1. Kif kienet ħajtek qabel bdejt tistudja l-​Bibbja?

 KIF kienet ħajtek qabel bdejt tistudja l-​Bibbja max-​Xhieda taʼ Ġeħova? Ħafna minna lanqas nixtiequ naħsbu dwarha. X’aktarx l-​attitudni u l-​personalità tagħna kienu influwenzati mill-​mod kif id-​dinja tqis dak li hu tajjeb u dak li hu ħażin. Jekk dan kien il-​każ, aħna ‘ma kellniex tama u konna mingħajr Alla fid-​dinja.’ (Efes. 2:12) Imma wara li bdejna nistudjaw il-​Bibbja, ħajjitna nbidlet.

2. X’ġara wara li bdejt tistudja l-​Bibbja?

² Wara li bdejt tistudja l-​Bibbja, inti sirt taf li Missierek tas-​sema jħobbok ħafna. Irrealizzajt li biex togħġob lil Ġeħova u ssir parti mill-​familja kbira tiegħu, kellek tagħmel bidliet kbar f’ħajtek, fl-​attitudni, u fil-​mod kif taħsibha. Kellek titgħallem ukoll tagħmel dak li Ġeħova jgħid li hu tajjeb u tevita dak li Ġeħova jgħid li hu ħażin.—Efes. 5:3-​5.

3. Skont Kolossin 3:9, 10, Ġeħova xi jridna nagħmlu, u x’se niddiskutu f’dan l-​artiklu?

³ Ġeħova hu l-​Ħallieq tagħna u Missierna tas-​sema. Għalhekk, hu għandu dritt jgħid lil dawk li jagħmlu parti mill-​familja tiegħu kif għandhom jgħixu ħajjithom. Qabel nitgħammdu, hu jridna nagħmlu sforz biex ‘ninżgħu l-​personalità l-​qadima bid-​drawwiet tagħha.’ * (Aqra Kolossin 3:9, 10.) Dan l-​artiklu se jgħin lil dawk li jridu jitgħammdu biex iwieġbu dawn it-​tliet mistoqsijiet: (1) X’inhi “l-​personalità l-​qadima”? (2) Għala Ġeħova  jridna ninżgħuha? (3) Kif nistgħu nagħmlu dan? Ukoll, se jgħin lill-​aħwa mgħammdin biex ma jerġgħux jilbsu l-​personalità l-​qadima.

4. Meta xi ħadd ikun ikkontrollat mill-​“personalità l-​qadima” tiegħu, x’jagħmel?

⁴ Meta xi ħadd ikun ikkontrollat mill-​“personalità l-​qadima,” spiss jaħseb u jaġixxi skont ix-​xewqat ħżiena tiegħu. Hu jaf ikun egoist, taqbiżlu malajr, kburi, u ma japprezzax. Forsi jieħu pjaċir jara l-​pornografija u films immorali u vjolenti. Bla dubju, hu jkollu xi kwalitajiet tajbin u forsi jħoss il-​kuxjenza tiegħu tniggżu minħabba l-​affarijiet ħżiena li jgħid jew jagħmel. Imma x-​xewqa tiegħu mhix b’saħħitha biżżejjed biex jagħmel il-​bidla fil-​mod kif jaħseb u jaġixxi.—Gal. 5:19-​21; 2 Tim. 3:2-​5.

5. Nistgħu ninżgħu l-​personalità l-​qadima għalkollox? Spjega. (Atti 3:19)

⁵ Aħna imperfetti, għalhekk ħadd minna ma jistaʼ jneħħi l-​ħsibijiet u x-​xewqat ħżiena li għandu f’qalbu u f’moħħu għalkollox. Xi kultant, se ngħidu jew nagħmlu xi ħaġa li wara jiddispjaċina. (Ġer. 17:9; Ġak. 3:2) Imma meta ninżgħu l-​personalità l-​qadima tagħna, mhux se nibqgħu kkontrollati mix-​xewqat u l-​affarijiet ħżiena li konna nagħmlu. Aħna se nsiru persuna aħjar.—Is. 55:7; aqra Atti 3:19.

6. Ġeħova għala jridna nneħħu l-​ħsibijiet ħżiena u l-​vizzji ħżiena tal-​personalità l-​qadima?

⁶ Ġeħova jridna nneħħu l-​ħsibijiet ħżiena u naqtgħu l-​vizzji ħżiena għax iħobbna ħafna u jixtieq li ngawdu l-​ħajja. (Is. 48:17, 18) Hu jaf li dawk li jċedu għax-​xewqat ħżiena jweġġgħu lilhom infushom u lil dawk taʼ madwarhom. Anki Ġeħova jweġġaʼ meta jarana nweġġgħu lilna nfusna u lil oħrajn.

7. Skont Rumani 12:1, 2, x’għażliet għandna?

⁷ Xi wħud minn tal-​familja jew il-​ħbieb tagħna xi kultant jistgħu jwaqqgħuna għaċ-​ċajt minħabba li aħna nipprovaw nagħmlu bidliet fil-​personalità tagħna. (1 Pt. 4:3, 4) Forsi jgħidulna li aħna għandna dritt li nagħmlu dak li rridu aħna u  m’għandniex inħallu lil oħrajn jgħidulna x’għandna nagħmlu. Imma dawk li ma jagħmlux dak li jixtieq Ġeħova mhux vera jkunu qed jagħmlu dak li jridu huma. Fir-​realtà, huma jkunu qed iħallu d-​dinja taʼ Satana tinfluwenzahom. (Aqra Rumani 12:1, 2.) Ilkoll kemm aħna rridu niddeċiedu x’ħa nagħmlu. Jew se nżommu l-​personalità l-​qadima tagħna li hi effettwata mid-​dnub u d-​dinja taʼ Satana, jew inħallu lil Ġeħova jibdilna fl-​aħjar persuna li nistgħu nkunu bħalissa.—Is. 64:8.

8. X’se jgħinna nevitaw ħsibijiet ħżiena u vizzji ħżiena?

⁸ Ġeħova jaf li jieħu ż-​żmien u li rridu nagħmlu sforz biex nevitaw ħsibijiet ħżiena u naqtgħu vizzji ħżiena. (Salm 103:13, 14) Però, permezz tal-​Kelma tiegħu, l-​ispirtu qaddis, u l-​organizzazzjoni tiegħu, Ġeħova jgħallimna x’għandna nagħmlu, jagħtina s-​saħħa, u l-​għajnuna li għandna bżonn biex ninbidlu. Bla dubju hu diġà għenek. Issa ejja nikkunsidraw xi affarijiet li inti tistaʼ tagħmel biex tkompli tinżaʼ l-​personalità l-​qadima u tikkwalifika għall-​magħmudija.

9. Il-​Bibbja x’tistaʼ tgħinek tagħmel?

⁹ Uża l-​Bibbja biex teżamina lilek innifsek sew. Il-​Kelma t’Alla hi bħal mera. Din tistaʼ tgħinek tara l-​mod kif inti taħseb, titkellem, u taġixxi. (Ġak. 1:22-​25) Il-​ħu jew l-​oħt li tistudja l-​Bibbja miegħek jew aħwa maturi oħrajn jistgħu jagħtuk parir. Pereżempju, huma jistgħu jużaw l-​Iskrittura biex jgħinuk tara fejn int sod u fejn int dgħajjef. Jistgħu jgħallmuk issib informazzjoni bbażata fuq il-​Bibbja li toffri pariri tajbin biex jgħinuk tegħleb vizzji ħżiena. U Ġeħova dejjem lest li jgħinek. Hu l-​aqwa persuna li tistaʼ tgħinek għax jaf x’għandek f’qalbek. (Prov. 14:10; 15:11) Għalhekk ħudha drawwa li titlob lilu u tistudja l-​Bibbja kuljum.

10. X’tgħallimt mill-​esperjenza taʼ Elie?

¹⁰ Kun konvint li l-​livelli taʼ Ġeħova huma l-​aħjar. Dak kollu li Ġeħova jgħidilna nagħmlu hu għall-​ġid tagħna. Dawk li jgħixu ħajjithom fi qbil mal-​livelli tiegħu se jibbenefikaw, se jkollhom skop f’ħajjithom, u ferħ veru. (Salm 19:7-​11) Mill-​banda l-​oħra, dawk li jinjoraw il-​livelli taʼ Ġeħova jbatu l-​konsegwenzi minħabba li jċedu għax-​xewqat ħżiena tagħhom. Innota x’jgħid raġel jismu Elie li ma riedx jibqaʼ jobdi l-​livelli taʼ Ġeħova. Hu trabba bħala Xhud taʼ Ġeħova. Imma meta kien qed jikber, hu għażel kumpanija ħażina. Beda jieħu d-​droga, jgħix ħajja immorali, u jisraq. Elie jgħid li beda jirrabja għal kull ħaġa taʼ xejn u sar vjolenti. Hu jammetti: “Bażikament, għamilt dak kollu li ġejt mgħallem biex ma nagħmilx bħala Kristjan.” Imma Elie ma nesiex dak li tgħallem meta kien żgħir. Maż-​żmien, reġaʼ beda jistudja l-​Bibbja. Elie ħadem iebes biex jegħleb il-​vizzji ħżiena li kellu u tgħammed fis-​sena 2000. Il-​fatt li reġaʼ beda jgħix skont il-​livelli taʼ Ġeħova, kif għenu? Hu jgħid: “Issa għandi l-​paċi tal-​moħħ u kuxjenza nadifa.” * L-​eżempju taʼ Elie jurina li dawk li ma jobdux il-​livelli taʼ Ġeħova jweġġgħu lilhom infushom. Minkejja dan, Ġeħova huwa lest li jgħinhom jinbidlu.

11. Ġeħova liema affarijiet jobgħod?

 ¹¹ Tgħallem obgħod dak li jobgħod Ġeħova. (Salm 97:10) Il-​Bibbja tgħid li Ġeħova jobgħod “għajnejn imkabbrin, ilsien falz, u idejn li qed ixerrdu demm innoċenti.” (Prov. 6:16, 17) Ukoll, hu jobgħod nies vjolenti u li jqarrqu. (Salm 5:6) Ġeħova tant jobgħod dawn l-​affarijiet li fi żmien Noè hu qered lil dawk kollha li kienu ħżiena minħabba li mlew l-​art bil-​vjolenza. (Ġen. 6:13) Ejja naraw eżempju ieħor. Permezz tal-​profeta Malakija, Ġeħova qal li Hu jobgħod lil dawk li ma jibqgħux leali u jiddivorzjaw lir-​raġel jew il-​mara tagħhom għal xejn b’xejn. Alla ma jaċċettax il-​qima tagħhom u se jżommhom responsabbli għal dak li għamlu.—Mal. 2:13-​16; Ebr. 13:4.

12. Xi jfisser li ‘nistmerru dak li hu ħażin’?

¹² Ġeħova jridna ‘nistmerru dak li hu ħażin.’ (Rum. 12:9) Il-​kelma “stmerr” tiddeskrivi sentiment b’saħħtu. Dan ifisser li vera tkun tobgħod xi ħaġa, tant li tqallgħak. Immaġina kif tħossok kieku jgħidulek tiekol ikel immoffat. Il-​ħsieb biss ukoll iqallgħek. Bl-​istess mod, il-​ħsieb li nagħmlu xi ħaġa li jobgħod Ġeħova għandu jqallagħna.

13. Għala għandna nneħħu ħsibijiet ħżiena?

¹³ Neħħi ħsibijiet ħżiena. Dak li naħsbu jeffettwa dak li nagħmlu. Hu għalhekk li Ġesù għallimna biex inneħħu ħsibijiet li jistgħu jwassluna biex nagħmlu dnubiet serji. (Mt. 5:21, 22, 28, 29) Aħna rridu nogħġbu lil Missierna tas-​sema, hux hekk? Għalhekk huwa importanti ħafna li nneħħu mill-​ewwel kull ħsieb ħażin li jiġina f’moħħna!

14. Dak li ngħidu x’juri, u liema mistoqsijiet għandna nistaqsu?

¹⁴ Ikkontrolla lsienek. Ġesù qal: “Dak li joħroġ mill-​fomm jiġi mill-​qalb.” (Mt. 15:18) Iva, dak li ngħidu juri x’għandna f’qalbna. Għalhekk, staqsi lilek innifsek dawn il-​mistoqsijiet: ‘Se nkun lest li ma nigdibx anki jekk inkun naf li jekk ngħid il-​verità nidħol fl-​inkwiet? Bħala persuna miżżewġa, noqgħod attent li ma nifflertjax ma’ dawk tas-​sess oppost? Nevita għalkollox kliem doppju sens? Meta xi ħadd jirrabjani, nibqaʼ kalm?ʼ Se ssibha t’għajnuna jekk taħseb fuq dawn  il-​mistoqsijiet. Kif titkellem jistaʼ jitqabbel mal-​buttuni li jkollha qmis. Jekk tħoll il-​buttuni se jkun iktar faċli għalik biex tinżagħha. Bl-​istess mod, jekk tagħmel dak kollu li tistaʼ biex ma tigdibx, ma tgħidx kliem li jweġġaʼ, u kliem doppju sens, se jkun iktar faċli għalik biex tinżaʼ l-​personalità l-​qadima.

15. Xi jfisser li nsammru l-​personalità l-​qadima tagħna “fuq iz-​zokk”?

¹⁵ Kun lest li tagħmel dak li jkun hemm bżonn. L-​appostlu Pawlu uża eżempju biex jurina kemm hu importanti li nbiddlu l-​mod ta’ kif ngħixu ħajjitna. Hu kiteb li għandna nsammru l-​personalità l-​qadima tagħna “fuq iz-​zokk.” (Rum. 6:6) Fi kliem ieħor, aħna rridu nimitaw l-​eżempju taʼ Kristu. Ġesù kien lest li jkun imsammar maz-​zokk biex jogħġob lil Ġeħova. B’mod simili, biex nogħġbu lil Ġeħova għandna nkunu lesti li nneħħu attitudni u affarijiet ħżiena li jobgħod hu. Jekk nagħmlu dan, jistaʼ jkollna kuxjenza nadifa u ngawdu l-​ħajja taʼ dejjem. (Ġw. 17:3; 1 Pt. 3:21) Ftakar li Ġeħova mhux se jbiddel il-​livelli tiegħu biex jagħmilna ferħanin. Minflok, irridu ninbidlu aħna u ngħixu ħajjitna fi qbil mal-​livelli tiegħu.—Is. 1:16-​18; 55:9.

16. Għala għandek tkun determinat li tibqaʼ tiġġieled kontra x-​xewqat ħżiena?

¹⁶ Ibqaʼ ġġieled kontra xewqat ħżiena. Anki wara li tkun tgħammidt se jkollok tibqaʼ tiġġieled kontra xewqat ħżiena. Aħseb dwar l-​esperjenza taʼ raġel jismu Maurício. Meta kien żgħir beda jgħix ħajja taʼ omosesswali. Maż-​żmien hu ltaqaʼ max-​Xhieda taʼ Ġeħova u beda jistudja l-​Bibbja. Wara li għamel il-​bidliet li kien hemm bżonn hu tgħammed fl-​2002. Minkejja li ilu jaqdi lil Ġeħova għal ħafna snin, Maurício ammetta li ġieli jkollu jiġġieled kontra xewqat ħżiena. Imma hu ma jħallix dan jiskuraġġih. Minflok, jgħid: “Nagħmel kuraġġ meta niftakar li jekk nagħżel li ma naġixxix fuq dawn ix-​xewqat inkun qed nogħġob lil Ġeħova.” *

17. X’sibt interessanti fl-​esperjenza taʼ Nabiha?

¹⁷ Itlob għall-​għajnuna taʼ Ġeħova, u dejjem strieħ fuq l-​ispirtu tiegħu. (Gal. 5:22; Flp. 4:6) Irridu naħdmu iebes jekk nixtiequ ninżgħu l-​personalità l-​qadima u ma nerġgħux nilbsuha. Ikkunsidra l-​esperjenza  taʼ mara jisimha Nabiha. Missierha telaqha meta kien għad kellha sitt snin. Hi tgħid: “Dan ġabli ħafna wġigħ.” Meta Nabiha bdiet tikber bdiet taqbżilha malajr, saret aggressiva, tbigħ id-​droga, ġiet arrestata, u għamlet xi snin fil-​ħabs. L-​aħwa li kienu jmorru jippritkaw il-​ħabs bdew jistudjaw il-​Bibbja magħha. Nabiha bdiet tagħmel bidliet kbar. Hi tgħid: “Kien faċli għalija biex naqtaʼ xi vizzji ħżiena li kelli. Imma biex naqtaʼ s-​sigaretti sibtha diffiċli ħafna.” Nabiha damet iktar minn sena biex taqtagħhom. X’għenha tagħmel dan? Hi tgħid: “L-​iktar ħaġa li għenitni naqtaʼ s-​sigaretti kienet it-​talb kontinwu lil Ġeħova.” Issa, Nabiha tgħid lil oħrajn: “Ċerta li jekk stajt nagħmel il-​bidliet jien biex nogħġob lil Ġeħova, kulħadd jistaʼ jirnexxilu!” *

18. Skont l-​1 Korintin 6:9-​11, ħafna mill-​qaddejja t’Alla xi rnexxielhom jagħmlu?

¹⁸ Fi żmien il-​Kristjani tal-​bidu, xi wħud minn dawk li għażel Ġeħova biex imexxu maʼ Kristu wkoll kienu jagħmlu affarijiet ħżiena qabel. Pereżempju, kienu adulteri, omosesswali, u ħallelin. Però, bl-​għajnuna tal-​ispirtu qaddis t’Alla rnexxielhom ibiddlu l-​personalità tagħhom. (Aqra l-​1 Korintin 6:9-​11.) Anke llum, il-​Bibbja għenet lil miljuni taʼ nies ibiddlu l-​mod kif jgħixu ħajjithom. * Huma qatgħu vizzji ħżiena minkejja li ma kienx faċli għalihom. L-​eżempju tagħhom jagħti prova li int ukoll tistaʼ tagħmel bidliet fil-​personalità tiegħek u tegħleb vizzji ħżiena biex tikkwalifika għall-​magħmudija.

19. X’se nikkunsidraw fl-​artiklu li jmiss?

¹⁹ Dawk li jridu jitgħammdu mhux biss għandhom jaħdmu biex jinżgħu l-​personalità l-​qadima imma wkoll iridu jagħmlu sforz biex jilbsu l-​personalità l-​ġdida. Fl-​artiklu li jmiss se naraw kif nistgħu nagħmlu dan u kif oħrajn jistgħu jgħinuna.