Il-ferħ taʼ li ngħixu ħajja sempliċi
DANIEL U MIRIAM iżżewġu f’Settembru tas-sena 2000 u kellhom ħajja komda f’Barċellona, Spanja. Daniel jispjega: “L-impjieg li kellna ppermettielna nieklu f’restoranti taʼ klassi, insiefru, u nilbsu ħwejjeġ tad-ditta. Ukoll, ħadna sehem b’mod regulari fil-ministeru tal-għalqa.” Imma mbagħad ġara xi ħaġa.
Waqt konvenzjoni fl-2006, Daniel semaʼ taħdita li kellha din il-mistoqsija: “Qegħdin aħna nagħmlu kulma nistgħu biex ngħinu lil dawk li qed ‘jogħtru huma u sejrin għall-qatla’ jaqbdu t-triq għall-ħajja taʼ dejjem?” (Proverbji 24:11) It-taħdita spjegat li aħna għandna r-responsabbiltà li nippritkaw il-messaġġ tal-Bibbja għax il-ħajjiet tan-nies jiddependu minnu. (Atti 20:26, 27) Daniel jiftakar: “Ħassejt li Ġeħova kien qed ikellem lili.” It-taħdita semmiet ukoll li meta nagħmlu iktar fis-servizz taʼ Ġeħova nkunu iżjed ferħanin. Daniel kien jaf li dan kien minnu għax setaʼ jara li Miriam, li kienet diġà bdiet taqdi bħala pijuniera, kienet ferħana ħafna.
Din it-taħdita tant effettwat lil Daniel li ddeċieda li kien wasal iż-żmien li jagħmel bidla kbira f’ħajtu. Hu beda jaħdem inqas sigħat, beda jaqdi bħala pijunier, u ħaseb dwar kemm kienu se jkunu ferħanin jekk hu u Miriam jaqdu fejn il-bżonn taʼ predikaturi tas-Saltna hu akbar.
L-EWWEL ID-DIFFIKULTAJIET—IMBAGĦAD AĦBAR EĊĊITANTI
F’Mejju 2007, Daniel u Miriam telqu l-impjieg tagħhom u marru joqogħdu l-Panama, pajjiż li kienu żaru qabel. It-territorju tagħhom kien jikkonsisti f’diversi gżejjer tal-Arċipelagu taʼ Bocas del Toro, fil-Baħar Karibew. Il-biċċa l-kbira min-nies li jgħixu hemm huma Ngabe. Daniel u Miriam ħasbu li setgħu joqogħdu l-Panama għal madwar tmien xhur bil-flus li kienu diġà faddlu.
Huma daru l-gżejjer bid-dgħajsa u r-rota. Għadhom jiftakru l-ewwel darba li saqu r-roti tagħhom għal madwar 30 kilometru f’għoljiet weqfin u temp sħun ħafna. Daniel tant kien għajjien li kważi tah ħass ħażin. Madankollu, il-familji Ngabe li ltaqgħu magħhom kienu ospitabbli ħafna, speċjalment wara li l-koppja tgħallmu xi ftit espressjonijiet bil-lingwa lokali. Ma damux ma kellhom 23 studju tal-Bibbja.
X’ġara wara li nefqu dak kollu li kienu faddlu? Daniel jgħid: “Bid-dmugħ f’għajnejna bdejna naħsbu biex nerġgħu lura Spanja. Konna mnikktin ferm li nħallu warajna l-istudenti tagħna tal-Bibbja.” Imma mbagħad, xahar wara, irċivew aħbar eċċitanti. Miriam tgħid: “Ġejna mistidnin biex naqdu bħala pijunieri speċjali. Kemm kien taʼ ferħ li stajna nibqgħu fl-inkarigu tagħna!”
L-AKBAR FERĦ TAGĦHOM
Minħabba bidliet fl-organizzazzjoni, Daniel u Miriam kellhom jieqfu jaqdu bħala pijunieri speċjali fl-2015. X’kienu se jagħmlu issa? Huma fdaw fil-wegħda li tinsab f’Salm 37:5: “Erħi triqtek f’idejn Ġeħova, strieħ fuqu, u hu jaġixxi.” Huma sabu impjieg biex ikunu jistgħu jkomplu jaqdu bħala pijunieri regulari, u llum jaqdu f’kongregazzjoni f’Veraguas, il-Panama.
Daniel jgħid: “Qabel ma tlaqna minn Spanja, ma konniex ċerti jekk stajniex ngħixu ħajja sempliċi. Illum ċerti, u ma jonqosna xejn taʼ importanza kbira.” X’inhu l-akbar ferħ tagħhom? Huma jgħidu: “Li ngħinu nies umli jitgħallmu dwar Ġeħova hu ferħ li ma jitqabbel maʼ xejn!”