Tinsiex turi qalb tajba mal-istranġieri
“Tinsewx l-ospitalità.”—EBREJ 13:2.
1, 2. (a) Xi sfidi għandhom ħafna barranin illum? (Ara l-ewwel stampa.) (b) Liema tfakkira ta l-appostlu Pawlu, u x’mistoqsijiet se nikkunsidraw?
IKTAR minn 30 sena ilu, Osei, li kien għadu mhux wieħed mix-Xhieda taʼ Ġeħova, ħalla d-dar tiegħu fil-Gana biex jgħix fl-Ewropa. [1] (Ara n-nota fl-aħħar.) Hu jgħid: “Ma domtx ma rrealizzajt li ħafna nies ma kienx jinteressahom minni. Il-klima wkoll kienet taʼ xokk għalija. Meta tlaqt mill-ajruport u ħassejt il-kesħa għall-ewwel darba f’ħajti, bdejt nibki.” Peress li kien diffiċli għal Osei biex jitgħallem il-lingwa, ħadlu iktar minn sena biex isib xogħol tajjeb. U minħabba li kien ’il bogħod mid-dar, hu kien jimmissja l-familja tiegħu u kien iħossu waħdu.
2 Aħseb dwar kif int tkun tixtieq li tiġi ttrattat kieku kont f’sitwazzjoni simili. Bla dubju tkun grat li tiġi milqugħ mill-qalb fis-Sala tas-Saltna minn nies li jħobbuk minkejja n-nazzjonalità jew il-kulur tal-ġilda tiegħek. Fil-fatt, il-Bibbja tgħid lill-Kristjani veri biex ma ‘jinsewx l-ospitalità,’ jiġifieri juru qalb tajba mal-istranġieri. (Ebrej 13:2) Mela ejja nikkunsidraw il-mistoqsijiet li ġejjin: Kif iħossu Ġeħova dwar l-istranġieri? Għandna bżonn nirranġaw il-mod taʼ kif inħossuna lejn l-istranġieri? U kif nistgħu ngħinu lil xi ħadd minn pajjiż ieħor iħossu milqugħ fil-kongregazzjoni tagħna?
ĠEĦOVA KIF IĦARES LEJN L-ISTRANĠIERI?
3, 4. Skont Eżodu 23:9, Alla kif ried li l-Iżraelin jittrattaw lill-barranin, u għala?
3 Wara li Ġeħova ħeles lill-poplu tiegħu mill-jasar fl-Eġittu, hu tahom liġijiet li għallmuhom juru qalb tajba lejn il-barranin li telqu magħhom. (Eżodu 12:38, 49; 22:21) Ladarba l-ħajja mhix dejjem faċli għall-barranin, Ġeħova ħa ħsiebhom bi mħabba. Pereżempju, huma setgħu jlaqqtu l-ikel li ħallew warajhom il-ħassada.—Levitiku 19:9, 10.
4 Iktar milli sempliċement jikkmanda lill-Iżraelin biex jirrispettaw lill-barranin, Ġeħova riedhom jiftakru x’jiġifieri li jkunu barranin. (Aqra Eżodu 23:9.) Anki qabel ma l-Iżraelin saru lsiera fl-Eġittu, l-Eġizzjani ma kellhomx pjaċir bihom għax kienu differenti. (Ġenesi 43:32; 46:34; Eżodu 1:11-14) Bħala barranin, l-Iżraelin kellhom ħajja diffiċli. Ġeħova riedhom jiftakruh dan u juru qalb tajba mal-barranin li kienu qed jgħixu fosthom.—Levitiku 19:33, 34.
Ġeħova juri qalb tajba mal-barranin
5. X’se jgħinna nuru qalb tajba mal-barranin bħalma juri Ġeħova?
5 Ġeħova ma nbidilx. Allura meta jiġu l-barranin fil-kongregazzjoni tagħna, m’għandniex ninsew li Ġeħova għadu juri qalb tajba maʼ nies bħal dawn. (Dewteronomju 10:17-19; Malakija 3:5, 6) Ieqaf u aħseb dwar l-isfidi li għandu mnejn iħabbtu wiċċhom magħhom il-barranin. Pereżempju, jistaʼ jkun li ma jifhmux il-lingwa l-ġdida u jiġu ttrattati b’mod inġust. Ejja nagħmlu sforz biex ngħinuhom u nkunu qalbna tajba magħhom.—1 Pietru 3:8.
GĦANDNA BŻONN NAĠĠUSTAW IL-ĦARSA TAGĦNA LEJN L-ISTRANĠIERI?
6, 7. X’wera li l-Kristjani Lhud tal-bidu tgħallmu jegħlbu preġudizzji qawwijin?
6 Il-Kristjani tal-bidu tgħallmu jegħlbu preġudizzji qawwijin li kienu komuni fost il-Lhud. F’Pentekoste tas-sena 33, Lhud Kristjani li kienu jgħixu Ġerusalemm urew ospitalità u interess kollu mħabba lejn uħud ġodda minn pajjiżi differenti. (Atti 2:5, 44-47) Dan wera li l-Kristjani Lhud fehmu xi tfisser “ospitalità.”
7 Madankollu, matul dak iż-żmien, ġara xi ħaġa. Lhud li jitkellmu bil-Grieg gergru li r-romol tagħhom kienu qed jiġu ttrattati b’mod inġust. (Atti 6:1) Biex isolvu l-problema, l-appostli għażlu sebaʼ rġiel biex imorru u jagħmlu ċert li kulħadd kien se jiġi ttrattat b’mod ġust. L-appostli għażlu rġiel b’ismijiet Griegi, forsi biex jgħinu lir-romol iħossuhom iżjed komdi.—Atti 6:2-6.
8, 9. (a) Liema mistoqsijiet jgħinuna nsiru nafu jekk aħniex preġudikati? (b) Minn xiex għandna neħilsu? (1 Pietru 1:22)
Rumani 12:2) Ukoll, għandu mnejn nisimgħu lill-ġirien tagħna, sħabna tax-xogħol, jew tal-iskola jgħidu affarijiet ħżiena dwar nies taʼ kultura, tribù, jew kulur tal-ġilda differenti. Kemm tassew aħna influwenzati minn ideat negattivi bħal dawn? Jew kif nirreaġixxu meta xi ħadd iwaqqaʼ għaċ-ċajt in-nazzjonalità jew xi parti mill-kultura tagħna?
8 Nirrealizzawx jew le, aħna lkoll influwenzati sew mill-kultura tagħna. (9 Kien hemm żmien meta l-appostlu Pietru kien preġudikat kontra nies li ma kinux Lhud. Imma bil-mod il-mod hu tgħallem jeħles minn sentimenti negattivi bħal dawn. (Atti 10:28, 34, 35; Galatin 2:11-14) Bl-istess mod, jekk ninnotaw anki traċċa taʼ preġudizzju jew kburija razzjali fina, għandna nagħmlu l-almu tagħna biex inqaċċtuha minna kompletament. (Aqra l-1 Pietru 1:22.) X’jistaʼ jgħinna nagħmlu dan? Ftakar li aħna minn fejn aħna, ilkoll imperfetti, u ħadd minna ma jistħoqqlu s-salvazzjoni. (Rumani 3:9, 10, 21-24) Mela m’għandna l-ebda raġuni għaliex inħossuna aħjar minn ħaddieħor! (1 Korintin 4:7) Għandna nħossuna bħall-appostlu Pawlu. Hu qal lill-Kristjani sħabu: “M’intomx iktar stranġieri u residenti barranin” imma “membri tad-dar t’Alla.” (Efesin 2:19) Ilkoll għandna bżonn naħdmu iebes biex neħilsu minn kull preġudizzju biex b’hekk inkunu nistgħu nilbsu l-personalità l-ġdida.—Kolossin 3:10, 11.
KIF NURU QALB TAJBA MAL-ISTRANĠIERI
10, 11. Bogħaż kif imita l-ħarsa taʼ Ġeħova lejn l-istranġieri?
10 Ir-raġel leali Bogħaż imita l-ħarsa taʼ Ġeħova lejn l-istranġieri. Kif? Meta Bogħaż mar jiċċekkja l-għelieqi tiegħu matul il-ħsad, hu nnota lil Rut, mara barranija mill-art taʼ Mowab. Hi kienet qed taħdem iebes biex tiġbor il-qamħ mill-art. Taħt il-Liġi Mosajka, Rut kellha d-dritt li tlaqqat. Imma meta Bogħaż semaʼ li kienet talbet permess biex tlaqqat fl-għalqa tiegħu, hu kien impressjonat bil-kbir u ħallieha tlaqqat anki qalb il-qatet tal-qamħ.—Aqra Rut 2:5-7, 15, 16.
11 Dak li ġara wara juri biċ-ċar li Bogħaż kien ikkonċernat dwar Rut u s-sitwazzjoni diffiċli tagħha bħala barranija. Hu stidinha toqgħod mal-grupp taʼ nisa żgħażagħ biex ma tiġix ittrattata ħażin mill-irġiel li kienu qed jaħdmu fl-għalqa. Hu saħansitra għamel ċert li jkollha biżżejjed ikel u ilma, bħall-ħaddiema tiegħu stess. Bogħaż wera rispett lejn din il-mara barranija fil-bżonn u inkuraġġieha.—Rut 2:8-10, 13, 14.
12. L-istranġieri kif jistgħu jiġu effettwati mill-qalb tajba?
12 Bogħaż ma weriex qalb tajba maʼ Rut biss minħabba l-imħabba leali lejn il-kunjata tagħha, Nagħomi, imma wkoll minħabba li Rut kienet bdiet taqdi ’l Ġeħova u fittxet il-protezzjoni Tiegħu. Meta Bogħaż wera qalb tajba magħha, hu fil-fatt kien qed jimita l-imħabba leali taʼ Ġeħova. (Rut 2:12, 20; Proverbji 19:17) B’mod simili llum, meta nkunu qalbna tajba, inkunu nistgħu ngħinu lil “bnedmin taʼ kull xorta” jitgħallmu l-verità u jaraw li Ġeħova jħobbhom ħafna.—1 Timotju 2:3, 4.
Nilqgħu bi mħabba lill-istranġieri meta jiġu fis-Sala tas-Saltna? (Ara paragrafi 13, 14)
13, 14. (a) Għala għandna nilqgħu l-istranġieri fis-Sala tas-Saltna? (b) X’jistaʼ jgħinek tħossok komdu titkellem maʼ xi ħadd minn kultura differenti?
13 Nistgħu nuru qalb tajba mal-istranġieri billi bi mħabba nilqgħuhom fis-Sala tas-Saltna. Immigranti li ma jkunux ilhom li waslu f’pajjiż jistgħu jħossuhom mistħijin kultant u jinqatgħu għalihom. Minħabba l-kultura jew l-istat soċjali tagħhom, huma għandhom mnejn iħossuhom inferjuri għal nies taʼ nazzjonalità jew razza oħra. Allura għandna nilqgħuhom aħna l-ewwel u bi mħabba nuru interess ġenwin fihom. Jekk hija disponibbli bil-lingwa tiegħek, l-app tal-JW Language tistaʼ tgħinek titgħallem kif tgħid tislima bil-lingwa tagħhom.—Aqra Filippin 2:3, 4.
14 Għandek mnejn tħossok skomdu titkellem maʼ xi ħadd minn kultura oħra. Biex tegħleb dawn is-sentimenti, tistaʼ tgħidlu xi ħaġa dwarek. Imbagħad forsi tinduna li hemm iktar affarijiet komuni bejnietkom milli ħsibt. Ftakar li kull kultura għandha l-affarijiet tajbin u d-dgħufijiet tagħha.
GĦIN LIL KULĦADD IĦOSSU MILQUGĦ
15. X’se jgħinna nifhmu ’l dawk li qed jidraw f’pajjiż differenti?
15 Biex tgħin lil oħrajn iħossuhom milqugħin fil-kongregazzjoni, kun onest miegħek innifsek u staqsi, ‘Kieku jien kont f’pajjiż barrani, kif inkun irrid li niġi ttrattat?’ (Mattew 7:12) Kun paċenzjuż maʼ dawk li qed jidraw f’pajjiż differenti. Għall-ewwel, nistgħu ma nifhmux eżatt il-mod taʼ kif jaħsbu jew jirreaġixxu. Imma iktar milli nistennewhom jaħsbu u jaġixxu bħan-nies tal-kultura tagħna, għala ma nilqgħuhomx, jew naċċettawhom kif inhuma?—Aqra Rumani 15:7.
Kun paċenzjuż maʼ dawk li qed jaġġustaw f’pajjiż differenti
16, 17. (a) X’nistgħu nagħmlu biex insiru nafu aħjar lil dawk taʼ kultura differenti? (b) X’għajnuna prattika nistgħu nagħtu lill-immigranti fil-kongregazzjoni tagħna?
16 Jekk nieħdu l-ħin biex nitgħallmu dwar il-pajjiż u l-kultura tal-barranin, jistaʼ jagħmilha iżjed faċli għalina biex insiru nafuhom. Matul il-qima bħala familja, nistgħu nagħmlu ftit riċerka dwar il-kultura tal-immigranti fil-kongregazzjoni jew territorju tagħna. Mod ieħor kif insiru nafu lill-immigranti aħjar hu billi nistidnuhom għall-ikel f’darna. Ġeħova “fetaħ il-bieb tal-fidi lill-ġnus,” allura għandna nimitawh u niftħu darna għall-istranġieri li ‘jiġu minna fil-fidi.’—Atti 14:27; Galatin 6:10; Ġob 31:32.
Qegħdin nuru ospitalità mill-qalb lil uħud ġodda minn pajjiżi oħra? (Ara paragrafi 16, 17)
17 Meta nqattgħu l-ħin maʼ familja li tkun ġiet f’pajjiżna, dan se jgħinna nifhmu u napprezzaw l-isforzi tagħhom biex jadattaw għall-kultura tagħna. Għandu mnejn naraw li għandhom bżonn l-għajnuna biex jitgħallmu l-lingwa. Nistgħu wkoll nidderiġuhom Proverbji 3:27.
lejn organizzazzjonijiet li jistgħu jgħinuhom isibu dar xierqa jew xogħol tajjeb. Għajnuna prattika bħal din tistaʼ tagħmel differenza kbira għal ħutna.—18. X’eżempju taʼ rispett u gratitudni jistgħu jimitaw l-immigranti llum?
18 M’għandniex xi ngħidu, l-immigranti se jkunu jridu jagħmlu l-almu tagħhom biex jadattaw għall-kultura tal-pajjiż il-ġdid. Rut ħalliet eżempju tajjeb f’dan ir-rigward. L-ewwel, hi wriet rispett għad-drawwiet tal-pajjiż fejn marret billi talbet permess biex tlaqqat. (Rut 2:7) Hi wriet apprezzament lejn id-dritt tagħha u ma ħassitx li oħrajn kellhom jagħtuha xi ħaġa. It-tieni, hi kienet ħafifa biex tirringrazzja lil oħrajn tal-qalb tajba li wrew magħha. (Rut 2:13) Meta l-immigranti juru attitudni tajba simili, iktar ikun hemm ċans li ħuthom u nies lokali oħra juruhom rispett.
19. X’raġunijiet għandna biex ngħinu lill-istranġieri jħossuhom milqugħin?
19 Aħna ferħanin ferm li Ġeħova wera qalb tajba mhix mistħoqqa u ppermetta lil kull xorta taʼ nies jisimgħu l-aħbar tajba. Għal xi wħud setgħet ma kinitx possibbli li jistudjaw il-Bibbja jew imorru l-laqgħat man-nies taʼ Ġeħova fil-pajjiż tagħhom. Imma issa li għandhom l-opportunità li jiltaqgħu magħna, għandna ngħinuhom biex ma jħossuhomx bħal stranġieri. Għandu mnejn m’għandniex ħafna flus jew ma nistgħux nipprovdu ħafna għajnuna prattika, imma meta nuru qalb tajba mal-barranin, se nimitaw l-imħabba taʼ Ġeħova lejhom. Bħala nies li ‘jimitaw lil Alla,’ ejja mela nagħmlu kulma nistgħu biex nilqgħu lill-istranġieri fostna!—Efesin 5:1, 2.
^ [1] (paragrafu 1) L-isem ġie mibdul.