1919—Mitt sena ilu
SAL-1919, il-Gwerra l-Kbira (iktar tard magħrufa bħala l-Ewwel Gwerra Dinjija), li damet tkarkar għal iktar minn erbaʼ snin, kienet spiċċat. Tard fis-sena taʼ qabel, in-nazzjonijiet waqfu jiġġieldu, u fit-18 taʼ Jannar 1919, bdiet il-Konferenza taʼ Paċi taʼ Pariġi. Waħda mill-affarijiet tajbin li ħarġu minn din il-konferenza kienet it-Trattat taʼ Versailles, li temm formalment il-gwerra bejn il-Ġermanja u l-pajjiżi li kienu jiggwerraw kontriha. Dan ġie ffirmat fit-28 taʼ Ġunju 1919.
It-trattat, jew ftehim, stabbilixxa wkoll organizzazzjoni ġdida msejħa l-Lega tan-Nazzjonijiet. L-iskop tagħha kien “li tippromwovi koperazzjoni internazzjonali u li ġġib paċi u sigurtà internazzjonali.” Ħafna mir-reliġjonijiet tal-Kristjaneżmu appoġġjaw il-Lega. Il-Kunsill Federali tal-Knejjes taʼ Kristu fl-Amerika faħħarha bħala “l-espressjoni politika tas-Saltna t’Alla fuq l-art.” Dan il-kunsill wera li appoġġja lil din il-Lega billi bagħat delegati għall-Konferenza taʼ Paċi taʼ Pariġi. Wieħed minn dawn id-delegati qal li l-konferenza “kienet il-bidu taʼ era ġdida fl-istorja tad-dinja.”
Era ġdida kienet qed tibda, iżda ma kinitx se tinbeda min-nies involuti f’dik il-konferenza taʼ paċi. Fl-1919 bdiet era ġdida fix-xogħol tal-ippritkar meta Ġeħova saħħaħ lill-poplu tiegħu biex jipprietka bħal qatt qabel. Imma qabel dan setaʼ jseħħ, xi ħaġa sinifikanti kellha bżonn tinbidel għall-Istudenti tal-Bibbja.
DEĊIŻJONI DIFFIĊLI
Joseph F. Rutherford
L-elezzjoni annwali tad-diretturi tal-Watch Tower Bible and Tract Society kienet ippjanata għas-Sibt, 4 taʼ Jannar 1919. F’dak iż-żmien, Joseph F. Rutherford, li kellu t-tmexxija fost il-poplu taʼ Ġeħova, kien ġie mitfugħ il-ħabs inġustament f’Atlanta, Georgia, l-Istati Uniti tal-Amerika, flimkien maʼ sebgħa oħra. Il-mistoqsija kienet, Kellhom dawn l-aħwa fil-ħabs li kienu uffiċjali jerġgħu jiġu eletti? Jew posthom kellu jieħdu xi ħadd ieħor?
Evander J. Coward
Fiċ-ċella tal-ħabs tiegħu, Ħuna Rutherford inkwieta dwar il-futur tal-organizzazzjoni. Hu kien jaf li xi aħwa ħassew li kien ikun aħjar li jtellgħu lil xi ħadd ieħor bħala president. Għalhekk, kiteb ittra lil dawk preżenti għal-laqgħa tal-4 taʼ Jannar 1919, u nnomina lil Evander J. Coward għal president. Rutherford iddeskriva lil Coward bħala “kalm,” “diskret,” u “leali lejn il-Mulej.”
Madankollu, ħafna aħwa ppreferew soluzzjoni differenti, li jipposponu l-elezzjoni għal sitt xhur. L-avukati li ddefendew lill-aħwa fil-ħabs qablu maʼ dan. Waqt li kienu qed jiddiskutu x’se jagħmlu, xi aħwa bdew jitbaqbqu.Richard H. Barber
Imbagħad ġrat xi ħaġa li skont Richard H. Barber ikkalmat is-sitwazzjoni diffiċli. Wieħed mill-aħwa fl-attendenza qal: “M’iniex xi espert tal-liġi, imma naf x’hemm bżonn biex tkun leali. Il-lealtà hi dak li Alla jrid. Ma nistax nimmaġina x’fiduċja ikbar nistgħu nuru milli jkollna elezzjoni u nerġgħu ntellgħu lil Ħuna Rutherford bħala president.”—Salm 18:25.
Alexander H. Macmillan
A. H. Macmillan, li kien il-ħabs ukoll, iktar tard irrakkonta li l-għada Ħuna Rutherford ħabbatlu fuq il-ħajt taċ-ċella u qallu, “Oħroġ idek ’il barra.” Imbagħad, Ħuna Rutherford newwillu telegramma. Macmillan ra l-messaġġ qasir u mill-ewwel kien jaf xi jfisser. Il-messaġġ qal: “RUTHERFORD WISE VAN BARBER ANDERSON BULLY U SPILL DIRETTUR L-EWWEL TLIETA UFFIĊJALI INĦOBBUKOM.” Dan kien ifisser li d-diretturi kollha reġgħu ġew eletti u li Joseph Rutherford u William Van Amburgh baqgħu jaqdu bħala uffiċjali. B’hekk, Ħuna Rutherford kien se jkompli bħala president.
MEĦLUSIN!
Waqt li t-tmien aħwa kienu l-ħabs, Studenti tal-Bibbja leali għamlu petizzjoni biex jinħelsu l-aħwa. Dawn l-aħwa rġiel u nisa kuraġġużi ġabru iktar minn 700,000 firma mingħand in-nies. L-Erbgħa, 26 taʼ Marzu 1919, qabel ma ġiet preżentata l-petizzjoni, Ħuna Rutherford u l-aħwa l-oħra responsabbli nħelsu.
F’taħdita li ta lil dawk li laqgħuh lura, Ħuna Rutherford qal: “Jien konvint li din l-esperjenza li lkoll għaddejna minnha se sservi biss biex tippreparana għal iżjed żminijiet diffiċli. . . . Il-ġlieda tagħkom ma kinitx biex toħorġu lil ħutkom mill-ħabs. Dan ma kienx l-iskop veru taʼ dan ix-xogħol kollu. . . . Il-ġlieda tagħkom kienet bl-iskop li ġġib glorja lil Ġeħova, u dawk li ħadu sehem fiha rċivew barka mill-isbaħ.”
Iċ-ċirkustanzi li kienu fihom ħutna f’din il-prova jistgħu jindikaw li Ġeħova kien qed jidderieġi l-affarijiet. Fl-14 taʼ Mejju 1919, il-qorti tal-appell qatgħet is-sentenza: “L-akkużati f’dan il-każ ma kellhomx il-ġuri ġust . . . li kienu intitolati għalih, u għal din ir-raġuni s-sentenza nbidlet.” L-aħwa kienu nstabu ħatja taʼ kriminalitajiet serji u dawn kienu se jibqgħu jidhru fuq il-kondotta tagħhom kieku biss ġew maħfurin jew kieku s-sentenzi tagħhom sempliċement tnaqqsu. Ma kienx hemm iżjed akkużi kontrihom. B’hekk, Ħuna Rutherford * ma tilifx il-kwalifiki legali li kellu biex jiddefendi lill-poplu taʼ Ġeħova quddiem il-Qorti Suprema tal-Istati Uniti, xi ħaġa li għamel ħafna drabi wara li ġie meħlus.
DETERMINATI LI JIPPRITKAW
“Ma konniex se noqogħdu nitgħażżnu b’idejna fuq żaqqna waqt li nistennew lill-Mulej jiħodna s-sema,” qal Ħuna Macmillan. “Aħna rrealizzajna li kellna nagħmlu xi ħaġa biex insiru nafu x’kienet verament ir-rieda tal-Mulej.”
Imma l-aħwa fil-kwartieri ġenerali ma setgħux sempliċement ikomplu x-xogħol li kienu ilhom jagħmlu għal ħafna snin. Għala le? Għax waqt li kienu l-ħabs, il-pjanċi għall-istampar kollha li kienu jintużaw biex tiġi stampata l-letteratura kienu nqerdu. Dan kien taʼ skuraġġiment, u xi aħwa tħassbu jekk ix-xogħol tal-ippritkar kienx spiċċa.
Kien baqaʼ xi ħadd interessat fil-messaġġ tas-Saltna ppritkat mill-Istudenti tal-Bibbja? Biex iwieġeb din il-mistoqsija, Ħuna Rutherford iddeċieda li jagħti taħdita. Il-pubbliku kien se jiġi mistieden. Ħuna Macmillan qal: “Jekk ħadd ma jattendi din il-laqgħa jkun ifisser li x-xogħol tal-ippritkar ikun spiċċa.”
Riklam fuq il-gazzetta għat-taħdita “It-tama għall-umanità mnikkta” taʼ Ħuna Rutherford f’Los Angeles, Kalifornja, fl-1919
Allura ġara li l-Ħadd, 4 taʼ Mejju 1919, minkejja marda serja, Ħuna Rutherford ta t-taħdita “It-tama għall-umanità mnikkta” f’Los Angeles, Kalifornja. Madwar 3,500 persuna attendew il-laqgħa, u mijiet taʼ nies ma setgħux jattendu għax ma kienx hemm wisaʼ għalihom. L-għada attendew 1,500 persuna oħra. L-aħwa ħadu t-tweġiba—in-nies kienu interessati!
Dak li mbagħad għamlu l-aħwa ħejja t-triq għax-xogħol tal-ippritkar tax-Xhieda taʼ Ġeħova sal-lum.
LESTI GĦAL IŻJED TKABBIR
It-Torri tal-Għassa tal-1 t’Awwissu 1919 ħabbar li kmieni f’Settembru kien se jkun hemm konvenzjoni f’Cedar Point, Ohio.
Clarence B. Beaty, Student tal-Bibbja żagħżugħ minn Missouri, qal: “Kulħadd ħass li kellu jmur.” Iktar minn 6,000 ħu u oħt marru għal din il-laqgħa, bil-wisq iżjed milli kien mistenni. Il-200 persuna u iktar li tgħammdu f’Lake Erie fil-viċin żiedu mal-eċitament tal-okkażjoni.Il-qoxra tal-ewwel ħarġa taʼ The Golden Age, bid-data tal-1 t’Ottubru 1919
Fil-5 taʼ Settembru 1919, il-ħames jum tal-konvenzjoni, fit-taħdita tiegħu bit-titlu “Taħdita għall-ħaddiema sħabna,” Ħuna Rutherford ħabbar il-pubblikazzjoni taʼ rivista ġdida, jisimha The Golden Age. * Din kellha “titkellem dwar aħbarijiet kurrenti taʼ importanza, u tagħti spjegazzjoni Skritturali għala [kienu] qed iseħħu dawn il-ġrajjiet kbar.”
L-Istudenti tal-Bibbja kollha kienu inkuraġġiti biex jippritkaw bil-qlubija billi jużaw din il-pubblikazzjoni ġdida. F’ittra li ddeskriviet kif ix-xogħol kien se jkun organizzat kien hemm miktub: “Ħalli lil kull min ġie konsagrat [mgħammed] jiftakar li hu privileġġ kbir li jaqdi, u jaħtaf l-opportunità issa f’li jieħu sehem f’din ix-xhieda kbira lid-dinja.” Ir-reazzjoni kienet meraviljuża! Sa Diċembru, pubblikaturi żelużi tas-Saltna kienu ġabru iżjed minn 50,000 abbonament għar-rivista l-ġdida.
Aħwa fi Brooklyn, New York, b’tagħbija taʼ The Golden Age
Sa ma spiċċat l-1919, il-poplu taʼ Ġeħova reġaʼ ġie organizzat u msaħħaħ. Ukoll, diversi profeziji importanti dwar l-aħħar jiem kienu twettqu. L-ittestjar u l-irfinar tal-poplu t’Alla, imbassar f’Malakija 3:1-4, kien komplut. Il-poplu taʼ Ġeħova kien inħeles mill-jasar simboliku taʼ “Babilonja l-Kbira,” u Ġesù kien ħatar lill-“ilsir leali u għaqli.” * (Riv. 18:2, 4; Mt. 24:45) Issa l-Istudenti tal-Bibbja kienu lesti għax-xogħol li Ġeħova riedhom jagħmlu.