1-3. Xi jfisser li taqdi lil Ġeħova “b’qalb sħiħa”? Agħti eżempju.

ILKOLL kemm aħna imperfetti u niżbaljaw. B’ferħ, Ġeħova pprovda l-​fidwa u lest li jaħfrilna. Allura jekk aħna umli u nedmin, nistgħu nitolbuh jaħfrilna. Nistgħu nkunu ċerti li Ġeħova mhux se jittratta magħna “skond dnubietna.” (Salm 103:10) Xorta waħda, għandna ‘naqduh b’qalb sħiħa.’ (1 Kronaki 28:9) Kif nistgħu nagħmlu dan avolja aħna imperfetti?

² Bħala għajnuna, nistgħu nqabblu l-​ħajja tas-​Sultan Asa maʼ dik tas-​Sultan Amażija. It-​tnejn li huma għamlu affarijiet tajbin, imma għamlu żbalji wkoll għax kienu imperfetti. Madankollu l-​Bibbja tgħid li “qalb Asa baqgħet sħiħa tul jiemu kollha.” (2 Kronaki 15:16, 17; 25:1, 2; Proverbji 17:3) Hu dejjem ipprova jogħġob lil Ġeħova “b’qalb sħiħa,” jiġifieri kien kompletament devot lejh. (1 Kronaki 28:9) Iżda, Amażija ma qediex lil Ġeħova “b’qalb sħiħa.” Wara li rebaħ lill-​għedewwa t’Alla, hu  ħa miegħu l-​idoli tagħhom u beda jqimhom.—2 Kronaki 25:11-​16.

³ Persuna li taqdi lil Alla “b’qalb sħiħa” tħobb lil Ġeħova profondament u tkun trid tqimu għal dejjem. Fil-​Bibbja, il-​kelma “qalb” ġeneralment tirreferi għal min aħna minn ġewwa. Tinkludi l-​mod kif naħsbu, xi nħobbu, xi rridu nagħmlu fil-​ħajja tagħna, u għala nagħmlu l-​affarijiet li nagħmlu. Għalkemm imperfetti, aħna nistgħu nqimu lil Ġeħova b’qalb sħiħa. Aħna naqduh għax verament irridu, mhux taʼ bilfors jew għax hija sempliċement drawwa.—2 Kronaki 19:9.

4. X’se nikkunsidraw issa?

⁴ Aħna nistgħu nifhmu iktar ċar xi jfisser li naqdu lil Alla b’qalb sħiħa billi nikkunsidraw il-​ħajja t’Asa kif ukoll dik tat-​tliet slaten leali oħra taʼ Ġuda. Dawn kienu Ġeħosafat, Ħeżekija, u Ġosija. Għalkemm dawn l-​erbaʼ slaten żbaljaw, huma xorta għoġbu lil Ġeħova. Hu ra li qdewh b’qalb sħiħa. Alla għala qieshom b’dan il-​mod, u kif nistgħu nimitawhom?

5. X’għamel Asa meta sar sultan?

⁵ Asa kien it-​tielet sultan taʼ Ġuda wara li l-​ġens tal-​Iżrael inqasam fis-​saltna tal-​Iżrael u s-​saltna taʼ Ġuda. Meta Asa sar sultan taʼ Ġuda, hu kien determinat li jneħħi l-​qima falza u l-​immoralità sesswali moqżieża mis-​saltna tiegħu. Hu qered l-​idoli li n-​nies kienu qed iqimu u keċċa l-​prostituti tat-​tempju. Asa saħansitra neħħa lil nanntu mill-​pożizzjoni taʼ “sultana omm, għax kienet għamlet idolu moqżież.” (1 Slaten 15:11-​13) Ukoll, Asa inkuraġġixxa lin-​nies “biex ifittxu lil Ġeħova” u biex jobdu “l-​liġi u l-​kmandamenti.” Hu għamel kulma setaʼ biex jgħin lil oħrajn iqimu lil Ġeħova.—2 Kronaki 14:4.

6. Asa kif irreaġixxa meta l-​Etjopjani invadew lil Ġuda?

⁶ Matul l-​ewwel għaxar snin tar-​renju t’Asa, is-​saltna taʼ Ġuda ma kellhiex gwerer. Imbagħad, l-​Etjopjani ġew biex jiġġieldu kontra Ġuda b’miljun suldat u tliet mitt karru. (2 Kronaki 14:1, 6, 9, 10) X’għamel Asa? Ma kellux dubju li Ġeħova setaʼ jgħin lin-​nies tiegħu. Allura talab lil Ġeħova jgħinhom jirbħu l-​battalja. (Aqra t-​2 Kronaki 14:11.) Xi drabi, Ġeħova għażel li jrebbaħ lill-​poplu tiegħu kontra l-​għedewwa tiegħu anke meta s-​slaten ma kinux leali lejh. Hu għamel dan sabiex juri li kien l-​Alla l-​veru. (1 Slaten 20:13, 26-​30) Iżda din id-​darba, Ġeħova għen lin-​nies tiegħu għaliex Asa fada fih. Ġeħova wieġeb it-​talba t’Asa, u l-​battalja ntrebħet. (2 Kronaki 14:12, 13) Iktar tard, Asa għamel żball serju meta talab l-​għajnuna tas-​sultan tas-​Sirja minflok dik taʼ Ġeħova.  (1 Slaten 15:16-​22) Xorta waħda, Ġeħova setaʼ jara li Asa kien iħobbu. Qalbu “baqgħet sħiħa maʼ Ġeħova tul jiemu kollha.” Kif nistgħu nimitaw l-​eżempju tajjeb t’Asa?—1 Slaten 15:14.

7, 8. Kif tistaʼ timita lil Asa?

⁷ Kif nistgħu nkunu nafu jekk aħniex kompletament devoti lejn Ġeħova? Aħna nistgħu nistaqsu lilna nfusna: ‘Se nobdi lil Ġeħova anke meta jkun diffiċli? Ninsab determinat għalkollox li nżomm il-​kongregazzjoni tiegħu nadifa?’ Aħseb kemm kellu bżonn inkuraġġiment Asa biex ineħħi lil nanntu mill-​pożizzjoni rjali tagħha! Xi drabi, ikollok bżonn turi kuraġġ bħal Asa. Pereżempju, xi ngħidu jekk membru tal-​familja tiegħek jew ħabib tal-​qalb dineb, ma nidimx, u kellu jinqataʼ mis-​sħubija tal-​kongregazzjoni? Se tkun determinat li ma tassoċjax maʼ din il-​persuna? X’se timmotivak tagħmel qalbek?

⁸ Bħal Asa, kultant għandu mnejn inħossu li kulħadd hu kontrina. Forsi sħabek tal-​iskola jew l-​għalliema jwaqqgħuk għaċ-​ċajt għaliex int wieħed mix-​Xhieda taʼ Ġeħova. Jew forsi xi nies fuq ix-​xogħol jaħsbu li int iblah għax tieħu l-​leave biex tmur xi assemblea jew għax ma taħdimx overtime taʼ spiss. F’sitwazzjonijiet bħal dawn, strieħ fuq Alla, bħalma għamel Asa. Itlob lil Ġeħova, kun kuraġġuż, u ibqaʼ agħmel it-​tajjeb. Ftakar li Alla saħħaħ lil Asa, u se jsaħħaħ lilek ukoll.

9. Kif nistgħu nogħġbu lil Ġeħova meta nippritkaw?

⁹ Asa ma ħasibx dwaru nnifsu biss; hu inkuraġġixxa lil oħrajn “biex ifittxu lil Ġeħova.” Aħna wkoll ngħinu lin-​nies biex iqimu lil Ġeħova. Hu jinnota meta nkellmu lil oħrajn dwaru. Min jaf kemm ikun kuntent meta jara li qed nagħmlu dan għax inħobbuh u għax jimpurtana min-​nies u mill-​futur tagħhom!

10, 11. Kif nistgħu nimitaw lil Ġeħosafat?

¹⁰ Ġeħosafat, iben Asa, “baqaʼ miexi fit-​triq taʼ missieru Asa.” (2 Kronaki 20:31, 32) Kif? Bħal missieru, Ġeħosafat inkuraġġixxa lin-​nies biex jibqgħu jqimu lil Ġeħova. Hu bagħat irġiel fil-​bliet taʼ Ġuda biex jgħallmu lin-​nies mill-​“ktieb tal-​liġi taʼ Ġeħova.” (2 Kronaki 17:7-​10) Hu saħansitra mar fit-​territorju tas-​saltna tal-​Iżrael fit-​Tramuntana, għand in-​nies fil-​muntanji t’Efrajm, “sabiex ireġġagħhom lura lejn Ġeħova.” (2 Kronaki 19:4) Ġeħosafat kien sultan “li fittex lil Ġeħova b’qalbu kollha.”—2 Kronaki 22:9.

¹¹ Illum, Ġeħova jrid li n-​nies madwar id-​dinja kollha jiġu mgħallmin  dwaru, u lkoll kemm aħna nistgħu ngħinu f’dan ix-​xogħol. Hija l-​mira tiegħek li tieħu sehem fih kull xahar? Tixtieq tgħallem il-​Bibbja lil oħrajn sabiex huma wkoll ikunu jistgħu jibdew iqimu lil Ġeħova? Hija din xi ħaġa li titlob dwarha? Jekk tagħmel l-​isforz, Ġeħova jistaʼ jgħinek tibda studju tal-​Bibbja. Se tkun lest li tistudja maʼ xi ħadd għalkemm ikollok iċċedi ftit mill-​ħin liberu tiegħek? U l-​istess bħalma Ġeħosafat ipprova jgħin lil oħrajn biex jerġgħu jibdew jaqdu lil Ġeħova, aħna nistgħu nipprovaw ngħinu lil dawk li saru inattivi. Ukoll, l-​anzjani tal-​kongregazzjoni jirranġaw biex iżuru u joffru għajnuna lil uħud maqtugħin mis-​sħubija fit-​territorju tal-​kongregazzjoni li għandhom mnejn waqfu jipprattikaw xi dnub tal-​passat.

12, 13. (a) Meta Ġeħosafat ħassu beżgħan, x’għamel? (b) Għala għandna nsegwu l-​eżempju taʼ Ġeħosafat?

¹² Bħal missieru Asa, Ġeħosafat fada f’Ġeħova meta armata kbira marret tiġġieled kontra Ġuda. (Aqra t-​2 Kronaki 20:2-​4.) Kien beżgħan u talab lil Ġeħova jgħinu. Fit-​talb tiegħu stqarr li ma setgħux jegħlbu lill-​għedewwa. Qal ukoll li hu u n-​nies tiegħu ma kinux jafu x’se jagħmlu. Ġeħosafat ma kellux dubju li Ġeħova kien se jgħinhom. Hu qal: “Għajnejna huma fuqek.”—2 Kronaki 20:12.

¹³ Bħal Ġeħosafat, kultant forsi ma nkunux nafu x’se naqbdu nagħmlu dwar problema, u saħansitra nistgħu nibżgħu. (2 Korintin 4:8, 9) Iżda ftakar x’għamel Ġeħosafat. Quddiem in-​nies kollha, talab lil Ġeħova u qallu kemm ħassewhom dgħajfin. (2 Kronaki 20:5) Il-​kapijiet tal-​familja jistgħu jimitaw l-​eżempju taʼ Ġeħosafat. Itlob lil Ġeħova jgħin lilek u l-​familja tiegħek biex tkampaw mal-​problema u biex tkunu tafu x’għandkom tagħmlu. Toqgħodx tiddejjaq tħalli l-​familja tiegħek jisimgħu dan it-​talb. Huma se jirrealizzaw kemm tafda f’Ġeħova. Hu għen lil Ġeħosafat, u se jgħin lilek ukoll.

14, 15. Ħeżekija kif straħ kompletament fuq Alla?

¹⁴ Ħeżekija kien sultan ieħor li “baqaʼ mqabbad maʼ Ġeħova.” Hu għamel dan minkejja li missieru tah eżempju ħażin u qiem lill-​idoli. Ħeżekija “neħħa l-​postijiet għall-​qima u kisser il-​pilastri sagri u qaċċat l-​arblu sagru u farrak is-​serp tar-​ram aħmar li kien għamel Mosè,” minħabba li l-​Iżraelin kienu qed iqimuh. Ħeżekija kien kompletament devot lejn Ġeħova. Hu “kompla jħares il-​kmandamenti li Ġeħova kien ikkmanda lil Mosè.”—2 Slaten 18:1-​6.

¹⁵ Meta Ħeżekija kien sultan, l-​armata setgħana Assirjana invadiet lil Ġuda u heddet li teqred lil Ġerusalemm. Is-​sultan tal-​Assirja, Sennakerib, waqqaʼ lil Ġeħova għaċ-​ċajt u pprova jġiegħel lil Ħeżekija jċedi. Matul  dak iż-​żmien perikoluż, Ħeżekija straħ kompletament fuq Ġeħova u talab għall-​għajnuna tiegħu. Hu kien jaf li Alla kien bil-​wisq iżjed b’saħħtu mill-​Assirjani u li setaʼ jsalva lill-​poplu tiegħu. (Aqra Isaija 37:15-​20.) Alla wieġeb it-​talba tiegħu billi bagħat anġlu biex joqtol 185,000 suldat Assirjan.—Isaija 37:36, 37.

16, 17. Kif tistaʼ timita lil Ħeżekija?

¹⁶ Iktar tard, Ħeżekija marad u kien qed imut. Matul dak iż-​żmien diffiċli, hu talab bil-​ħerqa lil Ġeħova biex jiftakar fil-​lealtà tiegħu u biex jgħinu. (Aqra t-​2 Slaten 20:1-​3.) Ġeħova semaʼ t-​talba taʼ Ħeżekija u fejqu. Mill-​Bibbja nafu li llum ma nistgħux nistennew mirakli mingħand Alla biex ifejqilna l-​mard jew biex itawlilna ħajjitna. Imma bħal Ħeżekija, nistgħu nistrieħu fuq Ġeħova għall-​għajnuna. Nistgħu ngħidulu: “Nissupplikak, O Ġeħova, ftakar, jekk jogħġbok, kif jien imxejt quddiemek bil-​verità u b’qalb sħiħa.” Temmen int li Ġeħova dejjem se jieħu ħsiebek, anke meta timrad?—Salm 41:3.

¹⁷ Kif iktar nistgħu nimitaw lil Ħeżekija? Forsi hemm xi ħaġa li qed tfixkel ir-​relazzjoni tagħna maʼ Ġeħova jew tiħodilna l-​ħin milli naqduh. Pereżempju, ħafna llum jittrattaw lill-​bnedmin bħallikieku kienu idoli. Huma jammiraw lil ċelebritajiet u nies oħrajn li ma jafuhomx. Ħafna jqattgħu ħin bl-​addoċċ jaqraw dwar nies bħal dawn u jaraw ir-​ritratti tagħhom. Inkella, huma spiss jużaw il-​midja soċjali jew għodod oħra biex jikkomunikaw maʼ nies fuq l-​Internet. M’għandniex xi ngħidu, forsi nieħdu gost nikkomunikaw mal-​familja jew ħbieb tal-​qalb permezz tat-​teknoloġija. Iżda nistgħu naħlu ħafna ħin fuq il-​midja soċjali. Saħansitra għandu mnejn insiru kburin jekk ħafna nies jagħtuna x’nifhmu li jogħġbuhom ir-​ritratti jew il-​kummenti li nitfgħu fuq l-​Internet. Jew, jekk nindunaw li xi wħud ma baqgħux jarawhom, forsi nieħdu għalina. Nistgħu nitgħallmu mill-​eżempji tal-​appostlu Pawlu, Akwila, u Prixilla. Taħseb li huma kuljum qattgħu l-​ħin jiskopru kull ħaġa żgħira li għamlu n-​nies, speċjalment nies li ma kinux jaqdu lil Ġeħova? Il-​Bibbja tgħid li Pawlu kien “okkupat bis-​sħiħ bix-​xandir tal-​kelma.” U Prixilla u Akwila użaw ħinhom jippritkaw u jispjegaw “it-​triq t’Alla iktar eżatt” lil oħrajn. (Atti 18:4, 5, 26) Aħna nistgħu nistaqsu lilna nfusna: ‘Noqgħod attent biex ma nittrattax lill-​bnedmin bħala idoli? Nevita jien li nqattaʼ ħafna ħin nagħmel affarijiet li mhumiex veru importanti?’—Aqra Efesin 5:15, 16.

18, 19. Kif nistgħu nkunu bħal Ġosija?

¹⁸ Is-​Sultan Ġosija wkoll obda l-​kmandamenti taʼ Ġeħova “b’qalbu kollha.” (2 Kronaki 34:31) Il-​bużnannu taʼ Ġosija kien Ħeżekija.  Meta kien adoloxxent, Ġosija “beda jfittex lil Alla taʼ David.” U meta kellu 20 sena, beda jneħħi l-​idolatrija minn Ġuda. (Aqra t-​2 Kronaki 34:1-​3.) Ġosija stinka iktar minn ħafna slaten oħra taʼ Ġuda biex jogħġob lil Ġeħova. Imbagħad ġurnata minnhom, il-​qassis il-​kbir sab il-​ktieb tal-​Liġi t’Alla fit-​tempju. Probabbilment, dan kien il-​ktieb li Mosè stess kien kiteb! Meta s-​segretarju qrah lil Ġosija, dan irrealizza li kien hemm bżonn jaħdem iktar biex jaqdi lil Ġeħova kompletament. Ukoll, inkuraġġixxa lil oħrajn jagħmlu l-​istess. B’hekk, in-​nies “ma żvijawx milli jsegwu lil Ġeħova” waqt li Ġosija kien għadu ħaj.—2 Kronaki 34:27, 33.

¹⁹ Jekk int żagħżugħ, int tistaʼ timita lil Ġosija u ssir taf lil Ġeħova aħjar. Ġosija għandu mnejn tgħallem li Ġeħova hu lest li jaħfer mingħand nannuh, li kien nidem, is-​Sultan Manasse. Int ukoll tistaʼ titgħallem minn uħud ikbar fil-​familja u l-​kongregazzjoni tiegħek. Huma jistgħu jgħidulek dwar il-​ħafna affarijiet tajbin li Ġeħova għamel għalihom. Ukoll, ftakar kif ħassu Ġosija wara li tgħallem x’kienet tgħid l-​Iskrittura. Kien ħerqan li jogħġob lil Ġeħova u minnufih għamel bidliet. Billi taqra l-​Iskrittura, int ukoll tistaʼ tkun iżjed determinat li tobdi lil Ġeħova. B’hekk, il-​ħbiberija tiegħek miegħu se tissaħħaħ u se tħossok iktar ferħan. Imbagħad se tkun trid titkellem dwar Ġeħova m’oħrajn. (Aqra t-​2 Kronaki 34:18, 19.) Meta tistudja l-​Bibbja, forsi wkoll tirrealizza li għandek fejn tagħmel titjib fis-​servizz tiegħek lil Alla. Jekk dan hu l-​każ, agħmel mill-​aħjar li tistaʼ biex tagħmel dawn il-​bidliet, l-​istess bħalma għamel Ġosija.

20, 21. (a) X’kellhom komuni bejniethom dawn l-​erbaʼ slaten li ddiskutejna? (b) X’se niddiskutu fl-​artiklu li jmiss?

²⁰ X’nistgħu nitgħallmu minn dawn l-​erbaʼ slaten taʼ Ġuda li qdew lil Ġeħova b’qalb sħiħa? Dawn l-​irġiel kienu determinati li jogħġbu lil Ġeħova u jqimuh tul ħajjithom kollha. Huma straħu fuqu meta għedewwa b’saħħithom ġew kontrihom. L-​iktar importanti, huma qdew lil Ġeħova għaliex kienu jħobbuh.

²¹ Għalkemm dawn l-​erbaʼ slaten kienu imperfetti u għamlu żbalji, Ġeħova kien kuntent bihom. Hu ra x’kien hemm f’qalbhom u kien jaf li kienu verament iħobbuh. Aħna wkoll imperfetti u nagħmlu żbalji. Imma Ġeħova se jkun kuntent bina meta jara li qed naqduh b’qalb sħiħa. Fl-​artiklu li jmiss, se niddiskutu x’nistgħu nitgħallmu mill-​iżbalji taʼ dawn is-​slaten.