1. Liema problemi qegħdin jiffaċċjaw in-​nies taʼ Ġeħova?

GĦADDEJ minn xi problema diffiċli? Forsi weġġgħek xi ħadd mill-​aħwa fil-​kongregazzjoni. (Ġak. 3:2) Jew forsi tax-​xogħol jew dawk fl-​iskola jwaqqgħuk għaċ-​ċajt għax taqdi lil Ġeħova. (1 Pt. 4:3, 4) Jew membri tal-​familja qed jipprovaw iwaqqfuk milli tattendi l-​laqgħat jew milli tipprietka. (Mt. 10:35, 36) Kultant, dawn il-​problemi jaf tant ikunu diffiċli li tibda taqtaʼ qalbek. Imma tistaʼ tkun ċert li huma x’inhuma l-​problemi li qed tiffaċċja, Ġeħova se jagħtik l-​għerf biex tieħu deċiżjonijiet tajbin u se jagħtik ukoll is-​saħħa biex tkampa mal-​problema.

2. Skont Rumani 15:4, li naqraw il-​Bibbja kif jistaʼ jgħinna?

² Fil-​Bibbja, Ġeħova inkluda eżempji taʼ wħud imperfetti li rnexxielhom jissaportu l-​problemi. Għala? Biex aħna nkunu nistgħu nitgħallmu minnhom. Hu għalhekk li Ġeħova uża lill-​appostlu Pawlu biex jikteb il-​kliem li nsibu f’​Rumani 15:4. (Aqra.) Meta naqraw dawn ir-​rakkonti jistgħu jinkuraġġuna u jagħtuna tama. Imma biex nibbenefikaw ma rridux biss naqraw il-​Bibbja. Irridu nħallu l-​Iskrittura tbiddel il-​mod taʼ kif naħsbu u nħossuna. Pereżempju, x’nistgħu nagħmlu jekk għandna bżonn parir dwar il-​problema li għandna? Nistgħu nagħmlu dawn l-​erbaʼ passi: (1) Nitolbu, (2) Nimmaġinaw, (3) Nimmeditaw, u (4) Napplikaw. F’dan l-​artiklu se niddiskutu  kif nagħmlu dawn l-​erbaʼ passi. * Imbagħad se nużaw dan il-​metodu taʼ kif nistudjaw biex nitgħallmu mill-​affarijiet li ġraw lis-​Sultan David u lill-​appostlu Pawlu.

3. Qabel tibda taqra l-​Bibbja x’għandek tagħmel, u għala?

³ (1) Itlob. Qabel tibda taqra l-​Bibbja, itlob lil Ġeħova biex jgħinek tifhem dak li tkun se taqra. Pereżempju, itlob lil Ġeħova biex jgħinek issib prinċipji li jistgħu jgħinuk tiddeċiedi x’għandek tagħmel.—Flp. 4:6, 7; Ġak. 1:5.

4. X’jistaʼ jgħinek biex tidħol fir-​rakkont li qed taqra mill-​Bibbja?

⁴ (2) Immaġina. Ġeħova tana l-​abbiltà sabiħa li nistgħu nimmaġinaw l-​affarijiet. Biex tidħol fir-​rakkont, immaġina x’qed jiġri, u li inti dik il-​persuna li qed taqra dwarha. Ipprova ara l-​affarijiet li rat hi u pprova ħoss l-​emozzjonijiet li ħasset.

5. X’jiġifieri li timmedita, u kif tistaʼ tagħmel dan?

⁵ (3) Immedita. Li timmedita jfisser li taħseb sew dwar dak li taqra u kif dan japplika għalik. Dan jgħinek iżżid maʼ dak li taf u b’hekk tifhem is-​suġġett aħjar. Jekk taqra l-​Bibbja u ma timmeditax tkun qisek qed tħares lejn jigsaw puzzle mingħajr ma tgħaqqadha. Imma meta timmedita tkun qisek qed tgħaqqad il-​biċċiet biex tara l-​istampa kollha. Xi mistoqsijiet li jistgħu jgħinuk timmedita huma: ‘Il-​karattru fir-​rakkont x’għamel biex isolvi l-​problema tiegħu? Ġeħova kif għenu? Kif nistaʼ nuża dak li tgħallimt biex inkampa mal-​problemi tiegħi?’

6. Għala għandna napplikaw dak li nitgħallmu?

⁶ (4) Applika. Ġesù qal li jekk ma napplikawx dak li nitgħallmu, inkunu bħal raġel li jibni daru fuq ir-​ramel. Hu jaħdem iebes, imma l-​isforzi tiegħu huma għalxejn. Għala? Għax jekk tagħmel maltempata, id-​dar tiegħu se taqaʼ. (Mt. 7:24-​27) Bl-​istess mod, jekk aħna nitolbu, nimmaġinaw, u nimmeditaw, imma ma napplikawx dak li nitgħallmu, l-​isforz li nkunu għamilna jkun għalxejn. U jekk niffaċċjaw il-​provi jew il-​persekuzzjoni, il-​fidi tagħna mhux se tkun b’saħħitha. Imma meta nistudjaw u napplikaw dak li nitgħallmu, se nieħdu deċiżjonijiet aħjar, se jkollna iktar paċi, u se nsaħħu l-​fidi tagħna. (Is. 48:17, 18) Billi nużaw dawn l-​erbaʼ passi li semmejna, ejja naraw x’nistgħu nitgħallmu minn xi ħaġa li ġrat lis-​Sultan David.

7. Liema rakkont tal-​Bibbja se nikkunsidraw?

⁷ Ġieli kien hemm xi ħadd mill-​aħwa jew xi ħadd tal-​familja li weġġgħek? Jekk iva, se jgħinek ħafna jekk tistudja r-​rakkont taʼ David taʼ meta ibnu Absalom ittradieh u pprova jsir sultan minfloku.—2 Sam. 15:5-​14, 31; 18:6-​14.

8. X’tistaʼ tagħmel biex Ġeħova jgħinek?

⁸ (1) Itlob. Bir-​rakkont f’moħħok, għid lil Ġeħova kif qed tħossok minħabba l-​mod kif ġejt ittrattat. (Salm 6:6-​9) Kun speċifiku. U mbagħad, itlob lil Ġeħova biex jgħinek issib prinċipji li jgħinuk tkampa mal-​problema tiegħek.

9. Xi kwistjoni kien hemm bejn David u ibnu Absalom?

⁹ (2) Immaġina. Aħseb dak li ġara f’dan ir-​rakkont u immaġina kif ħassu  s-​Sultan David. Absalom, it-​tifel taʼ David, għamel snin jipprova jinħabb man-​nies. (2 Sam. 15:7) Meta Absalom ħaseb li kien il-​waqt, hu bagħat spiji f’Iżrael kollu biex iħeġġu lin-​nies jaċċettaw lilu bħala sultan. Hu kkonvinċa wkoll lil Aħitofel, ħabib kbir taʼ David u wieħed li kien itih il-​pariri, biex ikun kompliċi miegħu. Absalom beda jgħid li sar sultan, u mbagħad ipprova jaqbad lil David biex joqtlu, li f’dak iż-​żmien x’aktarx li kien ma jiflaħx serjament. (Salm 41:1-​9) David sar jaf b’dak li kien qed jagħmel ibnu, u għalhekk ħarab minn Ġerusalemm. Eventwalment, l-​armata taʼ Absalom iġġieldet kontra l-​armata taʼ David. L-​armata taʼ Absalom tilfet, u hu ġie maqtul.

10. Is-​Sultan David x’setaʼ għamel?

¹⁰ Immaġina kif ħassu David minħabba dak kollu li kien għaddej minnu. Hu kien iħobbu lil Absalom u kien jafdah lil Aħitofel, imma t-​tnejn li huma ttradewh. Huma kkaġunaw ħafna wġigħ lil David u anki pprovaw joqtluh. David setaʼ ħaseb li sħabu l-​oħrajn ukoll kienu se jingħaqdu maʼ Absalom, u b’hekk setaʼ ma baqax jafdahom. U hu setaʼ ħaseb fih innifsu u jaħrab mill-​pajjiż waħdu. Jew setaʼ ħassu skuraġġit ħafna. Imma David m’għamilx hekk. Minflok, hu għeleb din il-​prova diffiċli. David kif irnexxielu?

11. David x’għamel meta ffaċċja sitwazzjoni diffiċli?

¹¹ (3) Immedita. Liema prinċipji tistaʼ titgħallem minn dan ir-​rakkont? Wieġeb il-​mistoqsija, “X’għamel David biex solva l-​problema tiegħu?” David ma ppanikjax u ma ħax deċiżjonijiet taʼ malajr. Ukoll, hu ma ħalliex il-​biżaʼ twaqqfu milli jieħu deċiżjonijiet tajbin. Minflok, talab lil Ġeħova għall-​għajnuna. Talab lill-​ħbieb tiegħu biex jgħinuh u malajr aġixxa fuq dak li kien iddeċieda. Minkejja li kien imweġġaʼ, hu ma baqax irrabjat. Hu xorta baqaʼ jafda lill-​oħrajn u jistrieħ fuq Ġeħova.

12. Ġeħova x’għamel biex jgħin lil David?

¹² Ġeħova kif għen lil David? Jekk tagħmel riċerka se titgħallem li Ġeħova lil David tah is-​saħħa li kellu bżonn biex ikampa maʼ din il-​prova. (Salm 3:1-​8; sopraskrizzjoni) Ġeħova bierek id-​deċiżjonijiet li ħa David u għen lill-​ħbieb leali tiegħu meta ġġieldu biex jipproteġuh.

13. Kif tistaʼ timita lil David meta xi ħadd iweġġgħek? (Mattew 18:15-​17)

¹³ (4) Applika. Staqsi lilek innifsek, ‘Kif nistaʼ nimita lil David jekk xi ħadd iweġġagħni?’ Se jkollok bżonn taġixxi mill-​ewwel biex issolvi l-​problema. Jekk ikun il-​waqt, tistaʼ tapplika l-​parir li ta Ġesù f’​Mattew kapitlu 18. (Aqra Mattew 18:15-​17.) Imma qatt tieħu deċiżjoni meta tkun irrabjat. Għandek titlob lil Ġeħova biex jgħinek tibqaʼ kalm u tkun taf x’għandek tagħmel. Ibqaʼ afda lill-​ħbieb tiegħek u kun lest li taċċetta l-​għajnuna li jipprovdulek. (Prov. 17:17) U l-​iktar ħaġa importanti hi li tapplika l-​pariri li jagħtik Ġeħova fil-​Kelma tiegħu.—Prov. 3:5, 6.

14. Meta jistaʼ jinkuraġġik il-​kliem tat-​2 Timotju 1:12-​16; 4:6-​11, 17-​22?

¹⁴ Il-​familja tiegħek hi kontrik għax taqdi lil Ġeħova? Jew tgħix f’xi pajjiż fejn ix-​xogħol taʼ Ġeħova ma jistax isir jew hemm xi restrizzjonijiet? Jekk iva, se tħossok inkuraġġit jekk taqra t-​2 Timotju  1:12-​16 u 4:6-​11, 17-​22. * Pawlu kiteb dawn il-​versi meta kien qiegħed fil-​ħabs.

15. X’tistaʼ titolbu lil Ġeħova?

¹⁵ (1) Itlob. Qabel taqra dawn il-​versi, għid lil Ġeħova bil-​problema tiegħek u kif din qed taffettwalek ħajtek. Kun speċifiku. Imbagħad, itlob lil Ġeħova biex jgħinek issib prinċipji f’dawn ir-​rakkonti dwar dak li ġara lil Pawlu, li jistgħu jgħinuk tkun taf x’għandek tagħmel.

16. Minn xiex għadda Pawlu?

¹⁶ (2) Immaġina. Immaġinak fis-​sitwazzjoni taʼ Pawlu. Hu qiegħed fil-​ħabs ġewwa Ruma. Din ma kinitx l-​ewwel darba, imma issa jaf li se jiġi maqtul. Xi wħud li kienu miegħu abbandunawh, u hu għajjien mejjet.—2 Tim. 1:15.

17. Pawlu kif setaʼ rreaġixxa?

¹⁷ Pawlu setaʼ qagħad jiffoka fuq il-​passat u jaħseb li kieku ma kienx Kristjan żeluż, l-​affarijiet kienu jkunu differenti u x’aktarx li ma kienx ħa jkun fil-​ħabs. Hu setaʼ ħadha kontra dawk l-​aħwa li kienu miegħu fl-​Asja u li mbagħad telquh. U setaʼ wkoll ma jibqax jafda lil aħwa oħrajn. Imma Pawlu m’għamilx hekk. Għala kien ċert li l-​aħwa kienu se jibqgħu leali lejh, u li Ġeħova kien se jippremjah?

18. Pawlu x’għamel meta kien f’sitwazzjoni diffiċli?

¹⁸ (3) Immedita. Wieġeb il-​mistoqsija, “Pawlu x’għamel biex isolvi l-​problema tiegħu?” Għalkemm kien jaf li kien se jmut, l-​iktar ħaġa importanti għalih kienet li jġib tifħir lil Ġeħova. U hu kompla jara kif jistaʼ jinkuraġġixxi lil oħrajn. Hu straħ fuq Ġeħova billi talab spiss. (2 Tim. 1:3) Pawlu ma baqax jaħseb fuq dawk li kienu abbandunawh. Minflok, hu qal li hu apprezza ħafna kif l-​aħwa kienu għenuh u inkuraġġewh. Barra minn hekk, Pawlu kompla jistudja l-​Kelma t’Alla. (2 Tim. 3:16, 17; 4:13) U l-​iktar ħaġa importanti kienet li hu kien ċert li Ġeħova u Ġesù jħobbuh. Huma ma kinux abbandunawh, u kien jaf li kienu se jippremjawh għax-​xogħol leali tiegħu.

19. Ġeħova kif għen lil Pawlu?

¹⁹ Ġeħova kien avża lil Pawlu li hu kien se jkun ippersegwitat minħabba li kien Kristjan. (Atti 21:11-​13) Ġeħova kif għenu lil Pawlu? Hu semaʼ t-​talb tiegħu u tah il-​qawwa. (2 Tim. 4:17) Ġeħova assigura lil Pawlu li hu kien se jirċievi l-​premju għax-​xogħol iebes li kien għamel. Ukoll, hu uża lill-​aħwa biex jgħinu lil Pawlu b’mod prattiku.

20. Bl-​iskrittura taʼ Rumani 8:38, 39 f’moħħna, kif nistgħu nimitaw lil Pawlu?

²⁰ (4) Applika. Staqsi lilek innifsek, ‘Kif nistaʼ nimita lil Pawlu?’ Bħal Pawlu, aħna nistennew li se nkunu ppersegwitati minħabba li naqdu lil Ġeħova. (Mk. 10:29, 30) Biex nibqgħu leali lejn Ġeħova meta jkollna l-​problemi, għandna bżonn nibqgħu nitolbu u nistudjaw il-​Bibbja b’mod regulari. U rridu dejjem niftakru li l-​iktar ħaġa importanti hi li nġibu tifħir lil Ġeħova. Nistgħu nkunu ċerti li Ġeħova qatt mhu se jabbandunana u li ħadd ma jistaʼ jwaqqfu milli jħobbna.—Aqra Rumani 8:38, 39; Ebr. 13:5, 6.

21. X’għen lil Aya u lil Hector biex jegħlbu l-​isfidi li ffaċċjaw?

²¹ L-​eżempji li nsibu fil-​Bibbja jistgħu jgħinuna biex ikollna s-​saħħa nissaportu  meta jkollna l-​problemi. Pereżempju, Aya, pijuniera fil-​Ġappun, tgħid li r-​rakkont taʼ Ġona għenha biex tegħleb il-​biżaʼ meta tkun qiegħda tipprietka f’postijiet pubbliċi. Hector, żagħżugħ fl-​Indoneżja, li l-​ġenituri tiegħu mhumiex fil-​verità, jgħid li l-​eżempju taʼ Rut jinkuraġġih biex jitgħallem iktar dwar Ġeħova u jaqdih.

22. X’jistaʼ jgħinek tibbenefika iktar mid-​drammi bbażati fuq il-​Bibbja jew mis-​serje “Imita l-​fidi tagħhom”?

²² Fejn tistaʼ ssib iktar eżempji tal-​Bibbja li jsaħħuk? Il-​vidjows, id-​drammi bl-​awdjo, u anki s-​serje “Imita l-​fidi tagħhom” jgħinuk biex tidħol iktar fir-​rakkonti tal-​Bibbja. * Qabel tara, tismaʼ, jew taqra dawn ir-​rakkonti li jidħlu f’ħafna dettalji, itlob lil Ġeħova biex jgħinek issib punti importanti li tistaʼ tapplika. Immaġina li qiegħed minflokhom. Immedita fuq dak li għamel il-​qaddej leali taʼ Ġeħova u kif Ġeħova għenu jegħleb il-​problemi tiegħu. Imbagħad applika l-​lezzjoni għas-​sitwazzjoni tiegħek. Irringrazzja lil Ġeħova għall-​għajnuna li qed itik. U uri li tapprezza l-​għajnuna billi tfittex opportunitajiet biex tinkuraġġixxi u tgħin lil oħrajn.

23. F’​Isaija 41:10, 13, Ġeħova xi jwiegħed li se jagħmel għalina?

²³ Il-​ħajja f’din id-​dinja kkontrollata minn Satana tistaʼ tkun diffiċli u xi kultant ma nkunux nafu x’se naqbdu nagħmlu. (2 Tim. 3:1) Imma m’għandniex għalfejn inkunu anzjużi jew nibżgħu. Ġeħova jaf minn xiex għaddejjin. Meta jkollna bżonn l-​għajnuna, hu jwegħedna li se jżommna b’idu l-​leminija. (Aqra Isaija 41:10, 13.) Aħna ċerti li Ġeħova se jgħinna, u li l-​qari tal-​Bibbja jagħtina s-​saħħa biex inkampaw meta jkollna l-​problemi.