1-2. Spjega għala ċerti prinċipji tal-​Bibbja jsiru iktar importanti għalina.

 SPISS meta koppja tkun se tiżżewweġ, anzjan jagħmel taħdita bbażata fuq il-​Bibbja dwar iż-​żwieġ. Għalkemm l-​għarus u l-​għarusa mhux l-​ewwel darba li semgħu dawn il-​prinċipji tal-​Bibbja, issa huma importanti iktar għalihom. Għala? Għax issa bħala koppja miżżewġa jridu japplikawhom f’ħajjithom.

² Xi ħaġa simili tiġri meta koppja Kristjana jkunu se jsiru ġenituri. Matul is-​snin, huma jaf semgħu ħafna taħditiet dwar kif irabbu t-​tfal. Imma issa l-​prinċipji li semgħu f’dawk it-​taħditiet huma ħafna iktar importanti għalihom, għax issa se jkollhom it-​tfal tagħhom stess. X’responsabbiltà kbira hi din! Dan jurina li meta ċ-​ċirkustanzi f’ħajjitna jinbidlu, ċerti skritturi jsiru iktar importanti għalina. Din hi waħda mir-​raġunijiet għala l-​qaddejja taʼ Ġeħova jaqraw il-​Kelma t’Alla u jimmeditaw fuqha “l-​jiem kollha” taʼ ħajjithom, bħalma kienu jagħmlu s-​slaten taʼ Iżrael.—Dt. 17:19.

3. X’se niddiskutu f’dan l-​artiklu?

³ Ġenituri, intom għandkom wieħed mill-​aqwa privileġġi li Kristjan jistaʼ jkollu. Dan hu li tgħallmu t-​tfal tagħkom dwar Ġeħova. Imma dan ma jinvolvix biss li tagħtuhom informazzjoni dwar Alla. Tridu tgħinu lit-​tfal  tagħkom iħobbu ħafna lil Ġeħova. Dan kif tistgħu tagħmluh? F’dan l-​artiklu se niddiskutu erbaʼ prinċipji tal-​Bibbja li jistgħu jgħinu lilkom bħala ġenituri. (2 Tim. 3:16) Se naraw ukoll kif xi ġenituri Kristjani bbenefikaw għax applikaw pariri tal-​Bibbja.

4. Liema prinċipju jistaʼ jgħin lill-​ġenituri jgħallmu lit-​tfal tagħhom iħobbu lil Ġeħova? (Ġakbu 1:5)

⁴ L-​1 Prinċipju: Fittex għall-​gwida taʼ Ġeħova. Itlob lil Ġeħova jagħtik l-​għerf biex tgħin lit-​tfal tiegħek isiru jħobbuh. (Aqra Ġakbu 1:5.) Ġeħova jistaʼ jagħtik l-​aqwa pariri. Hemm ħafna raġunijiet għala. Ejja nikkunsidraw tnejn minnhom. L-​ewwel, Ġeħova hu l-​iktar ġenitur li għandu esperjenza. (Salm 36:9) U t-​tieni, il-​pariri tajbin li jagħtina huma dejjem għall-​ġid tagħna.—Is. 48:17.

5. (a) L-​organizzazzjoni taʼ Ġeħova liema għajnuna qed tagħti lill-​ġenituri? (b) Mill-​vidjow, x’tgħallimt minn Ħuna u Oħtna Amorim dwar kif rabbew it-​tfal tagħhom?

⁵ Permezz tal-​Kelma tiegħu u l-​organizzazzjoni, Ġeħova qed jagħti lill-​ġenituri ħafna informazzjoni bbażata fuq il-​Bibbja. Din tgħinhom jgħallmu lil uliedhom iħobbu lil Ġeħova. (Mt. 24:45) Pereżempju, fis-​serje t’artikli “Għajnuna għall-​Familja,” il-​ġenituri jistgħu jsibu ħafna għajnuna. Din is-​serje, għal ħafna snin, kienet toħroġ fir-​rivista Stenbaħ! u issa nsibuha fuq il-​website tagħna. Apparti minn hekk, ħafna vidjows fuq jw.org jistgħu jgħinu lill-​ġenituri japplikaw il-​pariri taʼ Ġeħova meta jkunu qed irabbu t-​tfal. *—Prov. 2:4-​6.

6. Joe kif iħossu dwar l-​għajnuna li jirċievu hu u l-​mara tiegħu mingħand l-​organizzazzjoni taʼ Ġeħova?

⁶ Ħafna ġenituri qalu kemm japprezzaw l-​għajnuna li Ġeħova qed jagħtihom permezz tal-​organizzazzjoni tiegħu. Missier jismu Joe jgħid: “Biex trabbi tlett itfal fil-​verità mhux faċli. Jien u l-​mara dejjem nitolbu lil Ġeħova biex jgħinna. U ħafna drabi wara li nitolbu joħroġ xi artiklu jew vidjow li  jgħinna fis-​sitwazzjoni li nkunu qegħdin fiha. Aħna dejjem nistrieħu fuq il-​pariri taʼ Ġeħova.” Joe u l-​mara tiegħu raw b’għajnejhom stess kif dawn l-​artikli u l-​vidjows għenu lit-​tfal tagħhom jersqu qrib Ġeħova.

7. Għala huwa importanti li l-​ġenituri jagħmlu l-​almu tagħhom biex ikunu t’eżempju tajjeb? (Rumani 2:21)

⁷ It-​2 Prinċipju: Kun t’eżempju tajjeb. It-​tfal jinnotaw dak li jagħmlu l-​ġenituri tagħhom u spiss jimitawhom. Ovvjament l-​ebda ġenitur mhu perfett. (Rum. 3:23) Imma l-​ġenituri għandhom jagħmlu dak kollu li jistgħu biex ikunu t’eżempju tajjeb għat-​tfal tagħhom. (Aqra Rumani 2:21.) Missier qal hekk: “It-​tfal jixorbu kollox, qishom sponża. Ġieli, meta aħna ma nagħmlux dak li ngħidulhom biex jagħmlu, jgħidulna.” Allura, jekk irridu li t-​tfal tagħna jħobbu lil Ġeħova rridu nuru li l-​imħabba tagħna għalih hi b’saħħitha.

8-9. X’titgħallem minn dak li qalu Andrew u Emma?

⁸ Hemm ħafna modi kif il-​ġenituri jistgħu jgħinu lit-​tfal tagħhom iħobbu lil Ġeħova. Ara x’qal ħu taʼ 17-​il sena jismu Andrew: “Ommi u missieri dejjem għallmuni kemm hu importanti li nitlob. Kull filgħaxija missieri kien jgħidli talba, anki jekk inkun diġà għedt waħda għalija. Lili u lil oħti kienu jgħidulna: ‘Tistgħu titolbu lil Ġeħova meta tridu intom.’ Minħabba li kienu jgħiduli dan, it-​talb sar importanti ħafna għalija. Issa nsibha iktar faċli biex nitlob, u għalija Ġeħova qisu Missier li jħobbni.” Ġenituri, qatt tinsew li l-​imħabba tagħkom għal Ġeħova tistaʼ tgħin lit-​tfal tagħkom iħobbuh ukoll.

⁹ Aħseb ukoll dwar l-​eżempju t’Emma. Meta missierha telaqhom ħalla lil ommha b’ħafna dejn. Emma tgħid: “Kien hemm ħafna drabi fejn ommi ma kellhiex flus biżżejjed, imma hi kienet dejjem issemmi kif Ġeħova jieħu ħsieb lill-​qaddejja tiegħu. Mill-​mod kif kienet tgħix ħajjitha stajt nara li hi kienet temmen dak li tgħidilna. Dak li kienet tgħallimni, ommi kienet tapplikah f’ħajjitha.” Dan x’jgħallimna? Li anki f’sitwazzjonijiet diffiċli l-​ġenituri jistgħu jgħallmu lit-​tfal bl-​eżempju tagħhom.—Gal. 6:9.

10. Il-​ġenituri Iżraelin fi xħin setgħu jitkellmu mat-​tfal tagħhom dwar Ġeħova? (Dewteronomju 6:6, 7)

¹⁰ It-​3 Prinċipju: Tkellem mat-​tfal tiegħek spiss. Lill-​ġenituri Iżraelin, Ġeħova kien qalilhom biex jgħallmu lit-​tfal tagħhom b’mod regolari dwaru. (Aqra Dewteronomju 6:6, 7.) Dawk il-​ġenituri kellhom ħafna opportunitajiet matul il-​ġurnata biex jitkellmu magħhom u jgħallmuhom iħobbu lil Ġeħova. Pereżempju, tifel Iżraeli kellu ċ-​ċans li jqattaʼ ħafna ħin ma’ missieru peress li kienu jaħdmu fl-​għelieqi. Oħtu jistaʼ jkun li kienet tqattaʼ ħafna ħin matul il-​ġurnata tgħin lil ommha fit-​tisjir, fil-​ħjata, u f’affarijiet oħra tad-​dar. Waqt li t-​tfal u l-​ġenituri kienu jkunu qed jaħdmu flimkien, huma setgħu jitkellmu dwar affarijiet importanti. Pereżempju, setgħu jitkellmu dwar kemm hu qalbu tajba Ġeħova u kif kien qed jieħu ħsieb il-​familja tagħhom.

11. Il-​ġenituri f’liema ħin jistgħu jitkellmu mat-​tfal tagħhom?

¹¹ Illum il-​ħajja m’għadhiex bħalma kienet qabel. F’ħafna pajjiżi, il-​ġenituri  u t-​tfal ma jistgħux iqattgħu ħafna ħin flimkien. Il-​ġenituri jaf ikunu x-​xogħol u t-​tfal l-​iskola. Għalhekk, huwa iktar importanti li l-​ġenituri jsibu l-​ħin biex jitkellmu maʼ wliedhom. (Efes. 5:15, 16; Flp. 1:10) Il-​qima bħala familja tistaʼ tkun opportunità biex iqattgħu l-​ħin flimkien. Ħu żagħżugħ jismu Alexander jgħid: “Missieri dejjem jara li nagħmlu l-​qima bħala familja. U ma jħalli xejn itellifna milli nqattgħu dan il-​ħin flimkien. Wara l-​istudju, vera nieħdu pjaċir għax noqogħdu nitkellmu flimkien.”

12. Il-​kap tal-​familja x’għandu jżomm f’moħħu waqt il-​qima bħala familja?

¹² Jekk inti l-​kap tal-​familja, x’tistaʼ tagħmel biex it-​tfal tiegħek jieħdu pjaċir waqt il-​qima bħala familja? Għax ma tipprovax tistudja magħhom il-​ktieb il-​ġdid Għix Ħajja Ferħana għal Dejjem!? Dan il-​ktieb sabiħ se jgħinek titkellem b’mod faċli mat-​tfal tiegħek. Inti żgur tixtieq li t-​tfal tiegħek jgħidulek dwar dak li qed iħossu u dak li qed jinkwetahom. Għalhekk, tużax il-​ħin waqt il-​qima bħala familja biex tikkritikahom jew tikkoreġihom. U tiħodhiex bi kbira jekk it-​tfal jgħidu li ma jaqblux ma’ xi ħaġa li tgħid il-​Bibbja. Minflok, ħu pjaċir li qed jgħidulek dan u agħmilhielhom faċli jgħidulek kif iħossuhom. Meta vera tifhem kif qed iħossuhom se tkun tistaʼ tgħinhom.

13. B’liema modi oħra jistgħu l-​ġenituri jgħinu lit-​tfal tagħhom jersqu eqreb lejn Ġeħova?

¹³ Ġenituri, fittxu opportunitajiet waqt il-​ġurnata biex tgħinu lit-​tfal tagħkom iħossuhom eqreb taʼ Ġeħova. M’għandekx għalfejn tistenna l-​ħin tal-​istudju biex tgħallimhom dwar Alla. Innota x’qalet omm jisimha Lisa: “Aħna nużaw il-​ħolqien biex ngħallmu lit-​tfal tagħna jitgħallmu dwar Ġeħova. Pereżempju, meta l-​kelb tagħna kien jagħmel xi ħaġa tad-​daħq, konna ngħidulhom li dan juri li Ġeħova hu Alla ferħan u jixtieq li aħna wkoll inkunu ferħanin.”

14. Għala hu importanti li l-​ġenituri jgħinu lit-​tfal tagħhom jagħżlu ħbieb tajbin? (Proverbji 13:20)

¹⁴ Ir-​4 Prinċipju: Għin lit-​tfal tiegħek  jagħżlu ħbieb tajbin. Il-​Kelma t’Alla turi b’mod ċar li l-​ħbieb tagħna jistgħu jaffettwawna kemm b’mod tajjeb u kemm b’mod ħażin. (Aqra Proverbji 13:20.) Ġenituri, tafu min huma l-​ħbieb tat-​tfal tagħkom? Iltqajtu u qattajtu ħin magħhom? X’tistgħu tagħmlu biex tgħinu lit-​tfal tagħkom jagħmlu ħbieb maʼ dawk li jħobbu lil Ġeħova? (1 Kor. 15:33) Tistgħu tistiednu aħwa li jħobbu lil Ġeħova biex iqattgħu ħin magħkom u mat-​tfal tagħkom.—Salm 119:63.

15. Il-​ġenituri x’jistgħu jagħmlu biex jgħinu lit-​tfal tagħhom ikollhom ħbieb tajbin?

¹⁵ Missier jismu Tony jispjega x’għamlu hu u martu biex jgħinu lit-​tfal tagħhom jagħżlu ħbieb tajbin. Hu jgħid: “Matul is-​snin, aħna stidinna ħafna aħwa differenti, kbar u żgħar, fid-​dar tagħna. Aħna kilna flimkien u anki għamilna l-​qima bħala familja magħhom. Dan hu l-​aqwa mod kif issir taf lil dawk li jħobbu u jaqdu lil Ġeħova bil-​ferħ. Kellna l-​privileġġ li joqogħdu magħna indokraturi li jżuru l-​kongregazzjonijiet, missjunarji, u aħwa oħrajn. It-​tfal tagħna tgħallmu ħafna mill-​esperjenzi tagħhom, miż-​żelu li wrew, u mix-​xogħol li kienu lesti li jagħmlu għal Ġeħova. Dan kollu għen biex it-​tfal tagħna jersqu eqreb lejn Ġeħova.” Ġenituri, kunu determinati li tgħinu lit-​tfal tagħkom jagħżlu ħbieb tajbin.

16. X’tistaʼ tagħmel jekk it-​tifel jew it-​tifla tiegħek tgħid li ma tridx tibqaʼ taqdi lil Ġeħova?

¹⁶ Imma xi ngħidu jekk minkejja l-​isforzi kollha li għamiltu, it-​tifel jew it-​tifla tagħkom xorta ma tridx taqdi lil Ġeħova? Qatt taħsbu li hu t-​tort tagħkom. Ġeħova ta lil kull wieħed u waħda minna, inkluż lit-​tfal tagħkom, il-​libertà li nagħżlu jekk naqduhx jew le. Jekk it-​tifel jew it-​tifla tiegħek iddeċidiet li titlaq lil Ġeħova taqtax qalbek. Ibqaʼ ttama li xi darba tiġi lura. Ftakar fit-​tixbiha tal-​iben il-​ħali. (Lq. 15:11-​19, 22-​24) Dak il-​ġuvni għamel ħafna affarijiet ħżiena imma fl-​aħħar reġaʼ ġie lura. Imma ħafna forsi jgħidu: “Dik storja. Jistaʼ t-​tifel jew it-​tifla  tiegħi terġaʼ lura għand Ġeħova?” Iva, tistaʼ! Fil-​fatt hekk ġara lil ġuvni jismu Elie.

17. L-​esperjenza t’Elie kif tinkuraġġik?

¹⁷ Elie jgħid hekk dwar il-​ġenituri tiegħu: “[Huma] għamlu l-​almu tagħhom biex inaqqxu fija mħabba għal Ġeħova u għall-​Kelma tiegħu, il-​Bibbja. Però, meta kont adoloxxent, bdejt nirribella.” Elie beda jagħmel affarijiet bil-​moħbi li mhumiex tajbin. Minkejja li l-​ġenituri tiegħu pprovaw jgħinuh, hu ma riedx jismaʼ. Wara li telaq mid-​dar, beda jinvolvi ruħu fi mġiba ħażina. Minkejja dan, ġieli kien jitkellem dwar il-​Bibbja maʼ ħabib tiegħu. Elie jgħid: “Iktar ma tkellimt dwar Ġeħova maʼ sieħbi iktar sibt ruħi naħseb dwar Ġeħova. Bil-​mod il-​mod, iż-​żrieragħ tal-​verità tal-​Bibbja li kienu inattivi f’qalbi—żrieragħ li l-​ġenituri tiegħi kienu stinkaw biex jiżirgħu—bdew jikbru.” Maż-​żmien, Elie reġaʼ ġie lura fil-​verità. * Min jaf kemm kienu ferħanin il-​ġenituri tiegħu li minn età żgħira pprovaw jgħallmuh iħobb lil Ġeħova!—2 Tim. 3:14, 15.

18. Kif tħossok dwar il-​ġenituri li qed jaħdmu iebes biex jgħallmu lit-​tfal tagħhom iħobbu lil Ġeħova?

¹⁸ Ġenituri, Ġeħova takom rigal mill-​isbaħ, li trabbu ġenerazzjoni ġdida taʼ qaddejja tiegħu. (Salm 78:4-​6) Dan mhux faċli, u għalhekk infaħħrukom tax-​xogħol iebes li qed tagħmlu! Jekk tkomplu tagħmlu l-​aħjar li tistgħu biex tgħallmu t-​tfal tagħkom iħobbu u jobdu lil Ġeħova, tistgħu tkunu ċerti li Missierkom tas-​sema kollu mħabba se jkun ferħan bikom.—Efes. 6:4.