Mistoqsijiet mill-qarrejja
Ir-rakkont taʼ Mattew dwar it-tfulija taʼ Ġesù għala hu differenti minn dak taʼ Luqa?
Ir-rakkont taʼ Mattew dwar it-twelid u t-tfulija taʼ Ġesù hu differenti mir-rakkont taʼ Luqa għax kull kittieb jiffoka fuq il-ħsibijiet u l-esperjenzi taʼ persuna differenti.
Ir-rakkont taʼ Mattew jiffoka fuq ġrajjiet li involvew lil Ġużeppi. Fih jiddeskrivi r-reazzjoni taʼ Ġużeppi meta sar jaf li Marija kienet tqila, il-ħolma tiegħu li fiha anġlu spjegalu s-sitwazzjoni, u l-mod kif hu mexa mal-istruzzjonijiet tal-anġlu. (Mattew 1:19-25) Jiddeskrivi wkoll kif anġlu wissa lil Ġużeppi f’ħolma biex jaħrab lejn l-Eġittu flimkien mal-familja tiegħu u kif hu obda. Mattew imbagħad jgħidilna li Ġużeppi kellu ħolma oħra, li fiha anġlu qallu jmur lura lejn l-art taʼ Iżrael u li hu għamel dan u ddeċieda li flimkien mal-familja tiegħu jmur joqgħod Nazaret. (Mattew 2:13, 14, 19-23) Fl-ewwel żewġ kapitli tal-Evanġelju tiegħu, Mattew isemmi isem Ġużeppi sebaʼ darbiet, imma isem Marija erbaʼ darbiet biss.
Madankollu, ir-rakkont taʼ Luqa jiffoka fuq Marija. Jiddeskrivi ż-żjara tal-anġlu Gabrijel lil Marija, iż-żjara li għamlet lill-qariba tagħha Eliżabetta, u l-kliem taʼ tifħir tagħha lil Ġeħova. (Luqa 1:26-56) Jiddeskrivi wkoll x’qal Simegħon lil Marija dwar is-sofferenzi futuri taʼ Ġesù. Imbagħad Luqa jiddeskrivi l-okkażjoni meta Ġesù mar it-tempju mal-familja tiegħu meta kellu 12-il sena. Anke f’dan ir-rakkont, Luqa jikkwota l-kliem taʼ Marija u mhux il-kliem taʼ Ġużeppi, u jgħidilna li Marija kienet affettwata profondament minn dawn il-ġrajjiet. (Luqa 2:19, 34, 35, 48, 51) Fl-ewwel żewġ kapitli tal-Evanġelju tiegħu, Luqa jsemmi isem Marija 12-il darba, imma taʼ Ġużeppi tliet darbiet biss. Allura Mattew jgħidilna iżjed dwar dak li Ġużeppi ħaseb u għamel. Madankollu, Luqa jiffoka fuq il-ħsibijiet u l-esperjenzi taʼ Marija.
Id-dixxendenza tal-familja taʼ Ġesù wkoll hi dokumentata b’mod differenti fiż-żewġ Evanġelji. Mattew jiddokumenta d-dixxendenza tal-familja taʼ Ġużeppi u juri li Ġesù, bħala l-iben adottiv taʼ Ġużeppi, kellu d-dritt legali għas-saltna taʼ David. Għala? Għaliex Ġużeppi kien dixxendent tas-Sultan David permezz taʼ Salamun, bin David. (Mattew 1:6, 16) Madankollu, Luqa jikteb id-dixxendenza tal-familja taʼ Marija u juri li Ġesù kellu d-dritt naturali għas-saltna taʼ David “skond il-laħam.” (Rumani 1:3) Għala? Għaliex Marija kienet dixxendenta tas-Sultan David permezz taʼ Natan, bin David. (Luqa 3:31) Imma Luqa għala ma jiddokumentax lil Marija bħala bint Għeli, missierha? Għaliex ir-rekords uffiċjali ġeneralment inkludew biss lill-irġiel taʼ familja. Allura meta Luqa jikteb isem Ġużeppi u jiddeskrivih bħala iben Għeli, in-nies fehmu li Ġużeppi kien ir-raġel taʼ bint Għeli.—Luqa 3:23.
Il-listi taʼ dixxendenza tal-familja taʼ Ġesù fl-Evanġelji taʼ Mattew u Luqa juru li Ġesù kien il-Messija li Alla kien wiegħed. Il-fatt li Ġesù kien dixxendent tas-Sultan David tant kien magħruf li anke l-Fariżej u s-Sadduċej ma setgħux jiċħdu dan. Id-deskrizzjonijiet taʼ Mattew u Luqa tad-dixxendenza tal-familja taʼ Ġesù jsaħħu l-fidi tagħna u jagħmluna fiduċjużi li l-bqija tal-wegħdi t’Alla se jseħħu.