KIF tħossok meta tirċievi ittra taʼ inkuraġġiment mingħand ħabib tiegħek? Id-​dixxiplu Kristjan Timotju rċieva ittra bħal din mingħand l-​appostlu Pawlu. Din l-​ittra issa hija l-​ktieb tat-​2 Timotju. Żgur li Timotju kien ħerqan biex isib post għall-​kwiet biex ikun jistaʼ jaqra dak li sieħbu ried jgħidlu. Timotju jaf ħaseb: ‘Min jaf kif inhu Pawlu? Tgħid għandu xi parir għalija biex jgħinni fl-​inkarigu tiegħi? Tgħid fiha xi pariri biex jgħinuni nipprietka, ngħallem aħjar, u ngħin lil oħrajn?’ Kif se naraw, f’din l-​ittra importanti, Timotju sab it-​tweġibiet għal dawn il-​mistoqsijiet u ħafna iktar. F’dan l-​artiklu se niddiskutu xi pariri tajbin li nsibu f’din l-​ittra.

Meta Timotju beda jaqra l-​ewwel kliem tal-​ittra, mill-​ewwel setaʼ jara li Pawlu kien jimpurtah minnu. Pawlu sejjaħlu “iben maħbub.” (2 Tim. 1:2) Timotju rċieva din l-​ittra madwar is-​sena 65. Hu kellu madwar 30 sena u kien diġà anzjan tal-​esperjenza. Hu kien ħadem maʼ Pawlu għal iktar minn 10 snin u b’hekk tgħallem ħafna minnu.

Min jaf kemm ħassu inkuraġġit Timotju meta sar jaf li Pawlu qed jiffaċċja l-​provi b’lealtà. Pawlu kien fil-​ħabs marbut bil-​ktajjen f’Ruma, jistenna l-​mewt. (2 Tim. 1:15, 16; 4:6-​8) Timotju setaʼ jifhem li Pawlu kellu l-​kuraġġ għax qal: “Nibqaʼ nissaporti kollox.” (2 Tim. 2:8-​13) Bħalma saħħaħ lil Timotju, l-​eżempju taʼ Pawlu jistaʼ jsaħħaħ lilna wkoll.

Pawlu ħeġġeġ lil Timotju biex iqis l-​inkarigu tiegħu fix-​xogħol t’Alla bħala importanti ħafna. Pawlu ried li Timotju ‘jkebbes bħan-​nar l-​għotja t’Alla’ li kienet fih. (2 Tim. 1:6) Pawlu uża l-​kelma khaʹri·sma għal “għotja.” Il-​kelma Griega bażikament tirreferi għal rigal b’xejn u mhux mistħoqq. Timotju rċieva din l-​għotja, jew rigal meta hu kien magħżul biex jagħmel xogħol speċjali għall-​kongregazzjoni.—1 Tim. 4:14.

Pawlu x’kien qed jinkuraġġih jagħmel lil Timotju? Hekk kif qara l-​kliem “tkebbes bħan-​nar,” hu jaf ħaseb dwar in-​nar li n-​nies kien ikollhom fid-​djar tagħhom, li mbagħad isir ġamar. Biex dan il-​ġamar jerġaʼ jaqbad  kellu jiġi mċaqlaq. Dizzjunarju jgħid li l-​verb Grieg (a·na·zo·py·reʹo) li Pawlu uża jfisser, li “terġaʼ tqabbad, terġaʼ tagħti n-​nar, jew trewwaħ lin-​nar, “ jiġifieri, li kellu jkun żeluż f’xogħlu. Mela Pawlu kien qed jgħid lil Timotju: ‘Agħmel l-​aħjar li tistaʼ fl-​inkarigu tiegħek!’ Illum, aħna rridu nagħmlu l-​istess, jiġifieri, inkunu żelużi fix-​xogħol tagħna għal Ġeħova.

Fl-​ittra tiegħu, Pawlu qal xi ħaġa oħra li setgħet tgħin lil Timotju biex jirnexxi fix-​xogħol tiegħu. Pawlu kiteb: “Dan it-​teżor li ġejt fdat bih għassu permezz taʼ l-​ispirtu qaddis li qed jgħammar fina.” (2 Tim. 1:14) Timotju biex kien ġie fdat? Liema ħaġa prezzjuża kellu? Fil-​vers taʼ qabel, meta Pawlu qal: “Kliem mimli saħħa,” kien qed jirreferi għall-​verità li nsibu fl-​Iskrittura. (2 Tim. 1:13) Minħabba li kien Kristjan, Timotju kellu jgħallem din il-​verità lill-​aħwa fil-​kongregazzjoni u lin-​nies fit-​territorju tiegħu. (2 Tim. 4:1-​5) Ukoll, Timotju kien inħatar bħala anzjan biex jieħu ħsieb il-​merħla t’Alla. (1 Pt. 5:2) Timotju setaʼ jieħu ħsieb dak li kien fdat bih billi jistrieħ fuq l-​ispirtu qaddis taʼ Ġeħova u l-​Kelma tiegħu.—2 Tim. 3:14-​17.

Illum, aħna wkoll ġejna fdati l-​verità li ngħallmu lil oħrajn. (Mt. 28:19, 20) Qatt m’għandna ninsew kemm il-​verità li ngħallmu hi prezzjuża u għalhekk irridu nibqgħu nitolbu u nistudjaw il-​Kelma t’Alla. (Rum. 12:11, 12; 1 Tim. 4:13, 15, 16) Forsi għandna wkoll l-​inkarigu li naqdu bħala anzjan fil-​kongregazzjoni jew naħdmu fis-​servizz full-​time. Inkarigu importanti bħal dan għandu jagħmilna umli u jġegħelna nistrieħu fuq Alla għall-​għajnuna. Mela aħna nistgħu nieħdu ħsieb, jew nipproteġu, dak li fdalna Ġeħova billi napprezzawh u nistrieħu fuqu biex jgħinna nieħdu ħsiebu.

Parti mill-​inkarigu li kellu Timotju kien li jittrennja lil oħrajn. Huwa għalhekk li Pawlu ħeġġeġ lil Timotju: “Dak li smajt mingħandi . . . għaddih lil nies leali li, mill-​banda l-​oħra, ikunu kwalifikati biżżejjed biex jgħallmu lil oħrajn.” (2 Tim. 2:2) Iva, Timotju kellu jgħaddi lil aħwa oħrajn dak li tgħallem hu. Huwa importanti li kull anzjan fil-​kongregazzjoni Kristjana jagħmel hekk. Anzjan tajjeb ma jżommx għalih dak li jaf dwar l-​inkarigu tiegħu. Minflok, hu jgħaddih lil oħrajn biex b’hekk jitgħallmu huma wkoll. Hu ma jibżax li huma jistgħu jkunu kapaċi iktar minnu. Għalhekk, anzjan m’għandux jgħallem biss l-​affarijiet bażiċi. Hu jrid jgħin lil dawk li qed jittrennja biex isiru Kristjani maturi. B’dan il-​mod, lin-​“nies leali” li jkun ittrennja se jkunu jistgħu jgħinu iktar fil-​kongregazzjoni.

Bla dubju, Timotju apprezza l-​ittra li bagħatlu Pawlu. Nistgħu nimmaġinawh jaqra l-​pariri għal darba wara l-​oħra u jaħseb kif jistaʼ japplikahom fl-​inkarigu tiegħu.

Aħna wkoll irridu napplikaw dawn il-​pariri. Kif? Billi nkunu żelużi fix-​xogħol tagħna għal Ġeħova, nieħdu ħsieb dak li fdalna, u billi ngħallmu dak kollu li nafu lil oħrajn. B’dan il-​mod, kif qal Pawlu lil Timotju, aħna nistgħu ‘nwettqu bis-​sħiħ il-​ministeru tagħna.’—2 Tim. 4:5.