Ġeħova jħobb lil dawk li “jagħtu l-frott bis-sabar”
“Rigward dawk li waqgħu f’ħamrija tajba, dawn huma dawk li . . . jagħtu l-frott bis-sabar.”—LUQA 8:15.
1, 2. (a) Għala aħna inkuraġġiti b’aħwa rġiel u nisa li jibqgħu jippritkaw f’territorji fejn ħafna ma jridux jisimgħu? (Ara l-ewwel stampa.) (b) X’qal Ġesù dwar li jipprietka “f’pajjiżu”? (Ara n-nota taʼ taħt.)
SERGIO U OLINDA huma koppja pijunieri fl-Istati Uniti. It-tnejn li huma għandhom ’il fuq minn 80 sena. Dan l-aħħar, minħabba l-uġigħ f’saqajhom, kien qed ikun diffiċli għalihom biex jimxu. Imma, bħalma għamlu għal ħafna snin, huma jimxu lejn pjazza mimlija nies u karozzi fil-belt tagħhom fis-sebgħa taʼ filgħodu. Joqogħdu ħdejn stejġ tal-karozzi tal-linja u joffru l-pubblikazzjonijiet tagħna lin-nies għaddejjin. Il-biċċa l-kbira min-nies ma jagħtux kashom, imma Sergio u Olinda jibqgħu f’posthom u jitbissmu lil dawk li jħarsu lejhom. F’nofsinhar, imorru bil-mod lejn darhom. L-għada filgħodu, fis-sebgħa, jerġgħu lura lejn l-istejġ. Huma jibqgħu jippritkaw sitt darbiet fil-ġimgħa s-sena kollha.
2 Bħal Sergio u Olinda, hemm ħafna aħwa rġiel u nisa leali li ilhom jippritkaw fit-territorju tagħhom għal ħafna snin, avolja ħafna min-nies ma jridux jisimgħu. * (Ara n-nota taʼ taħt.) L-eżempju tiegħek jinkuraġġixxi ħafna aħwa, anke dawk bi snin taʼ esperjenza. Innota x’qalu xi indokraturi li jżuru l-kongregazzjonijiet: “Meta naħdem m’aħwa leali bħal dawn fil-ministeru, inħossni mimli enerġija bl-eżempju tagħhom.” “Il-lealtà tagħhom tinkuraġġini biex nibqaʼ nagħmel dan ix-xogħol u biex inkun kuraġġuż fil-ministeru tiegħi.” “L-eżempju tagħhom iqawwili qalbi.”
Forsi int tipprietka f’territorju bħal dan ukoll. Jekk inhu hekk, aħna nfaħħruk, għax tibqaʼ tipprietka bis-sabar għalkemm hu diffiċli.3. Liema tliet mistoqsijiet se nikkunsidraw, u għala?
3 F’dan l-artiklu se nwieġbu tliet mistoqsijiet: Kultant għala għandna mnejn inħossuna skuraġġiti? Xi jfisser li nagħtu l-frott? X’se jgħinna nibqgħu nagħtu l-frott bis-sabar? Li nkunu nafu t-tweġibiet għal dawn il-mistoqsijiet se jinkuraġġina nkomplu bix-xogħol tal-ippritkar li Ġesù tana nagħmlu.
GĦALA GĦANDNA MNEJN INĦOSSUNA SKURAĠĠITI?
4. (a) Ir-reazzjoni negattiva mingħand il-biċċa l-kbira tal-Lhud kif ġegħlitu jħossu lil Pawlu? (b) Pawlu għala ħassu b’dan il-mod?
4 Qatt ħassejtek skuraġġit għaliex in-nies fit-territorju tiegħek ma jridux jisimgħu l-messaġġ dwar is-Saltna? Jekk iva, se tifhem kif ħassu l-appostlu Pawlu. Hu għamel madwar 30 sena jipprietka, u għen ħafna nies isiru Kristjani. (Atti 14:21; 2 Korintin 3:2, 3) Xorta waħda, ma setax jgħin lil ħafna Lhud, nies tal-istess nazzjonalità tiegħu, isiru Kristjani. Minflok, il-biċċa l-kbira minnhom irrifjutaw li jisimgħu lil Pawlu, u xi wħud ippersegwitawh ukoll. (Atti 14:19; 17:1, 4, 5, 13) Din ir-reazzjoni negattiva kif ġegħlitu jħossu lil Pawlu? Hu qal: “F’qalbi għandi niket kbir u wġigħ bla waqfien.” (Rumani 9:1-3) Għala ħassu b’dan il-mod? Għax hu tassew kien iħobb jipprietka u kien iħobb lin-nies. Pawlu kien jimpurtah verament mil-Lhud u ħassu mnikket meta m’aċċettawx il-ħniena t’Alla.
5. (a) X’jimmotivana biex nippritkaw? (b) Għala hu normali li kultant inħossuna skuraġġiti?
5 Bħal Pawlu, aħna nippritkaw lin-nies għax jimpurtana minnhom u rridu ngħinuhom. (Mattew 22:39; 1 Korintin 11:1) Mill-esperjenza tagħna nafu illi li naqdu lil Ġeħova hu l-aħjar mod taʼ ħajja. U rridu ngħinu lil oħrajn jaraw kemm ħajjithom tistaʼ tkun aħjar ukoll. Hu għalhekk li nibqgħu ninkuraġġuhom jitgħallmu l-verità dwar Ġeħova u l-iskop tiegħu għall-bnedmin. Hu bħallikieku qed niħdulhom rigal sabiħ u nitolbuhom bil-ħniena: ‘Jekk jogħġbok, aċċettah.’ Allura meta ma jaċċettawx dan ir-rigal, ikun normali li nħossu ‘wġigħ ġo qalbna,’ bħal Pawlu. Inħossu dan l-uġigħ mhux għax għandna nuqqas taʼ fidi, imma għax tassew inħobbu lin-nies. B’hekk, għalkemm kultant għandna mnejn inħossuna skuraġġiti, aħna nkomplu nippritkaw. Forsi naqblu maʼ Elena, pijuniera għal iktar minn 25 sena, li tgħid: “Jien insibu diffiċli x-xogħol tal-ippritkar. Imma għalija m’hemm l-ebda xogħol ieħor li jiħodlu postu.”
XI JFISSER LI TAGĦTI L-FROTT?
6. X’mistoqsija se nwieġbu issa?
6 Għala nistgħu nkunu ċerti li jistaʼ jkollna riżultati tajbin fil-ministeru tagħna minkejja fejn nippritkaw? Biex inwieġbu din il-mistoqsija importanti, ejja niddiskutu żewġ tixbihat taʼ Ġesù li fihom jitkellem dwar il-bżonn li ‘nagħtu l-frott.’ (Mattew 13:23) L-ewwel tixbiha hija dwar dielja, jew, siġra tal-għeneb.
7. (a) Fit-tixbiha taʼ Ġesù, “il-bidwi,” “id-dielja,” u “l-friegħi” lil min jirrappreżentaw? (b) X’mistoqsija għad irridu nwieġbu?
7 Aqra Ġwanni 15:1-5, 8. F’din it-tixbiha, Ġesù spjega li Ġeħova hu “l-bidwi,” Ġesù nnifsu hu “d-dielja,” u d-dixxipli tiegħu huma “l-friegħi.” * (Ara n-nota taʼ taħt.) Imbagħad Ġesù qal lill-appostli tiegħu: “Missieri hu glorifikat b’dan, li tibqgħu tagħtu ħafna frott u turu li intom dixxipli tiegħi.” Allura, xi jfisser li tagħti l-frott? F’din it-tixbiha, Ġesù ma qalx speċifikament x’inhu dan il-frott, iżda semma dettall importanti biex jgħinna nsibu t-tweġiba għal din il-mistoqsija.
8. (a) Fit-tixbiha taʼ Ġesù, li “tagħti l-frott” għala ma tistax tfisser li tagħmel dixxipli ġodda? (b) X’inhi l-verità dwar dak kollu li Ġeħova jitlobna nagħmlu?
8 Dwar Missieru, Ġesù qal: “Kull fergħa fija li ma tagħtix frott [Ġeħova] jneħħiha.” Fi kliem ieħor, aħna nistgħu nkunu l-qaddejja taʼ Ġeħova jekk nagħtu l-frott biss. (Mattew 13:23; 21:43) Mela f’din it-tixbiha, li nagħtu l-frott ma jistax ifisser li nagħmlu dixxipli ġodda. (Mattew 28:19) Kieku kien hekk, Xhieda leali li ma għenux lil xi ħadd isir dixxiplu taʼ Ġesù kienu jkunu bħall-friegħi li ma jagħtux frott. Imma dan ma jistax ikun veru! Għala? Għaliex aħna ma nistgħux nisforzaw lin-nies biex isiru dixxipli. Ġeħova jħobbna. Qatt mhu se jitlobna nagħmlu xi ħaġa li ma nistgħux nagħmluha. Hu jitlob minna dak li nistgħu nagħmlu biss.—Dewteronomju 30:11-14.
9. (a) Aħna kif nagħtu l-frott? (b) Liema tixbiha se niddiskutu issa?
9 Mela, xi jfisser li nagħtu l-frott? Żgur li hi xi ħaġa li lkoll kemm aħna nistgħu nagħmlu. Ġeħova liema xogħol ta lill-qaddejja tiegħu kollha? L-ippritkar tal-aħbar tajba tas-Saltna t’Alla. * (Ara n-nota taʼ taħt.) (Mattew 24:14) It-tixbiha taʼ Ġesù tar-raġel li ħareġ jiżraʼ tagħmel dan ċar. Ejja issa niddiskutu din it-tixbiha.
10. (a) Fit-tixbiha taʼ Ġesù, x’inhuma ż-żerriegħa u l-ħamrija? (b) Zokk tal-qamħ x’jipproduċi?
10 Aqra Luqa 8:5-8, 11-15. Fit-tixbiha tar-raġel li ħareġ jiżraʼ, Ġesù spjega li ż-żerriegħa hi “l-kelma t’Alla,” jew il-messaġġ dwar is-Saltna t’Alla. Il-ħamrija hi l-qalb taʼ persuna. Iż-żerriegħa li waqgħet f’ħamrija tajba rabbiet l-għeruq, nibtet, u saret pjanta. Imbagħad, il-pjanta “għamlet frott għal mitt darba.” Kieku din il-pjanta kienet zokk tal-qamħ, x’tip taʼ frott kienet tipproduċi? Zkuk tal-qamħ żgħar? Le, kienet tipproduċi żrieragħ li maż-żmien jikbru u jsiru zkuk tal-qamħ. F’din it-tixbiha, żerriegħa waħda pproduċiet 100 żerriegħa. Dan x’jgħallimna dwar il-ministeru tagħna?
11. (a) It-tixbiha tar-raġel li ħareġ jiżraʼ x’tgħallimna dwar il-ministeru tagħna? (b) Kif nipproduċu żerriegħa ġdida?
11 Meta l-ġenituri Kristjani tagħna jew xi Xhieda oħrajn għall-ewwel għallmuna dwar is-Saltna t’Alla, kien bħallikieku żergħu żerriegħa f’ħamrija tajba. Huma kienu ferħanin ħafna meta raw li aċċettajna l-messaġġ. Dik iż-żerriegħa baqgħet tikber u tikber sakemm kienet lesta li tagħti l-frott. U bħalma z-zokk tal-qamħ li semmejna qabel ma jipproduċix zkuk ġodda, iżda żerriegħa ġdida, aħna ma nipproduċux dixxipli ġodda, imma żerriegħa ġdida. * (Ara n-nota taʼ taħt.) Kif nagħmlu dan? Kull darba li ngħidu lil oħrajn dwar is-Saltna t’Alla, ikun bħallikieku qed inkattru u nxerrdu ż-żerriegħa li nżergħet f’qalbna. (Luqa 6:45; 8:1) Allura, sakemm nibqgħu nippritkaw il-messaġġ dwar is-Saltna t’Alla, aħna ‘nagħtu l-frott bis-sabar.’
12. (a) X’nitgħallmu mit-tixbihat taʼ Ġesù dwar id-dielja u r-raġel li ħareġ jiżraʼ? (b) Din it-tagħlima kif iġġiegħlek tħossok?
12 Aħna x’nitgħallmu mit-tixbihat taʼ Ġesù dwar id-dielja u r-raġel li ħareġ jiżraʼ? Nitgħallmu illi li ‘nagħtu l-frott’ ma jiddependix minn jekk in-nies jisimgħux il-messaġġ. Jiddependi minn jekk nibqgħux nippritkaw. Pawlu qal xi ħaġa simili meta spjega: “Kull wieħed jirċievi l-premju tiegħu skond il-ħidma tiegħu.” (1 Korintin 3:8) Ġeħova se jippremjana għax-xogħol tagħna, mhux għar-riżultati tax-xogħol tagħna. Matilda, li ilha 20 sena taqdi bħala pijuniera, tgħid, “Jien ferħana li naf li Ġeħova jippremja l-isforzi tagħna.”
KIF NISTGĦU NIBQGĦU NAGĦTU L-FROTT BIS-SABAR?
13, 14. Skont Rumani 10:1, 2, x’kienu r-raġunijiet għala Pawlu qatt ma waqaf jipprietka?
13 X’se jgħinna ‘nagħtu l-frott bis-sabar’? Ejja naraw l-eżempju taʼ Pawlu iktar mill-qrib. Aħna nafu li Pawlu ħassu Rumani 10:1, 2) Mela, Pawlu għala kompla jipprietka?
skuraġġit għaliex il-Lhud irrifjutaw il-messaġġ dwar is-Saltna. Madankollu, Pawlu qatt ma waqaf jippritkalhom. Hu spjega kif ħassu dwar dawk il-Lhud meta qal: “Dak li nixtieq minn qalbi u li nitlob bil-ħerqa lil Alla għalihom hu, tabilħaqq, li jiġu salvati. Għax nixhdilhom li għandhom żelu għal Alla, imma mhux skond l-għarfien eżatt.” (14 L-ewwel, Pawlu qal li ħass li kellu jipprietka lil-Lhud minħabba ‘dak li xtaq minn qalbu.’ Hu tassew riedhom jiġu salvati. (Rumani 11:13, 14) It-tieni, hu semma li ‘jitlob bil-ħerqa lil Alla għalihom.’ Pawlu talab bil-ħerqa lil Ġeħova biex jgħin lil Lhud individwali biex jaċċettaw il-messaġġ dwar is-Saltna. It-tielet, Pawlu qal: “Għandhom żelu għal Alla.” Pawlu ra t-tajjeb fin-nies u li kienu kapaċi jaqdu lil Ġeħova. Hu kien jaf li dawk il-Lhud żelużi setgħu jsiru dixxipli żelużi taʼ Kristu, l-istess bħalu.
15. Kif nistgħu nimitaw lil Pawlu? Agħti eżempji.
15 Kif nistgħu nimitaw lil Pawlu? L-ewwel, għandna verament inkunu rridu nfittxu lil dawk li għandhom “attitudni xierqa lejn il-ħajja taʼ dejjem.” It-tieni, aħna nitolbu bil-ħniena lil Ġeħova biex jgħin lil nies sinċieri jisimgħu meta nippritkawlhom. (Atti 13:48; 16:14) Hekk għamlet Silvana, li ilha pijuniera għal 30 sena. Hi tgħid, “Qabel ma mmur għand xi ħadd fit-territorju tiegħi, nitlob lil Ġeħova jagħtini attitudni pożittiva.” Aħna nitolbu wkoll biex l-anġli jgħinuna nsibu nies li huma lesti li jisimgħu. (Mattew 10:11-13; Rivelazzjoni 14:6) Robert, li ilu pijunier għal iktar minn 30 sena, jgħid, “Huwa eċitanti li taħdem flimkien maʼ anġli li jafu xi jkun għaddej fil-ħajja tan-nies fid-djar.” It-tielet, aħna nipprovaw naraw it-tajjeb fin-nies u li huma kapaċi jaqdu lil Ġeħova. Carl, anzjan li tgħammed ’il fuq minn 50 sena ilu, jgħid, “Jien infittex għal xi sinjal żgħir li juri s-sinċerità taʼ persuna, forsi xi tbissima, xi ħarsa ħelwa, jew xi mistoqsija onesta.” Jekk nagħmlu dawn l-affarijiet, nistgħu ‘nagħtu l-frott bis-sabar,’ bħal Pawlu.
“TĦALLIX IDEK TISTRIEĦ”
16, 17. (a) X’lezzjoni nistgħu nitgħallmu minn Ekkleżjasti 11:6? (b) L-ippritkar tagħna kif jistaʼ jaffettwa lil dawk li jkunu qed jarawna?
16 Qatt m’għandna ninsew kemm l-ippritkar tagħna jistaʼ jaffettwa lin-nies, anke jekk jidher li ħadd ma jrid jismaʼ. (Aqra Ekkleżjasti 11:6.) In-nies ikunu qed jarawna. Huma jinnotaw li nkunu lebsin pulit, li nuru manjieri tajbin, u li aħna dħulin. Dan jistaʼ jimpressjonahom, u maż-żmien, anke dawk li kienu jaħsbu b’mod negattiv dwarna għandhom mnejn ibiddlu l-ħsieb. Sergio u Olinda raw kemm dan kien minnu.
17 Sergio jgħid: “Minħabba l-mard, għal xi żmien ma rsaqniex lejn il-pjazza. Meta rġajna morna, in-nies li kienu jgħaddu s-soltu staqsewna, ‘Xi ġralkom? Immissjajniekom.’” Olinda żżid bi tbissima: “Ix-xufiera tal-karozzi tal-linja xejrulna u wħud minnhom għajtu minn posthom, ‘Proset tax-xogħol tagħkom!’ Huma saħansitra talbuna r-rivisti tagħna.” Sergio u Olinda ħadu sorpriża meta resaq raġel ħdejn l-istand tagħhom, tahom bukkett fjuri, u rringrazzjahom għax-xogħol li jagħmlu.
18. Għala int determinat li ‘tagħti l-frott bis-sabar’?
18 Sakemm ma “tħallix idek tistrieħ” milli tgħid lil oħrajn dwar is-Saltna t’Alla, int għandek sehem importanti f’li tagħti “xiehda lill-ġnus kollha.” (Mattew 24:14) Fuq kollox, int tistaʼ tkun ferħan ħafna għax taf li qed tferraħ lil Ġeħova. Hu jħobb lil dawk kollha li “jagħtu l-frott bis-sabar”!
^ par. 2 Anke Ġesù qal li kien diffiċli jipprietka “f’pajjiżu.” Dan qiegħed imniżżel fl-erbaʼ rakkonti dwar il-ministeru tiegħu.—Mattew 13:57; Marku 6:4; Luqa 4:24; Ġwanni 4:44.
^ par. 7 Għalkemm il-friegħi f’din it-tixbiha jirreferu għall-Kristjani li se jmorru s-sema, it-tixbiha fiha tagħlim għall-qaddejja kollha t’Alla.
^ par. 9 L-espressjoni “tagħti l-frott” tistaʼ tirreferi wkoll għal li nipproduċu “l-frott taʼ l-ispirtu.” Madankollu, dan l-artiklu u li jmiss jiffokaw fuq li nipproduċu “l-frott tax-xofftejn,” jew li nippritkaw dwar is-Saltna t’Alla.—Galatin 5:22, 23; Ebrej 13:15.
^ par. 11 Drabi oħra, Ġesù uża l-eżempji taż-żrigħ u l-ħsad biex jurina x-xogħol taʼ li nagħmlu dixxipli.—Mattew 9:37; Ġwanni 4:35-38.