ARTIKLU GĦALL-ISTUDJU 21
Ġeħova Se Jagħtik is-Saħħa
“Meta nkun dgħajjef, inkun setgħan.”—2 KOR. 12:10.
GĦANJA 73 Għinna nxandru bil-qlubija
ĦARSA BIL-QUDDIEM *
1-2. Liema provi qegħdin jiffaċċjaw ħafna aħwa?
L-APPOSTLU PAWLU ħeġġeġ lil Timotju biex ikompli jagħmel dak kollu li jistaʼ għal Alla. (2 Tim. 4:5) Ilkoll kemm aħna nieħdu dan il-parir bis-serjetà u nagħmlu l-almu tagħna fix-xogħol taʼ Ġeħova. Imma xi kultant, dan mhux faċli. Ħafna minn ħutna għandhom bżonn il-kuraġġ biex jippritkaw. (2 Tim. 4:2) Pereżempju, aħseb f’ħutna li jgħixu f’postijiet fejn ix-xogħol tagħna ma jistax isir. Minkejja li jafu li jistgħu jispiċċaw il-ħabs, huma xorta jibqgħu jippritkaw!
2 Il-qaddejja taʼ Ġeħova jiffaċċjaw ħafna problemi li jistgħu jiskuraġġuhom. Pereżempju, ħafna jaħdmu iebes biex ilaħħqu mal-ħajja. Huma jkunu jixtiequ jagħmlu iktar għal Ġeħova, imma fl-aħħar tal-ġimgħa jħossuhom għajjenin. Oħrajn minħabba l-mard, ix-xjuħija, jew għax ma jistgħux joħorġu mid-dar, ma jistgħux jagħmlu ħafna għal Ġeħova. U oħrajn dejjem iħossuhom li ma jiswew għal xejn. Oħt jisimha Mary * tgħid: “Meta nkun skuraġġita, tant ikolli niġġieled mas-sentimenti tiegħi li wara nħossni għajjiena. Imbagħad inħossni ħażin għax ma nkunx użajt il-ħin u l-enerġija tiegħi biex naqdi lil Ġeħova.”
3. F’dan l-artiklu x’se nikkunsidraw?
3 Huma x’inhuma l-problemi li għandna, Ġeħova jistaʼ jagħtina s-saħħa biex inkomplu naqduh bl-aħjar mod li nistgħu. Imma qabel nikkunsidraw kif Ġeħova jistaʼ jgħinna, ejja naraw kif għen lil Pawlu u lil Timotju jkomplu jaqduh minkejja l-problemi li kellhom.
ĠEĦOVA JAGĦTINA S-SAĦĦA BIEX INKOMPLU NIPPRITKAW
4. Pawlu liema provi ffaċċja?
4 Pawlu ffaċċja ħafna provi. Hu kellu bżonn l-għajnuna taʼ Ġeħova meta l-għedewwa tiegħu sawtuh, tefgħuh fil-ħabs, u anki provaw joqtluh. (2 Kor. 11:23-25) Pawlu ammetta li hu kellu jiġġieled kontra emozzjonijiet negattivi. (Rum. 7:18, 19, 24) U hu kellu wkoll problema f’saħħtu li kienet bħal “xewka fil-laħam,” u xtaq li Alla jfejqu minnha.—2 Kor. 12:7, 8.
5. Pawlu xi rnexxielu jagħmel minkejja l-problemi li ffaċċja?
5 Ġeħova ta s-saħħa lil Pawlu biex minkejja l-problemi li kellu, ikompli jaqdih. Aħseb ftit dwar dak li rnexxielu jagħmel Pawlu. Pereżempju, meta hu kien arrestat ġo dar f’Ruma, hu pprietka lil ħafna nies inkluż lill-uffiċjali tal-gvern. (Atti 28:17; Flp. 4:21, 22) Hu pprietka wkoll lil ħafna mill-Gwardja Pretorjana, u ta xhieda wkoll lil dawk li kienu jmorru jżuruh. (Atti 28:30, 31; Flp. 1:13) Matul dak iż-żmien, Ġeħova uża lil Pawlu biex jikteb ittri li għenu lill-Kristjani veri fil-passat u qed jgħinu lilna llum. Barra minn hekk, l-eżempju taʼ Pawlu saħħaħ lil ħafna aħwa fil-kongregazzjoni taʼ Ruma, u b’hekk dawn kellhom “iktar u iktar kuraġġ biex jitkellmu l-kelma t’Alla bla biżaʼ.” (Flp. 1:14) Għalkemm Pawlu ma setax jagħmel daqs kemm xtaq, hu għamel dak li setaʼ, u dan “irriżulta fl-avanz taʼ l-aħbar tajba.”—Flp. 1:12.
6. Skont it-2 Korintin 12:9, 10, x’għen lil Pawlu biex ikompli jaqdi lil Alla?
6 Pawlu rrealizza li għamel dak li għamel grazzi għall-għajnuna li tah Ġeħova. Hu qal li l-qawwa t’Alla “tintgħamel perfetta fid-dgħufija.” (Aqra t-2 Korintin 12:9, 10.) Permezz tal-ispirtu qaddis, Ġeħova ta s-saħħa lil Pawlu biex ikompli jaqdih minkejja l-persekuzzjoni, il-ħabs, u provi oħrajn li ffaċċja.
7. Xi problemi ffaċċja Timotju li setgħu għamluhielu diffiċli biex ikompli jaqdi lil Ġeħova?
7 Timotju, li kien jgħin lil Pawlu, ukoll kellu jistrieħ fuq Ġeħova biex iwettaq ix-xogħol tiegħu. Huma vvjaġġaw flimkien biex jagħmlu x-xogħol bħala missjunarji. Barra minn hekk, Pawlu bagħat lil Timotju biex iżur lill-kongregazzjonijiet. 1 Kor. 4:17) Timotju jistaʼ jkun li ma ħassux kapaċi u jaf għalhekk Pawlu qallu: “Tħalli lil ħadd qatt imaqdar żgħożitek.” (1 Tim. 4:12) Barra minn hekk, Timotju wkoll kellu xewka fil-laħam għax kien jimrad spiss. (1 Tim. 5:23) Imma hu kien jaf li Ġeħova se jagħtih is-saħħa biex ikompli jipprietka u jgħin lill-aħwa.—2 Tim. 1:7.
(ĠEĦOVA JAGĦTINA S-SAĦĦA BIEX NIBQGĦU LEALI MINKEJJA L-PROBLEMI
8. Ġeħova kif isaħħaħ lill-qaddejja tiegħu llum?
8 Illum, Ġeħova jagħti lill-qaddejja tiegħu “l-qawwa iktar min-normal” biex huma jkomplu jaqduh lealment. (2 Kor. 4:7) Ejja nikkunsidraw erbaʼ affarijiet li tana Ġeħova biex jgħinna nibqgħu leali lejh, li huma t-talb, il-Bibbja, l-aħwa, u l-ippritkar.
9. It-talb kif jistaʼ jgħinna?
9 Nissaħħu permezz tat-talb. Kif naraw f’Efesin 6:18, Pawlu jinkuraġġina biex nitolbu lil Alla “f’kull okkażjoni.” Alla se jwieġeb it-talb tagħna billi jgħinna. Jonnie, li jgħix fil-Bolivja, ħass l-għajnuna taʼ Ġeħova meta kien qed jiffaċċja ħafna problemi. Il-mara u l-ġenituri tiegħu mardu serjament fl-istess żmien. Kien diffiċli ħafna għal Jonnie biex jieħu ħsiebhom it-tlieta li huma. Ommu mietet, u missieru u l-mara tiegħu damu ħafna biex fiequ mill-marda li kellhom. Meta jiftakar f’dak iż-żmien, Jonnie jgħid, “Meta kont inħossni inkwetat ħafna, kont nitlob lil Ġeħova u ngħidlu kif kont qed inħossni.” U dan għenni ħafna. Ġeħova ta s-saħħa lil Jonnie biex jibqaʼ jissaporti. Ronald, anzjan fil-Bolivja, sar jaf li ommu għandha kanċer. Hi mietet fi żmien xahar. X’għen lil Ronald matul dan iż-żmien diffiċli? Hu jgħid: “Meta nitlob lil Ġeħova ngħidlu dak kollu li nkun qed inħoss. Jien naf li hu l-iktar persuna li tistaʼ tifhimni.” Kultant forsi nħossuna li ma nkunux nistgħu nissaportu l-problemi li jkollna u ma nkunux nafu x’se nitolbu. Imma Ġeħova jgħidilna biex nitolbuh, anki jekk ma nkunux nafu kif se npoġġu l-kliem.—Rum. 8:26, 27.
10. Kif naraw f’Ebrej 4:12, għala huwa importanti li naqraw il-Bibbja u nimmeditaw fuqha?
10 Nissaħħu permezz tal-Bibbja. Pawlu kien jaqra l-Iskrittura biex iħossu b’saħħtu u inkuraġġit, u aħna rridu nagħmlu l-istess. (Rum. 15:4) Meta naqraw il-Bibbja u nimmeditaw fuqha, Ġeħova jistaʼ juża l-ispirtu tiegħu biex jgħinna nifhmu kif dak li qrajna jistaʼ japplika għas-sitwazzjoni tagħna. (Aqra Ebrej 4:12.) Ronald, li semmejna qabel jgħid: “Jiena vera kuntent li għamiltha mira li naqra l-Bibbja kull filgħaxija. Immeditajt ħafna fuq il-kwalitajiet taʼ Ġeħova u kif hu ħa ħsieb lill-qaddejja tiegħu. Dan saħħaħni ħafna.”
11. Il-Bibbja kif għenet lil oħt li mitilha r-raġel?
11 Meta nimmeditaw fuq il-Kelma t’Alla se jgħinna biex niffaċċjaw il-problemi tagħna b’attitudni pożittiva. Ejja naraw kif il-Bibbja għenet lil oħt li mitilha r-raġel. Anzjan issuġġerielha li taqra l-ktieb taʼ Ġob għax minnu tistaʼ titgħallem ħafna lezzjonijiet. Meta qratu, l-ewwel ħaġa li għamlet kienet li kkritikat lil Ġob għall-mod kif ħaseb. Hi rraġunat li Ġob kien qed jaħseb biss dwar il-problemi tiegħu. Imma mbagħad indunat li l-attitudni tagħha kienet bħal taʼ Ġob. Dan għenha biex tbiddel il-mod kif
kienet qed taħsibha u għenha wkoll biex tkampa mal-uġigħ minħabba li tilfet ir-raġel.12. Ġeħova kif juża lill-aħwa biex isaħħaħna?
12 Nissaħħu permezz tal-aħwa. Mod ieħor kif Ġeħova jsaħħaħ lill-qaddejja tiegħu hu permezz tal-aħwa. Pawlu kiteb li hu xtaq jinkuraġġixxi lill-aħwa u huma jinkuraġġixxu lilu. (Rum. 1:11, 12) Mary, li diġà semmejna, tieħu pjaċir tkun mal-aħwa. Hi tgħid: “Ġeħova uża lil aħwa li lanqas biss kienu jafu bil-problemi tiegħi. Huma inkuraġġewni ħafna b’dak li qaluli u anki b’xi kartolina. Dan kien dak li kelli bżonn. Kienu t’għajnuna wkoll l-aħwa nisa li għaddew minn problemi simili għal tiegħi u tgħallimt ħafna minn dak li għamlu huma. U l-anzjani dejjem iġegħluni nħossni maħbuba fil-kongregazzjoni.”
13. Kif nistgħu ninkuraġġixxu lil xulxin fil-laqgħat?
13 Wieħed mill-aħjar postijiet fejn nistgħu ninkuraġġixxu lil xulxin huwa fil-laqgħat. Meta tmur il-laqgħat, inti tistaʼ tinkuraġġixxi lil ħutek billi tgħidilhom li tħobbhom u tapprezza dak kollu li jagħmlu. Pereżempju, darba waħda qabel il-laqgħa, anzjan jismu Peter qal lil oħt li r-raġel mhux tal-istess twemmin: “Vera tinkuraġġini meta narak hawnhekk b’sitt itfal u mhux hekk biss, imma jkunu preparati biex jikkummentaw.” Dak il-ħin għajnejha mtlewlha bid-dmugħ u qaltlu: “Għadek ma tafx kemm kelli bżonn nismaʼ dan il-kliem.”
14. Ix-xogħol tal-ippritkar kif jistaʼ jgħinna?
14 Nissaħħu permezz tal-ippritkar. Meta nippritkaw lin-nies aħna nħossuna aħjar anki jekk ma jisimgħux il-messaġġ tagħna. (Prov. 11:25) Oħt jisimha Stacy indunat kemm l-ippritkar jistaʼ jgħinha. Meta xi ħadd fil-familja tagħha ġie maqtugħ mis-sħubija kienet tħossha vera mdejqa u kienet dejjem tistaqsi lilha nfisha, ‘Stajt nagħmel iktar biex ngħin?’ Kien diffiċli għaliha biex ma taħsibx dwar din il-problema. X’għenha biex tħossha aħjar? L-ippritkar! Meta kienet tipprietka, hi kienet taħseb dwar dak li għandhom bżonn in-nies fit-territorju tagħha. Hi tgħid: “Matul dak iż-żmien Ġeħova tani studenta tal-Bibbja li għamlet progress malajr. Dan vera inkuraġġieni. L-iktar ħaġa t’għajnuna li sibt kien l-ippritkar.”
15. X’tgħallimt minn dak li qalet Mary?
15 Minħabba ċ-ċirkustanzi, xi wħud jaf iħossuhom li mhux qed jagħmlu biżżejjed fil-ministeru. Jekk tħossok hekk, tinsiex li Ġeħova jkun kuntent meta inti tagħmel l-aħjar li tistaʼ. Erġaʼ kkunsidra l-eżempju taʼ Mary. Meta marret tipprietka f’post fejn in-nies jitkellmu b’lingwa differenti, ma tantx ħassitha utli. Hi tgħid, “Għal xi żmien kulma stajt nagħmel kien li nagħti kumment sempliċi, naqra xi vers tal-Bibbja, jew inħalli xi fuljett fil-ministeru.” Meta qabblet ruħha maʼ oħrajn li kienu jafu l-lingwa, hi kienet tħossha li mhix tajba biżżejjed. Però, ma baqgħetx taħsibha b’dan il-mod. Hi rrealizzat li Ġeħova xorta jistaʼ jużaha, anki jekk ma tafx il-lingwa sew. Hi tgħid, “Il-messaġġ tal-Bibbja hu sempliċi u dan jistaʼ jbiddel il-ħajja tan-nies.”
16. X’jistaʼ jgħin lil dawk li ma jistgħux joħorġu jippritkaw?
16 Ġeħova jaf li xi wħud minna jixtiequ jippritkaw imma ma jistgħux joħorġu mid-dar. Imma hu jistaʼ jgħinna biex
nippritkaw lil dawk li jieħdu ħsiebna, jew lin-nurses u t-tobba. Jekk noqogħdu nqabblu dak li qed nagħmlu issa maʼ dak li konna nagħmlu nistgħu nħossuna skuraġġiti. Imma jekk nifhmu kif Ġeħova qed jgħinna issa se jkollna s-saħħa biex niffaċċjaw il-provi bil-ferħ.17. Skont Ekkleżjasti 11:6, għala għandna nkomplu nagħmlu l-almu tagħna fl-ippritkar anki meta ma narawx riżultati mill-ewwel?
17 Aħna ma nafux liema żerriegħa li niżirgħu se taqbad u tibda tikber. (Aqra Ekkleżjasti 11:6.) Pereżempju Barbara, oħt li għandha fuq it-80, tipprietka bit-telefown u bl-ittri. F’waħda mill-ittri li bagħtet għamlet ukoll It-Torri tal-Għassa tal-1 taʼ Marzu tal-2014, li kien fih l-artiklu “X’għamel Alla għalik?” Hi ma kinitx taf li bagħtet l-ittra lil koppja li ma kinux baqgħu jaqdu lil Ġeħova. Huma qraw ir-rivista għal darba wara l-oħra u r-raġel ħass li Ġeħova kien qed ikellmu. Il-koppja bdew jattendu l-laqgħat u wara iktar minn 27 sena reġgħu bdew jaqdu lil Ġeħova. Immaġina kemm ħassitha inkuraġġita Barbara b’dak li rnexxielha twettaq bl-ittra li bagħtet!
18. Xi rridu nagħmlu biex Ġeħova jagħtina s-saħħa?
18 Ġeħova jagħtina ħafna affarijiet biex isaħħaħna, bħal pereżempju t-talb, il-Bibbja, l-aħwa, u l-ippritkar. Meta nieħdu vantaġġ minn dawn l-affarijiet, nuru lil Ġeħova li aħna nafdaw fih u nixtiequ li hu jgħinna. Għalhekk, għandna dejjem nafdaw f’Missierna tas-sema li jieħu pjaċir “juri s-saħħa tiegħu għan-nom taʼ dawk li qalbhom hi sħiħa lejh.”—2 Kron. 16:9.
GĦANJA 61 Irsistu, intom ix-Xhieda!
^ par. 5 Aħna qed ngħixu fi żminijiet diffiċli, imma Ġeħova se jagħtina s-saħħa biex nissaportu. F’dan l-artiklu se naraw kif Ġeħova għen lil Pawlu u lil Timotju biex ikomplu jaqduh minkejja l-problemi li kellhom. Se niddiskutu wkoll erbaʼ affarijiet li tana Ġeħova biex b’hekk inkomplu naqduh.
^ par. 2 L-isem ġie mibdul.