ARTIKLU GĦALL-ISTUDJU 20
Il-Ktieb tar-Rivelazzjoni X’Jgħid li Se Jiġrilhom l-Għedewwa t’Alla?
“Ġabruhom flimkien lejn il-post li bl-Ebrajk jissejjaħ Ħar–Magedon.”—RIV. 16:16.
GĦANJA 150 Fittex lil Alla biex jeħilsek
ĦARSA BIL-QUDDIEM *
1. Il-ktieb tar-Rivelazzjoni x’jgħid dwar in-nies t’Alla?
IL-KTIEB tar-Rivelazzjoni jurina li s-Saltna t’Alla qed tmexxi fis-sema u kif Ġesù tefa’ lil Satana lejn l-art. (Riv. 12:1-9) Dan ġab paċi għal dawk fis-sema u inkwiet għan-nies fuq l-art. Għala? Għax Satana rrabjat u hu qed jattakka lill-qaddejja leali taʼ Ġeħova.—Riv. 12:12, 15, 17.
2. X’se jgħinna nibqgħu leali lejn Ġeħova?
2 Kif nistgħu nibqgħu leali lejn Ġeħova minkejja li Satana qed jattakkana? (Riv. 13:10) Xi ħaġa li se tgħinna hi li nkunu nafu x’se jiġri fil-futur. Pereżempju, f’Rivelazzjoni, l-appostlu Ġwanni jsemmi xi barkiet li se ngawdu dalwaqt. Waħda minn dawn il-barkiet hi li l-għedewwa t’Alla se jinqerdu. Issa ejja naraw kif il-ktieb tar-Rivelazzjoni jiddeskrivi lil dawn l-għedewwa u x’se jiġrilhom.
L-GĦEDEWWA T’ALLA JIĠU RAPPREŻENTATI “B’SINJALI”
3. X’inhuma xi sinjali li jissemmew f’Rivelazzjoni?
3 L-ewwel vers tal-ktieb tar-Rivelazzjoni jgħidilna li l-informazzjoni li se naqraw qed tingħata “b’sinjali,” jiġifieri b’lingwa simbolika. (Riv. 1:1) Iktar tard naqraw dwar diversi bhejjem salvaġġi li jirrappreżentaw lill-għedewwa t’Alla. Pereżempju, tissemma “bhima salvaġġa tielgħa mill-baħar, b’għaxart iqrun u b’sebat irjus.” (Riv. 13:1) Imbagħad tissemma “bhima salvaġġa oħra tielgħa mill-art.” Din il-bhima titkellem bħal dragun u ġġiegħel “in-nar jinżel mis-sema.” (Riv. 13:11-13) Imbagħad naraw bhima differenti, “bhima salvaġġa lewn l-iskarlat,” u prostituta riekba fuqha. Dawn it-tliet bhejjem salvaġġi jirrappreżentaw lill-għedewwa li ilhom jiġġieldu kontra Ġeħova u s-Saltna tiegħu. Għalhekk, huwa importanti li nkunu nafu min huma.—Riv. 17:1, 3.
4-5. Dak li jgħid Danjel 7:15-17, kif jgħinna nifhmu dawn is-sinjali?
4 Qabel ma nitgħallmu min huma dawn l-għedewwa, irridu nifhmu x’jirrappreżentaw il-bhejjem salvaġġi u l-prostituta. L-aħjar mod biex nifhmu dan hu billi nħallu l-Bibbja stess tispjegalna. Ħafna mis-sinjali li nsibu fil-ktieb tar-Rivelazzjoni huma spjegati diġà f’kotba oħrajn li nsibu fil-Bibbja. Pereżempju, il-profeta Danjel kellu ħolma fejn “mill-baħar telgħu erbaʼ bhejjem enormi.” (Dan. 7:1-3) Danjel jgħidilna x’jirrappreżentaw. Dawn il-bhejjem enormi jirrappreżentaw erbaʼ “slaten,” jew gvernijiet. (Aqra Danjel 7:15-17.) Din l-ispjegazzjoni ċara tgħinna nifhmu li l-bhejjem li jissemmew f’Rivelazzjoni jirreferu wkoll għall-gvernijiet.
5 Issa ejja neżaminaw xi sinjali li jissemmew fil-ktieb tar-Rivelazzjoni. Waqt li nagħmlu dan se naraw kif il-Bibbja tgħinna nifhmu dawn is-sinjali. Se nibdew bil-bhejjem salvaġġi li jissemmew. L-ewwel, se naraw lil min jirrappreżentaw. Imbagħad, se naraw x’se jiġri lil dawn il-bhejjem. U fl-aħħar, se nikkunsidraw x’se jfissru għalina dawn il-ġrajjiet.
JINKIXFU MIN HUMA L-GĦEDEWWA T’ALLA
6. Skont Rivelazzjoni 13:1-4, il-bhima salvaġġa li għandha sebat irjus lil min tirrappreżenta?
6 Min hi l-bhima salvaġġa b’sebat irjus? (Aqra Rivelazzjoni 13:1-4.) Nistgħu naraw li din il-bhima tidher qisha leopard, imma għandha saqajha taʼ ors, ħalq taʼ ljun, u għandha għaxart iqrun. L-erbaʼ bhejjem salvaġġi li jissemmew f’Danjel kapitlu 7 ukoll għandhom partijiet li jixbhu l-partijiet taʼ din il-bhima. Però, fil-ktieb tar-Rivelazzjoni, dawn il-partijiet insibuhom f’bhima waħda, mhux f’erbaʼ bhejjem separati. Din il-bhima salvaġġa ma tirrappreżentax gvern wieħed biss. Ġwanni qal ukoll li hi kienet se tmexxi “fuq kull tribù u poplu u lsien u ġens.” Għalhekk din żgur li hija ikbar minn gvern wieħed. (Riv. 13:7) Mela, din il-bhima salvaġġa b’sebat irjus tirrappreżenta lill-gvernijiet kollha li mexxew fuq il-bnedmin sal-lum il-ġurnata. *—Ekk. 8:9.
7. Kull ras tal-bhima salvaġġa lil min tirrappreżenta?
7 Kull ras tal-bhima salvaġġa lil min tirrappreżenta? Rivelazzjoni kapitlu 17 jgħinna nsibu tweġiba għax jiddeskrivi xbieha tal-bhima li nsibu f’Rivelazzjoni kapitlu 13. F’Rivelazzjoni 17:10 naqraw: “Hemm sebaʼ slaten: ħamsa waqgħu, wieħed qiegħed hawn, u l-ieħor għadu ma wasalx, imma meta jasal irid jibqaʼ għal żmien qasir.” Mill-gvernijiet kollha li Satana uża, sebgħa kienu mqabblin mal-“irjus” minħabba li huma kellhom ħafna poter. Ħafna minn nies t’Alla kienu jgħixu fejn kienu jmexxu dawn il-gvernijiet jew kienu ppersegwitaw lin-nies t’Alla. Meta l-appostlu Ġwanni kien għadu ħaj, ħamsa minnhom kienu diġà mexxew. Dawn kienu l-Eġittu, l-Assirja, Babilonja, il-Medo-Persja, u l-Greċja. Is-sitt qawwa dinjija, Ruma, kienet għadha qed tmexxi meta Ġwanni kellu din il-viżjoni. Liema gvern kellu jkun is-sebaʼ u l-aħħar qawwa dinjija, jew ras?
8. Is-sebaʼ ras tal-bhima salvaġġa lil min tirrappreżenta?
8 Issa se naraw li l-profeziji li nsibu fil-ktieb taʼ Danjel jgħinuna nsiru nafu lil min tirrappreżenta s-sebaʼ u l-aħħar ras tal-bhima salvaġġa. Liema qawwa dinjija qed tmexxi f’dawn l-aħħar jiem, jew matul “jum il-Mulej”? (Riv. 1:10) Din hi magħmula minn żewġ gvernijiet li jaħdmu flimkien. Dawn huma r-Renju Unit u l-Istati Uniti tal-Amerika, fi kliem ieħor, il-Qawwa Dinjija Anglo-Amerikana. Għalhekk, nistgħu ngħidu li din hi s-sebaʼ ras tal-bhima salvaġġa li tissemma f’Rivelazzjoni 13:1-4.
9. Il-bhima salvaġġa li għandha “żewġt iqrun bħal ħaruf” lil min tirrappreżenta?
9 F’Rivelazzjoni kapitlu 13 nitgħallmu li s-sebaʼ ras, li hija l-Qawwa Dinjija Anglo-Amerikana, taġixxi wkoll bħal bhima salvaġġa b’“żewġt iqrun bħal ħaruf, imma bdiet titkellem bħal dragun.” Din il-bhima “twettaq sinjali kbar, [anki] saħansitra ġġiegħel in-nar jinżel mis-sema għal fuq l-art quddiem għajnejn il-bnedmin.” (Riv. 13:11-15) Rivelazzjoni kapitli 16 u 19 isejħu din il-bhima salvaġġa “l-profeta falz.” (Riv. 16:13; 19:20) Danjel semma xi ħaġa simili billi jgħid li l-Qawwa Dinjija Anglo-Amerikana kienet se ‘tikkaġuna rovina tal-għaġeb.’ (Dan. 8:19, 23, 24) Dan hu eżatt dak li ġara matul it-Tieni Gwerra Dinjija. Iż-żewġ bombi atomiċi li ntefgħu fuq il-Ġappun u li wasslu biex tispiċċa l-gwerra kienu magħmula minn xjentisti Ingliżi u Amerikani. Billi għamlet dawn il-bombi, il-Qawwa Dinjija Anglo-Amerikana ġiegħlet “in-nar jinżel mis-sema għal fuq l-art.”
10. “Ix-xbieha tal-bhima salvaġġa” lil min tirrappreżenta? (Rivelazzjoni 13:14, 15; 17:3, 8, 11)
10 Issa se naraw bhima salvaġġa oħra. Din tixbah ħafna lill-bhima b’sebat irjus, imma hi kulur l-iskarlat. Din tissejjaħ “ix-xbieha tal-bhima salvaġġa” u hi meqjusa bħala ‘t-tmien sultan.’ * (Aqra Rivelazzjoni 13:14, 15; 17:3, 8, 11.) Ġwanni sar jaf li dan is-“sultan” kien jeżisti, imbagħad ma baqax jeżisti, u iktar tard reġaʼ beda jeżisti. Dan hu eżatt dak li ġara lill-organizzazzjoni tal-Ġnus Magħquda, li tappoġġa lill-gvernijiet kollha tad-dinja. Għall-ewwel kienet tissejjaħ il-Lega tan-Nazzjonijiet. Imbagħad matul it-Tieni Gwerra Dinjija ma baqgħetx teżisti. Iktar tard reġgħet bdiet teżisti u bdiet tissejjaħ kif nafuha llum, bħala l-Ġnus Magħquda.
11. Il-gvernijiet x’se jagħmlu, u aħna għala m’għandniex għalfejn nibżgħu?
11 Permezz tal-gideb, dawn il-bhejjem salvaġġi, jew gvernijiet, qed iġiegħlu lin-nies jiħduha kontra Ġeħova u l-poplu tiegħu. Ġwanni qal li hu bħallikieku se jiġbru “s-slaten taʼ l-art abitata kollha” flimkien għall-gwerra taʼ Armageddon, li hija “l-jum il-kbir t’Alla li Jistaʼ Kollox.” (Riv. 16:13, 14, 16) Imma m’għandniex għalfejn nibżgħu. Alla tagħna, Ġeħova, se jaġixxi malajr u se jsalva lil dawk kollha li qegħdin fuq in-naħa tiegħu.—Eżek. 38:21-23.
12. X’se jiġrilhom il-bhejjem kollha?
12 X’se jiġri lill-bhejjem kollha? Rivelazzjoni 19:20 jagħtina t-tweġiba: “Il-bhima salvaġġa nqabdet, u magħha nqabad ukoll il-profeta falz li kien iwettaq quddiemha s-sinjali li bihom qarraq lil dawk li rċivew il-marka tal-bhima salvaġġa u lil dawk li jagħtu qima lix-xbieha tagħha. Waqt li kienu għadhom ħajjin, xeħtuhom it-tnejn fl-għadira tan-nar jaqbad bil-kubrit.” Għalhekk, waqt li jkunu għadhom qed imexxu, dawn il-gvernijiet li huma l-għedewwa t’Alla se jinqerdu għal dejjem.
13. Il-Kristjani kollha liema pressjoni jiffaċċjaw mill-gvernijiet?
13 Dan xi jfisser għalina? Bħala Kristjani, aħna rridu nkunu leali lejn Alla u s-Saltna tiegħu. (Ġw. 18:36) Biex nagħmlu dan irridu nibqgħu newtrali u ma jkollniex x’naqsmu mal-affarijiet tal-politika. Imma dan mhux dejjem faċli għax il-gvernijiet tad-dinja jridu li nappoġġawhom b’dak li ngħidu u nagħmlu. Dawk li jċedu għall-pressjoni tagħhom se jirċievu l-marka tal-bhima salvaġġa. (Riv. 13:16, 17) Kull min ikollu din il-marka, Ġeħova mhux se jaċċettah u mhux se jtih il-ħajja taʼ dejjem. (Riv. 14:9, 10; 20:4) Għalhekk, jagħmlulna kemm jagħmlulna pressjoni l-gvernijiet biex nappoġġawhom, huwa importanti ħafna li nibqgħu newtrali kompletament.
TMIEM TAL-MISTĦIJA GĦALL-PROSTITUTA L-KBIRA
14. Kif juri Rivelazzjoni 17:3-5, l-appostlu Ġwanni x’ra li biha baqaʼ mistagħġeb?
14 L-appostlu Ġwanni jsemmi xi ħaġ’oħra li ra u li biha baqaʼ mistagħġeb. X’kienet? Mara riekba fuq waħda minn dawn il-bhejjem feroċi. (Riv. 17:1, 2, 6) Din hi l-“prostituta kbira,” u isimha hu “Babilonja l-Kbira.” Hi tagħmel ‘l-immoralità sesswali’ mas-“slaten taʼ l-art.”—Aqra Rivelazzjoni 17:3-5.
15-16. Min hi “Babilonja l-Kbira,” u kif nafu?
15 Min hi “Babilonja l-Kbira”? Din il-mara ma jistax ikun li tirrappreżenta lill-gvernijiet għax il-ktieb tar-Rivelazzjoni jgħid li hi tagħmel l-immoralità sesswali mal-mexxejja politiċi tad-dinja. (Riv. 18:9) U l-fatt li hi riekba fuq il-bhima salvaġġa juri li hi qed tipprova tikkontrolla lil dawn il-mexxejja. Barra minn hekk, Babilonja l-Kbira ma jistax ikun li tirrappreżenta s-sistema kummerċjali tad-dinja taʼ Satana għax fil-ktieb tar-Rivelazzjoni, is-sistema kummerċjali taʼ Satana tissejjaħ “il-merkanti taʼ l-art.”—Riv. 18:11, 15, 16.
16 Fil-Bibbja, il-kelma “prostituta” tistaʼ tirreferi għal dawk li jgħidu li jaqdu lil Alla imma jieħdu sehem fl-idolatrija jew isiru ħbieb tad-dinja b’modi oħrajn. (Eżek. 16:2, 35, 36; Ġak. 4:4) Mill-banda l-oħra, il-Bibbja ssejjaħ lil dawk li jaqdu lil Alla b’lealtà “safjin” jew “verġni.” (2 Kor. 11:2; Riv. 14:4) Babilonja tal-qedem kienet iċ-ċentru tal-qima falza. Għalhekk, Babilonja l-Kbira tirrappreżenta kull tip taʼ qima falza, jiġifieri r-reliġjonijiet foloz kollha tad-dinja.—Riv. 17:5, 18; ara l-artiklu “X’inhi Babilonja l-Kbira?” fuq jw.org.
17. X’se jiġri lil Babilonja l-Kbira?
17 X’se jiġri lill-Babilonja l-Kbira? Rivelazzjoni 17:16, 17 jagħtina tweġiba billi jgħid: “L-għaxart iqrun li rajt, u l-bhima salvaġġa, dawn se jobogħdu lill-prostituta u jħarbtuha u jneżżgħuha, u jiklulha laħamha u jaħarquha għalkollox bin-nar. Għax Alla daħħlilhom fi qlubhom li jwettqu l-ħsieb tiegħu.” Iva, Ġeħova se jġiegħel lin-nazzjonijiet biex jużaw il-bhima salvaġġa lewn l-iskarlat, li hi l-Ġnus Magħquda, biex jattakkaw ir-reliġjonijiet foloz kollha tad-dinja u jeqirduhom għalkollox.—Riv. 18:21-24.
18. Kif nistgħu nkunu ċerti li m’għandna x’naqsmu xejn maʼ Babilonja l-Kbira?
18 Dan xi jfisser għalina? Aħna rridu nżommu ‘l-qima tagħna nadifa u bla tinġis mill-ħarsa t’Alla.’ (Ġak. 1:27) Qatt m’għandna niġu influwenzati mit-tagħlim falz ta’ Babilonja l-Kbira, mill-festi li ma jogħġbux lil Alla, mill-ħajja ħażina li jgħixu n-nies, u mill-affarijiet li għandhom x’jaqsmu mal-ispiritiżmu tagħha! U rridu nkomplu nwissu lin-nies biex ‘joħorġu minnha,’ ħalli ma jiħdux il-kastig magħha.—Riv. 18:4.
IL-ĠUDIZZJU FUQ L-IKBAR GĦADU T’ALLA
19. Min hu d-“dragun kbir lewn in-nar”?
19 Il-ktieb tar-Rivelazzjoni jsemmi wkoll “dragun kbir lewn in-nar.” (Riv. 12:3) Dan id-dragun iġġieled kontra Ġesù u l-anġli tiegħu. (Riv. 12:7-9) Hu jattakka lin-nies t’Alla u jagħti l-qawwa lill-bhejjem salvaġġi, jiġifieri l-gvernijiet. (Riv. 12:17; 13:4) Min hu dan id-dragun? Ħadd ħlief “is-serp oriġinali, dak li hu msejjaħ Xitan u Satana.” (Riv. 12:9; 20:2) Hu l-wieħed li qed jikkontrolla lill-għedewwa kollha taʼ Ġeħova.
20. X’se jiġrilu d-dragun?
20 X’se jiġrilu d-dragun? Rivelazzjoni 20:1-3 jispjega li anġlu se jitfaʼ lil Satana fl-abbiss. Dan ħa jkun bħal ħabs għalih. Meta jkun qiegħed f’dan l-abbiss, Satana mhux se jkun jistaʼ ‘jqarraq iktar bil-ġnus sakemm jintemmu l-elf sena.’ Fl-aħħar, Satana u d-demonji tiegħu se jinqerdu darba għal dejjem. Dan nafuh għax il-Bibbja tgħid li se jiġu mitfugħin “fl-għadira tan-nar u l-kubrit.” (Riv. 20:10) Tistaʼ timmaġina dinja mingħajr Satana u d-demonji tiegħu? Xi żmien sabiħ se jkun!
21. Għala nistgħu nkunu ferħanin dwar dak li qrajna fil-ktieb tar-Rivelazzjoni?
21 Kemm hu inkuraġġanti li nifhmu xi jfissru s-sinjali li jissemmew fil-ktieb tar-Rivelazzjoni! F’dan l-artiklu mhux biss tgħallimna min huma l-għedewwa taʼ Ġeħova imma rajna wkoll x’se jiġrilhom. Iva, “hieni min jaqra b’leħen għoli u dawk li jisimgħu l-kliem taʼ din il-profezija”! (Riv. 1:3) Imma meta l-għedewwa t’Alla jinqerdu, in-nies leali liema barkiet se jgawdu? Se niddiskutu dan fl-aħħar artiklu minn din is-serje.
GĦANJA 23 Ġeħova jibda jsaltan
^ Il-ktieb tar-Rivelazzjoni juża sinjali biex juri min huma l-għedewwa t’Alla. Il-ktieb taʼ Danjel jgħinna nifhmu xi jfissru dawn is-sinjali. F’dan l-artiklu se nqabblu xi profeziji mill-ktieb taʼ Danjel maʼ profeziji simili li nsibu fil-ktieb tar-Rivelazzjoni. Dan se jgħinna biex inkunu nafu min huma l-għedewwa t’Alla. Imbagħad se naraw x’se jiġrilhom.
^ Evidenza oħra li l-bhima b’sebat irjus tirrappreżenta lill-gvernijiet kollha hi għax għandha “għaxart iqrun.” Spiss, fil-Bibbja, in-numru għaxra jintuża biex juri li xi ħaġa hi sħiħa, jew kompleta.
^ Din ix-xbieha m’għandhiex kuruni, jew “dijademi,” fuq il-qrun tagħha bħalma għandha l-ewwel bhima salvaġġa. (Riv. 13:1) Dan minħabba li hi ħarġet mis-sebaʼ slaten l-oħrajn u huma jagħtuha l-qawwa.—Ara l-artiklu “X’inhi l-bhima lewn l-iskarlat li tissemma f’Rivelazzjoni kapitlu 17?” fuq jw.org.