1. Skont Kolossin 2:4, 8, Satana kif jipprova jikkontrollalna lil moħħna?

SATANA jridna nieqfu nħobbu lil Ġeħova. Sabiex jilħaq din il-​mira, hu jipprova jinfluwenza l-​mod kif naħsbu, bħallikieku jikkontrollalna lil moħħna u jagħmlu ubbidjenti lejh. Hu jipprova jipperswadina jew iqarraq bina biex insegwuh billi juża affarijiet li huma attraenti għalina.—Aqra Kolossin 2:4, 8.

2-3. (a) Għala għandna noqogħdu attenti għat-​twissija mniżżla f’​Kolossin 2:8? (b) X’se nikkunsidraw f’dan l-​artiklu?

² Qegħdin aħna verament f’periklu serju li niġu mqarrqin minn Satana? Iva, qegħdin! Ftakar li Pawlu ma kitibx it-​twissija mniżżla f’​Kolossin 2:8 lil nies li ma kinux jemmnu. Hu kitibha lill-​Kristjani li kienu ġew midlukin bl-​ispirtu qaddis. (Kol. 1:2, 5) Dawn il-​Kristjani kienu fil-​periklu dak iż-​żmien, u aħna qegħdin f’periklu saħansitra ikbar illum. (1 Kor. 10:12) Għala? Satana twaddab fil-​viċinanzi tal-​art, u hu ffokat biex iqarraq bil-​qaddejja leali t’Alla. (Riv. 12:9, 12, 17) Ukoll, qed ngħixu fi żmien meta nies mill-​agħar u impusturi jibqgħu sejrin “mill-​ħażin għall-​agħar.”—2 Tim. 3:1, 13.

³ F’dan l-​artiklu se niddiskutu kif Satana juża “qerq fieragħ,” jew qerq bla sens, biex jipprova jinfluwenza l-​ħsibijiet tagħna. Se nidentifikaw tliet nases minn tiegħu. (Efes. 6:11) Imbagħad, fl-​artiklu taʼ wara dan, se nikkunsidraw kif inġibu fix-​xejn kwalunkwe riżultat negattiv li t-​tattiki tiegħu setgħu ġabu fuq il-​ħsibijiet tagħna. Imma l-​ewwel, ejja naraw x’nistgħu nitgħallmu mill-​mod  kif Satana qarraq bl-​Iżraelin wara li daħlu fl-​Art Imwiegħda.

4-6. Skont Dewteronomju 11:10-15, l-​Iżraelin liema bidla rigward il-​biedja kellhom jagħmlu meta ssetiljaw fl-​Art Imwiegħda?

⁴ Bil-​ħażen taʼ moħħu, Satana ħajjar lill-​Iżraelin iqimu allat foloz. Kif għamel dan? Hu ħa vantaġġ mill-​bżonn tagħhom li jipprovdu l-​ikel għalihom infushom. Meta l-​Iżraelin daħlu fl-​Art Imwiegħda, huma kellhom ibiddlu l-​mod taʼ kif ikabbru l-​prodotti tal-​ikel tagħhom. Meta kienu l-​Eġittu, l-​Iżraelin saqqew l-​għelieqi tagħhom billi ġabu l-​ilma mix-​Xmara Nil. Madankollu, fl-​Art Imwiegħda ma kien hemm ebda xmara kbira, allura biex ikollhom x’jieklu kellhom bżonn l-​ilma tax-​xita kif ukoll tan-​nida. (Aqra Dewteronomju 11:10-15; Is. 18:4, 5) B’hekk, l-​Iżraelin kellhom jitgħallmu metodi ġodda tal-​biedja. Dan ma kienx se jkun faċli għaliex il-​biċċa l-​kbira tan-​nies li kellhom l-​esperjenza fil-​biedja kienu mietu fid-​deżert.

⁵ Ġeħova spjega lill-​poplu tiegħu li ċ-​ċirkustanzi tagħhom kienu nbidlu. Imbagħad żied din it-​twissija, li mad-​daqqa t’għajn tistaʼ tidher li m’għandhiex x’taqsam mal-​biedja: “Oqogħdu attenti għalikom infuskom li ma tmurx qalbkom titħajjar, u dduru u tqimu allat oħrajn u tmilu quddiemhom.” (Dt. 11:16, 17) Ġeħova għala wissa kontra l-​qima t’allat foloz meta kien qed jitkellem dwar li jitgħallmu metodi ġodda tal-​biedja?

⁶ Ġeħova kien jaf li l-​Iżraelin kienu se jitħajru biex jitgħallmu xi mod ġdid dwar il-​biedja mingħand in-​nies pagani taʼ  madwarhom. Bla dubju, il-​ġirien tagħhom kienu iżjed tal-​esperjenza minnhom, u l-​poplu t’Alla setaʼ jitgħallem mill-​metodi utli tagħhom, iżda kien hemm periklu. Ir-​raġunar tal-​bdiewa Kangħanin kien affettwat mit-​twemmin tagħhom f’Bagħal. Huma qiesu lil Bagħal bħala sid is-​sema u l-​wieħed li jagħti x-​xita. Ġeħova ma riedx li niesu jingannaw ruħhom bi twemmin falz bħal dan. Madankollu, għal darba wara l-​oħra, l-​Iżraelin għażlu li jqimu lil Bagħal. (Num. 25:3, 5; Mħ. 2:13; 1 Slat. 18:18) Issa nnota kif Satana kien kapaċi jaħtaf lill-​Iżraelin taħt difrejh.

7. Liema prova tal-​fidi ffaċċjaw l-​Iżraelin meta daħlu fl-​Art Imwiegħda?

⁷ L-​ewwel tattika li Satana uża kienet ix-​xewqa normali tan-​nies biex jaraw l-​art tissaqqa bl-​ilma tax-​xita. Fl-​Art Imwiegħda, kull sena ftit li xejn kienet tagħmel xita mill-​aħħar t’April sa Settembru. Il-​ħajja u l-​uċuħ tar-​rabaʼ ddependew mix-​xita li ġeneralment kienet tibda lejn Ottubru. Satana qarraq bl-​Iżraelin f’li jemmnu li biex jimxu ’l quddiem, huma kellhom jadottaw il-​prattiki tal-​ġirien pagani tagħhom. Dawn kienu jemmnu li kien hemm bżonn taʼ ċerti ritwali biex iqanqlu lill-​allat tagħhom jaġixxu u jġibulhom ix-​xita meħtieġa. Dawk li ma kellhomx biżżejjed fidi f’Ġeħova emmnu li dan kien l-​uniku mod biex tiġi evitata nixfa għal żmien twil. Allura huma għamlu ritwali pagani biex iqimu lill-​alla falz Bagħal.

8. Liema tattika oħra uża Satana? Spjega.

⁸ Satana uża tattika oħra fuq l-​Iżraelin. Hu ħajjarhom għall-​immoralità sesswali. Il-​ġnus pagani qiemu lill-​allat tagħhom billi għamlu atti immorali diżgustanti. Din il-​forma baxxa taʼ qima inkludiet prostituzzjoni fit-​tempju kemm taʼ nisa kif ukoll taʼ rġiel. L-​omosesswalità u forom oħrajn taʼ immoralità sesswali mhux biss kienu tollerati imma wkoll saru normali! (Dt. 23:17, 18; 1 Slat. 14:24) Dawn il-​pagani emmnu li dawn ir-​ritwali inkuraġġew lill-​allat tagħhom biex jagħmlu l-​art fertili. Ħafna Iżraelin inġibdu lejn ir-​ritwali immorali sesswalment tal-​pagani u ħallew lilhom infushom jiġu mħajrin jaqdu allat foloz. Fir-​realtà, huma nħatfu taħt difrejn Satana.

9. Skont Ħosea 2:16, 17, Satana kif ġiegħel lill-​Iżraelin jinsew x’kienet il-​ħarsa taʼ Ġeħova?

⁹ Satana uża t-​tielet tattika. Hu nessa lill-​Iżraelin x’kienet il-​ħarsa taʼ Ġeħova. Fi żmien il-​profeta Ġeremija, Ġeħova qal li l-​profeti foloz ġiegħlu lill-​poplu Tiegħu jinsa Ismu “minħabba Bagħal.” (Ġer. 23:27) Għal xi żmien, il-​poplu t’Alla milli jidher waqaf juża l-​isem taʼ Ġeħova u biddlu mal-​isem Bagħal, li jfisser “Sid.” Dan għamilha diffiċli għall-​Iżraelin biex jifhmu d-​differenza bejn Ġeħova u Bagħal, u b’hekk kien eħfef għalihom li jħalltu r-​ritwali tal-​qima lil Bagħal mal-​qima taʼ Ġeħova.—Aqra Ħosea 2:16, 17 u n-​nota taʼ taħt.

10. Satana x’tattiki juża llum?

¹⁰ Satana juża l-​istess tattiki llum. Hu jaħtaf in-​nies taħt difrejh billi jħajjarhom jaġixxu skont ix-​xewqat naturali tagħhom, billi jippromwovi l-​immoralità sesswali, u billi jnessi lin-​nies x’inhi  l-​ħarsa taʼ Ġeħova. L-​ewwel, ejja nikkunsidraw l-​aħħar tattika.

11. Satana kif nessa lin-​nies x’inhi l-​ħarsa taʼ Ġeħova?

¹¹ Satana jnessi lin-​nies x’inhi l-​ħarsa taʼ Ġeħova. Wara l-​mewt tal-​appostli taʼ Ġesù, uħud li qalu li kienu Kristjani bdew ixerrdu tagħlim falz. (Atti 20:29, 30; 2 Tess. 2:3) Dawn l-​apostati bdew inessu l-​identità tal-​uniku Alla veru. Pereżempju, huma waqfu jużaw l-​isem t’Alla meta għamlu l-​kopji tal-​Bibbja u ppreferew espressjonijiet bħal “Mulej.” Billi neħħew l-​isem personali t’Alla u poġġew “Mulej” minfloku, huma għamluha diffiċli għal min jaqra l-​Bibbja biex jara kif Ġeħova hu differenti mill-​“mulejiet” l-​oħrajn imsemmijin fl-​Iskrittura. (1 Kor. 8:5) Huma użaw l-​istess kelma, “Mulej,” kemm għal Ġeħova kif ukoll għal Ġesù. B’hekk, kien diffiċli li wieħed jifhem li Ġeħova u Ibnu huma individwi differenti b’pożizzjonijiet differenti. (Ġw. 17:3) Din il-​konfużjoni tat sehemha għall-​iżvilupp tad-​duttrina tat-​Trinità—duttrina li l-​Kelma t’Alla ma tgħallimx. Minħabba f’hekk, ħafna jaraw lil Alla bħala misterjuż u jemmnu li hu impossibbli li ssir tafu. X’gidba hi din!—Atti 17:27.

12. Ir-​reliġjon falza xi ppromwoviet, u b’liema riżultat, bħalma hu spjegat f’​Rumani 1:28-31?

¹² Satana jħajjar lin-​nies jaġixxu skont ix-​xewqat immorali. Fi żmien Iżrael tal-​qedem, Satana uża r-​reliġjon falza biex jippromwovi l-​immoralità. Illum jagħmel l-​istess. Ir-​reliġjon falza tittollera u saħansitra tippromwovi mġiba immorali. B’hekk, ħafna li jgħidu li jaqdu lil Alla abbandunaw il-​livelli ċari tiegħu dwar il-​moralità. L-​appostlu Pawlu jiddeskrivi x’kien ir-​riżultat fl-​ittra tiegħu lir-​Rumani. (Aqra Rumani 1:28-31.) Fost “dak li mhux xieraq” hemm kull tip taʼ immoralità sesswali, inkluż l-​omosesswalità. (Rum. 1:24-27, 32; Riv. 2:20) Kemm hu importanti għalina li nżommu mat-​tagħlim ċar tal-​Bibbja!

13. X’tattika oħra juża Satana?

¹³ Satana jħajjar lin-​nies jaġixxu skont ix-​xewqat naturali tagħhom. Aħna għandna xewqa naturali biex  ikollna edukazzjoni bażika li tistaʼ tgħinna naqilgħu l-​għajxien għalina u għall-​familji tagħna. (1 Tim. 5:8) Spiss, jistaʼ jkollna edukazzjoni bażika billi nattendu l-​iskola u nkunu studenti ħabrieka. Imma rridu noqogħdu attenti. Minbarra l-​edukazzjoni bażika, is-​sistema edukattiva f’ħafna pajjiżi tgħallem ukoll l-​għerf tal-​bniedem. L-​istudenti huma inkuraġġiti jiddubitaw l-​eżistenza t’Alla u jinjoraw il-​Bibbja. Huma jiġu mgħallmin li t-​teorija tal-​evoluzzjoni hi l-​unika spjegazzjoni intelliġenti għall-​oriġini tal-​ħajja. (Rum. 1:21-23) Tagħlim bħal dan imur kontra “l-​għerf t’Alla.”—1 Kor. 1:19-21; 3:18-20.

14. L-​għerf tal-​bniedem x’jippromwovi?

¹⁴ L-​għerf tal-​bniedem jinjora jew imur kontra l-​livelli ġusti taʼ Ġeħova. Ma jippromwovix il-​frott tal-​ispirtu t’Alla iżda, minflok, “l-​għemejjel tal-​laħam.” (Gal. 5:19-23) Dan jinkuraġġixxi l-​kburija u l-​arroganza, bir-​riżultat li n-​nies isiru “jħobbu lilhom infushom.” (2 Tim. 3:2-4) Dawn il-​kwalitajiet huma l-​oppost tal-​attitudni ġwejda u umli li l-​qaddejja t’Alla huma inkuraġġiti li jkollhom. (2 Sam. 22:28) Xi Kristjani li ħadu edukazzjoni ogħla beda jkollhom raġunar bħal tad-​dinja minflok bħal t’Alla. Ejja nikkunsidraw eżempju wieħed biss taʼ x’jistaʼ jiġri.

15-16. Int x’titgħallem mill-​esperjenza taʼ waħda oħt?

¹⁵ Oħt li ilha fis-​servizz full-​time għal iktar minn 15-​il sena tgħid: “Bħala Xhud mgħammda kont qrajt u smajt dwar il-​perikli taʼ li tmur l-​università, imma ma  tajtx kas twissijiet bħal dawn. Ħsibt li l-​parir ma kienx jgħodd għalija.” Xi sfidi ffaċċjat? Hi tammetti: “L-​istudju għall-​korsijiet li ħadt tant ħadli ħin u sforz li ma kienx jibqagħli ħin nitlob lil Ġeħova bħalma kien ikolli qabel, kont inkun wisq għajjiena biex ingawdi diskussjonijiet fil-​ministeru dwar il-​Bibbja, u għajjiena mejta biex nipprepara tajjeb għal-​laqgħat. B’ferħ, ladarba rrealizzajt illi li nkun involuta ħafna f’edukazzjoni ogħla kien qed jagħmilli l-​ħsara fir-​relazzjoni tiegħi maʼ Ġeħova, kont naf li kelli nieqaf. U hekk għamilt.”

¹⁶ Din l-​edukazzjoni ogħla x’effett ħalliet fuq ir-​raġunar taʼ din l-​oħt? Hi twieġeb: “Nistħi nammetti li l-​edukazzjoni li għażilt għallmitni niffoka fuq l-​imperfezzjonijiet t’oħrajn, speċjalment taʼ ħuti fil-​kongregazzjoni, għallmitni nistenna ħafna minnhom, u biex ninqataʼ minnhom. Kellu jgħaddi ħafna żmien biex nieqaf naħseb b’dan il-​mod. Dak il-​perjodu f’ħajti wrieni kemm hu perikoluż li ninjoraw it-​twissijiet mogħtijin minn Missierna tas-​sema permezz tal-​organizzazzjoni tiegħu. Ġeħova kien jafni aħjar milli kont naf lili nnifsi. Kemm nixtieq li smajt minnu!”

17. (a) X’għandha tkun id-​determinazzjoni tagħna? (b) X’se nikkunsidraw fl-​artiklu li jmiss?

¹⁷ Kun determinat li qatt ma tħalli lid-​dinja taʼ Satana taħtfek taħt difrejha “b’filosofija u qerq fieragħ.” Oqgħod għassa kontinwament għat-​tattiki taʼ Satana. (1 Kor. 3:18; 2 Kor. 2:11) Qatt tħallih inessik min hu Ġeħova u kif iridek tqimu. Għix skont il-​livelli morali għoljin taʼ Ġeħova. U qatt tħalli lil Satana jqarraq bik f’li tinjora l-​pariri taʼ Ġeħova. Imma x’għandek tagħmel jekk tinduna li diġà ġejt affettwat bir-​raġunar taʼ din id-​dinja? L-​artiklu li jmiss se jurina kif il-​Kelma t’Alla tistaʼ tgħinna negħlbu saħansitra ħsibijiet u drawwiet “stabbiliti fis-​sod.”—2 Kor. 10:4, 5.