Il-​kuntest juri li Pawlu kien qed jirreferi għall-​messaġġ t’Alla dwar l-​iskop Tiegħu, bħalma nsibu fil-​Bibbja.

Spiss insemmu Ebrej 4:12 fil-​pubblikazzjonijiet tagħna biex nuru li l-​Bibbja għandha l-​qawwa li tbiddel il-​ħajjiet, u dan hu minnu. Madankollu, hu t’għajnuna li nifhmu x’kien qed jiddiskuti Pawlu meta kiteb il-​kliem t’Ebrej 4:12. Hu kien qed jinkuraġġixxi lill-​Kristjani Ebrej biex jikkooperaw mal-​iskopijiet t’Alla. Ħafna minn dawk l-​iskopijiet instabu fil-​kitba qaddisa. Bħala eżempju, Pawlu uża l-​Iżraelin li Alla ħeles mill-​Eġittu. Huma kellhom it-​tama li jidħlu fl-​“art [imwiegħda] li tnixxi ħalib u għasel,” fejn setgħu jgawdu serħan taʼ veru.—Eżodu 3:8; Dewteronomju 12:9, 10.

Dan kien l-​iskop t’Alla. Imma l-​Iżraelin irrifjutaw id-​direzzjoni taʼ Ġeħova u ma wrewx fidi, u b’hekk il-​maġġorparti minnhom ma daħlux f’dak il-​mistrieħ. (Numri 14:30; Ġożwè 14:6-​10) Madankollu, Pawlu żied jgħid li kien għad “baqaʼ l-​wegħda taʼ dħul fil-​mistrieħ [t’Alla].” (Ebrej 3:16-​19; 4:1) Dik il-​“wegħda” b’mod ċar hi parti minn dak li Alla rrivela dwar l-​iskop tiegħu. Bħall-​Kristjani Ebrej, nistgħu naqraw dwar l-​iskop tiegħu u nikkooperaw miegħu. Sabiex jenfasizza li din il-​wegħda hi bbażata fuq l-​Iskrittura, Pawlu kkwota parti minn Ġenesi 2:2 u Salm 95:11.

Aħna nħossuna grati ħafna għall-​fatt li “baqaʼ l-​wegħda taʼ dħul fil-​mistrieħ” t’Alla. Aħna ċerti li dak li tgħallem il-​Bibbja dwar id-​dħul fil-​mistrieħ t’Alla hu verament possibbli, u ħadna passi biex nidħlu fih. Aħna ma nagħmlux dan billi nipprovaw insegwu l-​Liġi li Alla ta lil Mosè jew nagħmlu affarijiet tajbin għas-​sempliċi fatt biex ikollna l-​approvazzjoni taʼ Ġeħova. Pjuttost, minħabba l-​fidi tagħna f’Alla, b’ferħ ikkooperajna mal-​iskop tiegħu u qed inkomplu nagħmlu dan. Barra minn hekk, eluf taʼ nies madwar id-​dinja bdew jistudjaw il-​Bibbja u jitgħallmu dak li Alla rrivela dwar l-​iskop tiegħu. Dan immotiva lil ħafna minnhom biex ibiddlu l-​istil tal-​ħajja tagħhom, biex juru fidi, u biex jitgħammdu. Il-​mod li bih qed jiġu effettwati hu prova ċara li “l-​kelma t’Alla hi ħajja u qawwija.” Dak li Alla għamel magħruf fil-​Bibbja dwar l-​iskop tiegħu diġà effettwalna ħajjitna, u dan se jkompli jagħtina l-​qawwa.