Imita l-fidi u l-ubbidjenza taʼ Noè, Danjel, u Ġob
‘Noè, Danjel, u Ġob kienu jeħilsu biss lilhom infushom minħabba s-sewwa tagħhom.’—EŻEKJEL 14:14.
1, 2. (a) Għala nistgħu niġu inkuraġġiti billi neżaminaw l-eżempji taʼ Noè, Danjel, u Ġob? (b) X’kienu ċ-ċirkustanzi meta Eżekjel kiteb il-kliem li nsibu f’Eżekjel 14:14?
GĦADDEJ int minn żminijiet diffiċli minħabba li tinsab marid, għandek problemi finanzjarji, jew qed tiġi ppersegwitat? Issibha kultant bi tqila li tibqaʼ ferħan fis-servizz tiegħek lil Ġeħova? Jekk dan hu l-mod kif tħossok, tistaʼ tiġi inkuraġġit billi teżamina l-eżempji taʼ Noè, Danjel, u Ġob. Dawn l-irġiel kienu imperfetti u kellhom l-istess tipi taʼ sfidi li għandna aħna llum. Kultant, anke ħajjithom stess kienet fil-periklu. Iżda huma baqgħu leali lejn Ġeħova, u hu qieshom bħala eżempji taʼ fidi u ubbidjenza.—Aqra Eżekjel 14:12-14.
2 Eżekjel kiteb il-kliem tal-iskrittura tat-tema taʼ dan l-artiklu f’Babilonja fis-sena 612 qabel Kristu. * (Ara n-nota taʼ taħt.) (Eżekjel 1:1; 8:1) Dan kien ftit qabel ma nqerdet Ġerusalemm fis-sena 607. Kienu biss ftit in-nies f’Ġerusalemm li kellhom kwalitajiet bħal taʼ Noè, Danjel, u Ġob, u b’hekk salvaw. (Eżekjel 9:1-5) Ġeremija, Baruk, Għebed-melek, u r-Rekabin kienu xi ftit minnhom.
3. X’se nitgħallmu f’dan l-artiklu?
3 Bl-istess mod illum, huma biss in-nies li Ġeħova jqishom bla ħtija, nies li huma bħal Noè, Danjel, u Ġob, li se jsalvaw fit-tmiem taʼ din id-dinja mill-agħar. (Rivelazzjoni 7:9, 14) Allura ejja nitgħallmu għala Ġeħova uża dawn it-tlett irġiel bħala eżempji taʼ nies li għamlu dak li kien tajjeb f’għajnejh. Aħna se niddiskutu (1) l-isfidi li kellu kull wieħed minnhom u (2) kif aħna nistgħu nimitaw il-fidi u l-ubbidjenza tagħhom.
NOÈ WERA FIDI U UBBIDJENZA GĦAL IKTAR MINN 900 SENA!
4, 5. X’kienu xi ftit mill-isfidi taʼ Noè, u għala kien taʼ min jammira s-sabar li kellu?
4 X’kienu xi ftit mill-isfidi li kellu Noè? Fi żmien Enok, il-bużnannu taʼ Noè, in-nies diġà kienu ħafna mill-agħar. Huma qalu “kliem li jkexkex” dwar Ġeħova. (Ġuda 14, 15) Id-dinja mbagħad saret iżjed u iżjed vjolenti. Sa żmien Noè, l-art “imtliet bil-vjolenza.” Anġli mill-agħar ġew fuq l-art, għamlu iġsma umani għalihom infushom, u żżewġu nisa. Uliedhom subien kienu krudili u vjolenti. (Ġenesi 6:2-4, 11, 12) Imma kulħadd setaʼ jara li Noè kien differenti. Il-Bibbja tgħid li “Noè kien approvat f’għajnejn Ġeħova.” Għall-kuntrarju tan-nies madwaru, hu għamel it-tajjeb. “Noè mexa maʼ l-Alla l-veru.”—Ġenesi 6:8, 9.
5 Dan il-kliem x’jgħidilna dwar Noè? L-ewwel, aħseb dwar kemm Noè dam jaqdi lil Ġeħova b’lealtà f’dik id-dinja mill-agħar qabel ġie d-Dulluvju. Ma kienx sempliċement għal 70 jew 80 sena iżda għal kważi 600 sena! (Ġenesi 7:11) It-tieni, ftakar li ma kellux kongregazzjoni biex tgħinu u tinkuraġġih bħalma aħna għandna llum. Jidher li lanqas ħutu ma appoġġjawh. *—Ara n-nota taʼ taħt.
6. Noè kif wera kuraġġ kbir?
6 Noè ma ħasibx li kien biżżejjed li sempliċement ikun raġel tajjeb. Bi qlubija, hu qal lil oħrajn dwar il-fidi tiegħu f’Ġeħova. Il-Bibbja ssejjaħlu “predikatur tal-ġustizzja.” (2 Pietru 2:5) L-appostlu Pawlu qal dwar Noè: “Permezz taʼ din il-fidi kkundanna lid-dinja.” (Ebrej 11:7) Bla dubju, in-nies waqqgħuh għaċ-ċajt u pprovaw iwaqqfuh. Forsi wkoll heddew li jweġġgħuh. Imma Noè ma kienx jibżaʼ min-nies. (Proverbji 29:25) Minflok, kellu l-fidi, allura Ġeħova tah il-kuraġġ. U hu jagħti l-istess kuraġġ lill-qaddejja leali kollha tiegħu llum.
7. Xi sfidi ffaċċja Noè meta bena l-arka?
7 Noè kien diġà wera li kellu fidi f’Ġeħova għal iktar minn 500 sena meta Ġeħova qallu jibni arka kbira. Din kellha tiġi użata sabiex issalva xi nies u annimali mid-Dulluvju. (Ġenesi 5:32; 6:14) Il-bini taʼ arka daqstant kbira żgur li deher diffiċli ħafna għal Noè. U żgur li kien jaf li n-nies kienu se jiżżuffjettaw bih saħansitra iktar u jagħmlulu ħajtu vera diffiċli. Imma Noè kellu l-fidi f’Ġeħova u obdieh. “Għamel preċiż hekk.”—Ġenesi 6:22.
8. Noè kif fada f’Ġeħova biex imantni lil familtu?
8 Noè kellu sfida oħra. Kellu jmantni lil martu u wliedu. Qabel id-Dulluvju, in-nies kellhom jaħdmu iebes ħafna biex ikollhom x’jieklu, u Noè ma kienx meħlus milli jagħmel dan. (Ġenesi 5:28, 29) Madankollu, ma ħalliex il-bżonnijiet taʼ familtu jsiru l-iktar ħaġa li jinkwieta dwarha. Li jaqdi lil Ġeħova kien dejjem prijorità f’ħajtu. Għalkemm Noè kellu ħafna x’jagħmel fil-bini tal-arka għal forsi 40 jew 50 sena, hu baqaʼ ffokat fuq Ġeħova. U għamel dan għal 350 sena oħra wara d-Dulluvju. (Ġenesi 9:28) Noè kien eżempju mill-aħjar taʼ fidi u ubbidjenza!
9, 10. (a) Aħna kif nistgħu nimitaw il-fidi u l-ubbidjenza taʼ Noè? (b) Jekk int determinat li tobdi l-liġijiet t’Alla, minn xiex tistaʼ tkun ċert?
9 Aħna kif nistgħu nimitaw il-fidi u l-ubbidjenza taʼ Noè? Nagħmlu dan meta niddefendu l-ħarsa taʼ Ġeħova taʼ x’inhu tajjeb, meta ma nkunux parti mid-dinja taʼ Satana, u meta npoġġu lil Ġeħova l-ewwel. (Mattew 6:33; Ġwanni 15:19) M’għandniex xi ngħidu, minħabba f’hekk, id-dinja ma tħobbniex. Pereżempju, peress li aħna determinati li nobdu l-liġijiet t’Alla dwar is-sess u ż-żwieġ, in-nies għandhom mnejn jgħidu affarijiet negattivi dwarna fil-midja. (Aqra Malakija 3:17, 18.) Madankollu, bħal Noè, aħna ma nibżgħux min-nies. Aħna għandna l-biżaʼ taʼ Ġeħova, jiġifieri, għandna rispett profond għalih u ma rridux niddiżappuntawh. Aħna nafu li hu l-uniku Wieħed li jistaʼ jagħtina l-ħajja taʼ dejjem.—Luqa 12:4, 5.
10 Staqsi lilek innifsek: ‘Se nibqaʼ nagħmel it-tajjeb f’għajnejn Alla, anke meta oħrajn iwaqqgħuni għaċ-ċajt jew jikkritikawni? Għandi fiduċja li Ġeħova jistaʼ jipprovdi għall-familja tiegħi, anke meta jkun diffiċli li naqlaʼ l-flus għall-għajxien?’ Jekk tafda f’Ġeħova u tobdih bħalma għamel Noè, tistaʼ tkun ċert li Ġeħova se jieħu ħsiebek.—Filippin 4:6, 7.
DANJEL WERA FIDI U UBBIDJENZA MINKEJJA LI GĦEX F’BELT MILL-AGĦAR
11. Danjel u t-tlett iħbieb tiegħu liema sfidi kbar kellhom f’Babilonja? (Ara l-ewwel stampa.)
11 X’kienu xi ftit mill-isfidi taʼ Danjel? Danjel ġie sforzat jgħix f’Babilonja, belt barranija mimlija allat foloz u spiritiżmu. In-nies hemmhekk kienu jistmerruhom lil-Lhud u kienu jżebilħu lilhom u lil Alla tagħhom, Ġeħova. (Salm 137:1, 3) Dan żgur li weġġaʼ bil-kbir lil Danjel u lil Lhud oħra li kienu jħobbu lil Ġeħova! Ukoll, ħafna nies żammew għajnejhom fuq Danjel u t-tlett iħbieb tiegħu Ħananija, Misael, u Għażarija għax dawn kienu se jitħarrġu biex jaħdmu għas-sultan taʼ Babilonja. Huma kienu mistennijin li jieklu mill-ikel tas-sultan, li inkluda affarijiet li Ġeħova ma riedx li n-nies tiegħu jikluhom. Imma Danjel ma ‘tniġġisx bl-ikel mill-aqwa tas-sultan.’—Danjel 1:5-8, 14-17.
12. (a) X’tip taʼ persuna kien Danjel? (b) Ġeħova kif kien iqisu lil Danjel?
Danjel 1:19, 20) Xorta waħda, Danjel ma sarx kburi jew ħaseb li l-opinjoni tiegħu kienet dejjem tajba. Hu baqaʼ umli u modest, u dejjem ta l-krettu mistħoqq lil Ġeħova. (Danjel 2:30) Aħseb ftit: Ġeħova semma lil Danjel flimkien maʼ Noè u Ġob bħala eżempju tajjeb xi nsegwu. Dak iż-żmien, Noè u Ġob kienu diġà qdew lil Ġeħova lealment għal ħajjithom kollha, imma Danjel kien għadu raġel żagħżugħ. Ġeħova tassew kellu fiduċja f’Danjel! U bix-xieraq, għax Danjel baqaʼ juri fidi u ubbidjenza lejn Alla tul ħajtu kollha. Meta Danjel kellu kważi 100 sena, l-anġlu t’Alla qallu dan il-kliem taʼ mħabba: “O Danjel, raġel maħbub ħafna.”—Danjel 10:11.
12 Danjel kellu sfida oħra, li għall-ewwel setgħet dehret li ma kinitx daqstant diffiċli. Hu kien kapaċi ħafna, u għal din ir-raġuni s-sultan tah privileġġi speċjali. (13. X’setgħet kienet raġuni waħda għala Ġeħova għen lil Danjel ikollu pożizzjoni għolja?
13 Grazzi għall-appoġġ taʼ Ġeħova, Danjel sar uffiċjal importanti ħafna, l-ewwel fl-Imperu Babiloniż u mbagħad fl-Imperu Medo-Persjan. (Danjel 1:21; 6:1, 2) Forsi Ġeħova mmanuvra l-affarijiet b’dan il-mod sabiex Danjel setaʼ jkun taʼ barka għall-poplu tiegħu stess, bħalma kienu Ġużeppi fl-Eġittu u Ester u Mordekaj fil-Persja. * (Ara n-nota taʼ taħt.) (Danjel 2:48) Tistaʼ timmaġina kif ħassewhom Eżekjel u l-ilsiera l-oħra Lhud meta raw kif Ġeħova uża lil Danjel biex jgħinhom? Żgur li dan inkuraġġiehom ħafna!
14, 15. (a) Is-sitwazzjoni tagħna kif inhi simili għal dik taʼ Danjel? (b) Il-ġenituri llum x’jistgħu jitgħallmu mill-ġenituri taʼ Danjel?
14 Kif nistgħu nimitaw il-fidi u l-ubbidjenza taʼ Danjel? Id-dinja li qed ngħixu fiha llum hi mimlija bl-immoralità u qima falza. In-nies ġew influwenzati minn Babilonja l-Kbira, l-imperu dinji taʼ reliġjon falza, li l-Bibbja ssejħilha “post fejn jgħammru d-demonji.” (Rivelazzjoni 18:2) Imma aħna ninsabu bħal barranin f’din id-dinja. B’hekk, in-nies jistgħu jaraw li aħna differenti ħafna, u jwaqqgħuna għaċ-ċajt. (Marku 13:13) Madankollu, bħal Danjel, ejja nersqu qrib lejn Alla tagħna, Ġeħova. Meta nkunu umli, nafdaw f’Ġeħova, u nobduh, hu se jqisna bħala prezzjużi wkoll.—Ħaggaj 2:7.
15 Il-ġenituri jistgħu jitgħallmu lezzjonijiet importanti mill-ġenituri taʼ Danjel. Meta Danjel kien tifel żgħir f’Ġuda, il-biċċa l-kbira tan-nies madwaru kienu mill-agħar ħafna. Madankollu, hu sar iħobb lil Ġeħova. Kien dan sempliċement b’kumbinazzjoni? Le. Il-ġenituri tiegħu żgur li għallmuh dwar Ġeħova. (Proverbji 22:6) Saħansitra ismu stess, Danjel, li jfisser “L-Imħallef Tiegħi Hu Alla,” juri li l-ġenituri tiegħu kienu jħobbu lil Ġeħova. * (Ara n-nota taʼ taħt.) Għalhekk, ġenituri, kunu paċenzjużi meta tgħallmu lil uliedkom dwar Ġeħova. Taqtgħux qalbkom. (Efesin 6:4) Itolbu magħhom. Itolbu għalihom. Agħmlu mill-aħjar li tistgħu biex tgħallmuhom iħobbu dak li Ġeħova jgħid li hu tajjeb, u Ġeħova jberikkom bil-kbir.—Salm 37:5.
ĠOB WERA FIDI U UBBIDJENZA KEMM JEKK SINJUR U KEMM JEKK FQIR
16, 17. Liema sfidi ffaċċja Ġob meta (a) kien sinjur u rrispettat? (b) kien qed isofri?
16 X’kienu xi ftit mill-isfidi taʼ Ġob? Ġob għadda minn bidliet kbar f’ħajtu. L-ewwel, Ġob kien “l-aqwa wieħed min-nies kollha taʼ l-Orjent.” (Ġob 1:3) Kien raġel sinjur ħafna, u bosta nies kienu jafuh u jirrispettawh ferm. (Ġob 29:7-16) Minkejja dan, Ġob ma ħasibx li kien aħjar minn oħrajn jew ħass li ma kellux bżonn lil Alla. Dan nafuh għaliex Ġeħova sejjaħlu “l-qaddej tiegħi” u dwaru qal: “Raġel bla ħtija u rett, jibżaʼ minn Alla u jitbiegħed mill-ħażen.”—Ġob 1:8.
17 Iżda f’daqqa waħda, il-ħajja taʼ Ġob inbidlet taʼ taħt fuq. Hu tilef kollox u tant sar dipress li ried imut. Illum nafu li kien Satana li kkaġuna l-problemi taʼ Ġob. Hu qal li Ġob qeda lil Ġeħova għal raġunijiet egoisti biss. (Aqra Ġob 1:9, 10.) Ġeħova ħa din l-akkuża mill-agħar b’serjetà kbira. X’kien se jagħmel biex juri li Satana hu giddieb mill-agħar? Hu ta l-opportunità lil Ġob biex juri l-lealtà tiegħu lejn Alla u juri li jaqdih għax iħobbu.
18. (a) X’jimpressjonak dwar Ġob? (b) X’nitgħallmu dwar Ġeħova mill-mod kif ittratta lil Ġob?
18 Satana attakka bl-aħrax lil Ġob għal darba wara l-oħra u ġiegħlu jaħseb li dawn l-attakki kienu ġejjin minn Alla. (Ġob 1:13-21) Imbagħad tlett irġiel li riedu jgħidu li kienu l-ħbieb taʼ Ġob qalu affarijiet kattivi lil Ġob. Huma qalu li kien mill-agħar u li Alla kien qed jikkastigah. (Ġob 2:11; 22:1, 5-10) Minkejja dan kollu, Ġob baqaʼ leali lejn Ġeħova. Veru, Ġob kultant qal affarijiet bla ma ħasibhom. (Ġob 6:1-3) Imma Ġeħova fehem li Ġob għamel dan biss għax kien imweġġaʼ u dipress. Ġeħova ra li Ġob qatt m’abbandunah, avolja Satana kien bħallikieku waddbu mal-art u mbagħad sawtu bi lsienu billi uża gideb sfaċċat. Wara li din is-sitwazzjoni tal-biżaʼ spiċċat, Ġeħova ta lil Ġob id-doppju taʼ li kellu qabel u 140 sena oħra taʼ ħajja. (Ġakbu 5:11) Matul dak iż-żmien, Ġob kompla jaqdi lil Alla b’qalbu kollha. Dan kif nafuh? Għaliex Eżekjel 14:14, l-iskrittura tat-tema, kienet miktuba mijiet taʼ snin wara li miet Ġob.
19, 20. (a) Kif nistgħu nimitaw il-fidi u l-ubbidjenza taʼ Ġob? (b) Kif nistgħu nagħdru lil oħrajn bħalma jagħmel Ġeħova?
19 Kif nistgħu nimitaw il-fidi u l-ubbidjenza taʼ Ġob? Huma x’inhuma ċ-ċirkustanzi tagħna, irridu nkunu żguri li Ġeħova dejjem ikun l-iktar Persuna importanti f’ħajjitna. Aħna rridu nafdaw fih kompletament u nobduh b’qalbna kollha. Fil-fatt, għandna saħansitra iżjed raġunijiet minn Ġob biex nagħmlu dan. Aħseb dwar x’nafu llum. Aħna nafu ħafna dwar Satana u l-metodi tiegħu. (2 Korintin 2:11) Permezz tal-Bibbja, speċjalment il-ktieb taʼ Ġob, aħna nafu għala Alla jippermetti s-sofferenza. Mill-profezija taʼ Danjel nafu li s-Saltna t’Alla hija gvern veru mmexxi minn Ġesù Kristu. (Danjel 7:13, 14) U nafu li din is-Saltna dalwaqt tmexxi għal fuq l-art kollha u ttemm kull sofferenza.
20 L-esperjenza taʼ Ġob tgħallimna wkoll biex nagħdru lil ħutna jew inħossu għalihom meta jkunu qed isofru. L-istess bħal Ġob, għandhom mnejn jgħidu affarijiet bla ħsieb. (Ekkleżjasti 7:7) Imma m’għandniex naħsbu ħażin fihom jew nakkużawhom li għamlu xi ħaġa ħażina. Minflok, għandna nipprovaw nifhmuhom. Jekk nagħmlu dan, imbagħad se nkunu bħal Missierna, Ġeħova, li hu kollu mħabba u ħniena.—Salm 103:8.
ĠEĦOVA “JSAĦĦAĦKOM”
21. Il-kliem fl-1 Pietru 5:10 kif ifakkarna f’dak li esperjenzaw Noè, Danjel, u Ġob?
21 Noè, Danjel, u Ġob għexu fi żminijiet differenti fl-istorja u kellhom ċirkustanzi differenti ħafna. Madankollu, kollha ssaportew l-isfidi tagħhom. L-esperjenzi tagħhom ifakkruna fil-kliem tal-appostlu Pietru: “Wara li tkunu sofrejtu għal ftit, l-Alla taʼ kull qalb tajba mhix mistħoqqa . . . jtemm hu stess it-taħriġ tagħkom, jissodakom, u jsaħħaħkom.”—1 Pietru 5:10.
22. X’se nitgħallmu fl-artiklu li jmiss?
22 Il-kliem fl-1 Pietru 5:10 jgħodd ukoll għan-nies t’Alla llum. Ġeħova jassigurana li se jissoda u jsaħħaħ lill-qaddejja tiegħu. Ilkoll kemm aħna rridu lil Ġeħova jsaħħaħna, u lkoll irridu nibqgħu sodi u leali lejh. Hu għalhekk li rridu nimitaw il-fidi u l-ubbidjenza taʼ Noè, Danjel, u Ġob. Fl-artiklu li jmiss, se nitgħallmu li dawn l-irġiel setgħu jibqgħu juru fidi f’Ġeħova għax verament kienu jafuh. Fil-fatt, setgħu ‘jifhmu dak kollu’ li riedhom jagħmlu. (Proverbji 28:5) U aħna nistgħu nagħmlu l-istess.
^ par. 2 Eżekjel ittieħed lejn Babilonja fis-sena 617 qabel Kristu. Hu kiteb il-kliem misjub f’Eżekjel 8:1–19:14 “fis-sitt sena” wara li ttieħed hemmhekk, jiġifieri, fis-sena 612.
^ par. 5 Lamek, missier Noè, kellu fidi f’Alla iżda miet xi ħames snin qabel id-Dulluvju. Jekk omm Noè kif ukoll ħutu kienu għadhom ħajjin meta beda d-Dulluvju, huma ma salvawx.
^ par. 13 Jistaʼ jkun li Ġeħova għamel l-istess għal Ħananija, Misael, u Għażarija sabiex huma wkoll setgħu jgħinu lill-poplu Lhudi.—Danjel 2:49.
^ par. 15 Ara n-nota taʼ taħt fit-titlu tal-ktieb taʼ Danjel.