1. Fi qbil maʼ Filippin 2:3, għala se jkollna ħbiberija tajba m’oħrajn jekk inkunu umli?

B’UMILTÀ, aħna nobdu lil Ġeħova għax nifhmu li Ġeħova dejjem jaf x’inhu l-​aħjar għalina. (Efes. 4:22-​24) Meta nkunu umli, aħna se nifhmu li dak li jrid Ġeħova huwa iktar importanti minn dak li rridu aħna, u li oħrajn huma aħjar minna. B’hekk, aħna ngawdu ħbiberija tajba maʼ Ġeħova u mal-​aħwa fil-​kongregazzjoni.—Aqra Filippin 2:3.

2. L-​appostlu Pawlu xi rrealizza, u x’se nikkunsidraw f’dan l-​artiklu?

² Jekk ma noqogħdux attenti, nistgħu niġu influwenzati min-​nies tad-​dinja li huma egoisti u kburin. * Milli jidher, xi Kristjani tal-​bidu ġew influwenzati b’dan il-​mod. Dan nafuh għax l-​appostlu Pawlu kiteb lir-​Rumani: “Ngħid lil kull wieħed minnkom biex ma jaħsibx li hu xi ħaġa iktar milli hu xieraq; imma jaħseb b’tali mod li jkollu moħħ f’loku.” (Rum. 12:3) Pawlu rrealizza li xi kultant ma jkunx ħażin li naħsbu dwarna nfusna. Però, l-​umiltà se tgħinna biex ikollna ħarsa bilanċjata. F’dan l-​artiklu se nikkunsidraw tliet aspetti fejn l-​umiltà se tgħinna biex ma nkunux kburin. Dawn huma (1) fiż-​żwieġ, (2) meta jkollna l-​privileġġi fil-​kongregazzjoni, u (3) fil-​mod kif nużaw is-​social media.

3. Għala jistaʼ jkun hemm problemi fiż-​żwieġ, u xi wħud kif jipprovaw isolvu dawn il-​problemi?

³ Ġeħova jrid li l-​miżżewġin ikunu kuntenti flimkien. Imma peress li huma imperfetti, probabilment se jinqalgħu xi argumenti. Fil-​fatt, Pawlu qal li dawk li jiżżewġu se jkollhom xi problemi. (1 Kor. 7:28) Xi wħud jindunaw li l-​ħin kollu jiġġieldu, u jaf jaħsbu li aħjar ma żżewġux lil xulxin. Jekk iħallu lid-​dinja tinfluwenzahom, malajr jaħsbu li d-​divorzju hu s-​soluzzjoni. Huma se jaħsbu biss dwarhom infushom u li se jkunu kuntenti biss jekk jiddivorzjaw.

4. Xi rridu nevitaw?

⁴ Aħna ma rridux naħsbu li ż-​żwieġ tagħna falla. Nafu li l-​Bibbja tippermetti d-​divorzju biss jekk issir iż-​żina, jiġifieri l-​immoralità sesswali. (Mt. 5:32) Għalhekk, meta jkollna l-​problemi fiż-​żwieġ tagħna, m’għandniex inkunu kburin u nibdew naħsbu: ‘Il-​mara jew ir-​raġel, veru jimpurtah minni? Qed ikolli l-​imħabba li jistħoqqli? Se nkun aħjar jekk inkun maʼ xi ħadd ieħor?ʼ Jekk naħsbu b’dan il-​mod inkunu qed naħsbu dwarna nfusna biss u mhux dwar il-​mara jew ir-​raġel tagħna. L-​għerf tad-​dinja jgħidlek biex timxi skont qalbek u tagħmel dak li jagħmlek kuntent, anki jekk ifisser li ż-​żwieġ jispiċċa. Alla jgħidlek li m’għandekx ‘tfittex l-​interessi persunali tiegħek biss, imma wkoll l-​interessi persunali tal-​oħrajn.’ (Flp. 2:4) Ġeħova jridek tibqaʼ miżżewweġ u mhux tiddivorzja. (Mt. 19:6) Hu jridek l-​ewwel taħseb fih u mhux fik innifsek.

5. Skont Efesin 5:33, raġel u mara miżżewġin kif għandhom jittrattaw lil xulxin?

⁵ Raġel u mara miżżewġin għandhom jittrattaw lil xulxin bi mħabba u rispett.  (Aqra Efesin 5:33.) Il-​Bibbja tgħallimna li hu iktar importanti li nagħtu milli nirċievu. (Atti 20:35) Liema kwalità se tgħin koppja miżżewġa biex juru l-​imħabba u r-​rispett? It-​tweġiba hi l-​umiltà. Ir-​raġel se jara x’inhu l-​aħjar għall-​mara u l-​mara se tara x’inhu l-​aħjar għar-​raġel.—1 Kor. 10:24.

6. X’titgħallem mill-​kummenti taʼ Steven u Stephanie?

⁶ L-​umiltà għenet lil ħafna koppji Kristjani biex ikunu iktar kuntenti fiż-​żwieġ tagħhom. Pereżempju, raġel miżżewweġ jismu Steven qal: “Ir-​raġel u l-​mara għandhom jaħdmu flimkien speċjalment meta jkun hemm il-​problemi. Minflok ma naħseb ‘x’inhu l-​aħjar għalija?ʼ jien naħseb ‘x’inhu l-​aħjar għalina?’” Il-​mara tiegħu Stephanie, tgħid hekk: “Ħadd ma jrid jgħix maʼ xi ħadd li l-​ħin kollu jargumenta miegħu. Meta jkollna xi argument, nipprovaw naraw xi tkun il-​problema. Imbagħad nitolbu, nipprovaw insibu prinċipji mill-​Bibbja li nistgħu napplikaw, u niddiskutu l-​problema flimkien. Nattakkaw il-​problema, mhux lil xulxin.” Irġiel u nisa miżżewġin se jkunu iktar ferħanin meta ma jaħsbux iżżejjed dwarhom infushom.

7. X’attitudni għandu jkollu ħu meta jirċievi xi inkarigu?

⁷ Huwa privileġġ għalina li naqdu lil Ġeħova b’kull mod li nistgħu. (Salm 27:4; 84:10) Hi xi ħaġa sabiħa li ħu jkun jixtieq jagħmel iktar fl-​organizzazzjoni taʼ Ġeħova. Fil-​fatt, il-​Bibbja tgħid: “Jekk raġel qed jirsisti għal kariga taʼ indokratur, ikun jixtieq xogħol tajjeb.” (1 Tim. 3:1) Però, meta jirċievi xi inkarigu ma jridx jaħseb li issa hu iktar importanti minn oħrajn. (Lq. 17:7-​10) Il-​mira tiegħu għandha tkun li b’umiltà jaqdi lil oħrajn.—2 Kor. 12:15.

8. X’nitgħallmu mill-​eżempju taʼ Dijotrefe, Użżija, u Absalom?

⁸ Il-​Bibbja titkellem dwar nies li ħasbu żżejjed dwarhom infushom. Dijotrefe ma kienx umli. Hu pprova “jkollu l-​pożizzjoni ewlenija” fil-​kongregazzjoni. (3 Ġw. 9) Użżija bi kburija pprova jagħmel xi ħaġa li Ġeħova ma qabdux jagħmilha. (2 Kron. 26:16-​21) Absalom ried ikun sultan, għalhekk beda jinħabb man-​nies biex huma jappoġġjawh. (2 Sam. 15:2-​6) Kif juru biċ-​ċar dawn ir-​rakkonti mill-​Bibbja, Ġeħova ma jiħux pjaċir b’nies li huma kburin. (Prov. 25:27) Fl-​aħħar mill-​aħħar, nies li huma kburin u jridu li oħrajn jammirawhom ikollhom il-​problemi.—Prov. 16:18.

9. Ġesù x’eżempju ħallielna?

⁹ Ġesù ma kienx bħal dawn in-​nies kburin. Il-​Bibbja tgħid li Ġesù, “għalkemm kien jeżisti fis-​sura t’Alla, ma qagħadx jaħseb li għandu jaħtaf, jiġifieri, li għandu jkun ugwali m’Alla.” (Flp. 2:6) Minkejja li Ġesù hu t-​tieni l-​iktar persuna b’saħħitha fl-​univers, ma jaħsibx li hu iktar importanti milli hu. Fil-​fatt, Ġesù qal lid-​dixxipli tiegħu: “Min iġib ruħu bħal wieħed mill-​iżgħar fostkom ilkoll, dan ikun il-​kbir.” (Lq. 9:48) X’barka li naħdmu flimkien mal-​pijunieri, qaddejja ministerjali, anzjani, u indokraturi li jżuru l-​kongregazzjonijiet li juru l-​umiltà bħal Ġesù. Jekk aħna umli se nuru iktar imħabba lejn oħrajn. U Ġesù qal li l-​qaddejja veri taʼ Alla se juru l-​imħabba bejniethom.—Ġw. 13:35.

10. X’għandek tagħmel jekk tħoss li l-​anzjani mhux qed jieħdu ħsieb il-​problemi tal-​kongregazzjoni sew?

¹⁰ X’għandek tagħmel jekk tara li hemm problemi fil-​kongregazzjoni u tħoss li  l-​anzjani mhux qed jieħdu ħsieb dawn il-​problemi sew? Minflok ma tgerger, int tistaʼ turi l-​umiltà billi tgħin lil dawk li jmexxu. (Ebr. 13:17) Biex tkun tistaʼ tagħmel dan, staqsi lilek innifsek: ‘Il-​problemi li qed nara huma verament serji li jridu jitranġaw? Huwa l-​waqt li jitranġaw? Hija r-​responsabbiltà tiegħi li nieħu l-​affarijiet f’idejja? Qiegħed jien nipprova nżomm il-​paċi fil-​kongregazzjoni, jew qed nipprova nidher?’

11. Skont Efesin 4:2, 3, il-​kongregazzjoni kif se tibbenefika jekk inkunu umli?

¹¹ Hu iktar importanti għal Ġeħova li nkunu umli u magħqudin, milli jkollna abbiltajiet u ntellgħu x-​xogħol. Għalhekk, agħmel l-​aħjar li tistaʼ biex taqdi lil Ġeħova b’umiltà. Meta tagħmel dan, inti tkun qed tgħin biex il-​kongregazzjoni tkun iżjed magħquda. (Aqra Efesin 4:2, 3.) B’liema modi tistaʼ turi l-​umiltà? Billi tipprietka kemm tistaʼ, tfittex modi kif tistaʼ tgħin lil oħrajn, tkun ospitabbli maʼ kulħadd anki maʼ aħwa li m’għandhomx responsabbiltajiet fil-​kongregazzjoni. (Mt. 6:1-​4; Lq. 14:12-​14) Hekk kif b’umiltà tagħmel kull tip taʼ xogħol fil-​kongregazzjoni, oħrajn se jinnotaw mhux biss l-​abbiltajiet tiegħek imma anki l-​umiltà tiegħek.

12. Il-​Bibbja x’tgħid dwar il-​ħbieb?

¹² Ġeħova jrid li aħna ngawdu l-​ħin li nqattgħu mal-​familja u l-​ħbieb. (Salm 133:1) Anki Ġesù kellu ħbieb tajbin. (Ġw. 15:15) Il-​Bibbja titkellem kif aħna nibbenefikaw meta jkollna ħbieb veri. (Prov. 17:17; 18:24) U tgħidilna li mhux tajjeb  li ninqatgħu għalina. (Prov. 18:1) Ħafna jħossu li permezz tas-​social media jistaʼ jkollhom ħafna ħbieb u b’hekk ma jħossuhomx waħedhom. Però, irridu noqogħdu attenti kif nużaw is-​social media.

13. Nies li jużaw is-​social media, għala jaf iħossuhom waħedhom u dipressi?

¹³ Minn studji li saru, sabu li nies li jqattgħu ħafna ħin jaraw il-​kummenti u r-​ritratti li oħrajn jitfgħu fuq is-​social media, jispiċċaw iħossuhom waħedhom u dipressi. Għala? Dan minħabba li n-​nies spiss jitfgħu ritratti tal-​isbaħ mumenti f’ħajjithom, u juru biss l-​aħjar ritratti tagħhom, taʼ sħabhom, u tal-​postijiet sbieħ li jmorru. Persuna li tara dawn ir-​ritratti, taf tibda taħseb li ħajjitha mhux interessanti jew li dejjem l-​istess. Oħt żagħżugħa li għandha 19-​il sena tammetti: “Kont ngħir meta kont nara lil oħrajn jieħdu ħafna pjaċir fil-​weekends u jien kont inkun id-​dar ma nagħmel xejn.”

14. L-​1 Pietru 3:8, kif jistaʼ jgħinna meta nużaw is-​social media?

¹⁴ Vera, nistgħu nużaw is-​social media b’mod tajjeb, pereżempju, biex inżommu kuntatt maʼ tal-​familja u l-​ħbieb. Imma, innotajt li ċertu wħud jitfgħu affarijiet fuq is-​social media biex jiġbdu l-​attenzjoni lejhom infushom? Il-​messaġġ li jridu jwasslu hu: “Ħares lejja.” Oħrajn anki jikkummentaw fuq ir-​ritratti tagħhom jew t’oħrajn b’mod offensiv jew bi kliem maħmuġ. Dan hu kuntrarju għal dak li l-​Kristjani huma inkuraġġiti jagħmlu, biex juru l-​umiltà u l-​imħabba.—Aqra l-​1 Pietru 3:8.

15. Il-​Bibbja kif tgħinna biex ma naħsbux li aħna importanti ħafna?

¹⁵ Jekk tuża s-​social media, staqsi lilek innifsek: ‘Jistgħu l-​kummenti, ir-​ritratti, jew il-​vidjows li nitfaʼ jagħtu l-​impressjoni li qed niftaħar? Nistaʼ nġiegħel lil oħrajn jgħiru?’ Il-​Bibbja tgħid: “Għax kulma hemm fid-​dinja—ix-​xewqa tal-​laħam u x-​xewqa taʼ l-​għajnejn u l-​iffanfrar bil-​mezzi tal-​ħajja—ma joriġinax mill-​Missier, imma mid-​dinja.” (1 Ġw. 2:16) Bħala Kristjani ma nħossux li aħna importanti jew li oħrajn għandhom jammirawna.  Għal kuntrarju napplikaw il-​parir tal-​Bibbja: “Ħa ma nintefħux bina nfusna, għax b’hekk inqanqlu l-​kompetizzjoni bejnietna, u ngħiru għal xulxin.” (Gal. 5:26) Jekk inkunu umli, m’aħniex se nsiru bħan-​nies tad-​dinja li jridu lil oħrajn jaħsbu li huma importanti ħafna.

16. Għala rridu nevitaw li nkunu kburin?

¹⁶ Irridu naħdmu iebes biex inkunu umli għax nies kburin m’għandhomx “moħħ f’loku,” jiġifieri m’għandhomx ħarsa bilanċjata tagħhom infushom. (Rum. 12:3) Xi ħadd kburi jħobb jargumenta u hu egoist. Kif jaħseb u jaġixxi, ħafna drabi jweġġaʼ lilu nnifsu u lil oħrajn. Sakemm ma jbiddilx l-​attitudni tiegħu, Satana se jinfluwenzah u jqarraq bih. (2 Kor. 4:4; 11:3) Mill-​banda l-​oħra, xi ħadd umli għandu “moħħ f’loku.” Għandu ħarsa bilanċjata u raġonevoli tiegħu nnifsu, għax jifhem li f’ħafna affarijiet oħrajn huma aħjar minnu. (Flp. 2:3) U jaf ukoll li “Alla jopponi lis-​suppervi, imma juri qalb tajba mhix mistħoqqa maʼ l-​umli.” (1 Pt. 5:5) Dawk li għandhom moħħ f’loku ma jridux li Ġeħova jkun kontrihom.

17. X’għandna nagħmlu biex nibqgħu umli?

¹⁷ Biex nibqgħu umli, irridu napplikaw il-​parir tal-​Bibbja biex ‘ninżgħu l-​personalità l-​qadima bid-​drawwiet tagħha, u nilbsu l-​personalità l-​ġdida.’ Dan jinvolvi sforz. Biex nagħmlu dan irridu nistudjaw l-​eżempju taʼ Ġesù u nipprovaw nimitawh kemm nistgħu. (Kol. 3:9, 10; 1 Pt. 2:21) Jekk nagħmlu dan, se jkun għall-​ġid tagħna. Għax meta nkunu umli, il-​familji tagħna se jkunu iktar ferħanin, il-​kongregazzjoni se tkun iktar magħquda, u mhux se nużaw is-​social media biex inħossuna aħjar minn ħaddieħor. Imma l-​iktar ħaġa importanti hi li se ngawdu l-​barka u l-​approvazzjoni taʼ Ġeħova.