ARTIKLU GĦALL-ISTUDJU 32
Saħħaħ il-Fidi Tiegħek fil-Ħallieq
“Il-fidi hi . . . it-turija evidenti taʼ realtajiet li ma jidhrux.”—EBR. 11:1.
GĦANJA 11 Il-ħolqien ifaħħar lil Alla
ĦARSA BIL-QUDDIEM *
1. Jekk twelidt fil-verità, x’tgħallimt dwar Ġeħova?
JEKK twelidt fil-verità, x’aktarx li tgħallimt dwar Ġeħova minn meta kont żgħir. Int tgħallimt li hu ħalaq kollox, għandu kwalitajiet mill-isbaħ, u li se jerġaʼ jagħmel l-art ġenna.—Ġen. 1:1; Atti 17:24-27.
2. Xi wħud x’jaħsbu dwar dawk li jemmnu fil-Ħallieq?
2 Illum ħafna nies ma jemmnux li Alla jeżisti jew li hu l-Ħallieq taʼ kollox. Minflok, huma jemmnu li l-ħajja bdiet teżisti b’kumbinazzjoni u li mbagħad minn ħajja waħda ġew ħlejjaq ħajjin oħrajn. Xi wħud min-nies li jemmnu dan huma taʼ skola. Huma jgħidu li x-xjenza turi li dak li tgħid il-Bibbja mhux minnu, u li dawk in-nies li jemmnu li Alla ħalaq kollox huma injoranti u jemmnu kulma jisimgħu.
3. Għala hu importanti li nsaħħu l-fidi tagħna fil-Ħallieq?
3 L-irraġunar taʼ dawn in-nies jistaʼ jġegħelna naħsbu li Ġeħova mhux il-Ħallieq taʼ kollox? Dan jiddependi ħafna għala nemmnu li Alla huwa l-Ħallieq. Aħna nemmnu għax ġejna mgħallmin hekk jew għax studjajna u konvinti li hemm Ħallieq? (1 Kor. 3:12-15) Ilna kemm ilna fil-verità, irridu nibqgħu nsaħħu l-fidi tagħna. Jekk nagħmlu dan, mhux se niġu mqarrqin meta n-nies jgħidulna li dak li tgħid il-Bibbja mhux veru. (Kol. 2:8; Ebr. 11:6) Biex jgħinna, dan l-artiklu se jiddiskuti (1) għala ħafna nies ma jemmnux li hemm Ħallieq, (2) kif tistaʼ ssaħħaħ il-fidi tiegħek li Ġeħova hu l-Ħallieq, u (3) kif tistaʼ tibqaʼ konvint li Ġeħova hu l-Ħallieq.
GĦALA ĦAFNA MA JEMMNUX LI HEMM ĦALLIEQ
4. Skont Ebrej 11:1, il-fidi x’inhi?
4 Xi nies jaħsbu li l-fidi tfisser li temmen f’xi ħaġa mingħajr provi. Imma l-Bibbja turina li din mhix fidi vera. Il-Bibbja tispjega li l-fidi hi bbażata fuq turija evidenti, jew il-provi. (Aqra Ebrej 11:1.) Pereżempju, għalkemm ma nistgħux naraw lil Ġeħova, lil Ġesù, u s-Saltna, aħna għandna l-provi li jeżistu. (Ebr. 11:3) Xjentist li sar Xhud taʼ Ġeħova jgħid: “Il-fidi tagħna mhix fidi għamja u ma tinjorax dak li tgħid ix-xjenza.”
5. Għala ħafna nies ma jemmnux li Alla ħalaq kollox?
5 Aħseb ftit, ‘Għala ħafna nies jaħsbu li Alla mhux il-Ħallieq taʼ kollox meta hemm ħafna provi?ʼ Għax huma qatt ma fittxew biex isiru jafu. Robert, li sar wieħed mix-Xhieda taʼ Ġeħova, jgħid: “Peress li l-iskola qatt m’għallmuna li Alla hu l-Ħallieq, jien kont naħseb li l-ħajja ġiet waħedha. Imma mbagħad meta kelli 22 sena ltqajt max-Xhieda taʼ Ġeħova u tgħallimt li fil-Bibbja nsibu raġunijiet tajba għala għandna nemmnu li Alla ħalaq kollox.” *—Ara l-kaxxa “ Messaġġ Importanti għall-Ġenituri.”
6. Għala xi nies ma jemmnux li hemm Ħallieq?
6 Xi wħud ma jemmnux fil-Ħallieq għax jgħidu li jemmnu f’dak li jistgħu jaraw biss. Imma fil-verità huma jemmnu f’affarijiet li ma jistgħux jaraw, bħal pereżempju r-riħ. Minkejja li ma jarawhx, huma għandhom il-provi li jeżisti. Il-fidi li tissemma fil-Bibbja wkoll Ebr. 11:1) Jieħu l-ħin u rridu nagħmlu sforz biex ikollna l-evidenza, imma ħafna nies mhux lesti jagħmlu dan. Persuna li ma tistudjax biex ikollha l-evidenza għaliha nfisha tistaʼ tasal biex tgħid li Alla ma jeżistix.
hija bbażata fuq affarijiet li ma nistgħux naraw imma hemm il-provi li jeżistu. (7. In-nies taʼ skola kollha ma jemmnux fil-Ħallieq? Spjega.
7 Wara li studjaw il-provi li Alla jeżisti, xi xjentisti saru konvinti li hemm Ħallieq. * Bħal Robert, li diġà semmejna, xi wħud kienu jaħsbu li m’hemmx Ħallieq għax fl-università qatt ma ġew mgħallmin li xi ħadd ħalaqna. Però, ħafna xjentisti tgħallmu dwar Ġeħova u saru jħobbuh. Bħal dawn ix-xjentisti, aħna wkoll irridu nsaħħu l-fidi tagħna fil-Ħallieq. Ħadd ma jistaʼ jagħmel dan għalina.
KIF TISTAʼ SSAĦĦAĦ IL-FIDI TIEGĦEK FIL-ĦALLIEQ
8-9. (a) Liema mistoqsija se nikkunsidraw? (b) Jekk tistudja dwar l-affarijiet taʼ madwarek kif se jgħinek?
8 Kif tistaʼ int issaħħaħ il-fidi tiegħek fil-Ħallieq? Ejjew nikkunsidraw erbaʼ modi.
9 Tgħallem dwar il-ħolqien taʼ madwarek. Int tistaʼ ssaħħaħ il-fidi tiegħek f’Alla billi tosserva l-annimali, il-pjanti, u l-istilel. (Salm 19:1; Is. 40:26) Iktar ma tistudja dwar dawn l-affarijiet, iktar se ssir konvint li Ġeħova hu l-Ħallieq taʼ kollox. Spiss il-pubblikazzjonijiet tagħna jkun fihom artikli li jidħlu fid-dettall biex jispjegaw il-ħolqien. Jekk issibha diffiċli biex tifhem dawn l-artikli, xorta studjahom. Taqbiżhomx! Tgħallem dak li tistaʼ minnhom. U fuq il-website tagħna, jw.org, tinsiex tara l-vidjows sbieħ li hemm dwar il-ħolqien li ħarġu fil-konvenzjonijiet!
10. Agħti eżempju li juri li hemm Ħallieq. (Rumani 1:20)
10 Oqgħod attent għall-affarijiet li tistaʼ titgħallem dwar Ġeħova meta tkun qed tistudja dwar l-affarijiet taʼ madwarek. (Aqra Rumani 1:20.) Pereżempju, ix-xemx tipprovdi s-sħana u d-dawl li għandna bżonn biex ngħixu. Imma xi raġġi tax-xemx jistgħu jagħmlulna l-ħsara. Bħala bnedmin aħna għandna bżonn inkunu protetti minn dawn ir-raġġi. Fil-fatt, hekk qed jiġri. Kif? Mad-dawra tad-dinja hemm l-ozone layer li qed jipproteġina minn dawn ir-raġġi. Meta dawn ir-raġġi jkunu iżjed b’saħħithom, il-gass tal-ozone layer jiżdied. Taħseb li dan ġie mix-xejn jew hemm Ħallieq intelliġenti u li jħobbna?
11. Fejn tistaʼ ssib informazzjoni li tistaʼ tgħinek issaħħaħ il-fidi tiegħek fil-Ħallieq? (Ara l-kaxxa “ Informazzjoni li Biha Ssaħħaħ il-Fidi fil-Ħallieq.”)
11 Tistaʼ ssaħħaħ il-fidi tiegħek fil-Ħallieq billi tfittex fil-Gwida għall-Pubblikazzjonijiet u tagħmel riċerka fuq jw.org. Tistaʼ tibda billi tara l-artikli u l-vidjows mis-serje “Ġie Disinjat?” Dawn huma qosra, imma fihom tistaʼ ssib affarijiet interessanti ħafna dwar l-annimali u l-pjanti. Ukoll fihom eżempji fejn juru li x-xjentisti qed jipprovaw jikkopjaw il-ħolqien.
12. Meta tistudja l-Bibbja, liema affarijiet għandek toqgħod attent għalihom?
12 Studja l-Bibbja. Ix-xjentist li semmejna f’paragrafu 4 ma bediex jemmen fil-Ħallieq mill-ewwel. Imma maż-żmien hu sar konvint li hemm Ħallieq. Hu jgħid: “Bdejt nemmen mhux biss b’dak li kont naf mix-xjenza, imma wkoll b’dak li tgħallimt meta studjajt il-Bibbja.” Forsi inti diġà taf il-Bibbja sew. Imma biex issaħħaħ il-fidi tiegħek fil-Ħallieq, għandek bżonn tkompli tistudja l-Bibbja. (Ġoż. 1:8; Salm 119:97) Pereżempju, aħseb dwar id-dettalji li ssemmi l-Bibbja taʼ ġrajjiet li ġraw ħafna snin ilu. Aħseb ukoll dwar il-profeziji li seħħew u kif il-kittieba tal-Bibbja qablu bejniethom b’dak li kitbu. Jekk tagħmel hekk, se ssaħħaħ il-fidi tiegħek fil-Ħallieq kollu mħabba u fil-Kelma tiegħu, il-Bibbja. *—2 Tim. 3:14; 2 Pt. 1:21.
13. Semmi parir mill-Bibbja li għadu jgħodd għalina llum.
1 Tim. 6:9, 10; Prov. 28:20; Mt. 6:24) Dan il-kliem għadu jgħodd għalina llum? Ktieb li jitkellem dwar l-attitudni tan-nies fi żmienna jgħid: “Ħafna drabi, nies li jkunu moħħhom fl-affarijiet materjali jispiċċaw imdejqin u dipressi. Anke dawk in-nies li jixtiequ li jkollhom iktar flus mhumiex kuntenti u jbatu bil-problemi taʼ saħħa.” Mela l-parir li nsibu fil-Bibbja li m’għandniex inħobbu l-flus se jgħinna ħafna! Tistaʼ taħseb dwar parir ieħor fil-Bibbja li għenek? Meta naħsbu dwar il-pariri tajbin li nsibu fil-Bibbja, aħna se naraw li Ġeħova, il-Ħallieq tagħna, jaf x’inhu l-aħjar għalina. U b’hekk aħna se nistrieħu fuq il-pariri tiegħu. (Ġak. 1:5) Jekk nagħmlu hekk, se nkunu iktar ferħanin.—Is. 48:17, 18.
13 Meta tistudja l-Kelma t’Alla, ara kemm huma t’għajnuna l-pariri li nsibu fiha. Pereżempju ħafna snin ilu, il-Bibbja qalet li l-imħabba għall-flus iġġib “ħafna weġgħat.” (14. Meta tistudja l-Bibbja, x’se titgħallem dwar Ġeħova?
14 Studja l-Bibbja bil-mira li ssir taf lil Ġeħova aħjar. (Ġw. 17:3) Jekk tagħmel hekk, se titgħallem dwar il-kwalitajiet u l-personalità taʼ Ġeħova. U meta tistudja l-ħolqien se titgħallem ukoll dwar dawn l-istess kwalitajiet. Meta nitgħallmu dwar il-kwalitajiet taʼ Ġeħova se nkunu konvinti li hu jeżisti. (Eżo. 34:6, 7; Salm 145:8, 9) Iktar ma ssir taf lil Ġeħova u tkabbar il-ħbiberija tiegħek miegħu, iktar se tafdah u iktar se tħobbu.
15. Meta titkellem dwar Alla m’oħrajn kif jgħinek?
15 Tkellem m’oħrajn dwar Alla. Meta tagħmel hekk, il-fidi tiegħek se tissaħħaħ. Imma xi ngħidu jekk tkun qed tipprietka u tiltaqaʼ maʼ xi ħadd li ma jemminx f’Alla u int ma tkunx taf x’se twieġbu? Ipprova sib tweġiba mill-Iskrittura f’waħda mill-pubblikazzjonijiet tagħna u mbagħad aqsamha miegħu. (1 Pt. 3:15) Barra minn hekk, tistaʼ tgħid lil xi ħadd mill-aħwa biex jgħinek. Sew jekk il-persuna taċċetta dak li tgħidilha u sew jekk ma taċċettax, int se tibbenefika mir-riċerka li tagħmel. Int se ssir iktar konvint f’dak li temmen. Imbagħad int żgur mhux se temmen lil dawk li jgħidu li Alla ma jeżistix.
ŻOMM IL-FIDI TIEGĦEK SODA!
16. X’jistaʼ jiġrilna jekk ma nżommux il-fidi tagħna b’saħħitha?
16 Ilna kemm ilna naqdu lil Ġeħova, aħna rridu nkomplu nsaħħu l-fidi tagħna fih. Għala? Għax jekk ma noqogħdux attenti l-fidi tagħna tistaʼ tiddgħajjef. Kif diġà semmejna, il-fidi tagħna hi bbażata fuq affarijiet li ma jidhrux imma għandna l-provi li jeżistu. U kultant l-affarijiet li ma jidhrux nistgħu ninsewhom. Għalhekk, l-appostlu Pawlu qal li nuqqas taʼ fidi hija “d-dnub li faċilment ifixkilna.” (Ebr. 12:1) Allura x’nistgħu nagħmlu biex ma naqgħux f’din in-nassa?—2 Tess. 1:3.
17. X’jistaʼ jgħinna nżommu l-fidi tagħna b’saħħitha?
17 L-ewwel, itlob spiss lil Ġeħova biex jagħtik l-ispirtu qaddis tiegħu. Għala? Għax l-ispirtu qaddis se jgħinna jkollna l-fidi. (Gal. 5:22, 23) Aħna ma jistax ikollna l-fidi fil-Ħallieq jew insaħħuha jekk ma jkollniex l-għajnuna tal-ispirtu qaddis. Jekk aħna nibqgħu nitolbu lil Ġeħova għall-ispirtu qaddis, hu se jagħtihulna. (Lq. 11:13) Aħna nistgħu nitolbu lil Ġeħova: “Agħtina iktar fidi.”—Lq. 17:5.
18. Skont Salm 1:2, 3, illum liema rigal prezzjuż għandna?
18 It-tieni, studja l-Bibbja b’mod regolari. (Aqra Salm 1:2, 3.) Meta nkiteb dan is-salm, ftit Iżraelin kellhom kopja tal-Liġi t’Alla. Però, is-slaten u l-qassisin setaʼ jkollhom kopja, u darba kull sebaʼ snin, “l-irġiel, in-nisa, iċ-ċkejknin,” u r-residenti barranin f’Iżrael kienu jiltaqgħu flimkien biex jisimgħu l-Liġi t’Alla tinqara. (Dt. 31:10-12) Anke fi żmien Ġesù ftit kienu dawk li kellhom kopja tal-Iskrittura. Ħafna kopji tal-Iskrittura kienu jkunu fis-sinagogi. Però, illum il-maġġoranza tan-nies għandhom il-Bibbja. Mhuwiex dan rigal prezzjuż? Kif nistgħu nuru li napprezzaw il-Bibbja?
19. X’għandna bżonn nagħmlu biex inżommu l-fidi tagħna b’saħħitha?
19 Aħna nuru li napprezzaw il-Bibbja billi naqrawha b’mod regolari. Aħna rridu nwarrbu l-ħin biex naqraw u nistudjaw il-Bibbja, mhux naqrawha biss meta jkollna ċ-ċans. Jekk naqraw il-Bibbja b’mod regolari, se nżommu l-fidi tagħna b’saħħitha.
20. X’għandna nkunu determinati li nagħmlu?
20 Għall-kuntrarju tal-“għorrief u l-intellettwali” tad-dinja, aħna għandna fidi bbażata fuq il-Kelma t’Alla. (Mt. 11:25, 26) Il-Bibbja turina għala l-affarijiet fid-dinja sejrin għall-agħar u dak li se jagħmel Ġeħova. Għalhekk, ejjew inkunu determinati li nkomplu nsaħħu l-fidi tagħna u ngħinu lil kemm jistaʼ jkun nies biex ikollhom il-fidi fil-Ħallieq tagħna. (1 Tim. 2:3, 4) U ejjew inkomplu nħarsu ’l quddiem għal dak iż-żmien meta n-nies tad-dinja kollha se jgħidu l-kliem li nsibu f’Rivelazzjoni 4:11: “Int jistħoqqlok, Ġeħova, Alla tagħna, li tirċievi l-glorja . . . għax int ħlaqt l-affarijiet kollha.”
GĦANJA 2 Ġeħova ismek hu
^ par. 5 Il-Bibbja turi b’mod ċar li Alla Ġeħova ħalaq l-affarijiet kollha. Imma ħafna nies ma jemmnux dan. Huma jemmnu li l-ħajja bdiet teżisti b’kumbinazzjoni. Imma dak li jgħidu se jġegħelna niddubitaw jekk Ġeħova ħalaqx kollox? Le. Jekk nagħmlu l-almu tagħna biex insaħħu l-fidi tagħna f’Alla u fil-Bibbja mhux se jkollna dubji. Dan l-artiklu se jispjega kif nistgħu nagħmlu dan.
^ par. 5 F’ħafna skejjel, l-għalliema lanqas biss isemmu li Alla jistaʼ jkun il-Ħallieq. Huma jaħsbu li jekk jgħallmu dan, ikunu qed iġiegħlu lill-istudenti jemmnu b’Alla.
^ par. 7 Biex tara x’jgħidu wħud taʼ skola, inkluż xjentisti li jemmnu fil-Ħallieq, ara l-Gwida għall-Pubblikazzjonijiet tax-Xhieda taʼ Ġeħova. Mur fuq “Suġġetti,” “Xjenza u Teknoloġija,” imbagħad “‘Intervista’ (Serje fi Stenbaħ!).” Jew ara Watch Tower Publications Index l-iktar reċenti. Mur fuq “Science,” imbagħad fittex taħt “scientists expressing belief in creation.”
^ par. 12 Pereżempju, ara kapitlu 2, “Il-Bibbja—Ktieb mingħand Alla” tal-ktieb “X’Nistgħu Nitgħallmu mill-Bibbja?” u l-artiklu “Dak li Jbassar Ġeħova Jitwettaq” fil-ħarġa taʼ It-Torri tal-Għassa tal-1 taʼ Jannar 2008.