Mistoqsijiet mill-Qarrejja
Ġesù meta sar il-Qassis il-Kbir?
L-evidenza turi li Ġesù sar il-Qassis il-Kbir meta tgħammed fis-sena 29. Dan kif nafuh? Fil-magħmudija tiegħu, Ġesù kien lest li jagħti ħajtu bħala sagrifiċċju fuq l-artal li jirrappreżenta “r-rieda” t’Alla. (Gal. 1:4; Ebr. 10:5-10) L-artal kien parti importanti mit-tempju. Ladarba dan l-artal simboliku beda jeżisti minn meta tgħammed Ġesù, it-tempju spiritwali l-kbir taʼ Ġeħova, milli jidher beda jeżisti minn dakinhar ukoll. It-tempju spiritwali l-kbir taʼ Ġeħova jirrappreżenta dak kollu li hemm bżonn biex inqimuh bl-aħjar mod fuq il-bażi tas-sagrifiċċju taʼ Ġesù.—Mt. 3:16, 17; Ebr. 5:4-6.
It-tempju spiritwali l-kbir kellu bżonn qassis il-kbir. Għalhekk, Ġeħova “bl-ispirtu qaddis u bil-qawwa” għażel lil Ġesù biex ikun il-qassis il-kbir. (Atti 10:37, 38; Mk. 1:9-11) Imma kif nistgħu nkunu ċerti li Ġesù ntgħażel bħala l-Qassis il-Kbir qabel ma miet u ġie rxoxtat? L-eżempju taʼ Aron u l-qassisin il-kbar li ġew warajh se jgħinna biex inwieġbu din il-mistoqsija.
Il-Liġi li Ġeħova ta lil Mosè qalet li l-qassis il-kbir biss setaʼ jidħol fl-Iktar Qaddis tat-tinda u, iktar tard, fl-Iktar Qaddis tat-tempju. L-Iktar Qaddis kien separat permezz taʼ purtiera mill-Qaddis. F’Jum it-Tpattija, il-qassis il-kbir kien jidħol fl-Iktar Qaddis. (Ebr. 9:1-3, 6, 7) Aron u l-qassisin il-kbar li ġew warajh kienu jkunu magħżulin minn Ġeħova qabel ma kienu jidħlu minn quddiem il-purtiera għal ġol-Iktar Qaddis. Bl-istess mod, Ġesù kellu jkun magħżul minn Ġeħova bħala l-Qassis il-Kbir qabel ma miet, u mbagħad daħal mill-“purtiera, jiġifieri, laħmu,” għall-ħajja fis-sema. (Ebr. 10:20) Minħabba dan, l-appostlu Pawlu qal li Ġesù ġie “bħala qassis il-kbir” u “għadda mit-tinda li hi akbar u iktar perfetta u mhux magħmula bl-idejn,” u “fis-sema stess.”—Ebr. 9:11, 24.
Hemm differenza bejn meta l-patt il-ġdid ġie validu u meta ġie inawgurat?
Le. Għala? Għax meta Ġesù telaʼ s-sema u offra għalina l-ħajja perfetta tiegħu, hu għamel l-ewwel pass mit-tlieta li kien se jagħmel il-patt il-ġdid validu, jew jiswa legalment. Dawn l-istess passi inawguraw il-patt il-ġdid, jiġifieri l-patt il-ġdid beda jaħdem. Dawn il-passi x’kienu?
L-ewwel, Ġesù deher quddiem Ġeħova. It-tieni, Ġesù ppreżenta l-valur tas-sagrifiċċju tiegħu lil Ġeħova fis-sema. U t-tielet, Ġeħova aċċetta l-valur tad-demm imxerred taʼ Ġesù. Qabel ma ttieħdu dawn il-passi, il-patt il-ġdid ma bediex jaħdem.
Il-Bibbja ma tgħidilniex eżatt meta Ġeħova aċċetta l-valur tas-sagrifiċċju taʼ Ġesù. Allura, ma nistgħux ngħidu eżatt meta l-patt il-ġdid ġie validu u meta ġie inawgurat. Imma, aħna nafu li Ġesù telaʼ s-sema għaxart ijiem qabel Pentekoste tas-sena 33. (Atti 1:3) Matul dawk l-għaxart ijiem, hu ppreżenta l-valur tas-sagrifiċċju tiegħu, u Ġeħova aċċettah. (Ebr. 9:12) Dak li ġara fʼPentekoste wera ċar li l-patt il-ġdid beda jaħdem. (Atti 2:1-4, 32, 33) Dakinhar, deher ċar li l-patt il-ġdid ġie inawgurat.
Fil-qosor, il-patt il-ġdid kien ġie validu u inawgurat wara li Ġeħova aċċetta l-valur tad-demm imxerred taʼ Ġesù u daħħal lill-midlukin fʼdan il-patt. Imbagħad, il-patt il-ġdid beda jaħdem permezz tal-Qassis il-Kbir, Ġesù, bħala l-Medjatur.—Ebr. 7:25; 8:1-3, 6; 9:13-15.