1-2. Kittieb x’qal, u f’dan l-​artiklu x’se nikkunsidraw?

ILLUM miljuni taʼ nies jgħidu li jemmnu f’Ġesù, imma ma jagħmlux l-​affarijiet li jgħallem hu. (2 Tim. 4:3, 4) Fil-​fatt, kittieb darba qal: “Kieku kellu jkun hawn raġel ieħor magħna u jgħid l-​affarijiet kif qalhom Ġesù . . . , konna se nagħmlulu bħalma għamlu lil Ġesù elfejn sena ilu? . . . It-​tweġiba tkun iva.”

² Meta Ġesù kien fuq l-​art ħafna nies semgħuh jgħallem u rawh jagħmel il-​mirakli, imma huma m’emmnux li kien il-​Messija. Għala? Fl-​artiklu taʼ qabel dan iddiskutejna erbaʼ raġunijiet għala n-​nies fi żmien Ġesù tfixklu b’dak li qal u għamel. Ejja nikkunsidraw erbaʼ raġunijiet oħra. Hekk kif naraw dawn l-​erbaʼ raġunijiet, se naraw għala n-​nies illum ma jaċċettawx lis-​segwaċi taʼ Ġesù u kif aħna m’għandna nħallu xejn iwaqqafna milli nkomplu naqdu lil Ġeħova.

3. Xi wħud b’liema affarijiet li għamel Ġesù tfixklu?

³ Meta Ġesù kien fuq l-​art qattaʼ l-​ħin maʼ kulħadd. Hu kiel maʼ dawk li kienu sinjuri u li kellhom il-​poter, imma qattaʼ l-​ħin ukoll maʼ dawk li kienu foqra u li kellhom il-​problemi. Barra minn hekk, hu kien juri ħniena maʼ dawk li oħrajn kienu jqisuhom “midinbin.” Dan fixkel lil dawk li kienu kburin. Huma staqsew lid-​dixxipli tiegħu: “Għala tieklu u tixorbu mal-​kolletturi tat-​taxxi u l-​midinbin?” Imbagħad Ġesù wiġibhom: “Dawk li huma f’saħħithom  m’għandhomx bżonn tabib, imma dawk li huma morda iva. Ma ġejtx insejjaħ lin-​nies sewwa imma lill-​midinbin għall-​indiema.”—Lq. 5:29-​32.

4. Skont il-​profeta Isaija, il-​Lhud x’kellhom ikunu jafu dwar il-​Messija?

⁴ L-​Iskrittura x’tgħid? Ħafna snin qabel ġie l-​Messija, il-​profeta Isaija bassar li n-​nies ma kinux se jaċċettawh. Isaija kiteb: “Kien mistmerr u skartat min-​nies . . . U bħallikieku dorna biex ma nħarsux lejn wiċċu. Hu kien mistmerr u aħna ma stmajniehx.” (Is. 53:3) Il-​profezija bassret li l-​Messija kellu jkun “skartat min-​nies.” Għalhekk, il-​Lhud fi żmien Ġesù kellhom ikunu jafu li n-​nies ma kinux se jaċċettawh.

5. Ħafna nies illum kif iqisu lis-​segwaċi taʼ Ġesù?

⁵ Qegħdin naraw l-​istess problema llum? Iva. Ħafna mexxejja reliġjużi jieħdu pjaċir meta mal-​knisja tagħhom jingħaqdu nies li għandhom il-​poter, nies sinjuri, u nies li jidhru bravi. U huma jaċċettaw lil dawn in-​nies minkejja li jagħmlu affarijiet li Alla jobgħod. Imma dawn il-​mexxejja reliġjużi, lix-​Xhieda taʼ Ġeħova ma jirrispettawhomx minkejja li jgħixu fi qbil mal-​livelli t’Alla. Dan jaqbel mal-​kliem tal-​appostlu Pawlu meta qal li Alla jagħżel “lil dawk li huma mmaqdrin.” (1 Kor. 1:26-​29) Imma, għal Ġeħova l-​qaddejja leali tiegħu huma prezzjużi.

6. Kif nistgħu nimitaw dak li qal Ġesù f’​Mattew 11:25, 26?

⁶ Kif nistgħu nevitaw li nitfixklu? (Aqra Mattew 11:25, 26.) Tħallix il-​mod kif in-​nies iqisu lix-​Xhieda taʼ Ġeħova jinfluwenzak. Ftakar li Ġeħova juża biss lin-​nies umli biex jagħmlu x-​xogħol tiegħu. (Salm 138:6) U aħseb dwar kemm għamel xogħol billi uża lil dawn in-​nies li d-​dinja tqishom nies komuni.

7. Ġesù għala sejjaħ lill-​Fariżej ipokriti u huma kif aġixxew?

⁷ B’kuraġġ Ġesù qal lill-​mexxejja reliġjużi taʼ żmienu li huma ma kinux qed jgħallmu lin-​nies kif għandhom iqimu lil Ġeħova. Pereżempju, Ġesù wera kemm il-​Fariżej kienu ipokriti għax huma kienu aktar iffokati fuq kif għandhom jaħslu jdejhom milli fuq kif jieħdu ħsieb lill-​ġenituri tagħhom. (Mt. 15:1-​11) Id-​dixxipli taʼ Ġesù jistaʼ jkun li kienu sorpriżi bil-​kliem li qal. Fil-​fatt huma staqsewh: “Taf li l-​Fariżej tfixklu b’dak li għedt?” Ġesù wiġibhom: “Kull xitla li ma ħawwilx Missieri tas-​sema titqaċċat mill-​għeruq. Ħalluhom. Dawk gwidi għomja. Għalhekk, jekk agħma jmexxi lil agħma, it-​tnejn jaqgħu f’ħofra.” (Mt. 15:12-​14) Minkejja li l-​mexxejja reliġjużi kienu rrabjati maʼ Ġesù minħabba dak li qal, hu ma waqafx jgħid il-​verità.

8. Ġesù kif wera li Alla ma jaċċettax it-​tagħlim reliġjuż kollu?

⁸ Ġesù wera wkoll li ċertu tagħlim reliġjuż kien falz. Hu qal li Alla ma kienx se jaċċetta t-​tagħlim reliġjuż kollu. Infatti, Ġesù qal li ħafna nies se jkunu qegħdin fi triq spazjuża li twassal għall-​qerda. Mill-​banda l-​oħra, ftit se jkunu dawk fi triq imħarbta li twassal għall-​ħajja taʼ dejjem. (Mt. 7:13, 14) Hu għamilha ċara li xi nies se jgħidu li jqimu lil Alla imma ma jkunx vera. Ġesù wissiena: “Ħarsu ruħkom mill-​profeti foloz li jiġu għandkom lebsin taʼ nagħaġ, imma minn ġewwa huma lpup imġewħin. Mill-​frott tagħhom tagħrfuhom.”—Mt. 7:15-​20.

9. Ġesù liema tagħlim reliġjuż wera li kien falz?

 ⁹ L-​Iskrittura x’tgħid? Il-​profeziji tal-​Bibbja dwar il-​Messija bassru li hu kellu jkollu ħafna żelu għad-​dar taʼ Ġeħova. (Salm 69:9; Ġw. 2:14-​17) Dan iż-​żelu ġiegħel lil Ġesù biex jikxef it-​tagħlim reliġjuż falz u d-​drawwiet tagħhom. Pereżempju, il-​Fariżej kienu jemmnu li r-​ruħ ma tmutx, imma Ġesù għallem li meta xi ħadd imut ikun bħallikieku raqad. (Ġw. 11:11) Is-​Sadduċej ma kinux jemmnu fl-​irxoxt, imma Ġesù qajjem lill-​ħabib tiegħu Lazzru. (Ġw. 11:43, 44; Atti 23:8) Il-​Fariżej kienu jgħallmu li Alla jiddeċiedi dak li jiġrilna jew dak li nagħmlu fil-​ħajja tagħna, imma Ġesù għallem li Alla jħallina fil-​libertà biex nagħżlu aħna jekk irridux naqduh.—Mt. 11:28.

10. Illum għala ħafna nies ma jaċċettawniex?

¹⁰ Qegħdin naraw l-​istess problema llum? Iva. Meta nużaw il-​Bibbja biex nuru li xi tagħlim reliġjuż huwa falz, ħafna nies ma jaċċettawniex. Il-​mexxejja reliġjużi jgħallmu li Alla jikkastiga lin-​nies fl-​infern. Huma jużaw dan it-​tagħlim falz biex jikkontrollaw lin-​nies. Bħala qaddejja taʼ Ġeħova, li nqimu Alla kollu mħabba, nuru lin-​nies li dan it-​tagħlim hu falz. Il-​mexxejja reliġjużi jgħallmu wkoll li r-​ruħ ma tmutx. Aħna nuru lin-​nies li dan it-​tagħlim mhux fil-​Bibbja għax kieku ħadd m’għandu bżonn jiġi rxoxtat. U minkejja li ħafna reliġjonijiet jgħallmu li kulħadd għandu d-​destin tiegħu, aħna ngħallmu li dan mhux minnu u n-​nies jistgħu jagħżlu huma jekk jaqdux lil Alla. Il-​mexxejja reliġjużi kif iħossuhom meta aħna ngħidu li qed jgħallmu tagħlim falz? Spiss, huma jirrabjaw magħna u jiħduha kontrina!

11. Skont il-​kliem li qal Ġesù fi Ġwanni 8:45-​47, Alla x’jitolbu lill-​poplu tiegħu?

¹¹ Kif nistgħu nevitaw li nitfixklu? Jekk inħobbu l-​verità se nemmnu u nobdu dak li jgħidilna Alla. (Aqra Ġwanni 8:45-​47.) Għall-​kuntrarju taʼ Satana, aħna qatt mhu se nitilqu l-​verità. Aħna qatt mhu se nagħmlu xi ħaġa li tmur kontra  dak li nemmnu. (Ġw. 8:44) Alla jitlob lill-​poplu tiegħu biex ‘jistmerr dak li hu ħażin u jżomm sod maʼ dak li hu tajjeb’ eżatt bħalma għamel Ġesù.—Rum. 12:9; Ebr. 1:9.

12. Il-​mod kif miet Ġesù, għala fixkel lil ħafna Lhud?

¹² X’kienet raġuni oħra għala l-​Lhud m’aċċettawx lil Ġesù? Pawlu qal: “Aħna nippridkaw lil Kristu msammar maʼ zokk, [dan] tfixkil għal-​Lhud.” (1 Kor. 1:23) Għala l-​mod kif miet Ġesù fixkel lil ħafna Lhud? Għax għalihom la Ġesù miet fuq iz-​zokk tat-​tortura kien kriminal u midneb. B’hekk m’emmnux li kien il-​Messija.—Dt. 21:22, 23.

13. Dawk li tfixklu minħabba Ġesù x’ma ndunawx?

¹³ Il-​Lhud li tfixklu minħabba l-​mewt taʼ Ġesù ma ndunawx li hu kien innoċenti, li kien akkużat b’mod falz, u li ġie trattat b’mod inġust. Dawk li taw is-​sentenza lil Ġesù ma kienx jimpurtahom mill-​ġustizzja. L-​imħallfin tal-​qorti suprema Lhudija ltaqgħu taʼ malajr u m’għamlux dak li kienet titlob il-​liġi. (Lq. 22:54; Ġw. 18:24) L-​imħallfin kienu korrotti u huma ppruvaw ukoll ifittxu xhieda falza kontra Ġesù sabiex jagħtuh il-​mewt. Imma huma ma rnexxilhomx, u għalhekk li l-​qassis il-​kbir beda jipprova jġiegħel lil Ġesù jgħid xi ħaġa ħażina biex b’hekk ikunu jistgħu jakkużawh. Din kienet kontra l-​liġi. (Mt. 26:59; Mk. 14:55-​64) U wara li Ġesù ġie rxoxtat, dawk l-​imħallfin korrotti, lis-​suldati li kienu qed jieħdu ħsieb il-​qabar taʼ Ġesù tawhom “biċċiet tal-​fidda” biex jigdbu u jgħidu li d-​dixxipli taʼ Ġesù marru billejl u serqu l-​ġisem tiegħu.—Mt. 28:11-​15.

14. L-​Iskrittura x’bassret dwar il-​mewt tal-​Messija?

¹⁴ L-​Iskrittura x’tgħid? Għalkemm ħafna Lhud fi żmien Ġesù ma kinux jafu li l-​Messija l-​ewwel kellu jmut, innotaw x’bassret l-​Iskrittura: “Hu ferraʼ ruħu sal-​mewt, u kien magħdud maʼ dawk li  jiksru l-​liġi; u hu nnifsu ġarr id-​dnub taʼ ħafna nies, u qabeż għal dawk li jiksru l-​liġi.” (Is. 53:12) Għalhekk il-​Lhud ma kellhomx għalfejn jitfixklu meta qatlu lil Ġesù bħala midneb.

15. Liema akkużi kontra x-​Xhieda taʼ Ġeħova fixklu lil xi wħud?

¹⁵ Qegħdin naraw l-​istess problema llum? Iva! Ġesù ġie akkużat b’mod falz u qatgħuhielu għall-​mewt, u llum ix-​Xhieda taʼ Ġeħova qed jesperjenzaw inġustizzji simili. Pereżempju, fl-​Istati Uniti, bejn l-​1930 u l-​1950, kien hemm ħafna każijiet fil-​qorti biex aħna nkunu nistgħu nkomplu naqdu lil Ġeħova bil-​libertà. Xi mħallfin urew biċ-​ċar li kienu kontrina. Fi Quebec, il-​Kanada, il-​Knisja u l-​Gvern ħadmu flimkien biex iwaqqfu x-​xogħol tagħna. Ħafna pubblikaturi spiċċaw fil-​ħabs għax tkellmu man-​nies dwar is-​Saltna t’Alla. Fil-​Ġermanja, il-​gvern Nazist qatel ħafna żgħażagħ leali. U fi snin riċenti, ħutna fir-​Russja tressqu l-​qorti u ġew mitfugħin fil-​ħabs għax tkellmu dwar il-​Bibbja, xi ħaġa li għall-​awtoritajiet hi “attività estremista.” U t-​Traduzzjoni tad-​Dinja l-​Ġdida taʼ l-​Iskrittura Mqaddsa bir-​Russu ma tistax tintuża għax qalu li fiha “informazzjoni estremista” minħabba li fiha l-​isem Ġeħova.

16. Kif juri l-​1 Ġwanni 4:1, għala m’għandniex inħallu stejjer foloz dwar ix-​Xhieda taʼ Ġeħova jfixkluna?

¹⁶ Kif nistgħu nevitaw li nitfixklu? Kun af il-​fatti kollha. Fil-​Prietka taʼ fuq il-​Muntanja, Ġesù wissa lil dawk li kienu qed jisimgħuh li xi wħud ‘bil-​gideb kienu se jgħidu kull xorta taʼ ħażen kontrihom.’ (Mt. 5:11) Dan il-​gideb jiġi minn Satana. Hu jinfluwenza lin-​nies biex ixerrdu gideb li jweġġaʼ kontra dawk li jħobbu l-​verità. (Riv. 12:9, 10) Aħna ma rridux nisimgħu dan il-​gideb. Qatt m’għandna nħallu dan il-​gideb iwaqqafna milli nkomplu naqdu lil Ġeħova jew idgħajjef il-​fidi tagħna.—Aqra l-​1 Ġwanni 4:1.

17. L-​affarijiet li ġraw qabel il-​mewt taʼ Ġesù kif setgħu fixklu lil xi wħud?

¹⁷ Ftit qabel Ġesù miet wieħed mill-​appostli tiegħu ttradieh. Appostlu ieħor qal li ma jafux tliet darbiet u l-​appostli kollha abbandunawh f’dak il-​lejl qabel miet. (Mt. 26:14-​16, 47, 56, 75) Ġesù ma kienx sorpriż b’dan, u hu qal li dawn l-​affarijiet kellhom jiġru. (Ġw. 6:64; 13:21, 26, 38; 16:32) Meta xi wħud raw dawn l-​affarijiet, jistaʼ jkun li tfixklu u b’hekk ma ridux ikunu dixxipli taʼ Ġesù. Xi wħud forsi qalu, ‘Jekk dan hu l-​mod kif jaġixxu, jien ma rridx inkun wieħed minnhom!’

18. Liema profeziji twettqu bl-​affarijiet li ġraw lil Ġesù qabel miet?

¹⁸ L-​Iskrittura x’tgħid? Mijiet taʼ snin qabel Ġesù ġie fuq l-​art, Ġeħova permezz tal-​Kelma tiegħu bassar li l-​Messija kellu jkun tradut għal 30 biċċa tal-​fidda. (Żak. 11:12, 13) Dak li kellu jittradih kien se jkun wieħed mill-​ħbieb tal-​qalb tiegħu. (Salm 41:9) Il-​profeta Żakkarija kiteb ukoll: “Idrob lir-​ragħaj, u ħa jitferrxu dawk tal-​merħla.” (Żak. 13:7) Nies sinċiera mhux se jitfixklu minħabba dawn l-​affarijiet, minflok se jsaħħu l-​fidi tagħhom għax jaraw li l-​profeziji twettqu permezz taʼ Ġesù.

19. Dawk li huma sinċiera x’jafu?

¹⁹ Qegħdin naraw l-​istess problema llum? Iva. F’dawn l-​aħħar snin, uħud  mix-​Xhieda telqu l-​verità, saru apostati, u ppruvaw ifixklu lil oħrajn. Huma qalu rapporti negattivi u gideb dwar ix-​Xhieda taʼ Ġeħova permezz tal-​gazzetti, ir-​radju, it-​televixin, u l-​Internet. Imma dawk li huma sinċiera mhux se jitfixklu. Minflok, se jsaħħu l-​fidi tagħhom għax il-​Bibbja bassret li dawn l-​affarijiet kellhom jiġru.—Mt. 24:24; 2 Pt. 2:18-​22.

20. Xi rridu nagħmlu biex ma nitfixklux minħabba dawk li telqu l-​verità? (2 Timotju 4:4, 5)

²⁰ Kif nistgħu nevitaw li nitfixklu? Għandna bżonn inżommu l-​fidi tagħna b’saħħitha billi nistudjaw b’mod regolari, nitolbu l-​ħin kollu, u nibqgħu żelużi fix-​xogħol taʼ Ġeħova. (Aqra t-​2 Timotju 4:4, 5.) Jekk ikollna l-​fidi, mhux se nibżgħu meta nisimgħu rapporti negattivi dwar ix-​Xhieda taʼ Ġeħova. (Is. 28:16) L-​imħabba tagħna għal Ġeħova, il-​Bibbja, u ħutna se tgħinna biex ma nitfixklux minħabba dawk li telqu l-​verità.

21. Minkejja li llum ħafna nies ma jaċċettawx il-​messaġġ tagħna, minn xiex nistgħu nkunu ċerti?

²¹ Fi żmien Ġesù ħafna tfixklu u għalhekk m’aċċettawhx. Però, ħafna oħrajn emmnu fih. Fosthom kien hemm minn tal-​inqas membru tas-​Sinedriju Lhudi u “folla kbira taʼ qassisin.” (Atti 6:7; Mt. 27:57-​60; Mk. 15:43) Bl-​istess mod illum, miljuni taʼ nies qed jemmnu f’Ġesù. Għala? Għax huma jafu u jħobbu l-​veritajiet li hemm fil-​Bibbja. Il-​Kelma t’Alla tgħid: “Paċi abbundanti jkollhom dawk li jħobbu l-​liġi tiegħek, u għalihom m’hemm ebda tfixkil.”—Salm 119:165.