1. Il-​Kristjani mgħammdin kollha x’għandhom ikomplu jagħmlu?

INT mgħammed? Jekk iva, meta tgħammidt urejt quddiem kulħadd li għandek fidi f’Ġeħova u li tixtieq taqdih mal-​organizzazzjoni tiegħu. * Ovvjament, il-​fidi tiegħek f’Ġeħova għandha tkompli tissaħħaħ u trid tkun konvint li din hi l-​organizzazzjoni li hu qed juża llum biex twettaq ix-​xogħol tiegħu.

2-3. Liema tliet kwalitajiet qed juża Ġeħova biex imexxi l-​organizzazzjoni tiegħu llum? Agħti eżempji.

² Illum, il-​mod kif Ġeħova jmexxi l-​organizzazzjoni tiegħu juri x’tip taʼ persuna hu, xi skop jixtieq iwettaq, u x’inhuma l-​livelli tiegħu. Ejja naraw tliet kwalitajiet li nistgħu nitgħallmu dwaru.

³ L-​ewwel, “Alla mhux parzjali.” (Atti 10:34) L-​imħabba wasslitu biex jagħti lil Ibnu ‘bħala fidwa għal kulħadd.’ (1 Tim. 2:6; Ġw. 3:16) Fil-​fatt, Ġeħova juża lin-​nies tiegħu biex jippritkaw l-​aħbar tajba lil dawk kollha li jridu jisimgħu. B’dan il-​mod, kulħadd jistaʼ jibbenefika mill-​fidwa, jiġifieri, isalva. It-​tieni, Ġeħova jħobb il-​paċi u li l-​affarijiet ikunu organizzati. (1 Kor. 14:33, 40) Allura, aħna nistennew ukoll li l-​qaddejja tiegħu se jaqduh fil-​paċi u b’mod organizzat. It-​tielet, Ġeħova hu “l-​Istruttur Grandjuż.” (Is. 30:20, 21) Għalhekk, l-​organizzazzjoni tiegħu taħdem iebes biex tgħallem il-​Kelma tiegħu. Dan tagħmlu kemm permezz  tal-​kongregazzjonijiet u kemm permezz tal-​ministeru. Issa se nwieġbu dawn il-​mistoqsijiet: Kif il-​Kristjani tal-​bidu imitaw dawn it-​tliet kwalitajiet? Kif fi żminijiet moderni n-​nies taʼ Ġeħova għamlu dan? U kif l-​ispirtu qaddis jistaʼ jgħin lilek taqdi mal-​organizzazzjoni taʼ Ġeħova llum?

4. F’​Atti 1:8, Ġesù xi kmandahom jagħmlu lis-​segwaċi tiegħu, u x’għajnuna wegħedhom?

⁴ Fi żmien il-​Kristjani tal-​bidu. Il-​messaġġ li Ġesù pprietka ta tama lin-​nies kollha. (Lq. 4:43) Hu kmanda lis-​segwaċi tiegħu biex ikomplu x-​xogħol li hu kien beda, u biex jagħmlu dan “sa l-​iktar parti mbiegħda taʼ l-​art.” (Aqra Atti 1:8.) Ovvjament, dan ix-​xogħol ma setax isir bil-​ħila tagħhom biss. Huma kellhom bżonn “l-​ajjutant,” jiġifieri, l-​ispirtu qaddis, li Ġesù kien wegħedhom.—Ġw. 14:26; Żak. 4:6.

5-6. L-​ispirtu qaddis b’liema modi għen lis-​segwaċi taʼ Ġesù?

⁵ Is-​segwaċi taʼ Ġesù rċivew l-​ispirtu qaddis f’Pentekoste tas-​sena 33. Permezz tiegħu huma mill-​ewwel bdew jippritkaw, u wara ftit, eluf aċċettaw l-​aħbar tajba. (Atti 2:41; 4:4) Meta n-​nies bdew jippersegwitawhom, id-​dixxipli ma beżgħux u baqgħu jippritkaw. Minflok, huma talbu lil Alla għall-​għajnuna. Kliemhom kien: “Agħmel li l-​ilsiera tiegħek jibqgħu jitkellmu l-​kelma tiegħek bil-​qlubija kollha.” Imbagħad huma mtlew bl-​ispirtu qaddis u baqgħu “jxandru l-​kelma t’Alla bil-​qlubija.”—Atti 4:18-​20, 29, 31.

⁶ Id-​dixxipli taʼ Ġesù kellhom sfidi oħra. Pereżempju, ma kienx hemm ħafna kopji tal-​Iskrittura. Huma ma kellhomx kotba li jispjegaw il-​Bibbja bħalma għandna llum. Sfida oħra kienet li d-​dixxipli kellhom jippritkaw lin-​nies li jitkellmu b’ħafna lingwi differenti. Minkejja dawn l-​isfidi kollha, dawn id-​dixxipli żelużi għamlu affarijiet li kienu jidhru impossibbli. Madwar 30 sena wara, huma kienu ppritkaw “fil-​ħolqien kollu.”—Kol. 1:6, 23.

7. Iktar minn 100 sena ilu, in-​nies taʼ Ġeħova kif kienu jafu x’ried Alla, u huma x’għamlu?

⁷ Fi żminijiet moderni. Ġeħova kompla jmexxi u jsaħħaħ lin-​nies tiegħu. Dan għamlu l-​iktar permezz tal-​Bibbja li nkitbet bl-​ispirtu tiegħu. Fiha nsibu rakkonti dwar il-​ministeru taʼ Ġesù u l-​kmand li hu ta lis-​segwaċi tiegħu biex ikomplu x-​xogħol li hu beda. (Mt. 28:19, 20) F’Lulju tas-​sena 1881, din ir-​rivista qalet: “Ġeħova ma għażilniex biex nieħdu l-​krettu aħna jew biex insiru sinjuri, imma biex aħna nużaw dak kollu li għandna biex l-​aħbar tajba tiġi pritkata.” Il-​ktieb li ħareġ fl-​1919, bl-​isem To Whom the Work Is Entrusted, qal: “Hemm ħafna xogħol xi jsir, imma dan huwa x-​xogħol tal-​Mulej, u hu bis-​saħħa tiegħu li se nagħmluh.” Iva, bħal Kristjani tal-​bidu, dawn l-​aħwa kienu kuraġġużi u ħadmu iebes għax kienu konvinti li l-​ispirtu qaddis kien se jgħinuhom jippritkaw lil kull tip taʼ nies. Anki aħna konvinti li l-​ispirtu qaddis se jgħinna.

8-9. Matul is-​snin, l-​organizzazzjoni taʼ Ġeħova x’għodda użat biex tipprietka?

⁸ L-​organizzazzjoni taʼ Ġeħova minn dejjem użat l-​aqwa għodda biex l-​aħbar tajba tiġi pritkata. Mhux biss kien hemm pubblikazzjonijiet ipprintjati imma kien hemm ukoll il-​“Photo-​Drama of Creation,” il-​fonografi, il-​karozzi bis-​sawnd, l-​istazzjon tar-​radju u, fi snin riċenti, l-​użu tat-​teknoloġija. Apparti dawn l-​affarijiet, l-​organizzazzjoni qed tipprovdi wkoll informazzjoni b’iktar minn elf lingwa.  Għala? Biex kulħadd ikun jistaʼ jismaʼ l-​aħbar tajba bil-​lingwa tiegħu stess. Ġeħova mhux parzjali; minn qabel hu bassar li l-​aħbar tajba kienet se tiġi pritkata “lil kull ġens u tribù u lsien u poplu.” (Riv. 14:6, 7) Ġeħova jrid li kulħadd ikun jistaʼ jismaʼ l-​messaġġ tas-​Saltna.

⁹ Imma xi ngħidu għan-​nies li ma nistgħux nitkellmu magħhom minn bieb għal bieb, forsi minħabba li jgħixu f’postijiet li mhux permess nidħlu? Biex nilħqu lil dawn in-​nies, Ġeħova għen lill-​organizzazzjoni tiegħu tibda tuża tipi differenti taʼ pritkar f’postijiet pubbliċi. Pereżempju, fl-​2001, il-​Ġemgħa li Tiggverna approvat li l-​aħwa fi Franza jibdew jużaw l-​istands u l-​imwejjed. Maż-​żmien, aħwa f’pajjiżi oħra wkoll bdew jagħmlu dan. Ir-​riżultati kienu sbieħ ħafna. Fl-​2011, beda programm bi prova fi New York City. Matul l-​ewwel sena, l-​aħwa ħallew iktar minn 100,000 ktieb u 68,911-​il rivista. U madwar 4,500 persuna xtaqet tistudja l-​Bibbja! Dan wera ċar li l-​ispirtu qaddis kien qed jgħin biex dax-​xogħol jirnexxi. Għalhekk, il-​Ġemgħa li Tiggverna approvat li l-​aħwa mad-​dinja kollha setgħu jibdew jużaw dawn il-​metodi taʼ pritkar.

10. X’nistgħu nagħmlu biex intejbu l-​mod kif nippritkaw u ngħallmu?

¹⁰ X’tistaʼ tagħmel int. Waqt il-​laqgħat, Ġeħova jgħallimna kif nippritkaw. Għalhekk, ikun tajjeb li tipprova tuża dak li titgħallem. Ipprietka b’mod regolari mal-​grupp tas-​servizz tiegħek. L-​aħwa fil-​grupp jistgħu jgħinuk ittejjeb il-​mod kif tipprietka u tgħallem, u anki jinkuraġġuk bl-​eżempju tagħhom. Anki meta jkun diffiċli, ibqaʼ pprietka. Bħalma turi l-​iskrittura prinċipali taʼ dan l-​artiklu, aħna nistgħu nagħmlu dak li jrid Alla għax hu jgħinna bl-​ispirtu tiegħu. (Żak. 4:6) Wara kollox, dan hu x-​xogħol tiegħu.

11. Il-​ġemgħa li tiggverna f’Ġerusalemm kif ħadmet biex ikun hemm l-​ordni u l-​paċi fost in-​nies t’Alla?

¹¹ Fi żmien il-​Kristjani tal-​bidu. Il-​ġemgħa li tiggverna f’Ġerusalemm ħadmet biex ikun hemm l-​ordni u l-​paċi  fost in-​nies t’Alla. (Atti 2:42) Pereżempju, meta fis-​sena 49 kien hemm nuqqas taʼ qbil dwar jekk kulħadd kellux bżonn jagħmel iċ-​ċirkonċiżjoni, il-​ġemgħa li tiggverna ddiskutiet din il-​problema bl-​għajnuna tal-​ispirtu qaddis. Kieku l-​kongregazzjoni baqgħet mifruda fuq din il-​kwistjoni, ix-​xogħol tal-​ippritkar kien se jmur minn taħt. Għalkemm kienu Lhud, l-​appostli u rġiel oħra ma ħallewx it-​tradizzjonijiet jew it-​tagħlim Lhudi jinfluwenzahom. Minflok, huma fittxew fil-​Kelma t’Alla u talbu lil Ġeħova biex permezz tal-​ispirtu qaddis tiegħu jgħinhom jieħdu deċiżjoni tajba. (Atti 15:1, 2, 5-​20, 28) X’kien ir-​riżultat? Ġeħova bierek id-​deċiżjoni tagħhom, il-​kongregazzjoni baqgħet fil-​paċi u magħquda, u l-​aħbar tajba baqgħet tiġi ppritkata.—Atti 15:30, 31; 16:4, 5.

12. X’juri li l-​organizzazzjoni taʼ Ġeħova hi organizzata u għandha l-​paċi?

¹² Fi żminijiet moderni. L-​organizzazzjoni taʼ Ġeħova għenet lill-​poplu t’Alla jibqaʼ organizzat u fil-​paċi. Lura fis-​sena 1895, il-​ħarġa taʼ It-​Torri tal-​Għassa taʼ Sijon li Jħabbar il-​Preżenza taʼ Kristu tal-​15 taʼ Novembru, kellu artiklu bit-​titlu “Bid-​Deċenza u bl-​Ordni,” li kien ibbażat fuq l-​iskrittura tal-​1 Korintin 14:40. L-​artiklu qal: “L-​appostli kitbu ħafna affarijiet lill-​kongregazzjonijiet tal-​bidu dwar l-​ordni . . . Huwa importanti li nibqgħu nobdu għax ‘kulma nkiteb minn qabel inkiteb għall-​istruzzjoni tagħna.’” (Rum. 15:4) Din hi l-​istess xewqa li l-​organizzazzjoni għandha llum. Ejja nġibu eżempju: Jekk tmur f’kongregazzjoni oħra f’pajjiżek jew madwar id-​dinja, inti taf kif se jsir l-​Istudju taʼ It-​Torri tal-​Għassa u liema wieħed se jiġi studjat. B’hekk, mill-​ewwel tħossok komdu! U dan hu possibbli biss għax hemm l-​ispirtu t’Alla.—Sof. 3:9.

13. Bil-​kliem taʼ Ġakbu 3:17 f’moħħna, liema mistoqsijiet għandna nsaqsu lilna nfusna?

¹³ X’tistaʼ tagħmel int. Ġeħova jrid li n-​nies tiegħu jkunu magħqudin. (Efes. 4:1-​3) Għalhekk, saqsi lilek innifsek: ‘Nipprova jien inżomm il-​paċi u l-​għaqda fil-​kongregazzjoni? Nobdi lil dawk li  qed imexxu? Jekk għandi responsabbiltajiet fil-​kongregazzjoni, jistgħu oħrajn jafdawni? Oħrajn jistgħu jistrieħu fuqi u jafu li lest li ngħin?’ (Aqra Ġakbu 3:17.) Jekk tinduna li għandek fuq xiex taħdem, itlob għall-​ispirtu qaddis. Iktar ma tħalli l-​ispirtu qaddis jgħinek tbiddel il-​personalità tiegħek u kif iġġib ruħek, l-​aħwa iktar se jħobbuk u japprezzawk.

14. Skont Kolossin 1:9, 10, Ġeħova kif għen lin-​nies tiegħu jifhmu “l-​għarfien eżatt” dwaru?

¹⁴ Fi żmien il-​Kristjani tal-​bidu. Ġeħova jieħu pjaċir jgħallem lin-​nies tiegħu. (Salm 32:8) Hu jixtieqhom isiru jafuh, iħobbuh, u jgħixu għal dejjem bħala wliedu. Dan ma jistax isir kieku ma jgħallimniex. (Ġw. 17:3) Ġeħova uża lill-​kongregazzjoni tal-​bidu biex jgħallem lin-​nies tiegħu. (Aqra Kolossin 1:9, 10.) Anki l-​ispirtu qaddis, l-​“ajjutant,” li Ġesù kien wiegħed għen lid-​dixxipli. (Ġw. 14:16) Dan għenhom jifhmu l-​Kelma t’Alla u jiftakru dak kollu li qal u għamel Ġesù. Dawn l-​affarijiet setgħu jaqraw dwarhom iktar tard fl-​Evanġelji. Dan it-​tagħlim saħħaħ il-​fidi tal-​Kristjani tal-​bidu kif ukoll l-​imħabba tagħhom għal Alla, għal Ibnu, u għal xulxin.

15. Int b’liema mod rajt il-​profezija taʼ Isaija 2:2, 3 titwettaq?

¹⁵ Fi żminijiet moderni. Ġeħova bassar “li fl-​aħħar parti tal-​jiem” nies minn kull ġens kienu se jiġu lejn “il-​muntanja,” jiġifieri, kienu se jingħaqdu mal-​qaddejja veri tiegħu. (Aqra Isaija 2:2, 3.) Aħna qed naraw din il-​profezija titwettaq. Nistgħu naraw id-​differenza kbira li hemm bejn ir-​reliġjon vera u r-​reliġjon falza. U x’festa taʼ ikel spiritwali qed jipprovdilna Ġeħova! (Is. 25:6) Dan jagħmlu permezz tal-​“ilsir leali u għaqli.” Huma jipprovdu  l-​ikel spiritwali b’modi differenti. Pereżempju, nistgħu naqraw artikli, nisimgħu taħditiet, u naraw vidjows kemm għall-​kbar kif ukoll għat-​tfal. (Mt. 24:45) Aħna naqblu maʼ dak li qal Eliħu, il-​ħabib taʼ Ġob: “Liema għalliem iħabbatha [m’Alla]?”—Ġob 36:22.

16. X’tistaʼ tagħmel biex tibbenefika mit-​tagħlim taʼ Ġeħova?

¹⁶ X’tistaʼ tagħmel int. L-​ispirtu t’Alla jistaʼ jgħinek tapplika dak li taqra u tistudja mill-​Bibbja. Itlob bħalma talab is-​salmista, meta qal: “Istruwini, O Ġeħova, dwar triqtek. Jien se nimxi fil-​verità tiegħek. Agħtini qalb sħiħa biex nibżaʼ minn ismek.” (Salm 86:11) Ukoll, kompli aqra u studja l-​Bibbja u pubblikazzjonijiet oħra li l-​organizzazzjoni tipprovdi. Bla dubju, il-​mira tiegħek m’għandhiex tkun li jkollok ħafna għarfien, imma li tkun konvint li din hi l-​verità u tapplikaha f’ħajtek. Ġeħova jistaʼ jgħinek tagħmel dan bl-​ispirtu tiegħu. Ikun tajjeb ukoll li tinkuraġġixxi lill-​aħwa. (Ebr. 10:24, 25) Għala? Għax huma l-​familja spiritwali tiegħek. Itlob lil Ġeħova biex jgħinek tagħti kummenti minn qalbek waqt il-​laqgħat. U meta jkollok taħdita, agħmel dak kollu li tistaʼ. Meta tagħmel dawn l-​affarijiet, int turi lil Ġeħova u lil Ibnu li għalik “in-​nagħaġ” tiegħu huma prezzjużi.—Ġw. 21:15-​17.

17. B’liema modi tistaʼ turi li qed taħdem lealment mal-​organizzazzjoni taʼ Ġeħova?

¹⁷ Dalwaqt, l-​unika organizzazzjoni li se tibqaʼ fuq l-​art hi dik immexxiha mill-​ispirtu t’Alla. Allura, mill-​qalb aħdem mal-​organizzazzjoni taʼ Ġeħova. Bħal Alla, uri li tħobb lin-​nies kollha billi tipprietka maʼ kull min tiltaqaʼ. Meta int iżżomm il-​paċi fil-​kongregazzjoni, int tkun qed timitah għax hu jħobb l-​ordni u l-​paċi. U ismaʼ mill-​Istruttur Grandjuż billi tieħu vantaġġ sħiħ biex titgħallem mill-​informazzjoni kollha li hu qed jipprovdi. Imbagħad, meta d-​dinja taʼ Satana tispiċċa, m’intix se tibżaʼ. Minflok, ħa tkun kuraġġuż u ħa tkun fost dawk li qed jaqdu lil Ġeħova lealment fl-​organizzazzjoni tiegħu.