għal ġenoċidji (fejn ġens sħiħ jiġi maqtul), gwerer, u persekuzzjoni minħabba r-​razza jew ir-​reliġjon.—Easily Led—A History of Propaganda.

Jekk il-​bnedmin jistgħu jqarrqu bina permezz tal-​propaganda tagħhom, kemm iktar jistaʼ jqarraq bina Satana? Hu ilu jistudja l-​imġiba tal-​bnedmin minn mindu ġew maħluqin. Barra minn hekk, hu qiegħed jikkontrolla “d-​dinja kollha,” u b’hekk jistaʼ juża kwalunkwe parti mid-​dinja biex ixerred il-​gideb tiegħu. (1 Ġwanni 5:19; Ġwanni 8:44) Satana “għema l-​imħuħ” taʼ tant nies bil-​propaganda tiegħu li issa qed “iqarraq bl-​art abitata kollha.” (2 Korintin 4:4; Rivelazzjoni 12:9) Kif tistaʼ tirreżisti l-​propaganda tiegħu?

Ġesù għallimna li hemm mod sempliċi kif niġġieldu l-​propaganda: ‘Kunu afu l-​verità, u l-​verità teħliskom.’ (Ġwanni 8:31, 32) Fi gwerra, suldat ikollu bżonn ikun jaf minn fejn iġib informazzjoni li jistaʼ jafda għax l-​għadu se jxerred il-​gideb sabiex iqarraq bih. Allura int minn fejn tistaʼ ġġib informazzjoni li tistaʼ tafda? Ġeħova pprovda dan fil-​Kelma tiegħu, il-​Bibbja. Fiha int tistaʼ ssib kulm’għandek bżonn biex tiġġieled il-​propaganda taʼ Satana.—2 Timotju 3:16, 17.

Ovvjament, Satana jafu dan. Għalhekk, hu juża d-​dinja li jikkontrolla biex jaljenana u jiskuraġġina milli naqraw u nistudjaw il-​Bibbja. Tiġix imqarraq bit-​“tnassis [mill-​agħar] tax-​Xitan”! (Efesin 6:11) Mhuwiex biżżejjed li jkollna fehma bażika tal-​verità. Irridu naħdmu iebes biex inkabbru l-​għarfien tagħna tal-​verità. (Efesin 3:18) Bħalma qal l-​awtur Noam Chomsky, “Ħadd mhu se jpoġġilek il-​verità f’moħħok. Hi xi ħaġa li trid tfittixha għalik innifsek.” Għalhekk ‘fittex għalik innifsek’ billi ‘teżamina bir-​reqqa l-​Iskrittura kuljum.’—Atti 17:11.

Satana ma jridekx taħseb b’mod ċar u tifhem il-​verità dwar dak li tismaʼ. Għala? Għax “hemm iktar ċans li [l-​propaganda] tkun effettiva” jekk in-​nies ikunu “skuraġġiti biex ma jaħsbux b’attenzjoni.” (Media and Society in the Twentieth Century) Taqbadx u temmen kulma tismaʼ mingħajr ma taħseb  sew dwaru. (Proverbji 14:15) Alla tak “l-​abbiltà li taħseb” u “l-​qawwa tar-​raġuni,” għalhekk użahom biex issaħħaħ il-​fidi tiegħek.—Proverbji 2:10-​15; Rumani 12:1, 2.

Suldati li jiġu influwenzati mill-​propaganda jibdew jibżgħu u jkunu inqas lesti biex jiġġieldu. Il-​propaganda tistaʼ saħansitra ġġegħelhom jiġġieldu bejniethom stess jew jinqatgħu minn mal-​bqija tat-​truppi. Skont ġeneral Ġermaniż, il-​propaganda kienet waħda mir-​raġunijiet għala l-​Ġermanja ġiet megħluba fl-​Ewwel Gwerra Dinjija. Hu qal li n-​nies tant kienu influwenzati mill-​propaganda li kien bħallikieku ġew ipnotizzati minnha. Satana juża metodi simili biex ikisser l-​unità fost il-​Kristjani llum. Pereżempju, hu jipprova joħloq nuqqas taʼ qbil bejn l-​aħwa. Jew jipprova jwassalhom biex jitilqu mill-​organizzazzjoni taʼ Ġeħova billi jġegħelhom jaħsbu li kienet inġusta jew li għamlet xi ħaġa ħażina.

Tiġix imqarraq! Segwi l-​parir tal-​Kelma t’Alla u ibqaʼ magħqud maʼ ħutek. Pereżempju, il-​Bibbja tinkuraġġina biex inkomplu ‘naħfru lil xulxin mill-​qalb’ u nkunu ħfief biex nissetiljaw kwalunkwe nuqqas taʼ qbil. (Kolossin 3:13, 14; Mattew 5:23, 24) U twissina biex ma ninqatgħux mill-​kongregazzjoni. (Proverbji 18:1) Agħmel ċert li int preparat biex tirreżisti l-​propaganda taʼ Satana. Saqsi lilek innifsek, ‘L-​aħħar darba li xi ħadd minn ħuti naqasni, irreaġixxejt b’mod li jogħġob lil Alla jew b’mod li jogħġob lil Satana?’—Galatin 5:16-​26; Efesin 2:2, 3.

Suldat li mhuwiex leali lejn il-​mexxej tiegħu mhux se jiġġieled sew. Għalhekk, l-​għadu juża l-​propaganda biex ikisser il-​fiduċja li s-​suldat ikollu fil-​mexxej tiegħu. Jekk il-​mexxejja jieħdu żball, l-​għedewwa jipprovaw jużaw dan u jgħidu: “Ma tistax tafdahom!” u “Tħallihomx idaħħluk f’diżastru!” Satana jagħmel l-​istess. Hu jipprova jkissirlek il-​fiduċja li għandek f’dawk li Ġeħova qed juża biex imexxi lin-​nies tiegħu.

Kif tistaʼ tipproteġi ruħek? Kun determinat li tibqaʼ fl-​organizzazzjoni taʼ Ġeħova. Kompli kun leali u appoġġja lill-​irġiel li qed imexxu l-​poplu t’Alla, minkejja li dawn l-​irġiel huma imperfetti. (1 Tessalonikin 5:12, 13) L-​apostati u oħrajn li jqarrqu  jistgħu jattakkaw l-​organizzazzjoni. (Titu 1:10) Anki jekk dak li jgħidu jidher li hu veru, ‘titlifx malajr ir-​raġuni tiegħek.’ (2 Tessalonikin 2:2) Segwi l-​parir li Pawlu ta lil Timotju: “Kompli f’dak li tgħallimt,” u ftakar “mingħand min tgħallimtu.” (2 Timotju 3:14, 15) Aħseb dwar l-​evidenza kollha li turi li int tistaʼ tafda l-​ilsir leali li Ġeħova issa uża għal kważi mitt sena biex jgħallimna l-​verità.—Mattew 24:45-​47; Ebrej 13:7, 17.

Ukoll, Satana jipprova jinfluwenzak b’modi iktar diretti. Kultant jipprova jġiegħlek tħossok imbeżżaʼ. It-​twerwir hu “wieħed mill-​eqdem forom tal-​propaganda.” (Easily Led—A History of Propaganda) Philip M. Taylor, professur mill-​Brittanja, kiteb li pereżempju, l-​Assirjani użaw it-​twerwir flimkien mal-​propaganda sabiex jiddominaw fuq l-​għedewwa tagħhom. Satana se juża l-​biżaʼ, bħal biżaʼ mill-​bniedem, biżaʼ mill-​persekuzzjoni, u biżaʼ mill-​mewt, biex iġiegħlek tieqaf taqdi lil Ġeħova.—Isaija 8:12; Ġeremija 42:11; Ebrej 2:15.

Tħallix lil Satana jagħmel dan lilek! Ġesù qal: “Tibżgħux minn dawk li joqtlu l-​ġisem u mbagħad ma jkunu jistgħu jagħmlu xejn iktar.” (Luqa 12:4) Kun fiduċjuż għalkollox li Ġeħova se jżomm il-​wegħda tiegħu li jieħu ħsiebek, jagħtik “il-​qawwa iktar min-​normal,” u jgħinek tirreżisti l-​attakki taʼ Satana.—2 Korintin 4:7-​9; 1 Pietru 3:14.

M’għandniex xi ngħidu, jistaʼ jkun hemm drabi fejn tħossok dgħajjef jew imbeżżaʼ. Imma ftakar fil-​kliem inkuraġġanti li Ġeħova qal lil Ġożwè: “Kun kuraġġuż u agħmel il-​ħila. Tinħasadx jew titwerwer, għax Ġeħova Alla tiegħek hu miegħek kulfejn tmur.” (Ġożwè 1:9) Jekk tħossok ansjuż, itlob mill-​ewwel lil Ġeħova dwar dak li qed jinkwetak. Tistaʼ tkun ċert li “l-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom.” Imbagħad int se jkollok is-​saħħa biex tirreżisti l-​propaganda kollha taʼ Satana.—Filippin 4:6, 7, 13.

Tiftakarha l-​propaganda li Rabsake, il-​messaġġier tal-​Assirjani, uża sabiex ibeżżaʼ lin-​nies t’Alla? Hu riedhom jemmnu li ħadd ma setaʼ jipproteġihom mill-​Assirja, lanqas Ġeħova stess. Imbagħad, hu stqarr li Ġeħova kien qal lill-​Assirjani biex jeqirdu lil Ġerusalemm. Ġeħova kif wieġeb għal dan? “Tibżax minħabba l-​kliem li smajt u li l-​qaddejja tas-​sultan taʼ l-​Assirja maqdruni bih.” (2 Slaten 18:22-​25; 19:6) Imbagħad Ġeħova bagħat anġlu li qered 185,000 Assirjan f’lejl wieħed!—2 Slaten 19:35.

Qatt rajt film li fih xi ħadd ma jirrealizzax li qed jiġi mqarraq? Xtaqt int tgħajjat u tgħidlu: ‘Temminx! Qed jigdbulek!’ Mela, immaġina l-​anġli jagħmlu l-​istess miegħek u jgħidulek: “Titqarraqx mill-​gideb taʼ Satana!”

Mela tismax mill-​propaganda taʼ Satana. (Proverbji 26:24, 25) Ismaʼ minn Ġeħova u afda fih f’kulma tagħmel. (Proverbji 3:5-​7) Hu jħobbok u jħeġġek: “Ibni, kun għaref u ferraħli qalbi.” (Proverbji 27:11) Jekk tagħmel dan, int se tirbaħ il-​ġlieda tal-​moħħ!