1. Ġeħova għala ħalaq il-​ħajja?

KIEN hemm żmien li Ġeħova kien waħdu, imma dan ma jfissirx li ħassu mdejjaq. Ġeħova m’għandu bżonn lil ħadd biex ikun ferħan. Imma Alla ried li oħrajn jgħixu u jkunu ferħanin ukoll. Immotivat mill-​imħabba, Ġeħova beda joħloq.—Salm 36:9; 1 Ġw. 4:19.

2. Kif ħassewhom Ġesù u l-​anġli meta Ġeħova ħalaq l-​affarijiet l-​oħrajn?

² L-​ewwel, Ġeħova ħalaq lil Ibnu, Ġesù. Flimkien maʼ Ibnu, Ġeħova mbagħad ħalaq “l-​affarijiet l-​oħrajn kollha,” bħall-​anġli. (Kol. 1:16) Ġesù kien ferħan ħafna li ħadem maʼ Missieru. (Prov. 8:30) U anki l-​anġli kellhom għalfejn jifirħu. Huma kienu hemm meta Ġeħova u l-​Ħaddiem tas-​Sengħa tiegħu, Ġesù, ħolqu s-​sema u l-​art. L-​anġli kif urew il-​ferħ tagħhom? Huma “bdew jgħajtu b’tifħir” meta l-​art kienet lesta, u bla dubju baqgħu jfaħħruh meta raw kull ħaġa li hu ħalaq, speċjalment il-​bnedmin. (Ġob 38:7; Prov. 8:31) Kull ħaġa li ħalaq Ġeħova wriet l-​imħabba u l-​għerf tiegħu.—Salm 104:24; Rum. 1:20.

3. Kif jurina l-​1 Korintin 15:21, 22, is-​sagrifiċċju taʼ Ġesù bħala fidwa x’għamel possibbli?

³ Ġeħova ried li l-​bnedmin jgħixu għal dejjem fuq il-​pjaneta sabiħa li hu ħalaq. Imma Adam u Eva ħaduha kontra Ġeħova, għalhekk ma setgħux jgħixu għal dejjem. Huma u t-​tfal tagħhom maż-​żmien kienu se jmutu. (Rum.  5:12) Ġeħova x’għamel? Mill-​ewwel, hu qal kif kien se jsalva lill-​bnedmin. (Ġen. 3:15) Permezz tas-​sagrifiċċju taʼ Ġesù bħala fidwa, Ġeħova għamilha possibbli biex it-​tfal taʼ Adam u Eva jinħelsu mid-​dnub u l-​mewt. Imbagħad, lil dawk li jagħżlu li jaqduh, hu se jkun jistaʼ jagħtihom il-​ħajja taʼ dejjem.—Ġw. 3:16; Rum. 6:23; aqra l-​1 Korintin 15:21, 22.

4. Liema mistoqsijiet se nikkunsidraw f’dan l-​artiklu?

⁴ Hemm ħafna mistoqsijiet li nistgħu nsaqsu dwar il-​wegħda tal-​irxoxt li tana Alla. Pereżempju, l-​irxoxt kif se jseħħ? Se nagħrfuhom lil dawk li se jiġu rxoxtati? L-​irxoxt b’liema modi se jġibilna l-​ferħ? U l-​irxoxt x’jgħallimna dwar l-​għerf, il-​paċenzja, u l-​imħabba taʼ Ġeħova? Ejja nikkunsidraw dawn il-​mistoqsijiet.

5. In-​nies għala mhux se jiġu rxoxtati kollha f’daqqa?

⁵ Meta Ġeħova permezz taʼ Ibnu se jirxoxta lil miljuni taʼ nies, għala ma nistennewx li dawn jiġu rxoxtati kollha f’daqqa? Għax jekk jiġu rxoxtati kollha f’daqqa fuq l-​art se jkun hemm konfużjoni, u Ġeħova jagħmel kollox b’mod organizzat. Hu jaf li biex in-​nies jgħixu fil-​paċi, l-​affarijiet għandhom bżonn ikunu organizzati. (1 Kor. 14:33) Alla Ġeħova kien għaref u paċenzjuż meta ħadem maʼ Ġesù biex ilesti l-​art għall-​bnedmin. Anki Ġesù ħa jkun għaref u paċenzjuż matul it-​Tmexxija taʼ Elf Sena tiegħu meta se jaħdem maʼ dawk li jsalvaw f’Armageddon, biex jippreparaw l-​art u dak kollu li hemm bżonn għal dawk li se jiġu rxoxtati.

6. Skont Atti 24:15, min se jkun hemm fost dawk li jiġu rxoxtati minn Ġeħova?

 ⁶ L-​aqwa mod kif dawk li jsalvaw f’Armageddon se jgħinu lil dawk irxoxtati hu billi jgħallmuhom dwar is-​Saltna t’Alla u dwar dak li jitlob minna Ġeħova. Għala? Għax il-​biċċa l-​kbira tan-​nies li se jiġu rxoxtati se jkunu wħud li l-​Bibbja ssejħilhom “m’humiex sewwa.” (Aqra Atti 24:15.) Dawn se jkollhom jagħmlu ħafna bidliet biex igawdu mill-​fidwa taʼ Kristu u jgħixu għal dejjem. Aħseb kemm se jkun hemm xogħol biex ngħallmu lil miljuni taʼ nies li ma jafu xejn dwar Ġeħova. Għalhekk forsi nistaqsu: Kull persuna se jkollha lil xi ħadd magħha biex jgħallimha bħalma nagħmlu llum meta jkollna studju tal-​Bibbja? L-​uħud ġodda se jitqassmu f’kongregazzjonijiet u jiġu trenjati biex jgħallmu lil dawk li jiġu rxoxtati warajhom? Se jkollna nistennew u naraw. Dak li nafu hu li sal-​aħħar tal-​elf sena, “l-​art se tkun mimlija bl-​għarfien taʼ Ġeħova.” (Is. 11:9) Kemm se jkollna xogħol sabiħ matul l-​elf sena!

7. Għala n-​nies t’Alla se jifhmu lil dawk li jiġu rxoxtati?

⁷ Matul it-​Tmexxija taʼ Elf Sena taʼ Kristu, in-​nies taʼ Ġeħova se jkomplu jagħmlu bidliet f’ħajjithom biex jogħġbuh. Huma se jkunu jistgħu jifhmu lil dawk irxoxtati, għalhekk se jgħinuhom jagħmlu bidliet biex jegħlbu ħsibijiet u xewqat ħżiena, u jgħixu skont il-​livelli taʼ Ġeħova. (1 Pt. 3:8) Meta dawk irxoxtati se jaraw li n-​nies taʼ Ġeħova huma umli u għadhom qed jagħmlu bidliet biex jogħġbu lil Ġeħova se jkunu jridu jaqdu lil Ġeħova magħhom.—Flp. 2:12.

8. Għala nistgħu ngħidu li se nagħrfu lil tal-​familja u l-​ħbieb li jiġu rxoxtati?

⁸ Hemm diversi raġunijiet għala nistgħu ngħidu li se nagħrfu lill-​maħbubin tagħna li se jiġu rxoxtati. Pereżempju, meta Ġeħova rxoxta lin-​nies fil-​passat, huma qamu bl-​istess dehra, bl-​istess leħen, u bl-​istess ħsibijiet. Ftakar li Ġesù qabbel il-​mewt maʼ raqda, u l-​irxoxt bħal meta xi ħadd iqum minn raqda. (Mt. 9:18, 24; Ġw. 11:11-​13) Meta xi ħadd iqum minn raqda jibqaʼ l-​istess bniedem u bl-​istess memorja li kellu qabel. Ikkunsidra l-​eżempju taʼ Lazzru. Hu kien ilu mejjet erbat ijiem u kien diġà beda jinten. Imma meta Ġesù qajmu, ħutu mill-​ewwel għarfuh u bla dubju anki hu għarafhom.—Ġw. 11:38-​44; 12:1, 2.

9. Dawk li se jirxoxtaw għala mhux se jkunu perfetti?

⁹ Ġeħova wiegħed li fil-​Ġenna tal-​art ħadd mhu se jgħid: “Jien marid.” (Is. 33:24; Rum. 6:7) B’hekk, dawk li se jqumu mill-​mewt se jkollhom ġisem b’saħħtu. Però, dawn mhux se jkunu perfetti mill-​ewwel għax inkella jaf il-​familja u l-​ħbieb tagħhom ma jagħrfuhomx. Milli jidher, il-​bnedmin kollha se jsiru perfetti bil-​mod il-​mod matul it-​Tmexxija taʼ Elf Sena taʼ Kristu. Wara li jgħaddu l-​elf sena, Ġesù se jagħti s-​Saltna lura lil Missieru. Is-​Saltna se tkun wettqet dak kollu li Ġeħova ried, inkluż li n-​nies isiru perfetti.—1 Kor. 15:24-​28; Riv. 20:1-​3.

10. Kif se jġiegħlek tħossok l-​irxoxt?

¹⁰ Immaġina kemm se jkun żmien sabiħ meta se terġaʼ tara lill-​maħbubin tiegħek.  Se jaqbiżlek id-​dmugħ bil-​ferħ li se tħoss? Se tkanta bil-​ferħ lil Ġeħova? Li nafu żgur hu li se nħossu mħabba kbira għal Ġeħova u għal Ibnu li tant iħobbuna għax bis-​saħħa tagħhom l-​irxoxt sar possibbli.

11. Skont il-​kliem taʼ Ġesù fi Ġwanni 5:28, 29, x’se jiġrilhom dawk li jagħmlu bidliet u jobdu lil Alla?

¹¹ Immaġina l-​ferħ li se jħossu dawk li se jqumu hekk kif jagħmlu bidliet biex jobdu lil Alla. Dawk li jagħmlu dawn il-​bidliet se jkunu jistgħu jgħixu għal dejjem fil-​Ġenna tal-​art. Filwaqt li dawk li ma jridux jagħmlu bidliet, Ġeħova mhux se jħallihom jgħixu hemmhekk, biex b’hekk dawk ubbidjenti jgħixu fil-​paċi.—Is. 65:20; aqra Ġwanni 5:28, 29.

12. Dawk kollha li se jkunu fuq l-​art, kif se jkunu mberkin minn Ġeħova?

¹² Taħt it-​tmexxija tas-​Saltna, in-​nies t’Alla kollha se jaraw li l-​kliem fi Proverbji 10:22 hu veru. Il-​vers jgħid: “Il-​barka taʼ Ġeħova—hi li ġġib l-​għana, u hu ma jżid l-​ebda wġigħ magħha.” Bl-​għajnuna tal-​ispirtu taʼ Ġeħova, in-​nies tiegħu se jsiru jixbhu iktar lil Kristu u bil-​mod il-​mod isiru perfetti. (Ġw. 13:15-​17; Efes. 4:23, 24) Ukoll, maʼ kull ġurnata li tgħaddi huma se jsiru iktar b’saħħithom u nies aħjar. Kemm se tkun sabiħa l-​ħajja! (Ġob 33:25) Imma li timmedita issa fuq l-​irxoxt, kif jistaʼ jgħinek?

13. Fi qbil maʼ Salm 139:1-​4, l-​irxoxt kif juri li Ġeħova jaf kollox dwarna?

¹³ Kif iddiskutejna qabel, meta Ġeħova se jqajjem lin-​nies mill-​mewt se jkollhom l-​istess memorja u personalità. Aħseb xi jfisser dan. Ġeħova tant iħobbok li jinnota u jiftakar dak kollu li taħseb, tħoss, tgħid, u tagħmel. Mela jekk tmut u Ġeħova jirxoxtak, se jkun faċli għalih biex iqajmek kif kont qabel. Is-​Sultan David kien jaf kemm Ġeħova jimpurtah minn kull wieħed u waħda minna. (Aqra Salm 139:1-​4.) Kif tħossok meta tifhem kemm Ġeħova jafek sew?

14. Kif għandna nħossuna meta naħsbu dwar kemm Ġeħova jafna sew?

¹⁴ Meta naħsbu dwar kemm Ġeħova jafna sew m’għandniex għalfejn ninkwetaw. Għala? Ftakar li Ġeħova jimpurtah ħafna minna. Kull wieħed u waħda minna hu prezzjuż għalih. Ġeħova jaf minn xiex għaddejna u jifhem kif dan jeffettwana. Kemm hu inkuraġġanti dan il-​ħsieb! Qatt m’għandna nħossuna waħedna. Ġeħova jkun magħna kull mument taʼ ħajjitna u jixtieq jgħinna.—2 Kron. 16:9.

15. L-​irxoxt kif juri l-​għerf taʼ Ġeħova?

¹⁵ Minħabba li n-​nies jibżgħu li jmutu, l-​għedewwa tagħhom jistgħu jhedduhom li joqtluhom jekk ma jagħmlux dak li jgħidu huma. Nies ikkontrollati minn Satana jużaw din il-​biżaʼ biex jisforzaw lil nies oħrajn jittradixxu lill-​ħbieb tagħhom u jagħmlu affarijiet kontra qalbhom. Imma dawn ma jistgħux jisforzaw lilna biex nagħmlu hekk. Aħna nafu li jekk l-​għedewwa tagħna joqtluna, Ġeħova se jirxoxtana. (Riv. 2:10) Aħna konvinti li xejn ma jistaʼ jwaqqafna milli nkunu ħbieb taʼ Ġeħova. (Rum. 8:35-​39) It-​tama tal-​irxoxt turina kemm Ġeħova hu għaref! Grazzi għal din it-​tama, aħna ma nibżgħux minn dawk li jappoġġaw lil Satana u jhedduna li joqtluna jekk ma  nobduhomx. Ukoll, din it-​tama timliena bil-​kuraġġ biex nibqgħu leali lejn Ġeħova.

16. Liema mistoqsijiet għandek tistaqsi lilek innifsek, u t-​tweġibiet kif jistgħu juru kemm tafda lil Ġeħova?

¹⁶ Jekk l-​għedewwa taʼ Ġeħova jhedduk li joqtluk, temmen int li Ġeħova jistaʼ jqajmek? Kif tistaʼ tkun taf? Mod wieħed hu billi ssaqsi lilek innifsek, ‘Id-​deċiżjonijiet tiegħi taʼ kuljum juru li nafda f’Ġeħova? (Lq. 16:10) Kif nuża l-​ħin u l-​flus juri li nafda fil-​wegħda taʼ Ġeħova li se jieħu ħsieb il-​bżonnijiet tiegħi jekk inpoġġi s-​Saltna l-​ewwel?’ (Mt. 6:31-​33) Jekk it-​tweġiba għal dawn il-​mistoqsijiet hija iva, turi li tafda f’Ġeħova u se tkun preparat għal kull prova li se tiffaċċja.—Prov. 3:5, 6.

17. (a) L-​irxoxt kif juri li Ġeħova hu paċenzjuż? (b) Kif nistgħu nuru li napprezzaw il-​paċenzja taʼ Ġeħova?

¹⁷ Għalkemm Ġeħova diġà ddeċieda meta se jeqred din is-​sistema ħażina u għandu xewqa kbira biex jirxoxta lill-​mejtin, hu mhux se jitlef il-​paċenzja u jaġixxi qabel il-​waqt. (Mt. 24:36; Ġob 14:14, 15) Hu qed jistenna ż-​żmien addattat biex iqajjem lill-​mejtin. (Ġw. 5:28) Għal xiex għandna napprezzaw il-​paċenzja taʼ Ġeħova? Aħseb f’dan: Minħabba li Ġeħova hu paċenzjuż, ħafna nies, inkluż aħna, kellhom ċans ‘jaslu għall-​indiema.’ (2 Pt. 3:9) Ġeħova jixtieq li kulħadd ikollu l-​opportunità li jgħix għal dejjem. Kif nistgħu nuru li napprezzaw il-​paċenzja tiegħu? Billi nagħmlu dak kollu li nistgħu biex insibu lil dawk li għandhom “attitudni xierqa lejn il-​ħajja taʼ dejjem” u ngħinuhom iħobbu lil Ġeħova u jaqduh. (Atti 13:48) Imbagħad bħalna, anki huma se jibbenefikaw mill-​paċenzja taʼ Ġeħova.

18. Għala għandna nkunu paċenzjużi m’oħrajn?

¹⁸ Ġeħova bil-​paċenzja se jistenna sat-​tmiem tal-​elf sena biex aħna nsiru perfetti. Sa dak iż-​żmien, Ġeħova lest li jibqaʼ jaħfer in-​nuqqasijiet tagħna. Għalhekk, għandna nimitaw l-​eżempju tiegħu, niffokaw fuq il-​kwalitajiet tajbin t’oħrajn, u nkunu paċenzjużi magħhom. Ikkunsidra l-​eżempju taʼ oħt li r-​raġel tagħha beda jkollu attakki t’ansjetà qawwija  u waqaf jattendi l-​laqgħat. Hi tgħid: “Dan kien vera diffiċli għalija, ħajjitna nqalbet taʼ taħt fuq. U ma stajniex nagħmlu dak li xtaqna.” Minkejja dan, tant kienet tħobb lil żewġha li kienet paċenzjuża miegħu. Hi straħet fuq Ġeħova u ma qatgħetx qalbha. Bħal Ġeħova, hi ffokat fuq il-​kwalitajiet tajbin taʼ żewġha. Hi tgħid: “Żewġi għandu kwalitajiet mill-​aħjar u qed jagħmel dak kollu li jistaʼ biex bil-​mod il-​mod jirkupra.” Dan jgħallimna kemm hu importanti li nuru l-​paċenzja maʼ tal-​familja u mal-​aħwa fil-​kongregazzjoni li qed jiffaċċjaw ċirkustanzi diffiċli.

19. X’għandna nkunu determinati li nagħmlu?

¹⁹ Ġesù u l-​anġli ferħu ħafna meta nħolqot l-​art. Imma immaġina kemm se jkunu ferħanin meta se jaraw l-​art mimlija b’nies perfetti li jħobbu u jaqdu lil Ġeħova. Immaġina kemm se jkunu ferħanin dawk li se jkunu fis-​sema meta jaraw il-​bnedmin igawdu x-​xogħol tagħhom. (Riv. 4:4, 9-​11; 5:9, 10) Aħseb ukoll meta inti mhux se tibki bl-​uġigħ imma se tibki bil-​ferħ. U l-​mard, id-​dwejjaq, u l-​mewt se jispiċċaw għal dejjem. (Riv. 21:4) Sa dak iż-​żmien, kun determinat li tagħmel bħal Ġeħova billi tkun għaref, paċenzjuż, u turi l-​imħabba. Jekk tagħmel hekk, int se tibqaʼ ferħan minkejja l-​provi li tiffaċċja. (Ġak. 1:2-​4) Kemm għandna napprezzaw il-​wegħda taʼ Ġeħova “li se jkun hemm irxoxt”!—Atti 24:15.