RAĠEL li jbassar it-​temp jeżamina stampa fuq ir-​radar li qed tiżviluppa. Hu jara maltempata perikoluża riesqa b’ħeffa lejn post li fih joqogħdu ħafna nies. Peress li hu konċernat mis-​sigurtà tagħhom, hu jwissihom bla waqfien qabel ikun tard wisq.

Bl-​istess mod, Ġeħova issa qed jiġbed l-​attenzjoni tal-​abitanti tal-​art lejn maltempata li hi iktar perikoluża minn kwalunkwe ħaġa li jistgħu jisimgħu dwarha fir-​rapport tat-​temp. Kif qed jagħmlu dan? U kif nistgħu nkunu ċerti li qed jagħti biżżejjed żmien lin-​nies biex jaġixxu? Biex insibu t-​tweġibiet, ejja l-​ewwel nikkunsidraw xi twissijiet li Ġeħova ta fil-​passat.

Fi żminijiet Bibliċi, Ġeħova wissa dwar diversi maltempati, jew atti taʼ ġudizzju, li kien se jġib kontra dawk li għal t’apposta m’obdewx il-​kmandi tiegħu. (Prov. 10:25; Ġer. 30:23) F’kull każ, hu wissa lin-​nies diżubbidjenti ħafna qabel iż-​żmien, u qalilhom x’kellhom jagħmlu biex jobduh. (2 Slat. 17:12-15; Neħ. 9:29, 30) Sabiex iħabbar il-​ġudizzji tiegħu, hu spiss uża lill-​qaddejja leali tiegħu fuq l-​art biex jinkuraġġixxi lin-​nies jagħmlu l-​bidliet meħtiġin u jifhmu li kellhom bżonn jaġixxu malajr.—Għam. 3:7.

Noè wera li kien wieħed minn dawn il-​qaddejja leali. Għal ħafna snin, hu bla biżaʼ wissa lin-​nies immorali u vjolenti taʼ żmienu dwar Dulluvju globali li kellu jiġi. (Ġen. 6:9-​13, 17) Hu qalilhom ukoll x’kellhom bżonn jagħmlu biex isalvaw—tant hu hekk li iktar tard issejjaħ “predikatur tal-​ġustizzja.”—2 Pt. 2:5.

Minkejja l-​isforzi taʼ Noè, in-​nies li kienu jgħixu qabel id-​Dulluvju injoraw il-​messaġġ tiegħu mogħti minn Alla. Huma wrew nuqqas kbir taʼ fidi. B’hekk, mietu meta d-​Dulluvju ‘ġie u kinishom ilkoll.’ (Mt. 24:39; Ebr. 11:7) Hekk kif qorob it-​tmiem tagħhom, qatt ma setgħu jgħidu li Alla ma kienx wissiehom.

Drabi oħra, Ġeħova wissa lil individwi ftit qabel bdiet il-​maltempata tal-​ġudizzju tiegħu. Xorta waħda, hu għamel ċert li dawk affettwati ngħataw biżżejjed żmien biex jaġixxu. Pereżempju, hu pprovda twissijiet minn qabel matul l-​Għaxar Kastigi li ġew fuq l-​Eġittu tal-​qedem. Bħala eżempju, Ġeħova bagħat lil Mosè u Aron biex iwissu lill-​Fargħun u l-​qaddejja tiegħu dwar is-​sebaʼ kastig, xita taʼ silġ qerrieda. Ladarba s-​silġ kien se jibda nieżel mill-​għada, tahom Alla biżżejjed żmien biex isibu kenn u jaħarbu mill-​maltempata? Il-​Bibbja tgħid: “Kulmin beżaʼ mill-​kelma taʼ Ġeħova fost il-​qaddejja tal-​Fargħun ġiegħel lill-​qaddejja tiegħu u lill-​bhejjem tiegħu jaħarbu lejn djarhom, imma kulmin qalbu ma qanqlitux biex jagħti kas il-​kelma taʼ Ġeħova ħalla l-​qaddejja tiegħu u l-​bhejjem tiegħu fir-​rabaʼ.” (Eżo. 9:18-21) Biċ-​ċar, Ġeħova ta biżżejjed twissija, sabiex dawk li aġixxew malajr ma batewx daqs oħrajn.

Il-​Fargħun u l-​qaddejja tiegħu ġew imwissijin ukoll qabel l-​għaxar kastig. Madankollu, b’nuqqas t’għaqal irrifjutaw it-​twissija. (Eżo. 4:22, 23) B’hekk, raw lill-​ewwel imweldin subien tagħhom imutu. Kemm kien taʼ niket dan! (Eżo. 11:4-10; 12:29) Setgħu huma jagħtu kas it-​twissija qabel kien tard wisq? Iva! Mosè mill-​ewwel wissa lill-​Iżraelin dwar l-​għaxar kastig li kien riesaq u qalilhom x’kellhom jagħmlu biex isalvaw lill-​familji tagħhom. (Eżo. 12:21-28) Kemm kien hemm  nies li obdew it-​twissija? Skont xi kalkoli, tliet miljun ruħ, inkluż Iżraelin u “kotra mħallta kbira ħafna” taʼ wħud mhux Iżraelin u Eġizzjani, kienu ħelsuha mill-​ġudizzju t’Alla u telqu mill-​Eġittu.—Eżo. 12:38.

Bħalma juru dawn l-​eżempji, Ġeħova dejjem għamel ċert li n-​nies kellhom biżżejjed żmien biex jagħtu kas it-​twissijiet tiegħu. (Dt. 32:4) Għal liema raġuni kien jagħmel dan Alla? L-​appostlu Pietru spjega li Ġeħova “ma jixtieqx li xi ħadd jinqered imma jixtieq li kulħadd jasal għall-​indiema.” (2 Pt. 3:9) Iva, Alla kien jimpurtah min-​nies. Hu riedhom jindmu u jaġixxu fuq il-​parir tiegħu qabel wasal il-​ġudizzju tiegħu.—Is. 48:17, 18; Rum. 2:4.

Illum, ukoll, in-​nies kollha għandhom jobdu minn twissija urġenti li qed tingħata madwar id-​dinja. Meta Ġesù kien fuq l-​art, hu wissa li s-​sistema preżenti fl-​aħħar mill-​aħħar kienet se tinqered matul “tribulazzjoni kbira.” (Mt. 24:21) Dwar dan il-​ġudizzju tal-​futur, hu pprovda profezija dettaljata li fiha ddeskriva x’kellhom jistennew li jaraw u jesperjenzaw is-​segwaċi tiegħu hekk kif dak iż-​żmien qorob. B’hekk, Ġesù ddeskriva ġrajjiet globali importanti li qed narawhom iseħħu llum.—Mt. 24:3-12; Lq. 21:10-13.

Fi qbil maʼ din il-​profezija, Ġeħova issa qed iħeġġeġ lil kulħadd biex jissottometti lilu nnifsu għat-​tmexxija taʼ mħabba tiegħu. Hu jixtieq li nies ubbidjenti jgawdu ħajja aħjar issa kif ukoll il-​barkiet futuri fid-​dinja l-​ġdida ġusta tiegħu. (2 Pt. 3:13) Ġeħova jrid jgħin lin-​nies ikollhom fidi fil-​wegħdi tiegħu. Hu jgħinhom jagħmlu dan billi jagħtihom messaġġ li jsalvalhom ħajjithom. Dan il-​messaġġ hu “l-​aħbar tajba tas-​saltna,” li Ġesù bassar li kellha “tiġi pridkata fl-​art abitata kollha bħala xiehda lill-​ġnus kollha.” (Mt. 24:14) Alla organizza lill-​adoraturi veri tiegħu biex jagħtu din ix-​“xiehda,” jew jippritkaw dan il-​messaġġ mingħand Alla, f’xi 240 pajjiż. Ġeħova jrid lil kemm jistaʼ jkun nies jagħtu kas it-​twissija u jaħarbu mill-​“maltempata” tal-​ġudizzju ġust tiegħu.—Sof. 1:14, 15; 2:2, 3.

Mela, il-​mistoqsija importanti mhix jekk Ġeħova jagħtix lin-​nies biżżejjed żmien biex jaġixxu għat-​twissijiet tiegħu. L-​evidenza turi li dejjem hekk jagħmel. Minflok, il-​mistoqsija importanti tibqaʼ: In-​nies se jagħtu kas it-​twissija t’Alla qabel ma jkun tard wisq? Bħala l-​messaġġiera t’Alla, jalla nkomplu ngħinu lil kemm jistaʼ jkun nies biex jibqgħu ħajjin wara li tgħaddi din is-​sistema.