1. L-​appostlu Pawlu għala ħeġġeġ lill-​Kristjani Ebrej tal-​bidu biex jinkuraġġixxu lil xulxin “iktar u iktar”?

FL-​EWWEL seklu, l-​appostlu Pawlu ta dan il-​parir lill-​Kristjani Ebrej: “Ħa nagħtu kas xulxin biex nitqanqlu għall-​imħabba u l-​għemejjel tajbin, u ma nabbandunawx il-​laqgħat tagħna flimkien, bħalma ħaduha drawwa jagħmlu xi wħud, imma ninkuraġġixxu lil xulxin, u dan iktar u iktar hekk kif taraw joqrob il-​jum.” (Ebrej 10:24, 25) L-​aħwa għandu mnejn tħassbu dwar għala Pawlu qalilhom biex jinkuraġġixxu lil xulxin saħansitra iktar. Inqas minn ħames snin wara, raġuni waħda dehret ċara. F’dak iż-​żmien, huma raw li l-​jum taʼ ġudizzju taʼ Ġeħova fuq Ġerusalemm kien wasal. Huma fehmu li kellhom bżonn jaħarbu mill-​belt bħalma kien qalilhom Ġesù. (Luqa 21:20-22; Atti 2:19, 20) Dan il-​jum taʼ Ġeħova wasal fis-​sena 70 meta r-​Rumani qerdu lil Ġerusalemm.

2. Illum, għala għandna naħsbu dwar li ninkuraġġixxu lil xulxin saħansitra iktar?

 ² Illum, aħna qegħdin f’sitwazzjoni simili. Il-​jum taʼ Ġeħova, li “hu kbir u jqanqal biżaʼ kbir,” qiegħed fil-​qrib. (Ġoel 2:11) Kliem il-​profeta Sofonija japplika wkoll għal żmienna: “Il-​jum il-​kbir taʼ Ġeħova fil-​qrib. Fil-​qrib u qed jgħaġġel ħafna.” (Sofonija 1:14) Għal din ir-​raġuni, aħna għandna “nagħtu kas xulxin biex nitqanqlu għall-​imħabba u l-​għemejjel tajbin.” (Ebrej 10:24) Hemm bżonn li nsiru saħansitra iktar interessati f’ħutna sabiex inkunu nistgħu ninkuraġġuhom meta jkollhom bżonn.

3. L-​appostlu Pawlu x’qal dwar l-​inkuraġġiment? (Ara l-​ewwel stampa.)

³ “L-​ansjetà f’qalb il-​bniedem ittaqqalha, imma l-​kelma t-​tajba tferraħha.” (Proverbji 12:25) Ilkoll kemm aħna xi drabi jkollna bżonn l-​inkuraġġiment. Pawlu għamilha ċara li anke dawk li huma responsabbli biex jinkuraġġixxu lil oħrajn għandhom bżonn jiġu inkuraġġiti. Lil ħutu f’Ruma kitbilhom: “Għandi xewqa kbira li narakom, biex nagħtikom xi għotja spiritwali sabiex tissodaw; jew, pjuttost, biex ninkuraġġixxu lil xulxin bil-​fidi tagħna, intom lili u jien lilkom.” (Rumani 1:11, 12) Allura, anke l-​appostlu Pawlu kellu bżonn l-​inkuraġġiment xi drabi.—Aqra Rumani 15:30-32.

4, 5. Lil min nistgħu ninkuraġġixxu llum, u għala?

⁴ Illum, aħna nistgħu ninkuraġġixxu lil dawk li jaqdu lil Ġeħova full-​time. Fosthom hemm il-​pijunieri leali. Ħafna minnhom għamlu sagrifiċċji kbar biex ikunu pijunieri. Dan japplika wkoll għall-​missjunarji, il-​Beteliti, l-​indokraturi li jżuru l-​kongregazzjonijiet u n-​nisa tagħhom, u dawk li jaqdu fl-​uffiċċji tat-​traduzzjoni. Dawn kollha jagħmlu sagrifiċċji sabiex iqattgħu iktar ħin jaqdu lil Ġeħova. Għalhekk, aħna għandna ninkuraġġuhom. Hemm ukoll ħafna li jixtiequ li baqgħu fis-​servizz full-​time imma m’għadhomx jistgħu. Anke dawn ikunu grati meta jiġu inkuraġġiti.

⁵ Min iktar jistħoqqlu l-​inkuraġġiment? Aħna nistgħu ninkuraġġixxu lil ħafna aħwa li għażlu li jibqgħu single għax iridu jobdu lil Ġeħova u jiżżewġu “biss fil-​Mulej.” (1 Korintin 7:39) In-​nisa miżżewġin jiġu inkuraġġiti meta żwieġhom jgħidulhom li jħobbuhom u li huma grati għal kulma jagħmlu. (Proverbji 31:28, 31) Il-​Kristjani li jissaportu persekuzzjoni jew mard ukoll għandhom bżonn l-​inkuraġġiment. (2 Tessalonikin 1:3-5) Ġeħova u Ġesù jfarrġu lil dawn l-​uħud leali kollha.—Aqra t-​2 Tessalonikin 2:16, 17.

6. X’nitgħallmu dwar l-​irwol tal-​anzjani f’​Isaija 32:1, 2?

⁶ Aqra Isaija 32:1, 2. Aħna ngħixu fi żminijiet diffiċli u faċilment insiru mnikktin u skuraġġiti. Sabiex jinkuraġġina, Ġesù Kristu juża lil ħutu l-​midlukin u lill-​“prinċpijiet” leali min-​nagħaġ oħrajn. Dawn l-​anzjani tal-​kongregazzjoni mhumiex “sidien” tal-​fidi tagħna imma ‘ħaddiema sħabna’ għall-​ferħ  tagħna. Huma jridu jgħinuna nkunu ferħanin u nibqgħu leali.—2 Korintin 1:24.

7, 8. L-​anzjani kif jistgħu jinkuraġġixxu lil oħrajn b’dak li jgħidu u jagħmlu?

⁷ L-​anzjani jistgħu jimitaw lill-​appostlu Pawlu, li dejjem ipprova jinkuraġġixxi lil ħutu. Lill-​Kristjani f’Tessalonika li kienu qed jiġu ppersegwitati kitbilhom: “Peress li għandna affezzjoni tenera lejkom, konna kuntenti ħafna li mhux biss nagħtukom l-​aħbar tajba t’Alla, imma wkoll ruħna stess, għax sirtu għeżież għalina.”—1 Tessalonikin 2:8.

⁸ L-​anzjani jistgħu jkunu taʼ inkuraġġiment kbir b’dak li jgħidu. Imma dejjem se jkun biżżejjed dan? Pawlu qal lill-​anzjani minn Efesu: “Għandkom tgħinu lid-​dgħajfin u żżommu f’moħħkom il-​kliem tal-​Mulej Ġesù, li qal hu stess, ‘Hemm iktar hena meta tagħti milli meta tirċievi.’” (Atti 20:35) Pawlu kien lest li ‘jonfoq u jintefaq għalkollox għal’ ħutu. Bil-​mod taʼ kif aġixxa, hu wera li kien lest li jagħmel mill-​aħjar li setaʼ għalihom. (2 Korintin 12:15) B’mod simili, l-​anzjani għandhom jinkuraġġixxu u jfarrġu lil oħrajn mhux bil-​kliem biss imma b’li jagħmlu wkoll. Dan juri li huma verament jimpurtahom minna.—1 Korintin 14:3.

9. L-​anzjani kif jistgħu jagħtu parir b’mod inkuraġġanti?

⁹ Biex isaħħu lil ħuthom, l-​anzjani xi kultant ikollhom bżonn jagħtu parir. Huma jistgħu jitgħallmu kif jagħmlu dan b’mod inkuraġġanti mill-​Bibbja. Wara l-​mewt u l-​irxoxt tiegħu, Ġesù ħalla eżempju eċċellenti taʼ dan. Hu kellu jagħti parir sod lil xi kongregazzjonijiet fl-​Asja Minuri, imma nnota kif għamel dan. Qabel ma tahom il-​parir, hu faħħar mill-​qalb lill-​kongregazzjonijiet f’Efesu, f’Pergamu, u fi Tjatira għall-​affarijiet tajbin li kienu qed jagħmlu. (Rivelazzjoni 2:1-5, 12, 13, 18, 19) Lill-​kongregazzjoni f’Laodiċija, Ġesù qalilha: “Lil kulmin għandi affezzjoni lejh inwiddbu u niddixxiplinah. Għalhekk, kun żeluż u indem.” (Rivelazzjoni 3:19) L-​anzjani jipprovaw jimitaw lil Kristu bil-​mod kif jagħtu parir.

10. Kif nistgħu aħna lkoll insaħħu lil xulxin?

¹⁰ L-​anzjani mhumiex l-​uniċi wħud li jeħtieġ jinkuraġġixxu lil oħrajn. Pawlu ħeġġeġ lill-​Kristjani kollha ħalli jgħidu “dak li hu tajjeb biex jibni fejn ikun hemm bżonn, sabiex jagħmel il-​ġid” lil oħrajn. (Efesin 4:29) Kull wieħed u waħda minna għandu jkun konxju tal-​bżonnijiet t’oħrajn sabiex ikun jistaʼ jgħinhom. Lill-​Kristjani Ebrej, Pawlu kitbilhom: “Iddrittaw l-​idejn merħijin u l-​irkopptejn dgħajfin, u ibqgħu ddrittaw il-​mogħdijiet għal saqajkom, biex il-​partijiet dgħajfin ma jinqalgħux mill-​ġogi, imma minflok, jitfejqu.” (Ebrej 12:12, 13) Aħna lkoll nistgħu nsaħħu u ninkuraġġixxu lil xulxin b’dak li ngħidu, anke jekk aħna żgħar ħafna fl-​età.

11. X’għen lil Marthese meta kienet dipressa?

¹¹ Oħt jisimha Marthese kienet dipressa għal xi żmien. * (Ara n-​nota taʼ taħt.) Hi kitbet: “Darba, meta kont qed nitlob għall-​inkuraġġiment, iltqajt m’oħt ikbar minni li wrietni affezzjoni u mogħdrija, proprju dak li kelli bżonn dak il-​ħin.  Ukoll, hi qaltli l-​esperjenza personali tagħha bl-​istess tip taʼ prova li kont għaddejja minnha jien, u ħassejtni inqas waħdi.” Probabbilment, din l-​oħt lanqas biss irrealizzat kemm kliemha kien t’għajnuna għal Marthese!

12, 13. Kif nistgħu napplikaw il-​parir f’​Filippin 2:1-​4?

¹² Lill-​Kristjani f’Filippi, Pawlu kitbilhom: “Mela, jekk għandkom xi inkuraġġiment fi Kristu, xi konsolazzjoni taʼ mħabba, xi interess f’xulxin, xi affezzjoni tenera u mogħdrija, imlewni bil-​ferħ billi jkollkom l-​istess fehma u l-​istess imħabba. Kunu magħqudin ruħ waħda u żommu ħsieb wieħed f’moħħkom, waqt li ma tagħmlu xejn bi ġlied jew bi kburija, imma b’umiltà tqisu lill-​oħrajn superjuri għalikom. Tfittxux l-​interessi persunali tagħkom biss, imma wkoll l-​interessi persunali taʼ l-​oħrajn.”—Filippin 2:1-4.

¹³ Aħna lkoll għandna nfittxu għal modi biex ngħinu lil xulxin. Nistgħu nfarrġu lil oħrajn, jew, noffru “konsolazzjoni taʼ mħabba,” nuru “interess f’xulxin,” u “affezzjoni tenera u mogħdrija” sabiex ninkuraġġixxu lil ħutna.

14. Liema hu mod wieħed kif nistgħu ninkuraġġixxu?

¹⁴ Aħna nifirħu meta nisimgħu li dawk li għenna fil-​passat qed jibqgħu leali. L-​appostlu Ġwanni kiteb: “M’għandix raġuni akbar minn din biex irrodd ħajr, li nismaʼ li wliedi jkomplu mexjin fil-​verità.” (3 Ġwanni 4) Ħafna pijunieri jkunu ferħanin se jtiru meta jsiru jafu li  xi ħadd li jkunu għenu biex jitgħallem il-​verità żmien ilu għadu qed jaqdi lil Ġeħova lealment, forsi saħansitra hu pijunier. Allura jekk il-​pijunieri jħossuhom skuraġġiti, aħna nistgħu nfakkruhom fl-​affarijiet tajbin kollha li jkunu għamlu biex jgħinu lil oħrajn.

15. X’nistgħu nagħmlu biex ninkuraġġixxu lil dawk li qed jaqdu lealment?

¹⁵ Ħafna indokraturi li jżuru l-​kongregazzjonijiet qalu li flimkien maʼ marthom ġew inkuraġġiti meta rċivew nota taʼ ringrazzjament wara li żaru kongregazzjoni. Dan hu minnu wkoll għall-​anzjani, missjunarji, pijunieri, u Beteliti, li lkoll jaqdu lil Ġeħova lealment. Billi nirringrazzjawhom, aħna nistgħu ninkuraġġuhom iktar milli naħsbu.

16. Liema affarijiet sempliċi jistgħu jinkuraġġixxu lil xi ħadd?

¹⁶ Xi ngħidu jekk ma ssibhiex faċli tgħid lil oħrajn kif tħossok dwarhom? Fil-​fatt, mhuwiex daqshekk diffiċli biex tinkuraġġixxi lil oħrajn. Ipprova tbissem lil xi ħadd. Jekk ma jitbissimx lura, jistaʼ jkun li għaddej minn problema u għandu bżonn maʼ min jitkellem. Int tistaʼ tfarrġu billi sempliċement tisimgħu.—Ġakbu 1:19.

17. Ħu żagħżugħ kif kien inkuraġġit?

¹⁷ Ħu żagħżugħ li jismu Henri kien imnikket ferm meta xi qraba tiegħu ma baqgħux jaqdu lil Ġeħova. Wieħed minn dawn kien missieru, li kien anzjan. Indokratur li jżur il-​kongregazzjonijiet innota li Henri kien imdejjaq u  ħadu għal kafè. Hu semaʼ b’attenzjoni hekk kif Henri esprima kif kien iħossu. Wara l-​konversazzjoni, Henri rrealizza li l-​uniku mod kif setaʼ jgħin lil familtu tiġi lura fil-​verità kien billi hu stess jibqaʼ leali. Hu kien imfarraġ ukoll billi qara Salm 46, Sofonija 3:17, u Marku 10:29, 30.

18. (a) Is-​Sultan Salamun x’kiteb dwar l-​inkuraġġiment? (b) Xi ssuġġerixxa l-​appostlu Pawlu?

¹⁸ X’nistgħu nitgħallmu mill-​esperjenzi taʼ Marthese u Henri? Kull wieħed u waħda minna jistaʼ jfarraġ u jinkuraġġixxi ħu jew oħt li għandha bżonn. Is-​Sultan Salamun kiteb: “Kemm hi tajba kelma f’waqtha! Għajnejn ileqqu jferrħu l-​qalb; rapport tajjeb iħaxxen l-​għadam.” (Proverbji 15:23, 30) Tistaʼ taħseb dwar xi ħadd li taf li qed iħossu skuraġġit jew imdejjaq? Għala ma tagħmilx xi ħaġa sempliċi bħal li taqralu mit-​Torri tal-​Għassa jew mill-​websajt tagħna? Ukoll, Pawlu għallem li l-​kant flimkien tal-​għanjiet tas-​Saltna jistaʼ jġegħelna nħossuna aħjar. Hu kiteb: “Komplu għallmu u widdbu [jew, “inkuraġġixxu” *] lil xulxin b’salmi, tifħir lil Alla, għanjiet spiritwali b’radd il-​ħajr, u kantaw fi qlubkom lil Ġeħova.”—Kolossin 3:16; Atti 16:25.

19. L-​inkuraġġiment għala se jsir iktar u iktar importanti fil-​jiem li ġejjin, u x’għandna nagħmlu?

¹⁹ Hekk kif joqrob jum Ġeħova, se jkun saħansitra iktar importanti għalina li ninkuraġġixxu lil xulxin. (Ebrej 10:25) Aħna se nkunu ferħanin jekk nagħmlu bħalma wissa Pawlu: “Ibqgħu farrġu lil xulxin u ibnu lil xulxin, bħalma fil-​fatt qed tagħmlu.”—1 Tessalonikin 5:11.