ARTIKLU GĦALL-ISTUDJU 14
Anzjani—Komplu Imitaw lill-Appostlu Pawlu
“Imitaw lili.”—1 KOR. 11:1.
GĦANJA 99 Mirjadi t’aħwa
ĦARSA BIL-QUDDIEM *
1-2. L-eżempju tal-appostlu Pawlu kif jistaʼ jgħin lill-anzjani llum?
L-APPOSTLU PAWLU kien iħobbhom lill-aħwa u ħadem iebes biex jieħu ħsiebhom. (Atti 20:31) Huwa għalhekk li l-aħwa kienu jħobbuh ħafna lil Pawlu. Darba waħda, meta l-anzjani t’Efesu saru jafu li ma kinux se jarawh iktar, “infexxew jibku.” (Atti 20:37) L-anzjani żelużi wkoll iħobbuhom ħafna lill-aħwa u jagħmlu dak kollu li jistgħu biex jgħinuhom. (Flp. 2:16, 17) Imma xi kultant, isibuha diffiċli biex ilaħħqu maʼ kollox. X’jistaʼ jgħinhom?
2 L-eżempju taʼ Pawlu jistaʼ jkun t’għajnuna kbira għall-anzjani. (1 Kor. 11:1) Hu ma kellux xi qawwa speċjali. Kien raġel imperfett li kultant ukoll sabha diffiċli biex jagħmel dak li hu tajjeb. (Rum. 7:18-20) Pawlu ffaċċja problemi kbar ukoll imma ma qatax qalbu jew tilef il-ferħ. Meta l-anzjani jimitaw l-eżempju tiegħu jkunu jistgħu jibqgħu jaqdu lil Ġeħova bil-ferħ anki meta jkun diffiċli. Ejja naraw kif.
3. X’se nikkunsidraw f’dan l-artiklu, u x’se nitgħallmu iktar?
3 F’dan l-artiklu se nikkunsidraw erbaʼ sfidi li jiffaċċjaw l-anzjani: (1) biex isibu l-ħin għall-ippritkar u responsabbiltajiet oħrajn, (2) biex isibu l-ħin ħalli jinkuraġġixxu lill-aħwa, (3) biex ma jħossuhomx skuraġġiti minħabba l-imperfezzjonijiet tagħhom stess, u (4) biex jaħdmu m’oħrajn li huma imperfetti wkoll. Se naraw ukoll x’għen lil Pawlu u kif l-anzjani jistgħu jimitaw l-eżempju tiegħu.
L-ISFIDA BIEX ISIBU L-ĦIN GĦALL-IPPRITKAR U RESPONSABBILTAJIET OĦRAJN
4. Xi kultant għala tkun taʼ sfida biex l-anzjani jkunu minn taʼ quddiem fix-xogħol tal-ippritkar?
4 Għala tistaʼ tkun taʼ sfida? Minbarra li jridu jkunu minn taʼ quddiem fix-xogħol tal-ippritkar, l-anzjani għandhom ħafna responsabbiltajiet oħrajn. Pereżempju, ikunu ċ-chairman matul il-laqgħat taʼ fost il-ġimgħa jew jikkonduċu l-Istudju tal-Bibbja tal-Kongregazzjoni. Jistaʼ jkun ukoll li jkollhom taħditiet oħrajn. Barra minn hekk, huma jittrennjaw lill-qaddejja ministerjali u minn qalbhom jagħmlu dak kollu li jistgħu biex jinkuraġġixxu lill-aħwa. (1 Pt. 5:2) Xi anzjani jaħdmu fil-bini jew il-manutenzjoni taʼ Swali tas-Saltna u bini ieħor li fih nagħtu qima lil Ġeħova. Però, bħal kull pubblikatur ieħor, l-iktar xogħol importanti li jagħmlu l-anzjani hu l-ippritkar.—Mt. 28:19, 20.
5. L-appostlu Pawlu x’eżempju ħalla fejn jidħol l-ippritkar?
5 L-anzjani x’jitgħallmu minn Pawlu? F’Filippin 1:10, Pawlu jgħidilna għala kellu suċċess fix-xogħol tal-ippritkar. Hemmhekk hu qal: ‘Aċċertaw ruħkom minn dak li hu iktar importanti.’ Pawlu applika dan il-parir. Hu kien ingħata inkarigu biex jipprietka, u għal ħafna snin dan ix-xogħol kien l-iktar ħaġa importanti f’ħajtu. Hu pprietka “pubblikament u minn dar għal dar.” (Atti 20:20) Hu mhux sempliċiment kien iwarrab ftit ħin fil-ġurnata biex jipprietka jew forsi ġurnata fil-ġimgħa, imma kien jieħu kull opportunità li kellu. Pereżempju, waqt li kien qed jistenna lil sħabu f’Ateni, hu pprietka lil grupp taʼ nies, u wħud minnhom bdew jemmnu. (Atti 17:16, 17, 34) Anki meta kien arrestat f’daru, Pawlu pprietka lil dawk li ltaqaʼ magħhom.—Flp. 1:13, 14; Atti 28:16-24.
6. Pawlu kif għen lil oħrajn?
6 Pawlu uża l-ħin tiegħu bl-aħjar mod. Spiss hu kien jistieden lil oħrajn imorru jippritkaw miegħu. Pereżempju, fl-ewwel vjaġġ missjunarju tiegħu ħa lil Marku u fit-tieni wieħed ħa lil Timotju. (Atti 12:25; 16:1-4) Bla dubju Pawlu għamel l-almu tiegħu biex jgħallem lil dawn l-irġiel kif jorganizzaw kongregazzjoni, jinkuraġġixxu lill-aħwa, u jsiru għalliema effettivi.—1 Kor. 4:17.
Imita lil Pawlu billi tieħu kull opportunità biex tagħti xhieda (Ara paragrafu 7) *
7. L-anzjani kif jistgħu jagħmlu dak li qal Pawlu f’Efesin 6:14, 15?
7 Il-lezzjoni. L-anzjani jistgħu jimitaw lil Pawlu billi mhux biss jippritkaw minn dar għal dar, imma wkoll billi jieħdu kull opportunità li jkollhom. (Aqra Efesin 6:14, 15.) Pereżempju, huma jistgħu jagħtu xhieda meta jkunu qed jagħmlu xi qadi jew fuq il-post tax-xogħol. Jew meta jkunu qed jgħinu biex tinbena Sala tas-Saltna, jistgħu jippritkaw lin-nies li joqogħdu fil-viċin jew lil dawk li jixtru l-affarijiet mingħandhom. Bħal Pawlu, l-anzjani jistgħu jużaw il-ħin li jqattgħu fil-ministeru biex jittrennjaw lil oħrajn, inkluż il-qaddejja ministerjali.
8. Xi kultant, anzjan xi jkollu bżonn jagħmel?
8 L-anzjani qatt m’għandu jkollhom tant x’jagħmlu fil-kongregazzjoni jew fis-circuit li mbagħad ma jibqgħalhomx ħin għax-xogħol tal-ippritkar. Għalhekk, biex ilaħħqu mal-affarijiet li diġà jridu jagħmlu, xi kultant ikollhom bżonn li ma jaċċettawx iktar inkarigi. Dan jagħmluh wara li jaħsbu sew u jitolbu lil Ġeħova dwar l-inkarigu ħalli jaraw hux se jkollhom biżżejjed ħin biex jagħmlu l-iktar affarijiet importanti. Fosthom hemm il-qima bħala familja kull ġimgħa, li jkunu żelużi fix-xogħol tal-ippritkar, u li jgħinu lit-tfal tagħhom jitgħallmu jippritkaw. Xi wħud isibuha diffiċli biex ma jaċċettawx privileġġ, imma jistgħu jkunu ċerti li Ġeħova jifhem li huma jixtiequ jagħmlu r-responsabbiltajiet li għandhom bl-aħjar mod.
L-ISFIDA BIEX ISIBU L-ĦIN ĦALLI JINKURAĠĠIXXU LILL-AĦWA
9. L-anzjani, li għandhom ħafna x’jagħmlu, liema sfida jiffaċċjaw?
9 Għala tistaʼ tkun taʼ sfida? Il-qaddejja taʼ Ġeħova għandhom ħafna problemi. Matul dawn l-aħħar jiem, ilkoll kemm aħna għandna bżonn ninkuraġġixxu lil xulxin, ngħinu lil xulxin, u nkunu hemm għal xulxin. U xi kultant, xi wħud ikollhom bżonn l-għajnuna biex jevitaw periklu li jistaʼ jagħmel il-ħsara lill-ħbiberija tagħhom maʼ Ġeħova. (1 Tess. 5:14) Bla dubju, l-anzjani ma jistgħux ineħħu l-problemi kollha li l-qaddejja taʼ Ġeħova qed jiffaċċjaw. Però, Ġeħova jrid li l-anzjani jagħmlu dak kollu li jistgħu biex jinkuraġġixxu u jipproteġu lill-poplu tiegħu. L-anzjani, li diġà għandhom ħafna x’jagħmlu, kif jistgħu jsibu l-ħin biex jagħmlu dan?
Faħħar lil oħrajn u għinhom isaħħu l-fidi tagħhom (Ara paragrafi 10, 12) *
10. Fi qbil mal-1 Tessalonikin 2:7, Pawlu x’għamel biex jieħu ħsieb lill-aħwa?
10 L-anzjani x’jitgħallmu minn Pawlu? Pawlu kien iħobb ifaħħar u jinkuraġġixxi lil oħrajn. Kemm hu importanti li l-anzjani jimitaw l-eżempju tiegħu u juru mħabba u qalb tajba mal-aħwa. (Aqra l-1 Tessalonikin 2:7.) Pawlu fakkar lil ħutu li Ġeħova u anki hu kienu jħobbuhom. (2 Kor. 2:4; Efes. 2:4, 5) Hu ttratta lil dawk fil-kongregazzjoni bħala l-ħbieb tiegħu billi qattaʼ l-ħin magħhom. Pawlu wera li kien jafdahom billi kien onest magħhom u qalilhom dwar l-imperfezzjonijiet tiegħu u dak li kien jinkwetah. (2 Kor. 7:5; 1 Tim. 1:15) Però, hu ma ffokax fuq il-problemi tiegħu. Minflok, ra kif setaʼ jgħin lil ħutu.
11. Pawlu għala ta l-pariri lill-aħwa?
11 Xi kultant, Pawlu kellu bżonn jagħti parir lill-aħwa imma qatt m’għamel dan għax kien irrabjat. Hu ta l-pariri għax kien jimpurtah minnhom u ried jipproteġihom mill-perikli. Pawlu pprova jagħti l-pariri b’mod faċli biex l-aħwa jifhmuhom u japplikawhom. F’waħda mill-ittri li kiteb lill-Korintin, Pawlu tahom parir sod. Imma wara li kiteb l-ittra, hu bagħat lil Titu għandhom. Pawlu ried ikun jaf kif ħassewhom wara li semgħu l-ittra. Hu kien ferħan ħafna meta sar jaf li aċċettaw il-parir tiegħu u applikawh!—2 Kor. 7:6, 7.
12. L-anzjani kif jistgħu jinkuraġġixxu lill-aħwa?
12 Il-lezzjoni. L-anzjani jistgħu jimitaw l-eżempju taʼ Pawlu billi jqattgħu l-ħin mal-aħwa. Mod wieħed kif jistgħu jagħmlu dan hu billi jattendu għal-laqgħa kmieni biex ikunu jistgħu jitkellmu mal-aħwa. Xi kultant, kulma jkun hemm bżonn ftit minuti biex ħu jew oħt tirċievi l-inkuraġġiment li jkollha bżonn. (Rum. 1:12; Efes. 5:16) Ukoll, anzjan li jsegwi l-eżempju taʼ Pawlu se juża l-Bibbja biex isaħħaħ il-fidi tal-aħwa u jassigurahom li Alla jħobbhom. Barra minn hekk, hu għandu jagħmel ċert li l-aħwa jħossuhom maħbubin minnu. Hu jitkellem magħhom b’mod regulari u jfittex opportunitajiet biex ifaħħarhom. Meta anzjan ikollu bżonn jagħti parir, għandu joqgħod attent li l-parir ikun fi qbil mal-Kelma t’Alla. Hu jitkellem b’mod ċar, imma juri qalb tajba għax irid li l-ħu jew l-oħt tapplika l-parir.—Gal. 6:1.
L-ISFIDA MINĦABBA L-IMPERFEZZJONIJIET TAGĦHOM STESS
13. Anzjan kif jistaʼ jħossu minħabba l-imperfezzjonijiet tiegħu?
13 Għala tistaʼ tkun taʼ sfida? L-anzjani mhumiex perfetti. Bħal kulħadd, huma jiżbaljaw. (Rum. 3:23) Kultant ma jkunx faċli biex ikollhom ħarsa bbilanċjata lejn in-nuqqasijiet tagħhom. Ġieli tant jinkwetaw dwar l-imperfezzjonijiet tagħhom li jispiċċaw skuraġġiti. Oħrajn forsi jaħsbu li l-imperfezzjonijiet tagħhom mhux importanti u għalhekk m’għandhomx għalfejn jagħmlu bidliet.
14. Skont Filippin 4:13, l-umiltà kif għenet lil Pawlu biex ikollu l-attitudni t-tajba dwar l-imperfezzjonijiet tiegħu?
14 L-anzjani x’jitgħallmu minn Pawlu? Minħabba li Pawlu kien umli, hu kien jaf li ma setax ikampa man-nuqqasijiet tiegħu waħdu. Pawlu kellu bżonn l-għajnuna t’Alla. Qabel, hu kien jippersegwita bl-aħrax lill-Kristjani. Imma mbagħad, fehem li dak li kien qed jagħmel kien ħażin, u kien lest li jbiddel l-attitudni u l-personalità tiegħu. (1 Tim. 1:12-16) Bl-għajnuna taʼ Ġeħova, Pawlu sar anzjan li jaf iħobb, umli, u juri l-ħniena. Hu ma baqax jaħseb fuq l-imperfezzjonijiet tiegħu, minflok emmen li Ġeħova ħafirlu. (Rum. 7:21-25) Hu ma stenniex li jkun perfett. Għalhekk, ħadem biex itejjeb il-personalità Kristjana tiegħu u straħ fuq Ġeħova biex jgħinu jwettaq ix-xogħol tiegħu.—1 Kor. 9:27; aqra Filippin 4:13.
Aħdem iebes biex tegħleb l-imperfezzjonijiet tiegħek (Ara paragrafi 14-15) *
15. Anzjan kif jistaʼ jkollu l-attitudni t-tajba dwar l-imperfezzjonijiet tiegħu?
15 Il-lezzjoni. Ħu ma jibdiex jaqdi bħala anzjan għax hu perfett. Però, Ġeħova jistenna li hu jammetti l-iżbalji tiegħu u jtejjeb il-personalità Kristjana tiegħu. (Efes. 4:23, 24) Anzjan għandu juża l-istudju tal-Bibbja personali biex jgħinu jara fejn għandu bżonn jirranġa u jagħmel il-bidliet li jkun hemm bżonn. Imbagħad Ġeħova se jgħinu biex ikun kuntent u anzjan tajjeb.—Ġak. 1:25.
L-ISFIDA META JAĦDMU M’OĦRAJN LI HUMA IMPERFETTI WKOLL
16. X’jistaʼ jiġri jekk anzjan jiffoka fuq l-imperfezzjonijiet t’oħrajn?
16 Għala tistaʼ tkun taʼ sfida? Meta l-anzjani jqattgħu ħafna ħin mal-aħwa fil-kongregazzjoni, se jkun iktar faċli għalihom biex jaraw l-imperfezzjonijiet tagħhom. Però, jekk ma joqogħdux attenti, l-anzjani jistgħu jibdew jirritaw ruħhom, jistennew ħafna mingħand l-aħwa, jew ikollhom ħarsa negattiva lejhom. Pawlu qal lill-Kristjani li Satana hekk jixtieqhom jagħmlu, allura hu wissiehom biex joqogħdu attenti.—2 Kor. 2:10, 11.
17. Pawlu kif kien jaħsibha dwar l-aħwa?
17 L-anzjani x’jitgħallmu minn Pawlu? Hu kien jiffoka fuq it-tajjeb tal-aħwa. Hu kien jaf bl-iżbalji tagħhom għax xi kultant kienu jweġġgħuh b’dak li jagħmlu. Imma Pawlu kien jaf li meta persuna tagħmel żball ma jfissirx li hija persuna ħażina. Hu kien iħobb lill-aħwa u kien jiffoka fuq il-kwalitajiet tajbin tagħhom. Meta l-aħwa kienu jsibuha diffiċli biex jagħmlu dak li hu tajjeb, hu dejjem kien iżomm f’moħħu li huma jixtiequ jagħmlu t-tajjeb, imma għandhom bżonn l-għajnuna.
18. X’titgħallem minn dak li għamel Pawlu dwar is-sitwazzjoni taʼ Evodja u Sintike? (Filippin 4:1-3)
18 Aħseb ftit kif Pawlu għen lil żewġ aħwa nisa fil-kongregazzjoni f’Filippi. (Aqra Filippin 4:1-3.) Milli jidher, Evodja u Sintike kellhom nuqqas taʼ qbil bejniethom u ma baqgħux ħbieb. Pawlu ma kienx aħrax magħhom u ma kkritikahomx. Minflok, hu ffoka fuq il-kwalitajiet tajbin tagħhom. Dawn l-aħwa nisa leali kienu ilhom jaqdu lil Ġeħova għal ħafna żmien. Pawlu kien jaf li Ġeħova jħobbhom. Minħabba li żamm ħarsa pożittiva lejn dawn l-aħwa, hu inkuraġġiehom biex jagħmlu paċi bejniethom. U peress li dejjem iffoka fuq it-tajjeb tal-aħwa, hu setaʼ jibqaʼ kuntent u jżomm ħbiberija b’saħħitha maʼ dawk fil-kongregazzjoni.
Żomm ħarsa pożittiva lejn l-aħwa (Ara paragrafu 19) *
19. (a) L-anzjani kif jistgħu jżommu ħarsa pożittiva lejn l-aħwa? (b) X’tistaʼ titgħallem mill-istampa li fiha hemm l-anzjan qed inaddaf is-Sala tas-Saltna?
19 Il-lezzjoni. Anzjani, fittxu l-kwalitajiet tajbin li għandhom l-aħwa. Minkejja li huma kollha imperfetti, kollha għandhom kwalitajiet sbieħ. (Flp. 2:3) Veru, kultant l-anzjani jkollhom bżonn jagħtu xi parir lil ħu jew oħt. Imma bħal Pawlu, l-anzjani għandhom jaħdmu iebes biex ma jiffokawx fuq il-kliem negattiv u l-mod kif taġixxi l-persuna. Minflok, għandhom jiffokaw fuq l-imħabba li l-persuna għandha għal Ġeħova, il-lealtà li wriet minkejja l-isfidi, u dak li tistaʼ tagħmel għal Ġeħova fil-futur. Anzjani li jiffokaw fuq il-kwalitajiet tajbin tal-aħwa jkunu qed jgħinuhom biex iħossuhom maħbubin fil-kongregazzjoni.
KOMPLU IMITAW LIL PAWLU
20. L-anzjani kif jistgħu jkomplu jibbenefikaw mill-eżempju taʼ Pawlu?
20 Anzjani, jekk tkomplu tistudjaw l-eżempju taʼ Pawlu se jkun t’għajnuna għalikom. Pereżempju, tistgħu taraw ir-referenzi fil-ktieb Nagħtu Xhieda u fʼIt-Torri tal-Għassa li jidhru fl-aħħar tal-paragrafu. Hekk kif taqraw dawn ir-referenzi, staqsu lilkom infuskom, ‘L-eżempju taʼ Pawlu kif jistaʼ jgħinni nibqaʼ nagħmel l-inkarigu tiegħi bħala anzjan bil-ferħ?’—bt 99 para. 17-19; bt 166-167 para. 6, 7; w97 8/1 29-30 para. 14-16; w86-E 9/15 12-13 para. 13-16; w86-E 10/1 10 para. 2.
21. L-anzjani minn xiex jistgħu jkunu ċerti?
21 Anzjani, ftakru li Ġeħova mhux qed jistenna li tkunu perfetti imma li tkunu leali. (1 Kor. 4:2) Bħalma Ġeħova kien kuntent bil-lealtà u x-xogħol iebes taʼ Pawlu, tistgħu tkunu ċerti li Ġeħova japprezza x-xogħol li tagħmlu għalih. Ġeħova qatt mhu se “jinsa għemilkom u l-imħabba li wrejtu għal ismu, peress li qdejtu lill-qaddisin u għadkom taqduhom.”—Ebr. 6:10.
GĦANJA 87 Ejjew! Sibu serħan
^ par. 5 Kemm napprezzaw ix-xogħol iebes li jagħmlu l-anzjani biex jgħinuna! F’dan l-artiklu se naraw erbaʼ affarijiet li għall-anzjani ġieli jkunu taʼ sfida biex jagħmluhom. Se naraw ukoll kif l-eżempju tal-appostlu Pawlu jistaʼ jgħin lill-anzjani llum biex jirnexxilhom jagħmlu dawn l-affarijiet. Dan l-artiklu se jgħin lil kull wieħed u waħda minna biex nifhmu lill-anzjani, nuru li nħobbuhom, u nagħmlu x-xogħol tagħhom iktar faċli.
^ par. 61 X’TGĦIDILNA L-ISTAMPA: Ħu li lest mix-xogħol qed jaqsam l-aħbar tajba maʼ raġel li jaħdem miegħu.
^ par. 63 X’TGĦIDILNA L-ISTAMPA: Anzjan b’qalb tajba qed jinkuraġġixxi lil ħu li spiss jinqataʼ għalih waħdu.
^ par. 65 X’TGĦIDILNA L-ISTAMPA: Ħu qed jagħti parir lil ħu ieħor li hu diżappuntat minħabba li ġrat xi ħaġa.
^ par. 67 X’TGĦIDILNA L-ISTAMPA: Anzjan mhux qed igerger mal-ħu minħabba li mhux qed jagħmel ix-xogħol li offra biex jagħmel.