1. X’juri li Ġeħova hu ġeneruż?

KIEN hemm żmien meta Ġeħova kien kompletament waħdu. Imbagħad iddeċieda li jagħti l-​għotja tal-​ħajja lil ħlejjaq intelliġenti, kemm spirti kif ukoll umani. “L-​Alla l-​hieni,” Ġeħova, iħobb jagħti affarijiet tajbin. (1 Timotju 1:11; Ġakbu 1:17) U għax Ġeħova jridna nkunu henjin ukoll, jew ferħanin, hu jgħallimna nkunu ġenerużi.—Rumani 1:20.

2, 3. (a) Għala nkunu ferħanin meta nkunu ġenerużi? (b) X’se nitgħallmu f’dan l-​artiklu?

² Alla ħalaq lill-​bnedmin fuq ix-​xbieha tiegħu. (Ġenesi 1:27) Dan ifisser li ħalaqna bil-​kwalitajiet li għandu hu. Sabiex inkunu verament ferħanin u jkollna l-​barka taʼ Ġeħova, għandna bżonn nimxu fuq l-​eżempju tiegħu. Jeħtieġ li aħna ninteressaw ruħna f’nies oħrajn u li nagħtu b’mod ġeneruż. (Filippin 2:3, 4; Ġakbu 1:5) Għala? Għax dan hu  l-​mod kif Ġeħova ħalaqna. Għalkemm aħna imperfetti, nistgħu nimitaw lil Ġeħova u nkunu ġenerużi wkoll.

³ Issa se niddiskutu xi lezzjonijiet li tgħallem il-​Bibbja dwar il-​ġenerożità. Se nitgħallmu għala Ġeħova jkun kuntent meta nkunu ġenerużi. Se nitgħallmu wkoll kif il-​ġenerożità tgħinna nagħmlu x-​xogħol li Ġeħova tana nagħmlu u għala nkunu ferħanin meta nkunu ġenerużi. U se niddiskutu għala għandna nkomplu nkunu ġenerużi.

4, 5. Ġeħova u Ġesù kif kienu ġenerużi, u għala għandna nimitawhom?

⁴ Ġeħova jridna nimitawh, allura li nkunu ġenerużi jagħmlu ferħan. (Efesin 5:1) Ġeħova jrid ukoll li l-​bnedmin ikunu ferħanin. Aħna nafu dan għaliex hu għamilna b’mod tal-​għaġeb u għamel l-​art sabiħa tagħna u kulma hemm fiha għalina biex ingawduh. (Salm 104:24; 139:13-16) B’hekk, aħna nonoraw lil Ġeħova meta nipprovaw inferrħu lil oħrajn.

⁵ Aħna nimitaw ukoll lil Ġesù, li tana l-​eżempju perfett taʼ kif il-​bnedmin jistgħu jkunu ġenerużi. Hu qal: “Bin il-​bniedem ma ġiex biex ikun moqdi, imma biex jaqdi u jagħti ruħu b’fidwa għal ħafna.” (Mattew 20:28) U l-​appostlu Pawlu inkuraġġixxa lill-​Kristjani: “Żommu din l-​attitudni mentali fikom li kienet ukoll fi Kristu Ġesù . . . [li] xejjen lilu nnifsu u ħa s-​sura taʼ lsir.” (Filippin 2:5, 7) Allura nistgħu nistaqsu lilna nfusna, ‘Nistaʼ jien nimxi fuq l-​eżempju taʼ Ġesù saħansitra iktar mill-​qrib?’—Aqra l-​1 Pietru 2:21.

6. X’għallimna Ġesù fl-​istorja tas-​Samaritan li aġixxa taʼ proxxmu tajjeb? (Ara l-​ewwel stampa.)

⁶ Ġeħova jkun kuntent meta nimxu fuq l-​eżempju perfett li hu u Ġesù tawna. Aħna nagħmlu dan billi ninteressaw ruħna fin-​nies u nfittxu għal modi kif ngħinuhom. Ġesù wera kemm dan hu importanti meta qal l-​istorja tas-​Samaritan li aġixxa taʼ proxxmu tajjeb. (Aqra Luqa 10:29-37.) Hu għallem lis-​segwaċi tiegħu li kellhom jgħinu lil oħrajn, ikunu min ikunu jew huma minn fejn huma. Tiftakar għala Ġesù qal din l-​istorja? Kien għaliex raġel Lhudi staqsieh: “Min tassew hu l-​proxxmu tiegħi?” It-​tweġiba taʼ Ġesù tgħallimna li bħal dak is-​Samaritan għandna nkunu ġenerużi jekk irridu nogħġbu lil Ġeħova.

7. Kif nuru li nemmnu li l-​mod kif Ġeħova jagħmel l-​affarijiet hu l-​aħjar mod? Spjega.

⁷ Raġuni oħra biex inkunu ġenerużi għandha x’taqsam maʼ dak li ġara fil-​ġnien tal-​Għeden. Satana sostna li Adam u Eva kienu jkunu iżjed ferħanin jekk ma jobdux lil Ġeħova u jaħsbu biss fihom infushom. Eva kienet egoista u riedet tkun bħal Alla. Adam kien egoist u ried jogħġob lil Eva iktar milli ried jogħġob lil Alla. (Ġenesi 3:4-6) Ir-​riżultati kienu diżastrużi. Huwa ċar, ħadd ma jistaʼ jkun ferħan meta jkun egoist. Imma meta naħsbu wkoll f’ħaddieħor u nkunu ġenerużi, aħna nuru li nemmnu li l-​mod kif Ġeħova jagħmel l-​affarijiet hu l-​aħjar mod.

8. Adam u Eva għala kien imisshom ħasbu f’oħrajn?

⁸ Għalkemm Adam u Eva kienu waħedhom fil-​ġnien tal-​Għeden, huma kien imisshom ħasbu f’oħrajn. Għala? Ġeħova kien tahom xogħol x’jagħmlu. Hu qalilhom jimlew l-​art bit-​tfal tagħhom u jagħmluha ġenna tal-​art. (Ġenesi 1:28) Adam u Eva suppost riedu li t-​tfal futuri tagħhom ikunu ferħanin, l-​istess bħalma Ġeħova riedhom ilkoll ikunu. Flimkien, kienu se jaħdmu biex jagħmlu d-​dinja kollha ġenna tal-​art. Xi proġett enormi kien se jkun dan!

9. Il-​bnedmin għala kienu se jkunu ferħanin waqt li jagħmlu l-​art ġenna?

⁹ Ukoll, il-​bnedmin perfetti kien se jkollhom bżonn jaħdmu mill-​qrib maʼ Ġeħova biex jagħmlu l-​art ġenna u jwettqu r-​rieda tiegħu. B’dan il-​mod, kienu se jidħlu fil-​mistrieħ tiegħu. (Ebrej 4:11) Immaġina kemm dan ix-​xogħol kien se jkun taʼ sodisfazzjon u taʼ gost! Ġeħova kien se jberikhom bil-​kbir talli kienu se jaħsbu f’oħrajn u jimpurtahom minnhom.

10, 11. X’se jgħinna nippritkaw u nagħmlu dixxipli?

¹⁰ Illum, Ġeħova tana xogħol speċjali x’nagħmlu. Hu jridna nippritkaw u nagħmlu dixxipli. Biex nagħmlu dan  ix-​xogħol, verament għandu jimpurtana min-​nies. Fil-​fatt, aħna nistgħu nibqgħu nagħmlu dan ix-​xogħol jekk ikollna l-​motiv it-​tajjeb biss: imħabba għal Ġeħova u mħabba għan-​nies.

¹¹ Pawlu qal li hu u Kristjani oħra fl-​ewwel seklu kienu “ħaddiema sħab m’Alla” għax ippritkaw u għallmu l-​verità lin-​nies. (1 Korintin 3:6, 9) Illum, anke aħna nistgħu nkunu “ħaddiema sħab m’Alla” billi nagħtu b’mod ġeneruż mill-​ħin, l-​enerġija, u l-​affarijiet materjali tagħna biex nagħmlu x-​xogħol tal-​ippritkar li Alla tana. X’unur kbir dan!

12, 13. Int x’tgħid li huma l-​barkiet taʼ li nagħmlu dixxipli?

¹² Li nkunu ġenerużi fil-​ħin u l-​enerġija tagħna meta nippritkaw u ngħallmu jġibilna ferħ kbir. Hekk jgħidu ħafna aħwa li kellhom l-​opportunità li jikkonduċu studji tal-​Bibbja. Aħna nifirħu ħafna meta naraw lill-​istudenti tagħna jsiru entużjasti meta jifhmu x’tistaʼ tgħallimna l-​Bibbja, meta jiżviluppaw fidi vera, jagħmlu bidliet f’ħajjithom, u jibdew jgħidu lil oħrajn x’qed jitgħallmu. Ġesù wkoll kien ferħan ħafna meta s-​70 dixxiplu li bagħat “ġew lura ferħanin” minħabba l-​esperjenzi tajbin li kellhom.—Luqa 10:17-21.

¹³ Ħutna madwar id-​dinja jkunu ferħanin meta jaraw kif il-​messaġġ tal-​Bibbja jgħin lin-​nies itejbu ħajjithom. Pereżempju, oħt single jisimha Anna riedet taħdem iktar għal Ġeħova. * (Ara n-​nota taʼ taħt.) Allura marret f’post fl-​Ewropa tal-​Lvant fejn hemm bżonn taʼ iktar ħaddiema. Hi kitbet: “Hawn ħafna opportunitajiet biex tikkonduċi studji tal-​Bibbja, u dan jogħġobni wisq. Ix-​xogħol tal-​ippritkar iġibli ħafna ferħ. Meta nasal id-​dar, ma jkollix ħin naħseb fuqi nnifsi. Jien naħseb fuq dawk li qed nistudja magħhom—l-​inkwiet u l-​ansjetajiet tagħhom. Infittex modi kif ninkuraġġihom u ngħinhom b’modi prattiċi. U sirt konvinta li ‘hemm iktar hena meta tagħti milli meta tirċievi.’”—Atti 20:35.

14. Kif tistaʼ tieħu pjaċir tipprietka anke jekk in-​nies ma jisimgħux?

¹⁴ Anke jekk in-​nies ma jisimgħuniex meta nippritkaw, aħna nistgħu nkunu ferħanin għax nagħtuhom l-​opportunità li jisimgħu l-​aħbar tajba. Ġeħova jistenniena nagħmlu l-​istess ħaġa li qal lil Eżekjel jagħmel: “Trid tgħidilhom kliemi, sew jekk jisimgħu u sew jekk le.” (Eżekjel 2:7; Isaija 43:10) Allura, minkejja kif iwieġbu n-​nies, Ġeħova japprezza l-​isforzi tagħna. (Aqra Ebrej 6:10.) Dwar il-​ministeru tiegħu, wieħed ħu qal: “Aħna ħawwilna, saqqejna,  u tlabna bit-​tama li Ġeħova jkabbar l-​interess.”—1 Korintin 3:6.

15. Għandna nkunu ġenerużi biss jekk in-​nies japprezzaw? Spjega.

¹⁵ Ġesù jridna nkunu ġenerużi għax dan jagħmilna ferħanin. Meta nkunu ġenerużi, ħafna nies ikunu ġenerużi wkoll. Allura hu jinkuraġġina: “Idraw agħtu, u n-​nies jagħtukom. Iferrgħulkom f’ħoġorkom kejl tajjeb, marsus, mheżżeż, u mfawwar. Għax bil-​kejl li tkejlu, ikejlulkom lura.” (Luqa 6:38) M’għandniex xi ngħidu, meta tkun ġeneruż, mhux in-​nies kollha se japprezzaw. Imma anke meta huma ma japprezzawx, ibqaʼ agħti. Ma tistax tgħid kemm ġid tistaʼ tagħmel b’att wieħed biss taʼ ġenerożità.

16. Maʼ min għandna nkunu ġenerużi, u għaliex?

¹⁶ Nies li verament huma ġenerużi ma jagħtux għax jistennew xi ħaġa lura. Ġesù qal: “Meta tagħmel festa, stieden lill-​foqra, lill-​magħtubin, liz-​zopop, lill-​għomja; u tkun hieni, għax dawn m’għandhomx biex ipattulek.” (Luqa 14:13, 14) Il-​Bibbja tgħid li min ikun ġeneruż se jitbierek. Tgħid ukoll: “Hieni min jaġixxi b’konsiderazzjoni mal-​batut.” (Proverbji 22:9; Salm 41:1) Aħna għandna nkunu ġenerużi għax tassew nixtiequ ngħinu lil oħrajn.

17. B’liema modi li jferrħuna nistgħu nagħtu?

¹⁷ Meta Pawlu kkwota kliem Ġesù li “hemm iktar hena meta tagħti milli meta tirċievi,” hu ma kienx qed jitkellem biss dwar l-​għoti t’affarijiet materjali. Aħna nistgħu nagħtu  wkoll l-​inkuraġġiment lin-​nies, parir mill-​Bibbja, u għajnuna prattika. (Atti 20:31-35) B’dak li qal u għamel, Pawlu għallimna kemm hu importanti li nkunu ġenerużi bil-​ħin, l-​enerġija, l-​attenzjoni, u l-​imħabba tagħna.

18. X’jgħidu ħafna riċerkaturi dwar li nkunu ġenerużi?

¹⁸ Riċerkaturi li jistudjaw fuq l-​imġiba tal-​bniedem ukoll sabu li meta nagħtu nkunu ferħanin. Skont artiklu, in-​nies jgħidu li jħossuhom bil-​qabda iżjed ferħanin wara li jagħmlu affarijiet tajbin għal oħrajn. Ir-​riċerkaturi jgħidu li meta ngħinu lil oħrajn, inħossu li ħajjitna għandha skop u fiha tifsir. B’hekk, xi esperti jissuġġerixxu li n-​nies jagħmlu xogħol volontarju biex ikunu iżjed f’saħħithom u iktar ferħanin. Bla dubju, dak li sabu ma jissorprendiniex, għax il-​Ħallieq tagħna kollu mħabba, Ġeħova, dejjem qalilna li meta nagħtu nkunu ferħanin.—2 Timotju 3:16, 17.

19, 20. Int għala trid tkun ġeneruż?

¹⁹ Meta n-​nies madwarna jimpurtahom biss minnhom infushom, dan jistaʼ jkun diffiċli biex nibqgħu nkunu ġenerużi. Imma Ġesù fakkarna li l-​ikbar żewġ kmandamenti huma li nħobbu lil Ġeħova b’qalbna kollha, b’ruħna kollha, b’moħħna kollu, u b’saħħitna kollha u li nħobbu lill-​proxxmu tagħna bħalna nfusna. (Marku 12:28-31) F’dan l-​artiklu tgħallimna li dawk li jħobbu lil Ġeħova jimitawh. Ġeħova u Ġesù t-​tnejn huma ġenerużi. Huma jinkuraġġuna nimxu fuq l-​eżempju tagħhom, għax jafu li dan jagħmilna verament ferħanin. Jekk inkunu ġenerużi f’dak li nagħmlu għal Alla u għall-​proxxmu tagħna, aħna se nonoraw lil Ġeħova u se nibbenefikaw kemm aħna kif ukoll oħrajn.

²⁰ Ċertament, int diġà qed tagħmel l-​aħjar li tistaʼ biex tkun ġeneruż u tgħin lil oħrajn, speċjalment lil ħutek Kristjani. (Galatin 6:10) Jekk tibqaʼ tagħmel dan, in-​nies se japprezzaw u jħobbuk, u int se tkun ferħan. Il-​Bibbja tgħid: “Ir-​ruħ ġeneruża titqawwa [jew, “tiġi ppremjata”], u min isaqqi bix-​xabaʼ lil oħrajn jissaqqa bix-​xabaʼ hu wkoll.” (Proverbji 11:25) Fil-​ħajja u l-​ministeru tagħna hemm ħafna modi kif nistgħu nagħtu mingħajr egoiżmu u nkunu qalbna tajba u ġenerużi. L-​artiklu li jmiss se jitkellem dwar ftit minn dawn il-​modi.