1. David x’qal dwar l-​umiltà taʼ Ġeħova?

NISTGĦU verament ngħidu li Ġeħova hu umli? Dażgur li nistgħu! Darba David qal: “Int se tagħtini t-​tarka tiegħek taʼ salvazzjoni, u hi l-​umiltà tiegħek li tagħmilni kbir.” (2 Sam. 22:36; Salm 18:35) Meta David kiteb dan, forsi ftakar meta l-​profeta Samwel mar id-​dar taʼ missieru biex jagħżel lil dak li kien se jkun is-​sultan taʼ Iżrael. David kien l-​iżgħar wieħed mit-​tmien subien, imma hu kien il-​wieħed li Ġeħova għażel biex ikun minflok is-​Sultan Sawl.—1 Sam. 16:1, 10-​13.

2. X’se niddiskutu f’dan l-​artiklu?

² David żgur li qabel maʼ dak li jgħid Salm 113 dwar Ġeħova: “Qed jitbaxxa biex iħares lejn is-​sema u l-​art, iqajjem lill-​batut mit-​trab. Jgħolli lill-​fqir . . . biex iqiegħdu bil-​qiegħda man-​nobbli.” (Salm 113:6-​8) F’dan l-​artiklu, l-​ewwel se nitgħallmu lezzjonijiet importati dwar l-​umiltà billi niddiskutu kif Ġeħova wera din il-​kwalità. Se nitgħallmu iktar dwar l-​umiltà mill-​eżempji tas-​Sultan Sawl, il-​profeta Danjel, u Ġesù.

3. Ġeħova kif jaġixxi magħna, u dan xi prova jagħti?

³ Ġeħova juri li hu umli bil-​mod kif jaġixxi man-​nies imperfetti. Hu mhux biss jaċċetta l-​qima tagħna imma wkoll iqisna bħala l-​ħbieb tiegħu. (Ġak. 4:8) Biex aħna nkunu l-​ħbieb tiegħu, Ġeħova ħa l-​inizjattiva billi provda lil  Ibnu bħala sagrifiċċju għal dnubietna. Xi ħniena u qalb tajba juri magħna Ġeħova!

4. Ġeħova x’tana, u għala?

⁴ Aħseb f’mod ieħor kif Ġeħova juri l-​umiltà. Bħala l-​Ħallieq, Ġeħova setaʼ ħalaqna mingħajr l-​abbiltà li nagħżlu x’nagħmlu b’ħajjitna. Imma hu ma għamilx hekk. Hu għamilna fix-​xbieha tiegħu u tana l-​libertà. Minkejja li aħna żgħar u dgħajfin meta mqabblin maʼ Ġeħova, l-​għażliet li nagħmlu huma importanti għalih. Hu jridna naqduh minn qalbna għax inħobbuh u għax nafu li jekk nobduh se nibbenefikaw. (Dt. 10:12; Is. 48:17, 18) Kemm napprezzaw li Ġeħova hu umli!

5. Ġeħova kif jgħallimna nkunu umli? (Ara l-​istampa tal-​qoxra.)

⁵ Bil-​mod kif Ġeħova jaġixxi magħna jgħallimna nkunu umli. Minkejja li huwa l-​iktar Persuna intelliġenti fl-​univers, xorta jaċċetta s-​suġġerimenti t’oħrajn. Pereżempju, Ġeħova ħalla lil Ibnu jgħinu biex joħloq l-​affarijiet kollha. (Prov. 8:27-​30; Kol. 1:15, 16) U minkejja li Ġeħova jistaʼ kollox, hu jagħti responsabbiltajiet lil oħrajn. Nistgħu naraw dan meta għażel lil Ġesù bħala s-​Sultan tas-​Saltna, u ta xi responsabbiltà lill-​144,000 uman biex imexxu maʼ Ġesù. (Lq. 12:32) Bla dubju, Ġeħova ttrennja lil Ġesù biex ikun Sultan u Qassis il-​Kbir. (Ebr. 5:8, 9) Hu jittrennja wkoll lil dawk li se jmexxu maʼ Ġesù biex iwettqu l-​inkarigu tagħhom, imma ma jipprovax jikkontrolla kif jagħmlu x-​xogħol. Minflok, hu jafda li se jagħmlu r-​rieda tiegħu.—Riv. 5:10.

6-7. X’nitgħallmu mill-​mod kif Missierna tas-​sema jagħti responsabbiltajiet lil oħrajn?

⁶ Jekk Missierna tas-​sema, li m’għandu  bżonn għajnuna mingħand ħadd, jagħti responsabbiltajiet lil oħrajn, kemm għandna iktar nagħmlu dan aħna! Inti kap taʼ familja jew anzjan fil-​kongregazzjoni? Imita l-​eżempju taʼ Ġeħova billi tagħti responsabbiltajiet lil oħrajn u tipprovax tikkontrolla kif huma jagħmlu x-​xogħol. Meta timita lil Ġeħova, mhux biss se jsir ix-​xogħol, imma wkoll tkun qed tittrennja oħrajn u turihom li tafdahom. (Is. 41:10) X’jistgħu jitgħallmu iktar minn Ġeħova dawk li għandhom responsabbiltajiet?

⁷ Il-​Bibbja turina li Ġeħova hu interessat fl-​opinjoni tal-​anġli. (1 Slat. 22:19-​22) Ġenituri, kif tistgħu timitaw l-​eżempju taʼ Ġeħova? Meta tkunu se tagħmlu xi ħaġa, jekk ikun xieraq, saqsu lit-​tfal tagħkom għall-​opinjoni tagħhom. U fejn tistgħu applikaw is-​suġġerimenti tagħhom.

8. Ġeħova kif aġixxa b’paċenzja maʼ Abraham u Sara?

⁸ Il-​paċenzja taʼ Ġeħova turi wkoll kemm hu umli. Pereżempju, Ġeħova juri l-​paċenzja maʼ dawk li jaqduh meta b’rispett jiddubitaw id-​deċiżjonijiet tiegħu. Hu semaʼ lil Abraham meta ħaseb li ma kienx sew li jeqred lil Sodoma u Gomorra. (Ġen. 18:22-​33) U tiftakar kif Ġeħova rreaġixxa mal-​mara taʼ Abraham, Sara? Hu ma ħassux offiż jew irrabjat għax daħqet meta wegħedha li se jkollha tarbija fi xjuħitha. (Ġen. 18:10-​14) Minflok, hu tratta lil Sara b’rispett.

9. Il-​ġenituri u l-​anzjani, x’jistgħu jitgħallmu mill-​eżempju taʼ Ġeħova?

⁹ Ġenituri u anzjani, x’tistgħu titgħallmu mill-​eżempju taʼ Ġeħova? Ikkunsidra kif tħossok meta t-​tfal tiegħek jew uħud mill-​kongregazzjoni ma jaqblux mad-​deċiżjoni tiegħek. Xi tkun l-​ewwel reazzjoni tiegħek? Li tikkoreġihom jew tipprova tifhem il-​ħsieb tagħhom? Il-​familji u l-​kongregazzjonijiet żgur se jibbenefikaw meta dawk li għandhom responsabbiltajiet jimitaw lil Ġeħova. S’issa ddiskutejna x’nistgħu nitgħallmu dwar l-​umiltà mill-​eżempju taʼ Ġeħova. Issa se nitgħallmu kif nistgħu nuru l-​umiltà billi nikkunsidraw eżempji oħrajn fil-​Bibbja.

10. Ġeħova kif juża l-​eżempji t’oħrajn biex jgħallimna?

¹⁰ Bħala “l-​Istruttur Grandjuż” tagħna, Ġeħova jipprovdi eżempji fil-​Kelma tiegħu biex jgħallimna. (Is. 30:20, 21) Mir-​rakkonti tal-​Bibbja, aħna nitgħallmu dwar nies li kellhom kwalitajiet li jogħġbu lil Alla, u għarfu l-​limitazzjonijiet tagħhom. Ukoll, se nitgħallmu minn uħud li naqsu li juru kwalitajiet tajbin.—Salm 37:37; 1 Kor. 10:11.

11. X’nistgħu nitgħallmu mill-​eżempju ħażin taʼ Sawl?

¹¹ Aħseb x’ġara lis-​Sultan Sawl. Għall-​ewwel kien żagħżugħ umli. Hu kien jaf il-​limitazzjonijiet tiegħu u anki żamm lura milli jaċċetta iżjed responsabbiltajiet. (1 Sam. 9:21; 10:20-​22) Imma maż-​żmien, Sawl sar prużuntuż. Hu beda jaġixxi hekk ftit wara li sar sultan. Darba minnhom, waqt li kien qed jistenna lill-​profeta Samwel, tilef il-​paċenzja. Minflok ma ħalla f’idejn Ġeħova, Sawl offra sagrifiċċju tal-​ħruq minkejja li ma kellux id-​dritt. Minħabba f’hekk, Sawl tilef l-​approvazzjoni taʼ Ġeħova u maż-​żmien ma baqax sultan. (1 Sam. 13:8-​14) Jekk  nitgħallmu minn dan l-​eżempju ħażin u nevitaw li nkunu prużuntużi se nkunu għaqlin.

12. Danjel għala hu taʼ eżempju tajjeb għalina?

¹² Kuntrarju għall-​eżempju ħażin taʼ Sawl, il-​profeta Danjel ħallielna eżempju tajjeb. Matul ħajtu, Danjel baqaʼ umli u dejjem talab lil Ġeħova għal gwida. Pereżempju, Danjel ma ħax il-​krettu meta Ġeħova użah biex jispjega l-​ħolma taʼ Nebukadnessar. Minflok, hu ta t-​tifħir lil Ġeħova. (Dan. 2:26-​28) X’nitgħallmu minn dan? Jekk l-​aħwa jgħidulek li jieħdu pjaċir bit-​taħditiet li tagħti jew ikollok esperjenzi tajbin fil-​ministeru, se tagħti t-​tifħir lil Ġeħova? Irridu nirrealizzaw li mingħajr l-​għajnuna taʼ Ġeħova ma nistgħux nagħmlu dawn l-​affarijiet. (Flp. 4:13) Meta jkollna din l-​attitudni, inkunu qed nimitaw ukoll l-​eżempju tajjeb taʼ Ġesù. Kif?

13. X’jgħallimna Ġwanni 5:19, 30 dwar Ġesù?

¹³ Ġesù straħ fuq Ġeħova avolja kien l-​Iben perfett tiegħu. (Aqra Ġwanni 5:19, 30.) Hu qatt ma prova jaħtaf l-​awtorità mingħand Missieru tas-​sema. Filippin 2:6 jgħidilna li Ġesù “ma qagħadx jaħseb li għandu jaħtaf, jiġifieri, li għandu jkun ugwali m’Alla.” Ġesù għaraf il-​limitazzjonijiet tiegħu u rrispetta l-​awtorità taʼ Missieru.

14. Ġesù x’għamel meta ġie mitlub jagħmel xi ħaġa li ma kellux awtorità fuqha?

¹⁴ Aħseb x’għamel Ġesù meta Ġakbu, Ġwanni, u ommhom talbuh xi ħaġa li hu ma kellux awtorità fuqha. Ġesù mill-​ewwel qal li Missieru tas-​sema biss setaʼ jiddeċiedi min kien se jkun fuq ix-​xellug u fuq il-​lemin tiegħu fis-​Saltna. (Mt. 20:20-​23) Ġesù wera li kien umli u għaraf il-​limitazzjonijiet tiegħu. Hu qatt m’għamel xi ħaġa li Ġeħova ma tahx l-​awtorità jagħmilha. (Ġw. 12:49) Kif nistgħu nimitaw l-​eżempju tajjeb taʼ Ġesù?

15-16. Kif nistgħu napplikaw il-​parir tal-​Bibbja fl-​1 Korintin 4:6?

¹⁵ Aħna nimitaw l-​eżempju taʼ Ġesù billi napplikaw il-​parir tal-​Bibbja fl-​1 Korintin 4:6. Hemmhekk naqraw: “Tmorrux lil hinn minn dak li hemm miktub.” Għalhekk, meta xi ħadd jitlobna parir, m’għandniex ngħidu l-​opinjoni  tagħna jew dak li jiġina f’moħħna. Minflok, irridu nagħtu pariri li huma bbażati fuq il-​Bibbja u l-​pubblikazzjonijiet tagħna. B’dan il-​mod, nuru li nafu l-​limitazzjonijiet tagħna u li ma nafux kollox. Meta nagħmlu hekk, nuru li aħna umli għax nifhmu li l-​pariri taʼ Ġeħova huma dejjem aħjar minn tagħna.—Riv. 15:3, 4.

¹⁶ Apparti milli nfaħħru lil Ġeħova, għandna raġunijiet oħra biex inkunu umli. Jekk inkunu umli se nkunu ferħanin u ningwalawha m’oħrajn. Ejja nikkunsidraw dan.

17. Nies umli għala huma ferħanin?

¹⁷ Meta nkunu umli, għandna iktar ċans li nkunu ferħanin. Għala? Meta nkunu konxji tal-​limitazzjonijiet tagħna, se nkunu ferħanin u napprezzaw l-​għajnuna li nirċievu mingħand oħrajn. Pereżempju, aħseb meta Ġesù fejjaq għaxart irġiel li kellhom il-​marda tal-​ġdiem. Wieħed minnhom biss mar lura biex jirringrazzja lil Ġesù talli fejqu minn dik il-​marda kiefra. Dan ir-​raġel umli kien jaf li ma setax ifiq mingħajr l-​għajnuna taʼ Ġesù, u għalhekk apprezza l-​għajnuna li rċieva u faħħar lil Alla.—Lq. 17:11-​19.

18. L-​umiltà kif tgħinna ningwalawha m’oħrajn? (Rumani 12:10)

¹⁸ Għal nies umli jkun iżjed faċli biex jingwalawha m’oħrajn u jkollhom ħbieb tal-​qalb. Għala? Huma jieħdu pjaċir li oħrajn għandhom kwalitajiet tajbin u b’hekk jafdawhom. Dawk li huma umli jkunu ferħanin meta oħrajn jagħmlu xogħol tajjeb fl-​inkarigu tagħhom u ma jżommux lura milli jfaħħruhom.—Aqra Rumani 12:10.

19. Għala għandna nevitaw il-​kburija?

 ¹⁹ Kuntrarju għal nies umli, nies kburin isibuha diffiċli biex ifaħħru lil oħrajn għax jippreferu jirċievu t-​tifħir huma. Huma jqabblu lilhom infushom m’oħrajn u jipprovaw ikunu aħjar minnhom. Minflok jittrennjaw lil oħrajn u jagħtuhom responsabbiltajiet, jaf jgħidu: “Jekk trid xi ħaġa sew, trid tagħmilha int stess.” Spiss persuna kburija tkun trid li tħossha iktar importanti minn oħrajn u tgħir meta huma jagħmlu affarijiet aħjar minnha. (Ga 5:26) Nies bħal dawn ma tantx ikollhom ħbieb. Jekk nindunaw li għandna problema bil-​kburija, għandna nitolbu mill-​qalb lil Ġeħova għall-​għajnuna biex inbiddlu l-​mod kif naħsbu ħalli ma nħallux din il-​kwalità ssir parti mill-​personalità tagħna.—Rum. 12:2.

20. Għala rridu nkunu umli?

²⁰ Kemm għandna għal xiex napprezzaw l-​eżempju taʼ Ġeħova! L-​umiltà tiegħu narawha mill-​mod kif jaġixxi mal-​qaddejja tiegħu, u aħna nkunu rridu nimitawh. Barra minn hekk, irridu nimitaw l-​eżempji tajbin li nsibu fil-​Bibbja taʼ nies li qdew lil Ġeħova b’umiltà. Jalla dejjem nagħtu l-​glorja u l-​unur li jixraq lil Alla. (Riv. 4:11) Jekk nagħmlu dawn l-​affarijiet, aħna nistgħu nkunu l-​ħbieb taʼ Ġeħova għal dejjem, għax hu jħobb lil nies umli u li jagħrfu l-​limitazzjonijiet tagħhom.