Mistoqsijiet mill-qarrejja
Għala ħadd m’għandu permess li jitfaʼ pubblikazzjonijiet tax-Xhieda taʼ Ġeħova fuq websajts oħrajn jew fuq il-midja soċjali?
Xi wħud jaħsbu li peress li noffru l-pubblikazzjonijiet tagħna mingħajr ħlas, huma jistgħu jikkopjawhom jew jitfgħuhom fuq websajts oħrajn jew fuq il-midja soċjali. Imma dan jistaʼ jġib problemi serji u jmur kontra t-Termini tal-użu * (ara n-nota taʼ taħt) għall-websajts tagħna. Dawn it-Termini jgħidu b’mod ċar li ħadd m’għandu permess “jitfaʼ stampi, pubblikazzjonijiet elettroniċi, trademarks, mużika, ritratti, vidjows, jew artikli minn din il-websajt għal fuq l-Internet (kwalunkwe websajt, file-sharing site, video-sharing site, jew netwerk soċjali).” Dawn ir-regoli għala huma neċessarji?
Il-materjal kollu fuq il-websajts tagħna hu copyrighted, jiġifieri, li hu protett mil-liġi. Dan hu importanti għax jgħin biex ma jintużax b’mod ħażin. L-apostati u nies oħrajn li jridu jagħmlu ħsara lix-xogħol tagħna kultant ipoġġu l-pubblikazzjonijiet tagħna fuq il-websajts tagħhom biex jattiraw l-attenzjoni tax-Xhieda taʼ Ġeħova u oħrajn. Imma fuq dawn il-websajts ipoġġu wkoll materjal li jqajjem id-dubji fl-imħuħ tan-nies. (Salm 26:4; Proverbji 22:5) Oħrajn użaw il-materjal tagħna jew il-logo tal-jw.org f’reklami, fl-apps tal-mowbajls jew tablets, u fuq prodotti li jbigħu. Imma peress li l-materjal tagħna u l-logo tagħna huma protetti mil-liġi, aħna nistgħu ntellgħuhom il-qorti u nwaqqfuhom milli jagħmlu dan. (Proverbji 27:12) Imma l-qrati għandhom mnejn ma jappoġġjawniex jekk inħallu lil xi nies, saħansitra lill-aħwa, jitfgħu l-pubblikazzjonijiet tagħna fuq websajts oħrajn jew jużaw il-logo tal-jw.org biex ibigħu prodotti.
Jekk inniżżlu, jew niddawnlowdjaw, il-pubblikazzjonijiet tagħna minn xi mkien ieħor apparti jw.org, dan jistaʼ jkun taʼ periklu. Ġeħova jagħtina l-ikel spiritwali permezz tal-“ilsir leali u għaqli” biss. (Mattew 24:45) Dan “l-ilsir” juża biss il-websajts uffiċjali tiegħu biex jipprovdi ikel spiritwali—www.pr418.com, tv.pr418.com, u wol.pr418.com. U aħna għandna biss tliet apps uffiċjali għall-mowbajls u t-tablets—JW Language®, JW Library®, u JW Library Sign Language®. Fuq dawn il-websajts u l-apps mhux se nsibu reklami jew xi affarijiet oħra mid-dinja taʼ Satana. Imma jekk inġibu l-pubblikazzjonijiet tagħna minn fuq websajt jew app oħra, ikun hemm il-periklu li dawn jistgħu jkunu ġew mibdulin b’xi mod.—Salm 18:26; 19:8.
Flimkien maʼ dan, jekk nitfgħu l-materjal tagħna fuq websajts fejn in-nies jistgħu jagħmlu l-kummenti, dan jippermetti lill-apostati u oħrajn biex jikkritikaw l-organizzazzjoni taʼ Ġeħova. Xi aħwa mbagħad joqogħdu jargumentaw maʼ dawn in-nies, u dan iġib saħansitra iktar diżunur lil Ġeħova. Diskussjonijiet bħal dawn fuq l-Internet mhumiex il-mod xieraq kif nikkoreġu l-ħsieb taʼ xi ħadd u ngħinuh jifhem il-verità. (1 Timotju 6:3-5; 2 Timotju 2:23-25) Ukoll, xi wħud jagħmlu websajts u accounts fuq il-midja soċjali li jidhru li huma ġejjin mill-organizzazzjoni jew minn aħwa tal-Ġemgħa li Tiggverna. Imma dawn huma foloz. L-ebda membru tal-Ġemgħa li Tiggverna ma għandu Web page personali jew account fuq xi sit tal-midja soċjali.
Meta ngħidu lin-nies biex jidħlu fuq jw.org, inkunu qed nappoġġjaw l-ippritkar tal-“aħbar tajba.” (Mattew 24:14) Il-websajts u l-apps tagħna qed isiru dejjem aħjar. Aħna rridu li kulħadd jibbenefika minnhom. Allura, aħna għandna permess li nibagħtu kopja taʼ xi pubblikazzjoni jew link tal-websajt permezz taʼ e-mail. B’dal-mod, inkunu qed inwasslu lin-nies lejn l-uniku sors li Ġeħova qed juża biex jagħti l-ikel spiritwali, “l-ilsir leali u għaqli.”
^ par. 1 Tistaʼ ssib link għat-Termini tal-użu fin-naħa t’isfel tal-paġna tad-dħul taʼ jw.org/mt. Dawn ir-regoli japplikaw għal kull ħaġa li hi disponibbli fuq il-websajts tagħna.