ARTIKLU GĦALL-ISTUDJU 22
Għin lill-Istudent tal-Bibbja Tiegħek Isir Dixxiplu Mgħammed
“Ħa jitgħammed kull wieħed minnkom.”—ATTI 2:38.
GĦANJA 72 Nagħmlu magħrufa l-verità tas-Saltna
ĦARSA BIL-QUDDIEM *
1. Il-folla kbira li marret Ġerusalemm x’kellha tagħmel?
FOLLA kbira taʼ rġiel u nisa vvjaġġaw lejn Ġerusalemm. Huma kienu minn pajjiżi differenti u kienu jitkellmu b’ħafna lingwi differenti. Dakinhar ġrat xi ħaġa tal-għaġeb. Xi Lhud li kienu f’Ġerusalemm f’daqqa waħda bdew jitkellmu bil-lingwi taʼ dawn l-irġiel u nisa! Din il-folla baqgħet mistagħġba, imma dak li qalu l-Lhud u l-appostlu Pietru kien iktar impressjonanti. Din il-folla tgħallmet li huma jistgħu jiġu salvati jekk juru fidi f’Ġesù Kristu. Dan il-messaġġ messilhom qalbhom, u bdew jistaqsu: “X’għandna nagħmlu?” Pietru wiġibhom: “Ħa jitgħammed kull wieħed minnkom.”—Atti 2:37, 38.
Ħu flimkien mal-mara tiegħu qed jikkonduċi studju tal-Bibbja maʼ żagħżugħ li għandu l-ktieb Għix Ħajja Ferħana għal Dejjem! (Ara paragrafu 2)
2. X’se niddiskutu f’dan l-artiklu? (Ara l-istampa tal-qoxra.)
2 Wara dan ġrat xi ħaġa kbira. Madwar 3,000 ruħ tgħammdu f’dik il-ġurnata u saru dixxipli taʼ Kristu. Dan kien il-bidu tax-xogħol li Ġesù kien ikkmanda lid-dixxipli tiegħu. Illum, dan ix-xogħol għadu qed isir. Però, meta nitkellmu maʼ xi ħadd illum ma jitgħammidx daqshekk malajr. Jistgħu jgħaddu xhur u anki snin biex student jitgħammed. Jekk għandek xi studju, taf li jirrikjedi xogħol iebes biex tgħin lil xi ħadd isir dixxiplu taʼ Kristu. F’dan l-artiklu se naraw x’tistaʼ tagħmel biex tgħin l-istudent tiegħek jasal għall-magħmudija.
GĦIN LILL-ISTUDENT TIEGĦEK JAPPLIKA DAK LI QED JITGĦALLEM
3. Skont Mattew 28:19, 20, student x’għandu jagħmel biex jagħmel progress u jitgħammed?
3 Qabel ma jitgħammed student għandu jibda japplika dak li jkun qed jitgħallem. (Aqra Mattew 28:19, 20.) Meta jagħmel dan, hu jkun bħal dak ir-“raġel għaqli” li semma Ġesù u li ħaffer fil-fond biex jibni d-dar tiegħu fuq il-blat. (Mt. 7:24, 25; Lq. 6:47, 48) Kif nistgħu ngħinu lill-istudent japplika dak li jitgħallem? Ejja nikkunsidraw tliet suġġerimenti.
4. Kif nistgħu ngħinu lill-istudent tagħna jkompli jaħdem ħalli b’hekk jikkwalifika għall-magħmudija? (Ara wkoll il-kaxxa “ Għin lill-Istudent Tiegħek Jagħmel Miri u Jilħaqhom.”)
4 Għin lill-istudent tiegħek jagħmel miri. Għala hu importanti? Ejja nġibu eżempju: Immaġinak li se tagħmel vjaġġ twil bil-karozza. Mat-triq forsi tkun trid tieqaf tara xi postijiet. B’hekk, minkejja li l-vjaġġ ikun twil m’intix se tiddejjaq. Bl-istess mod, meta student jagħmel miri żgħar u jilħaqhom se jinduna li l-mira tal-magħmudija jistaʼ jilħaqha wkoll. Uża l-kaxxa “Ipprova Dan” li qiegħda fil-ktieb Għix Ħajja Ferħana għal Dejjem! biex tgħin lill-istudent tiegħek jagħmel miri. Fl-aħħar taʼ kull lezzjoni, iddiskuti mal-istudent kif il-mira li għamel se tgħinu japplika dak li jkun għadu kif tgħallem. Jekk tixtieq li l-istudent tiegħek jilħaq mira oħra, tistaʼ tiktibha fejn hemm “Jew Ipprova Xi Ħaġa Oħra.” B’mod regolari, għaddi din il-parti mal-istudent biex tara jekk laħaqx il-miri li niżżel.
5. Kif naraw f’Marku 10:17-22, Ġesù x’qallu biex jagħmel lir-raġel sinjur, u għala?
5 Għin lill-istudent tiegħek jagħmel il-bidliet li għandu bżonn. (Aqra Marku 10:17-22.) Ġesù kien jaf li mhux se jkun faċli għar-raġel sinjur biex ibigħ dak kollu li kellu. (Mk. 10:23) Però, Ġesù xorta waħda qallu biex jagħmel din il-bidla kbira. Għala? Għax Ġesù kien iħobbu. Kultant forsi nżommu lura u ma ngħidux lill-istudent biex jagħmel ċertu bidliet għax naħsbu li għadu mhux lest. Jistaʼ jieħu ż-żmien biex jagħmlu l-bidliet li jkun hemm bżonn u jilbsu l-personalità l-ġdida. (Kol. 3:9, 10) Imma iktar ma titkellem malajr mal-istudent dwar il-bidliet li jkollu bżonn jagħmel, iktar se jagħmilhom malajr u tkun qed turih ukoll li inti jimpurtak minnu.—Salm 141:5; Prov. 27:17.
6. Għala rridu nistaqsu mistoqsijiet li jgħidulna x’jaħseb l-istudent?
6 Huwa importanti li tistaqsi lill-istudent x’jaħseb dwar is-suġġett. Dan se jgħinek issir taf x’jifhem u dak li jemmen. Jekk tagħmel dan spiss, se jkun iktar faċli biex tiddiskuti miegħu suġġetti li għalih jistgħu jkunu diffiċli. Il-ktieb Għix Ħajja Ferħana għal Dejjem! fih ħafna mistoqsijiet li nistgħu nużaw biex insiru nafu x’inhi l-opinjoni tal-istudent. Pereżempju, f’lezzjoni 04 hemm il-mistoqsija: “Kif taħseb li jħossu Ġeħova meta tuża ismu?” F’lezzjoni 09 hemm il-mistoqsija: “Liema affarijiet tixtieq titlob dwarhom?” Għall-ewwel, forsi ma jkunx faċli għall-istudent tiegħek biex iwieġeb dawn il-mistoqsijiet. Imma int tistaʼ tgħinu billi ġġiegħlu jaħseb dwar l-iskritturi u l-istampi li hemm fil-ktieb.
7. Kif nistgħu ninkuraġġixxu lill-istudenti tagħna bl-esperjenzi t’aħwa oħrajn?
7 Meta l-istudent jifhem x’għandu jagħmel, uża esperjenzi t’aħwa oħrajn biex tinkuraġġih. Pereżempju, jekk l-istudent tiegħek ma jattendix il-laqgħat b’mod regolari, tistaʼ turih il-vidjow Ġeħova ħa Ħsiebi li qiegħed f’lezzjoni 14 fis-sezzjoni “Ara Iżjed.” Ħafna mill-lezzjonijiet tal-ktieb Għix Ħajja Ferħana għal Dejjem! se ssib fihom esperjenzi fis-sezzjoni “Tgħallem Iżjed” jew “Ara Iżjed.” * Oqgħod attent li ma tqabbilx lill-istudent tiegħek m’oħrajn u tgħidlu, “La dak għamilha, tistaʼ tagħmilha int ukoll.” Ħallih jinduna waħdu li jistaʼ jagħmilha. Minflok, tkellem dwar affarijiet li għenu lill-persuna fil-vidjow tagħmel il-bidliet. Forsi tistaʼ ssemmi xi skrittura importanti jew xi ħaġa prattika li dehret fil-vidjow. Kull meta tistaʼ enfasizza kif Ġeħova għen lil dik il-persuna.
8. Kif nistgħu ngħinu lill-istudent tagħna jsir iħobb lil Ġeħova?
8 Għin lill-istudent tiegħek isir iħobb lil Ġeħova. Kif? Sib modi kif tgħinu biex jitgħallem iktar dwar il-kwalitajiet taʼ Ġeħova. Għinu jifhem li Ġeħova hu Alla ferħan u jgħin lil dawk li jħobbuh. (1 Tim. 1:11; Ebr. 11:6) Uri lill-istudent li hu se jibbenifika jekk japplika dak li jitgħallem, u spjegalu li Ġeħova qed jgħallmu għall-ġid tiegħu. (Is. 48:17, 18) Iktar mal-istudent tiegħek isir iħobb lil Ġeħova, iktar se jkun irid jagħmel bidliet.—1 Ġw. 5:3.
LAQQAʼ L-ISTUDENT MAL-AĦWA
9. Fi qbil maʼ Marku 10:29, 30 student x’sagrifiċċji jaf ikollu jagħmel biex isir dixxiplu mgħammed?
9 Biex student tal-Bibbja jasal għall-magħmudija jrid jagħmel sagrifiċċji. Marku 10:29, 30.) Kif tistaʼ tgħin lill-istudent tiegħek jibbenifika minn dan ir-rigal sabiħ?
Bħal dak ir-raġel sinjur li semmejna fil-bidu, xi studenti jaf ikollhom iċedu xi affarijiet materjali. Jekk ix-xogħol tagħhom ma jaqbilx mal-prinċipji tal-Bibbja, jaf ikollhom isibu xogħol ieħor. Ħafna jkollhom jaqtgħu ħbieb li ma jħobbux lil Ġeħova. Oħrajn forsi jiħduha kontrihom tal-familja stess. Ġesù qal li għal xi nies ma kienx se jkun faċli jagħmlu dawn is-sagrifiċċji. Imma hu wiegħed li dawk li se jimxu warajh mhux se jkunu ddiżappuntati. Ġeħova ħa jippremjahom billi jagħtihom familja spiritwali li tħobbhom. (Aqra10. X’titgħallem mill-esperjenza taʼ Manuel?
10 Sir ħabib mal-istudent tiegħek. Huwa importanti li turih li int jimpurtak minnu. Għala? Manuel, li jgħix il-Messiku, għadu jiftakar kif għenu l-għalliem tiegħu. Hu jgħid: “Qabel kull studju, kien jistaqsini kif kont inħossni. Vera kont inħossni komdu miegħu u dan għenni biex niftaħ qalbi miegħu. Kont inħoss li hu vera jimpurtah minni.”
11. L-istudenti tagħna kif jibbenifikaw meta nqattgħu l-ħin magħhom?
11 Qattaʼ l-ħin mal-istudent tiegħek bħalma għamel Ġesù mad-dixxipli tiegħu. (Ġw. 3:22) Jekk l-istudent qed jagħmel bidliet fil-ħajja tiegħu, tistaʼ tistiednu għal xi kikkra te, forsi biex jiekol xi ħaġa miegħek, jew biex jara l-broadcasting taʼ kull xahar. Hu se japprezza iktar jekk int tistiednu matul żmien taʼ festi li l-familja u l-ħbieb tiegħu jiċċelebraw u b’hekk jispiċċa waħdu. Kazibwe, li jgħix l-Uganda, jgħid: “Meta kont inkun mal-għalliem, tgħallimt affarijiet dwar Ġeħova daqskemm kont nitgħallem fl-istudju. Jien rajt kemm Ġeħova jieħu ħsieb il-poplu tiegħu u kemm huma ferħanin, u jien dak li xtaqt.”
Meta tieħu aħwa differenti għall-istudju, l-istudent se jsibha iktar faċli biex jattendi l-laqgħat (Ara paragrafu 12) *
12. Għala hu importanti li nieħdu aħwa differenti fuq l-istudju?
12 Għall-istudju ħu miegħek aħwa differenti. Kultant, forsi nsibuha iktar faċli biex immorru waħedna jew nieħdu l-istess pubblikatur magħna. Vera li dan jistaʼ jkun faċli għalina, imma jekk xi drabi nieħdu pubblikaturi differenti se jkun taʼ ġid għall-istudent. Dmitrii, li jgħix il-Moldova, jgħid: “Il-pubblikaturi li ġew għall-istudju tiegħi esprimew ruħhom b’mod differenti, u dan għenni biex napplika dak li kont qed nitgħallem b’modi oħrajn. Għenni wkoll meta mort l-ewwel laqgħa, għax ħassejtni iktar komdu peress li diġà kont naf xi aħwa.”
13. Għala għandna ngħinu lill-istudent tagħna jattendi l-laqgħat?
13 Għin lill-istudent tiegħek jattendi l-laqgħat. Għala? Għax Ġeħova kkmanda lill-qaddejja tiegħu biex jattendu l-laqgħat bħala parti mill-qima. (Ebr. 10:24, 25) Barra minn hekk, l-aħwa fil-kongregazzjoni jsiru parti mill-familja spiritwali tagħna. Meta nkunu l-laqgħat flimkien, inkunu bħallikieku qed nieklu ikla tajba magħhom. Meta tgħin lill-istudent tiegħek biex jattendi l-laqgħat tkun qed tgħinu jagħmel xi ħaġa importanti li tistaʼ twasslu għall-magħmudija. Però, jistaʼ jkun diffiċli għalih biex jibda jattendi. Il-ktieb Għix Ħajja Ferħana għal Dejjem! kif jistaʼ jgħin lill-istudent tiegħek biex ma jħalli xejn iwaqqfu milli jattendi l-laqgħat?
14. Kif nistgħu nħajru lill-istudent jattendi l-laqgħat?
14 Uża lezzjoni 10 tal-ktieb Għix Ħajja Ferħana għal Dejjem! biex tħajru jattendi l-laqgħat. Qabel ħareġ dan il-ktieb, xi pubblikaturi ġew mitluba biex jużaw lezzjoni 10 u sabu li kienet taʼ għajnuna kbira għall-istudenti biex jibdew jattendu l-laqgħat. Bla dubju, m’għandekx tistenna li tasal f’lezzjoni 10 biex tistieden lill-istudent tiegħek. Stiednu kemm jistaʼ jkun malajr u ibqaʼ fakkru li importanti li jattendi l-laqgħat. Kull student jiffaċċja problemi differenti. Għalhekk, ipprova ifhem x’għandu bżonn l-istudent u ara kif tistaʼ tgħinu. Taqtax qalbek jekk ma jibdiex jattendi l-laqgħat mill-ewwel. Ibqaʼ pprova u kun paċenzjuż.
GĦIN LILL-ISTUDENT TIEGĦEK JEGĦLEB IL-BIŻAʼ
15. L-istudenti tagħna liema biżaʼ jistaʼ jkollhom?
15 Tiftakar kif kont tħossok int qabel sirt Xhud taʼ Ġeħova? Forsi ħassejt li qatt ma kien se jirnexxilek tipprietka. Jew kont tibżaʼ li l-familja u l-ħbieb tiegħek kienu se jiħduha kontrik. Jekk iva, tistaʼ tifhem kif iħossu l-istudent tiegħek. Ġesù qal li xi nies jistgħu jħossuhom imbeżżgħin. Però, hu ħeġġeġ lis-segwaċi tiegħu biex ma jħallux il-biżaʼ twaqqafhom milli jaqdu lil Ġeħova. (Mt. 10:16, 17, 27, 28) Ġesù x’għamel biex jgħin lid-dixxipli tiegħu jegħlbu l-biżaʼ? U int kif tistaʼ timitah?
16. Kif nistgħu nittrennjaw lill-istudent tagħna biex jipprietka?
16 Għallem lill-istudent tiegħek jitkellem m’oħrajn dwar dak li qed jitgħallem. Id-dixxipli taʼ Ġesù jistaʼ jkun li beżgħu meta Ġesù bagħathom jippritkaw. Imma Ġesù għenhom billi qalilhom fejn għandhom imorru jippritkaw u x’għandhom jgħidu. (Mt. 10:5-7) Kif tistaʼ timita lil Ġesù? Għin lill-istudent biex jaħseb lil min jistaʼ jipprietka. Pereżempju, staqsih jekk jafx lil xi ħadd li jistaʼ jibbenifika mit-tagħlim tal-Bibbja. Imbagħad, b’mod sempliċi għinu jipprepara dak li jistaʼ jgħid. Meta jkun il-waqt, tistaʼ tuża s-sezzjoni “Ħafna Jgħidu” u “Xi Ħadd Jistaʼ Jsaqsi,” li nsibu fil-ktieb Għix Ħajja Ferħana għal Dejjem! Meta tagħmel dan, ittrennja lill-istudent tiegħek biex juża l-Bibbja u bit-tattika jagħti tweġibiet sempliċi.
17. Kif nistgħu nużaw il-versi li nsibu f’Mattew biex ngħinu lill-istudent jafda f’Ġeħova?
17 Għin lill-istudent tiegħek jafda f’Ġeħova. Ġesù qal lid-dixxipli tiegħu li Ġeħova se jgħinhom għax iħobbhom. (Aqra Mattew 10:19, 20, 29-31.) Fakkar lill-istudent tiegħek li Ġeħova se jgħin lilu wkoll. Int tistaʼ tgħinu jistrieħ fuq Ġeħova billi titlob miegħu dwar il-miri li għandu. Franciszek, li jgħix il-Polonja, jgħid: “L-għalliem tiegħi spiss kien isemmi l-miri tiegħi fit-talb tiegħu. Meta rajt kif Ġeħova beda jwieġeb it-talb tiegħu, anke jien bdejt nitlob. U meta kelli bżonn ġranet off biex nattendi l-laqgħat u l-konvenzjoni Ġeħova għenni.”
18. Ġeħova kif iħossu dwar ix-xogħol li jagħmlu l-għalliema Kristjani?
18 Ġeħova jimpurtah ħafna mill-istudenti tal-Bibbja. Hu jaf kemm l-għalliema Kristjani jaħdmu iebes biex jgħinu lin-nies jersqu qrib tiegħu, u għalhekk iħobbhom ħafna. (Is. 52:7) Jekk m’għandekx studju tal-Bibbja, int xorta waħda tistaʼ tgħin lill-istudenti jagħmlu progress u jaslu għall-magħmudija billi tmur mal-pubblikaturi għall-istudju.
GĦANJA 60 Hemm ħajjithom fin-nofs
^ par. 5 F’dan l-artiklu se naraw kif Ġesù għen lin-nies biex isiru dixxipli tiegħu u kif aħna nistgħu nimitawh. Se niddiskutu wkoll kif nistgħu nużaw il-ktieb Għix Ħajja Ferħana għal Dejjem! Dan il-ktieb ġie ddisinjat biex jgħin lill-istudenti tagħna jagħmlu progress u jitgħammdu.
^ par. 7 Tistaʼ ssib esperjenzi oħrajn (1) fil-Gwida għall-Pubblikazzjonijiet tax-Xhieda taʼ Ġeħova taħt “Suġġetti,” “Bibbja,” “Valur Prattiku,” “‘Il-Bibbja Tbiddel il-Ħajjiet’ (Serje fit-Torri tal-Għassa)” jew (2) fil-JW Library® fis-sezzjoni “Midja,” “Intervisti u esperjenzi.”
^ par. 62 X’TGĦIDILNA L-ISTAMPA: Ħu flimkien mal-mara tiegħu qed jistudja maʼ żagħżugħ. Xi kultant aħwa differenti jmorru għall-istudju miegħu.