Se Tobdi Int id-Daqq tat-Trumbetta?
AĦNA lkoll nemmnu li Ġeħova qed imexxi lill-poplu tiegħu u jagħtihom dak li għandhom bżonn biex jibqgħu qrib tiegħu matul dawn “l-aħħar jiem.” (2 Tim. 3:1) Però, kull wieħed u waħda minna jrid ikun ubbidjenti lejn Ġeħova. Nistgħu nqabblu s-sitwazzjoni tagħna maʼ dik tal-Iżraelin meta kienu fix-xagħri. Huma kellhom jaġixxu meta kienu jisimgħu l-ħoss tat-trumbetta.
Ġeħova qal lil Mosè biex jagħmel żewġ trumbetti tal-fidda maħdumin bil-martell, ‘biex isejjaħ lill-ġemgħa u biex jiżżarmaw il-kampijiet għat-tluq.’ (Num. 10:2) Il-qassisin kellhom idoqqu t-trumbetti b’modi differenti biex jagħtu sinjal lin-nies dwar dak li kellhom jagħmlu. (Num. 10:3-8) Illum, il-poplu t’Alla jirċievi direzzjoni b’diversi modi. F’dan l-artiklu, se nikkunsidraw tliet modi kif aħna nirċievu direzzjonijiet, u se nqabbluhom mad-daqq tat-trumbetti fi żmien l-Iżraelin. Dawn it-tliet modi huma: (1) meta niġu mistidnin biex niltaqgħu flimkien fi gruppi kbar, (2) meta l-anzjani jirċievu taħriġ, u (3) meta jkun hemm xi tibdil jew aġġustamenti fil-kongregazzjonijiet kollha.
META NIĠU MISTIDNIN BIEX NILTAQGĦU FLIMKIEN FI GRUPPI KBAR
Meta Ġeħova ried li “l-ġemgħa kollha” tinġabar quddiem l-entratura fuq in-naħa tal-Lvant tat-tabernaklu, il-qassisin kienu jdoqqu ż-żewġ trumbetti. (Num. 10:3) It-tribujiet kollha li kienu kkampjati madwar it-tabernaklu f’erbaʼ partijiet, kienu jisimgħu dak il-ħoss. Dawk ikkampjati viċin l-entratura, x’aktarx li kienu jaslu fi ftit minuti. Oħrajn kienu iktar ’il bogħod u x’aktarx kien ikollhom bżonn iktar ħin u jagħmlu sforz akbar biex jaslu. Kien x’kien il-każ, Ġeħova ried li kulħadd jinġabar flimkien u jismaʼ l-istruzzjonijiet tiegħu.
Illum, aħna ma ninġabrux ħdejn it-tabernaklu, imma niġu mistidnin biex niltaqgħu fi gruppi bħala l-poplu t’Alla. Dawn jinkludu konvenzjonijiet reġjonali u laqgħat speċjali oħra, li fihom nirċievu informazzjoni u direzzjoni importanti. Madwar id-dinja kollha, il-poplu taʼ Ġeħova jgawdi l-istess programm. Għalhekk, dawk li jaċċettaw l-istedina u jattendu, ikunu parti minn grupp kbir. Xi wħud ikollhom jivvjaġġaw iktar fit-tul minn oħrajn. Imma dawk kollha li jattendu jafu li l-isforzi li jagħmlu huma taʼ benefiċċju għalihom.
Dawk il-gruppi li huma iżolati minn gruppi kbar, li jiltaqgħu għal konvenzjonijiet reġjonali u laqgħat speċjali oħra, jistgħu jibbenefikaw? Iva. Grazzi għat-teknoloġija moderna, ħafna minn dawn jistgħu jibbenefikaw mill-istess programm u ma jħossuhomx iżolati. Pereżempju, meta kien hemm żjara tar-rappreżentant
tal-kwartieri ġenerali, l-aħwa fil-fergħa fil-Benin għamlu arranġamenti biex il-programm ikun jistaʼ jintwera lill-aħwa f’Arlit, in-Niġer, belt li fiha l-minjieri fid-Deżert Saħara. Hemmhekk iltaqgħu 21 ħu u oħt, u oħrajn interessati. Għalkemm kienu ’l bogħod, xorta ħassewhom parti mill-grupp kbir taʼ 44,131 ruħ. Ħu minnhom kiteb: “Nirringrazzjakom minn qalbi talli pprovdejtulna l-programm. Għal darba oħra, nistgħu naraw l-imħabba tagħkom.”META L-ANZJANI JIĠU MISTIDNIN GĦAL IKTAR TAĦRIĠ
Meta l-qassisin Iżraelin kienu jdoqqu trumbetta waħda, il-“kapijiet taʼ l-eluf taʼ Israel” biss kellhom jiġu jiltaqgħu ħdejn it-tinda. (Num. 10:4) Hemmhekk setgħu jirċievu informazzjoni u taħriġ mingħand Mosè. Dan kien se jgħinhom jieħdu ħsieb ir-responsabbiltajiet li kellhom fit-tribujiet tagħhom. Kieku kont wieħed minn dawn il-kapijiet, ma kontx tagħmel kull ma tistaʼ biex tkun hemm u tismaʼ?
Illum, l-anzjani tal-kongregazzjoni mhumiex “kapijiet,” u lanqas ma jiddominaw il-merħla t’Alla li huma responsabbli tagħha. (1 Pt. 5:1-3) Imma żgur li jagħmlu l-aħjar tagħhom biex jieħdu ħsieb l-aħwa. B’hekk, huma lesti għal iktar taħriġ, bħalma toffri l-Iskola tal-Ministeru tas-Saltna. Waqt dawn is-sessjonijiet, l-anzjani jitgħallmu kif jieħdu ħsieb sew kwistjonijiet tal-kongregazzjoni. Minħabba dan it-taħriġ, l-anzjani u l-aħwa li huma jieħdu ħsieb ikunu jistgħu jersqu eqreb t’Alla. Anki jekk ma mortx waħda minn dawn l-iskejjel, int xorta tistaʼ tibbenefika minn dawk li marru.
META NIĠU MITLUBIN NAGĦMLU BIDLA
Kultant il-qassisin Iżraelin kienu jdoqqu t-trumbetta b’ħoss li jogħla u jitbaxxa. Dan kien ifisser li Ġeħova jrid li n-nies iżarmaw il-kampijiet u jitilqu. (Num. 10:5, 6) Meta kienu jitilqu, huma kienu jagħmlu dan b’mod organizzat, u dan kien jinvolvi ħafna xogħol. Imma xi Iżraelin kultant kienu jsibuha bi tqila biex imorru xi mkien ieħor. Għala?
Forsi xi wħud ħassew li d-daqq tat-trumbetti biex jitilqu, kien qed ikun taʼ spiss u bla mistenni. “Kultant is-sħaba kienet tibqaʼ minn fil-għaxija sa fil-għodu.” Drabi oħra kienet iddum jumejn, xahar, jew iktar. (Num. 9:21, 22) Taf kemm-il darba kellhom jarmaw il-kamp? Numri kapitlu 33 isemmi li dawn marru f’madwar 40 post.
Kultant, kienu jsibu post għad-dell. Dan kien ikun tajjeb għalihom peress li kienu qed jgħixu “ġo dak ix-xagħri kbir li jqanqal il-biżaʼ.” (Dt. 1:19) Allura, setgħu jiġu mħajrin biex jibqgħu fejn ikunu, għax kienu jibżgħu li se jmorru f’post agħar.
Meta l-poplu kien ikollu jimxi, xi nies kienu jsibuha diffiċli biex jistennew wara min imisshom. Kulħadd kien jismaʼ d-daqq tat-trumbetti jogħla u jitbaxxa, imma ma setgħux jitilqu f’daqqa. Dik id-daqqa tat-trumbetta kienet sinjal biex jitilqu t-tribujiet li kienu kkampjati fuq in-naħa tal-Lvant, jiġifieri taʼ Ġuda, Issakar, u Żebulun. (Num. 2:3-7; 10:5, 6) Wara li kienu jitilqu, il-qassisin kienu jerġgħu jdoqqu t-trumbetti bl-istess mod biex titlaq it-taqsima taʼ tliet tribujiet fuq in-naħa tan-Nofsinhar. Il-qassisin kienu jibqgħu jagħmlu hekk sakemm kien jitlaq kulħadd.
Għandu mnejn sibtha diffiċli biex taċċetta bidliet fl-organizzazzjoni. Għala? Forsi ħsibt li qed ikun hemm wisq bidliet. Jew kont kuntent kif kienu l-affarijiet u ma xtaqtx li jinbidlu. Jistaʼ jkun li sibtha diffiċli biex turi s-sabar waqt li qed tidra bidla, u kellek bżonn iż-żmien biex taddatta. Minkejja dan, jekk nagħmlu sforz biex inkunu ubbidjenti, aktarx se naraw li Alla qed iberikna.
Fi żmien Mosè, Ġeħova ggwida lil miljuni taʼ rġiel, nisa, u tfal fix-xagħri. Mingħajr l-għajnuna u d-direzzjoni t’Alla, ma kienx se jirnexxilhom isalvaw. Anki llum, Ġeħova qed jiggwidana f’dawn l-aħħar jiem mill-agħar. Hu jgħinna nibqgħu qrib tiegħu u nżommu fidi b’saħħitha. Allura, irridu nagħmlu minn kollox biex inkunu ubbidjenti bħalma kienu l-Iżraelin leali meta kienu jisimgħu d-daqq tat-trumbetti!