ARTIKLU GĦALL-ISTUDJU 18
Tħalli Xejn Ifixklek Milli Timxi Wara Ġesù!
“Hieni min ma jitfixkilx minħabba fija.”—MT. 11:6.
GĦANJA 54 “Din hi t-triq”
ĦARSA BIL-QUDDIEM *
1. Meta għedt il-veritajiet tal-Bibbja lil oħrajn xi ħsibt li se jiġri?
TIFTAKAR meta sirt taf bil-verità kemm kienu jidhru ċari għalik il-veritajiet tal-Bibbja? Forsi ħsibt li kulħadd se jkun irid jitgħallem dak li qed titgħallem int. Int kont ċert li l-messaġġ tal-Bibbja se jgħinhom fil-ħajja tagħhom u jagħtihom tama mill-isbaħ għall-futur. (Salm 119:105) Għalhekk, bdejt tgħid lil tal-familja u lill-ħbieb tiegħek dak kollu li bdejt titgħallem. Imma x’ġara? L-affarijiet ma marrux kif ħsibt inti għax ħafna m’aċċettawx dak li għedtilhom.
2-3. Il-maġġorparti tan-nies fi żmien Ġesù kif aġixxew minħabba dak li qal u għamel?
2 M’għandniex għalfejn nistagħġbu jekk oħrajn ma jaċċettawx il-messaġġ tagħna. Anke lil Ġesù, ħafna nies xorta m’aċċettawhx minkejja li bl-għajnuna t’Alla għamel ħafna mirakli. Pereżempju, meta Ġesù qajjem lil Lazzru mill-mewt dawk taʼ kontrih m’emmnuhx. Barra minn hekk, il-mexxejja Lhud m’emmnux li kien il-Messija u riedu joqtlu lilu u lil Lazzru!—Ġw. 11:47, 48, 53; 12:9-11.
3 Ġesù kien jaf li ħafna nies ma kinux se jaċċettaw li hu kien il-Messija. (Ġw. 5:39-44) Tant li hu qal lid-dixxipli taʼ Ġwanni l-Battista: “Hieni min ma jitfixkilx minħabba fija.” (Mt. 11:2, 3, 6) Ħafna għala m’aċċettawx lil Ġesù?
4. X’se nikkunsidraw f’dan l-artiklu?
4 F’dan l-artiklu u taʼ warajh se naraw erbaʼ raġunijiet
għala n-nies fi żmien Ġesù m’aċċettawhx. Se naraw ukoll għala ħafna nies illum ma jaċċettawx il-messaġġ tagħna. U l-iktar ħaġa importanti li se nitgħallmu hi kif nistgħu nsaħħu l-fidi tagħna f’Ġesù biex xejn ma jwaqqafna milli nkunu d-dixxipli tiegħu.(1) IL-PASSAT TAʼ ĠESÙ
5. Għala jistaʼ jkun li xi wħud ħasbu li Ġesù mhux il-Messija?
5 Ħafna tfixklu minħabba l-passat taʼ Ġesù. Għalkemm huma aċċettaw li Ġesù kien għalliem tajjeb u li għamel il-mirakli, għalihom kien sempliċiment tifel taʼ mastrudaxxa. Barra minn hekk, hu kien minn Nazaret, belt li għal ħafna ma kinitx importanti. Anke Natanjel, li mbagħad sar dixxiplu taʼ Ġesù, għall-ewwel qal: “Tistaʼ xi ħaġa tajba toħroġ minn Nazaret?” (Ġw. 1:46) Natanjel jaf ma kienx iħobb il-belt fejn Ġesù trabba jew forsi kellu f’moħħu l-profezija taʼ Mikea 5:2 li kienet tgħid li l-Messija kellu jitwieled f’Betlem u mhux f’Nazaret.
6. In-nies fi żmien Ġesù x’kellhom jagħmlu biex ikunu jafu li Ġesù kien il-Messija?
6 L-Iskrittura x’tgħid? Il-profeta Isaija bassar li l-għedewwa taʼ Ġesù ma kinux se jagħtu kas “id-dettalji taʼ nislu,” jiġifieri, il-linja li kien ġej minnha l-Messija. (Is. 53:8) Kien hemm ħafna dettalji li ġew imbassrin. Kieku studjaw l-Iskrittura sew, kienu se jifhmu li Ġesù kellu jitwieled f’Betlem u jiġi mil-linja tas-Sultan David. (Lq. 2:4-7) Ġesù kien twieled fil-post li bassret il-profezija taʼ Mikea 5:2. Allura, x’kienet il-problema? In-nies kienu jaslu għall-konklużjoni mingħajr ma kien ikollhom il-fatti kollha, u għalhekk tfixklu.
7. Illum il-ġurnata għala ħafna nies ma jaċċettawx il-messaġġ tax-Xhieda taʼ Ġeħova?
7 Qegħdin naraw l-istess problema llum? Iva. Ħafna min-nies taʼ Ġeħova llum mhumiex sinjuri jew nies importanti. Għalhekk, ħafna nies jaħsbu li aħna nies “komuni u taʼ ftit skola.” (Atti 4:13) Xi nies jaħsbu li x-Xhieda taʼ Ġeħova m’għandhomx jgħallmu l-Bibbja għax ma marrux skejjel reliġjużi. Oħrajn jgħidu li r-reliġjon tax-Xhieda taʼ Ġeħova hija “reliġjon Amerikana.” Imma l-verità hi li 1 minn kull 7 mix-Xhieda taʼ Ġeħova jgħix fl-Istati Uniti. U terġaʼ oħrajn jgħidu li x-Xhieda taʼ Ġeħova ma jemmnux f’Ġesù. Maż-żmien, xi wħud qalu li aħna “Komunisti,” “spiji Amerikani,” u “estremisti.” Ħafna nies minħabba li jisimgħu dawn l-affarijiet u ma jkunux jafu l-fatti kollha jitfixklu.
8. Skont Atti 17:11, in-nies x’għandhom jagħmlu biex ikunu jafu min huma l-qaddejja t’Alla?
8 Persuna kif tistaʼ tevita li titfixkel? In-nies iridu jeżaminaw il-fatti kollha. Luqa li kiteb l-Evanġelju kien determinat li jagħmel hekk. Hu ħadem iebes biex ifittex “kollox mill-bidu b’eżattezza.” Hu ried li l-qarrejja jkunu jafu “bis-sħiħ iċ-ċertezza taʼ l-affarijiet” li kienu semgħu dwar Ġesù. (Lq. 1:1-4) Il-Lhud f’Berea għamlu bħal Luqa. Meta semgħu l-aħbar tajba dwar Ġesù għall-ewwel darba huma fittxew fl-Iskrittura Ebrajka biex ikunu ċerti minn dak li semgħu. (Aqra Atti 17:11.) Bl-istess mod, in-nies illum iridu jeżaminaw il-fatti. Huma għandhom iqabblu dak li jgħallmu x-Xhieda taʼ Ġeħova maʼ dak li tgħid il-Bibbja. Iridu jistudjaw ukoll dak li għamlu x-Xhieda taʼ Ġeħova matul is-snin. Jekk isiru jafu l-fatti kollha mhu se jħallu xejn ifixkilhom.
(2) ĠESÙ M’GĦAMILX MIRAKLI BIEX JAGĦTI PROVA LI HU L-MESSIJA
9. X’ġara meta Ġesù m’aċċettax li jagħtihom sinjal mis-sema?
9 Għal xi nies dak li għallem Ġesù ma kienx biżżejjed. Huma riedu iktar minn hekk, biex jemmnu li hu kien il-Messija “talbuh jurihom sinjal mis-sema.” (Mt. 16:1) Jistaʼ jkun li talbuh biex jagħmel dan minħabba dak li qraw f’Danjel 7:13, 14. Però, kien għadu mhux il-waqt taʼ Ġeħova biex iwettaq din il-profezija. Dak li għallem Ġesù kellu jkun biżżejjed għalihom biex jindunaw li hu kien il-Messija. Imma meta Ġesù m’għamilx dak li talbuh huma m’aċċettawhx.—Mt. 16:4.
10. Ġesù kif wettaq dak li pprofetizza Isaija dwar il-Messija?
10 L-Iskrittura x’tgħid? Dwar il-Messija l-profeta Isaija kiteb: “Ma jgħajjatx jew jgħolli leħnu, u ma jsemmax leħnu fit-triq.” (Is. 42:1, 2) Meta wettaq il-ministeru tiegħu Ġesù qatt ma ġibed l-attenzjoni lejh. Ġesù ma beniex tempji kbar, ma libisx ilbies speċjali, u ma riedx li n-nies jgħajtulu b’xi titlu. Anke meta ħajtu kienet fil-periklu, hu m’aċċettax li jagħmel miraklu quddiem is-Sultan Erodi. (Lq. 23:8-11) Ġesù għamel diversi mirakli imma l-ippritkar kien l-iktar ħaġa importanti għalih. U għalhekk li qal lid-dixxipli tiegħu: “Għal dan intbgħatt.”—Lq. 4:43.
11. X’ideat żbaljati għandhom in-nies dwarna?
11 Qegħdin naraw l-istess problema llum? Iva. Illum ħafna nies jimpressjonaw ruħhom b’katidrali kbar li jkun fihom ħafna affarijiet li jiswew il-flus, mexxejja reliġjużi li għandhom titli importanti, u b’ħafna festi li mhumiex ibbażati fuq l-Iskrittura. Imma n-nies li jattendu l-laqgħat tagħhom x’qed jitgħallmu dwar Alla u l-iskop tiegħu?
Dawk li jattendu l-laqgħat tagħna qed jitgħallmu xi jrid Ġeħova minna. Is-Swali tas-Saltna tagħna huma sempliċi u nodfa. Dawk li jmexxu ma jilbsux ilbies speċjali, u m’għandhomx titli li jagħmluhom jidhru importanti. U dak li nemmnu u ngħallmu huwa bbażat mill-Bibbja. Minkejja dan ħafna nies ma jaċċettawx il-messaġġ tagħna għax jaħsbu li l-mod kif inqimu lil Alla hu sempliċi u għax dak li ngħallmu ma jdoqqx għal widnejhom.12. Kif jgħid Ebrej 11:1, 6, il-fidi tagħna fuq xiex għandha tkun ibbażata?
12 Kif nistgħu nevitaw li nitfixklu? L-appostlu Pawlu qal lill-Kristjani li kienu qed jgħixu f’Ruma: “Il-fidi tiġi minn dak li nstemaʼ. Mill-banda l-oħra, dak li nstemaʼ hu permezz tal-kelma dwar Kristu.” (Rum. 10:17) Għalhekk, aħna nsaħħu l-fidi tagħna billi nistudjaw il-Bibbja u mhux billi niċċelebraw festi kbar u sbieħ li l-Bibbja tgħid li huma ħżiena. Il-fidi tagħna għandha tkun ibbażata fuq għarfien eżatt, għax ‘mingħajr fidi impossibbli li nogħġbu sew lil Alla.’ (Aqra Ebrej 11:1, 6.) Mela m’għandniex bżonn naraw sinjali kbar mis-sema biex nemmnu li għandna l-verità. Jekk nistudjaw il-Bibbja sew, se nsaħħu l-fidi tagħna u nkunu konvinti li għandna l-verità.
(3) ĠESÙ MA SEGWIEX IT-TRADIZZJONIJIET TAL-LHUD
13. Ħafna nies għala ħaduha kontra Ġesù?
13 Fi żmien Ġesù, id-dixxipli taʼ Ġwanni l-Battista kienu sorpriżi għax id-dixxipli taʼ Ġesù ma kinux isumu. Ġesù spjega li ma kellhomx għalfejn isumu meta hu kien għadu ħaj. (Mt. 9:14-17) Minkejja dan, il-Fariżej u oħrajn li kienu kontra Ġesù ħaduha kontrih għax ma mexiex mat-tradizzjonijiet tagħhom. Huma kienu rrabjati għal Ġesù meta fejjaq lin-nies fis-Sabat. (Mk. 3:1-6; Ġw. 9:16) Mill-banda l-oħra, huma kienu kburin li jżommu mas-Sabat, però ma kinitx problema għalihom li jagħmlu n-negozju fit-tempju. U huma ħaduha bi kbira meta Ġesù rrabja magħhom u keċċiehom mit-tempju. (Mt. 21:12, 13, 15) Meta Ġesù kien qed jgħallem fis-sinagoga ġewwa Nazaret u semma l-eżempji taʼ wħud Iżraelin tal-passat biex juri n-nuqqas taʼ fidi u l-egoiżmu tagħhom, irrabjaw ħafna. (Lq. 4:16, 25-30) Ħafna nies tfixklu għax Ġesù m’għamilx dak li huma ħasbu li kellu jagħmel.—Mt. 11:16-19.
14. Ġesù għala ma qabilx mat-tradizzjonijiet taʼ nies li kienu jmorru kontra l-Iskrittura?
14 L-Iskrittura x’tgħid? Permezz tal-profeta Isaija, Ġeħova qal: “Dan il-poplu resaq qrib b’fommu, u gglorifikani biss b’xofftejh, u biegħed qalbu minni, u jitgħallem il-kmandi tal-bnedmin u jqishom bħala l-biżaʼ minni.” (Is. 29:13) Ġesù kellu raġun ma jaqbilx mat-tradizzjonijiet li għamlu huma għax kienu kontra dak li tgħid il-Bibbja. Dawk li ħasbu li l-liġijiet u t-tradizzjonijiet li għamlu kienu iktar importanti mill-Iskrittura ħaduha kontra Ġeħova u l-Messija li hu bagħat.
15. Illum għala ħafna nies ma jaqblux max-Xhieda taʼ Ġeħova?
15 Qegħdin naraw l-istess problema llum? Iva. Ħafna nies illum jiħduha kontra x-Xhieda taʼ Ġeħova għax dawn ma jiċċelebrawx festi li mhumiex ibbażati fuq il-Kelma t’Alla, bħall-birthdays u l-Milied. Oħrajn jirrabjaw meta x-Xhieda taʼ Ġeħova ma jiċċelebrawx festi nazzjonali jew għax ma jsegwux id-drawwiet tagħhom li mhumiex Skritturali waqt il-funerali. Dawn jitfixklu għax huma jaħsbu li qed iqimu lil Alla b’mod tajjeb. Imma ma jistgħux jogħġbu lil Alla jekk jiċċelebraw it-tradizzjonijiet tal-bnedmin minflok jimxu maʼ dak li tgħid il-Bibbja.—Mk. 7:7-9.
16. Skont il-versi taʼ Salm 119, xi rridu nagħmlu u x’għandna nevitaw?
16 Kif nistgħu nevitaw li nitfixklu? Billi jkollna mħabba kbira għal-liġijiet taʼ Ġeħova u l-prinċipji tiegħu. (Aqra Salm 119:97, 113, 163-165.) Jekk inħobbu lil Ġeħova mhux se niċċelebraw festi jew nieħdu sehem fit-tradizzjonijiet li ma jogħġbuhx. Mhu se nħallu xejn ikun iktar importanti mill-imħabba tagħna għal Ġeħova.
(4) ĠESÙ MA NDAĦALX FIL-POLITIKA
17. In-nies fi żmien Ġesù x’ħasbu li se jagħmel il-Messija?
17 Xi nies fi żmien Ġesù riedu li jinbidel il-gvern. Huma ħasbu li l-Messija se jeħlishom mill-ħakma Rumana. Imma meta riedu jagħmlu lil Ġesù sultan hu m’aċċettax. (Ġw. 6:14, 15) Il-qassisin u oħrajn bdew jibżgħu li Ġesù kien se jipprova jibdel il-gvern u għalhekk ir-Rumani kienu se jirrabjaw u jiħdulhom il-poter li kienu tawhom. Minħabba li kienu inkwetati fuq dawn l-affarijiet, ħafna Lhud tfixklu.
18. Ħafna Lhud liema profeziji dwar il-Messija injoraw?
18 L-Iskrittura x’tgħid? Għalkemm ħafna profeziji bassru li l-Messija kien se jkun Gwerrier, profeziji oħrajn bassru li l-ewwel kellu jmut għad-dnubiet tagħna. (Is. 53:9, 12) Il-Lhud għala kellhom ideat żbaljati dwar il-Messija? Għax huma ffokaw biss fuq profeziji li kienu juru li se jeħilsuhom mill-problemi tagħhom.—Ġw. 6:26, 27.
19. Liema ideat żbaljati dwarna jfixklu lin-nies?
19 Qegħdin naraw l-istess problema llum? Iva. Ħafna nies illum jitfixklu minħabba li aħna ma niħdux sehem fil-politika. Huma jaħsbu li aħna għandna nivvotaw. Imma kieku kellna nivvotaw biex nagħżlu mexxej inkunu qegħdin niċħdu lil Ġeħova. (1 Sam. 8:4-7) In-nies jaħsbu wkoll li għandna nibnu skejjel, sptarijiet, u nagħmlu karità biex ngħinu lill-poplu. Imma minħabba li naħdmu iebes biex nippritkaw il-messaġġ tas-Saltna minflok ma nipprovaw insolvu l-problemi tad-dinja huma jitfixklu.
20. Skont dak li qal Ġesù f’Mattew 7:21-23, x’għandha tkun l-iktar ħaġa importanti għalina?
20 Kif nistgħu nevitaw li nitfixklu? (Aqra Mattew 7:21-23.) Il-mira tagħna għandha tkun li nagħmlu x-xogħol li kkmandana Ġesù. (Mt. 28:19, 20) Qatt m’għandna nħallu l-politika jew l-affarijiet li qed jiġru fid-dinja jaljenawna. Aħna nħobbuhom lin-nies u naħsbu dwar il-problemi tagħhom, imma aħna nafu li l-aħjar mod li nistgħu ngħinuhom hu billi ngħallmuhom dwar is-Saltna u ngħinuhom jibnu ħbiberija maʼ Ġeħova.
21. X’għandna nkunu determinati li nagħmlu?
21 F’dan l-artiklu semmejna erbaʼ affarijiet li fixklu lil ħafna nies fi żmien Ġesù u li jistgħu jġiegħlu lil xi wħud ma jaċċettawx il-messaġġ tagħna llum. Imma dawn l-erbaʼ affarijiet biss hemm li jistgħu jfixkluna? Le. Fl-artiklu li jmiss se nikkunsidraw erbaʼ affarijiet oħra. Jalla ma nħallu xejn ifixkilna milli nkomplu nsaħħu l-fidi tagħna!
GĦANJA 56 Għożż il-verità
^ par. 5 Minkejja li Ġesù kien l-aqwa għalliem li qatt eżista, ħafna nies li għexu fi żmienu m’aċċettawhx. Għala? F’dan l-artiklu se nikkunsidraw erbaʼ raġunijiet. Se naraw ukoll għala ħafna nies illum jitfixklu minħabba dak li jgħidu u jagħmlu x-Xhieda taʼ Ġeħova. U xi ħaġa oħra importanti li se naraw hi kif fidi soda f’Ġesù tgħinna biex ma nitfixklux.
^ par. 60 X’TGĦIDILNA L-ISTAMPA: Filippu qed jinkuraġġixxi lil Natanjel biex jiltaqaʼ maʼ Ġesù.
^ par. 62 X’TGĦIDILNA L-ISTAMPA: Ġesù jipprietka l-aħbar tajba.
^ par. 64 X’TGĦIDILNA L-ISTAMPA: Ġesù jfejjaq raġel b’idu niexfa u dawk taʼ kontrih iħarsu lejh.
^ par. 66 X’TGĦIDILNA L-ISTAMPA: Ġesù jaħrab lejn il-muntanja waħdu.