1. (a) Iż-​żgħażagħ x’għandhom jiddeċiedu dwar il-​futur tagħhom? (b) X’jistaʼ jgħinhom biex ma jkunux ansjużi żżejjed? (Ara l-​ewwel stampa.)

INTOM iż-​żgħażagħ probabbilment se taqblu li qabel tibdew xi vjaġġ, ikun għaqli li tippjanaw fejn se tmorru. Il-​ħajja hi bħal vjaġġ, u ż-​żmien biex tippjana fejn trid tmur hu meta tkun għadek żgħir. M’għandniex xi ngħidu, jistaʼ ma jkunx faċli li tagħmel pjanijiet bħal dawn. Tfajla jisimha Heather qalet: “Tal-​biżaʼ! Ikollok tiddeċiedi x’tagħmel bil-​kumplament taʼ ħajtek.” Jekk tħossok b’dan il-​mod, ftakar li Ġeħova jgħid: “Tiċċassax ’l hemm u ’l hawn, għax jien Alla tiegħek. Jien inqawwik. Jien ngħinek verament.”—Isaija 41:10.

2. Int kif taf li Ġeħova jridek tippjana għal futur hieni?

² Ġeħova jinkuraġġik tippjana bil-​għaqal għall-​futur tiegħek. (Ekkleżjasti 12:1; Mattew 6:20) Hu jridek tkun ferħan. Dan jidher ċar meta int tara, tismaʼ, u ttiegħem l-​affarijiet li ħalaq. Ukoll, Ġeħova jieħu ħsiebna b’modi oħrajn. Hu jagħtina pariri u jgħallimna kif ngħixu bl-​aħjar mod.  Allura meta n-​nies iwarrbu l-​pariri għaqlin tiegħu, ma jiħux pjaċir. Hu jgħid lil dawk li ma jsegwux il-​gwida tiegħu: “Għażiltu dak li jien ma tgħaxxaqtx bih. . . . Ara! Il-​qaddejja tiegħi se jifirħu, imma intom issofru l-​mistħija. Ara! Il-​qaddejja tiegħi se jgħajtu bil-​ferħ minħabba l-​kundizzjoni tajba taʼ qalbhom.” (Isaija 65:12-​14) Meta nagħmlu għażliet għaqlin fil-​ħajja, aħna nigglorifikaw lil Ġeħova.—Proverbji 27:11.

3. Ġeħova x’jissuġġerilek?

³ Ġeħova xi pjanijiet jissuġġerilek? Biex tkun ferħan, għandek bżonn tkun taf lil Ġeħova u taqdih. Dan hu l-​mod kif Ġeħova ħalaq lill-​bnedmin. (Salm 128:1; Mattew 5:3) L-​annimali sempliċement jieklu, jixorbu, u jkollhom il-​frieħ. Iżda Ġeħova jridek tippjana ħajtek b’tali mod li din tkun taʼ ferħ u sinifikanti. Il-​Ħallieq tiegħek hu “l-​Alla taʼ l-​imħabba,” “l-​Alla l-​hieni,” li għamel il-​bnedmin “fix-​xbieha tiegħu.” (2 Korintin 13:11; 1 Timotju 1:11; Ġenesi 1:27) Int se tkun ferħan meta timita lil Alla tagħna taʼ mħabba. Il-​Bibbja tgħid: “Hemm iktar hena meta tagħti milli meta tirċievi.” (Atti 20:35) M’esperjenzajtux dan int stess? Din hi verità bażika dwar il-​ħajja. Allura Ġeħova jridek tagħmel il-​pjanijiet tiegħek għall-​futur ibbażati fuq l-​imħabba għal oħrajn u għalih.—Aqra Mattew 22:36-​39.

4, 5. X’għamel lil Ġesù ferħan?

⁴ Ġesù Kristu ħalla l-​eżempju perfett għalikom iż-​żgħażagħ. Meta kien għadu tifel, x’aktarx li kien jilgħab u jieħu gost. Bħalma tgħid il-​Kelma t’Alla, hemm “żmien li tidħaq” u “żmien li taqbeż ’l hemm u ’l hawn.” (Ekkleżjasti 3:4) Ukoll, Ġesù resaq qrib Ġeħova billi studja l-​Iskrittura. Meta kellu 12-​il sena, l-​għalliema fit-​tempju stagħġbu “b’kemm kien jifhem u bit-​tweġibiet tiegħu.”—Luqa 2:42, 46, 47.

⁵ Meta Ġesù sar adult, li jagħmel dak li Alla talab minnu għamlu ferħan. Pereżempju, Alla riedu ‘jxandar aħbar tajba lill-​foqra’ u “l-​għoti tad-​dawl lill-​għomja.” (Luqa 4:18) Salm 40:8 jiddeskrivi kif ħassu Ġesù: “Jien tgħaxxaqt nagħmel ir-​rieda tiegħek, O Alla tiegħi.” Ġesù ħa pjaċir jgħallem lin-​nies dwar Missieru. (Aqra Luqa 10:21.) Darba, wara li kellem lil waħda mara dwar il-​qima vera, Ġesù qal lid-​dixxipli tiegħu: “L-​ikel tiegħi hu li nagħmel ir-​rieda taʼ dak li bagħatni u li ntemm xogħlu.” (Ġwanni 4:31-​34) Ġesù kien ferħan għax wera mħabba għal Alla u għal oħrajn. Jekk int tagħmel l-​istess, se tkun ferħan ukoll.

6. Għala hu tajjeb li titkellem m’oħrajn dwar il-​pjanijiet tiegħek għall-​futur?

⁶ Ħafna Kristjani bdew ix-​xogħol taʼ pijunier meta kienu għadhom żgħar, u dan għamilhom ferħanin. Tistaʼ int titkellem maʼ xi wħud minnhom dwar il-​pjanijiet tiegħek? “Il-​pjanijiet jisfrattaw  meta ma jkunx hemm diskors kunfidenzjali, imma jirnexxu meta jkun hemm ħafna li jagħtu l-​pariri.” (Proverbji 15:22) Dawn l-​aħwa probabbilment se jgħidulek li x-​xogħol taʼ pijunier jagħtik edukazzjoni li se tgħinek tul ħajtek kollha. Ġesù tgħallem ħafna affarijiet minn Missieru meta kien fis-​sema. Imbagħad, matul il-​ministeru tiegħu fuq l-​art, kompla jitgħallem. Hu esperjenza l-​ferħ hekk kif qasam l-​aħbar tajba m’oħrajn u żamm l-​integrità tiegħu f’ċirkustanzi diffiċli. (Aqra Isaija 50:4; Ebrej 5:8; 12:2) Ejja naraw għaliex is-​servizz full-​time jistaʼ jagħmlek ferħan.

7. Ħafna żgħażagħ għala jieħdu pjaċir jagħmlu dixxipli?

⁷ Ġesù qalilna biex immorru ‘nagħmlu dixxipliʼ u ngħallmu lin-​nies. (Mattew 28:19, 20) Jekk qed tippjana li tagħmel dan ix-​xogħol il-​karriera tiegħek, se jkollok ħajja sodisfaċenti li tonora lil Alla. Bħal kwalunkwe karriera oħra, jeħtieġ iż-​żmien biex issir tas-​sengħa. Wieħed ħu jismu Timothy li beda x-​xogħol taʼ pijunier bħala adoloxxent qal: “Li naqdi lil Ġeħova full-​time jogħġobni għax hu l-​mod kif nesprimi mħabbti għalih. Għall-​ewwel, ma stajtx nibda studji tal-​Bibbja, imma wara mort f’territorju ieħor, u fi żmien xahar bdejt diversi studji. Student minnhom beda jiġi s-​Sala tas-​Saltna. Wara li attendejt l-​Iskola tal-​Bibbja Għal Aħwa Rġiel Mhux Miżżewġin li damet xahrejn, irċivejt inkarigu ġdid fejn bdejt erbaʼ studji. Inħobb ngħallem lin-​nies, għax nistaʼ nara l-​bidla li jagħmlu permezz tal-​ispirtu qaddis.” * (Ara n-​nota taʼ taħt.)—1 Tessalonikin 2:19.

8. X’għamlu wħud li għadhom żgħar sabiex jippritkaw lil iżjed nies?

⁸ Uħud li għadhom żgħar tgħallmu lingwa oħra. Pereżempju, Jacob, mill-​Amerika taʼ Fuq, jikteb: “Meta kelli sebaʼ snin, ħafna mit-​tfal tal-​klassi kienu Vjetnamiżi. Ridt ngħidilhom dwar Ġeħova, allura wara ftit ippjanajt biex nitgħallem il-​lingwa tagħhom. L-​iktar li tgħallimt kien billi kont inqabbel l-​edizzjonijiet tat-​Torri tal-​Għassa bl-​Ingliż u l-​Vjetnamiż. Ukoll, għamilt ħbieb maʼ wħud minn kongregazzjoni tal-​lingwa Vjetnamiża fil-​viċin. Meta kelli 18-​il sena bdejt ix-​xogħol taʼ pijunier. Wara, attendejt l-​Iskola tal-​Bibbja Għal Aħwa Rġiel Mhux Miżżewġin. Dan għenni fl-​inkarigu taʼ pijunier li għandi issa, fejn jien l-​uniku anzjan fi grupp tal-​lingwa Vjetnamiża. Ħafna Vjetnamiżi jibqgħu mbellhin għax tgħallimt il-​lingwa tagħhom. Huma jistidnuni ġewwa, u spiss inkun nistaʼ nistudja l-​Bibbja magħhom. Xi wħud għamlu progress li wassalhom għall-​magħmudija.”—Qabbel Atti 2:7, 8.

9. X’jgħallimna x-​xogħol taʼ li nagħmlu dixxipli?

⁹ Ix-​xogħol taʼ li nagħmlu dixxipli jgħallmek drawwiet taʼ xogħol tajbin, kif tikkomunika tajjeb, u kif tkun kunfidenti u jkollok it-​tattika. (Proverbji 21:5; 2 Timotju 2:24) Imma dan ix-​xogħol hu speċjalment taʼ ferħ  għaliex titgħallem kif tagħti prova mill-​Iskrittura taʼ dak li temmen. Titgħallem ukoll kif taħdem mill-​qrib maʼ Ġeħova.—1 Korintin 3:9.

10. Kif tistaʼ ssib il-​ferħ fix-​xogħol taʼ li nagħmlu dixxipli anke meta t-​territorju tiegħek ikun diffiċli?

¹⁰ Int tistaʼ ssib ferħ fix-​xogħol taʼ li nagħmlu dixxipli anke jekk huma ftit in-​nies fit-​territorju tiegħek li jridu jistudjaw il-​Bibbja. Biex nagħmlu dixxipli, il-​kongregazzjoni kollha taħdem flimkien bħala tim. Għalkemm ħu jew oħt waħda biss għandha mnejn issib individwu li jsir dixxiplu, ilkoll kemm aħna nkunu ferħanin għax ilkoll ħadna sehem fit-​tfittxija. Pereżempju, Brandon, li kien pijunier għal disaʼ snin fi nħawi fejn ftit nies studjaw il-​Bibbja, jgħid: “Inħobb nipprietka l-​aħbar tajba għax hu dak li jridna nagħmlu Ġeħova. Bdejt fix-​xogħol taʼ pijunier ftit wara li spiċċajt l-​iskola. Nieħu pjaċir ninkuraġġixxi lill-​aħwa rġiel żgħażagħ fil-​kongregazzjoni tagħna u nara l-​progress spiritwali tagħhom. Wara li attendejt l-​Iskola tal-​Bibbja Għal Aħwa Rġiel Mhux Miżżewġin, irċivejt inkarigu ġdid taʼ pijunier. Huwa veru li qatt ma sibt lil xi ħadd fit-​territorju li għamel progress għall-​magħmudija, imma oħrajn sabu. Jien kuntent li ppjanajt biex nieħu sehem bis-​sħiħ fix-​xogħol taʼ li nagħmlu dixxipli.”—Ekkleżjasti 11:6.

11. Ħafna rġiel u nisa żgħażagħ liema tip taʼ servizz lil Ġeħova gawdew?

¹¹ Hemm ħafna opportunitajiet biex taqdi lil Ġeħova. Pereżempju, ħafna rġiel u nisa żgħażagħ jgħinu fix-​xogħol tal-​bini. Hemm bżonn taʼ mijiet taʼ Swali tas-​Saltna ġodda. Dawn il-​postijiet jonoraw lil Ġeħova, allura li tgħin fil-​bini tagħhom jistaʼ jagħmlek ferħan. Int tistaʼ wkoll ikollok il-​ferħ taʼ li taħdem flimkien maʼ ħutek. U tistaʼ titgħallem ħafna affarijiet, bħal kif tagħmel biċċa xogħol tajba bla periklu u kif tikkoopera maʼ dawk li jieħdu ħsieb ix-​xogħol.

12. Is-​servizz taʼ pijunier kif jistaʼ jwassal għal opportunitajiet oħrajn?

¹² Ħu jismu Kevin jgħid: “Mindu kont tifel żgħir ridt li xi darba naqdi lil Ġeħova full-​time. Fl-​aħħar, bdejt naqdi bħala pijunier meta kelli 19-​il sena. Ħdimt part-​time maʼ ħu li kien bennej. Tgħallimt inpoġġi s-​soqfa u nwaħħal il-​bibien u t-​twieqi. Iktar tard, qattajt sentejn maʼ grupp li jagħti l-​għajnuna wara diżastri tal-​uragani, u bnejna mill-​ġdid is-​Swali tas-​Saltna u d-​djar għall-​aħwa. Meta smajt dwar il-​bżonnijiet tal-​kostruzzjoni fl-​Afrika t’Isfel, applikajt u ġejt mistieden immur. Hawn fl-​Afrika, immur minn proġett tas-​Sala tas-​Saltna għal ieħor kull ftit ġimgħat. Il-​grupp tal-​kostruzzjoni li qiegħed fih hu  bħal familja. Ngħixu flimkien, nistudjaw il-​Bibbja flimkien, u naħdmu flimkien. Ukoll, nieħu gost nipprietka mal-​aħwa tal-​lokal kull ġimgħa. Il-​pjanijiet li għamilt bħala tifel għamluni ferħan b’modi li ma stennejtx.”

13. Ħafna żgħażagħ għala jinsabu ferħanin li jaqdu lil Ġeħova f’Betel?

¹³ Uħud li kienu pijunieri issa qed jaqdu f’Betel. Is-​servizz taʼ Betel hu mod taʼ ħajja li jġiblek ferħ għax kulma tagħmel hemm hu għal Ġeħova. Il-​familja taʼ Betel tgħin biex tipprovdi Bibbji u pubblikazzjonijiet ħalli n-​nies ikunu jistgħu jitgħallmu l-​verità. Betelit jismu Dustin jgħid: “Jien għamilt is-​servizz full-​time il-​mira tiegħi meta kelli disaʼ snin, u bdejt ix-​xogħol taʼ pijunier wara li spiċċajt l-​iskola. Wara sena u nofs, ġejt mistieden Betel, fejn tgħallimt inħaddem il-​magni tal-​istampar u iktar tard nipprogramma l-​kompjuters. F’Betel għandi l-​privileġġ li nismaʼ direttament dwar il-​progress fl-​attività madwar id-​dinja taʼ li nagħmlu dixxipli. Nieħu pjaċir naqdi hawn għax dak li nagħmlu jgħin lin-​nies jersqu qrib taʼ Ġeħova.”

14. X’tistaʼ tagħmel issa biex tipprepara għall-​ministeru full-​time?

¹⁴ Kif tistaʼ tipprepara lilek innifsek għall-​ministeru full-​time? Sabiex  taqdi lil Ġeħova bl-​aħjar mod li tistaʼ, għandek bżonn tiżviluppa kwalitajiet Kristjani. Studja l-​Kelma t’Alla regolarment, immedita fil-​fond fuqha, u pprova esprimi l-​fidi tiegħek fil-​laqgħat tal-​kongregazzjoni. Sakemm għadek l-​iskola, tistaʼ ttejjeb l-​abbiltà tiegħek biex titkellem m’oħrajn dwar l-​aħbar tajba. Tgħallem uri interess fin-​nies billi bit-​tattika tistaqsi l-​opinjoni tagħhom u tismaʼ t-​tweġibiet li jagħtu. Ukoll, tistaʼ toffri li tagħmel affarijiet fil-​kongregazzjoni, bħal li tgħin fit-​tindif u l-​manutenzjoni tas-​Sala tas-​Saltna. Ġeħova jieħu pjaċir juża lill-​umli u lil dawk li jridu jaħdmu minn jeddhom. (Aqra Salm 110:3; Atti 6:1-​3) L-​appostlu Pawlu stieden lil Timotju biex jaqdi bħala missjunarju għax “kienu jitkellmu tajjeb dwaru.”—Atti 16:1-​5.

15. X’tistaʼ tagħmel biex ikollok impjieg li jistaʼ jgħinek tagħmel ix-​xogħol taʼ pijunier?

¹⁵ Il-​biċċa l-​kbira tal-​qaddejja full-​time ikollhom bżonn impjieg. (Atti 18:2, 3) Forsi tistaʼ tieħu kors qasir tal-​iskola li jistaʼ jgħinek ikollok xogħol part-​time li jkun fl-​inħawi tiegħek. Tkellem mal-​indokratur li jżur il-​kongregazzjonijiet u maʼ pijunieri oħra dwar il-​pjanijiet tiegħek, u itlobhom xi suġġerimenti. Imbagħad, bħalma tgħid il-​Bibbja, “erħi l-​ħidma tiegħek f’idejn Ġeħova u l-​pjanijiet tiegħek ikunu stabbiliti fis-​sod.”—Proverbji 16:3; 20:18.

16. Is-​servizz full-​time kif jistaʼ jippreparak għal responsabbiltajiet oħrajn fil-​futur?

¹⁶ Tistaʼ tibqaʼ ċert li Ġeħova jridek ‘taqbad qabda sodaʼ maʼ futur hieni. (Aqra l-​1 Timotju 6:18, 19.) Is-​servizz full-​time jgħinek issir Kristjan matur hekk kif taħdem maʼ qaddejja oħra full-​time. Ukoll, ħafna sabu li l-​fatt li kienu fis-​servizz full-​time meta kienu żgħar, iktar tard għenhom fil-​ħajja miżżewġa tagħhom. Spiss, dawk li jkunu għamlu x-​xogħol taʼ pijunier qabel iżżewġu jkomplu jagħmluh flimkien bħala koppja miżżewġa.—Rumani 16:3, 4.

17, 18. Li tagħmel pjanijiet kif jinvolvi lil qalbek?

¹⁷ Salm 20:4 jgħid dwar Ġeħova: “Ħa jagħtik skond ma tixtieq qalbek, u jwettaq kull pjan li tagħmel.” Hekk kif tippjana għall-​futur tiegħek, aħseb dwar dak li verament tixtieq tagħmel f’ħajtek. Aħseb dwar x’qed jagħmel Ġeħova fi żmienna u x’tistaʼ tagħmel int fix-​xogħol tiegħu. Imbagħad ippjana biex tagħmel dak li jogħġob lilu.

¹⁸ Meta tuża ħajtek biex taqdi lil Ġeħova bis-​sħiħ u tonorah, se tkun kuntent ħafna. Int se ‘titgħaxxaq b’Ġeħova bil-​kbir, u hu jagħtik dak li tixtieq qalbek.’—Salm 37:4.