1. Kif nafu li x-​xogħol taʼ li nagħmlu dixxipli jsalva l-​ħajja tan-​nies?

IX-​XOGĦOL taʼ li nagħmlu dixxipli jsalva l-​ħajja tan-​nies! Kif nafu? Meta Ġesù ta l-​kmand li nsibu f’​Mattew 28:19, 20, hu qal: “Morru u agħmlu dixxipli . . . , [u] għammduhom.” ll-​magħmudija kemm hi importanti? Ħafna! Għax biex ngħixu għal dejjem irridu nitgħammdu. Xi ħadd li jrid jitgħammed għandu jemmen li hu jistaʼ jgħix għal dejjem minħabba li Ġesù miet għalina u ġie rxoxtat. Hu għalhekk li l-​appostlu Pietru qal lil ħutu l-​Kristjani li l-​magħmudija “issa qed issalva lilkom, . . . permezz taʼ l-​irxoxt taʼ Ġesù Kristu.” (1 Pt. 3:21) Għalhekk, meta dixxiplu jitgħammed, hu jistaʼ jkollu t-​tama li jgħix għal dejjem.

2. Skont it-​2 Timotju 4:1, 2, x’tip taʼ għalliema għandna nkunu?

² Biex nagħmlu dixxipli rridu niżviluppaw “l-​arti tat-​tagħlim,” jiġifieri, insiru għalliema tajbin. (Aqra t-​2 Timotju 4:1, 2.) Għala? Għax Ġesù kkmandana: “Morru u agħmlu dixxipli . . . , u għallmuhom.” U anki l-​appostlu Pawlu qal: “Żomm maʼ dawn l-​affarijiet, għax jekk tagħmel dan issalva kemm lilek innifsek u kemm lil dawk li jisimgħuk.” Mela bir-​raġun li Pawlu qal ukoll: “Oqgħod attent il-​ħin kollu . . . għat-​tagħlim tiegħek.” (1 Tim. 4:16) Minħabba li biex nagħmlu dixxipli rridu nkunu għalliema tajbin, il-​mod kif ngħallmu għandu jkun effettiv.

3. X’se nikkunsidraw f’dan l-​artiklu?

³ Mad-​dinja kollha qed isiru miljuni taʼ studji tal-​Bibbja. Imma kif qal l-​artiklu taʼ qabel dan, aħna rridu nkunu  nafu kif nistgħu ngħinu iktar lill-​istudenti tal-​Bibbja jaslu għall-​magħmudija. F’dan l-​artiklu se naraw ħames affarijiet li għalliem għandu jagħmel biex l-​istudent tiegħu jitgħammed u jsir dixxiplu taʼ Ġesù Kristu.

4. Għalliem għala m’għandux jitkellem ħafna meta jkun qed jikkonduċi studju tal-​Bibbja? (Ara wkoll in-​nota taʼ taħt.)

⁴ Aħna nieħdu pjaċir ngħallmu dak li nafu dwar il-​Kelma t’Alla. Għalhekk, forsi naqgħu fin-​nassa li nitkellmu ħafna. Però, sew jekk nikkonduċu l-​Istudju taʼ It-​Torri tal-​Għassa, l-​Istudju tal-​Bibbja tal-​Kongregazzjoni, jew studju tal-​Bibbja fid-​dar, il-​persuna li qed tikkonduċi l-​istudju m’għandhiex titkellem ħafna. Biex għalliem juża l-​Bibbja b’mod effettiv, hu m’għandux jispjega dak kollu li jaf dwar vers jew suġġett. * (Ġw. 16:12) Aħseb dwar dak li kont taf meta tgħammidt u dak li taf issa. X’aktarx meta tgħammidt, int kont fhimt biss tagħlim bażiku tal-​Bibbja. (Ebr. 6:1) Għaddew is-​snin biex tgħallimt dak li taf illum, mela tipprovax tgħallem lil student ġdid kollox f’daqqa.

5. (a) Skont l-​1 Tessalonikin 2:13, xi rridu li l-​istudent jifhem? (b) Kif nistgħu ninkuraġġuh jitkellem maʼ oħrajn dwar dak li qed jitgħallem?

⁵ Aħna rridu li l-​istudent tagħna jifhem li dak li qed jitgħallem huwa mill-​Bibbja. (Aqra l-​1 Tessalonikin 2:13.) Kif nistgħu nagħmlu dan? Inkuraġġih jitkellem maʼ oħrajn dwar dak li qed jitgħallem billi, minflok tispjega l-​versi tal-​Bibbja dejjem int, staqsih biex jispjega xi versi hu. Għin lill-​istudent biex jara kif il-​Kelma t’Alla tapplika għalih. Staqsih mistoqsijiet li jgħinuh jesprimi dak li jaħseb u dak li jħoss dwar il-​vers li tkunu qrajtu. (Lq. 10:25-​28) Pereżempju, staqsih: “Din l-​iskrittura kif tgħinek tara waħda mill-​kwalitajiet taʼ Ġeħova?” “Dan li għadek kif tgħallimt mill-​Bibbja kif jistaʼ jgħinek?” “Kif tħossok dwaru?” (Prov. 20:5) L-​importanti mhux kemm jaf l-​istudent, imma kemm iħobb u japplika dak li jaf.

6. Għala jkun tajjeb li tieħu pubblikatur tal-​esperjenza miegħek fuq l-​istudju?

⁶ Jekk qed tikkonduċi studju tal-​Bibbja, ġieli ħadt xi pubblikatur tal-​esperjenza miegħek? Jekk iva, tistaʼ tistaqsih jekk hux qed tikkonduċi l-​istudju  sew u jekk hux qed tuża l-​Bibbja b’mod tajjeb biex tgħallem. Biex issir għalliem aħjar trid tkun umli. (Qabbel Atti 18:24-​26.) Wara saqsi lill-​pubblikatur tal-​esperjenza x’jaħseb dwar l-​istudent, jekk hux qed jifhem dak li qed jitgħallem. Jekk ma tkunx tistaʼ tikkonduċi l-​istudju int għal xi ġimgħat, tistaʼ wkoll issaqsi l-​istess pubblikatur biex jikkonduċi l-​istudju hu. Dan se jgħin biex l-​istudju jsir b’mod regolari u biex l-​istudent jara kemm hu importanti. Qatt taħseb li l-​istudju hu “tiegħek” u li ħadd ma jistaʼ jagħmlu minflokok. Wara kollox, inti tixtieq l-​aħjar lill-​istudent tiegħek biex hu jkun jistaʼ jkompli jitgħallem dwar il-​verità.

7. X’jistaʼ jgħin lill-​istudent ikun irid jitgħallem iktar?

⁷ L-​istudent għandu bżonn jara li int tħobb u temmen dak li tgħallem. (1 Tess. 1:5) Imbagħad hu se jkun irid jitgħallem iktar. Forsi tistaʼ tgħidlu kif il-​Bibbja għenitek fil-​ħajja tiegħek. Imbagħad hu se jara li l-​Bibbja fiha gwida prattika li hu jistaʼ jibbenefika minnha wkoll.

8. X’tistaʼ tagħmel iktar biex tgħin lill-​istudent tal-​Bibbja tiegħek, u għala?

⁸ Matul l-​istudju tal-​Bibbja, semmi xi esperjenzi taʼ aħwa li kellhom l-​istess problemi bħalu u rnexxielhom jegħlbuhom. Għall-​istudju tistaʼ tieħu wkoll lil xi ħadd mill-​kongregazzjoni li l-​eżempju tiegħu jistaʼ jgħinu. Jew tistaʼ turih esperjenzi inkuraġġanti minn fuq jw.org, mis-​serje “Il-​Bibbja Tbiddel il-​Ħajjiet.” * Artikli u vidjows bħal dawn jistgħu jgħinu lill-​istudent biex jirrealizza li l-​prinċipji tal-​Bibbja jistgħu jgħinuh jagħmel bidliet f’ħajtu.

9. Kif tistaʼ tinkuraġġixxi lill-​istudent biex jaqsam dak li qed jitgħallem mal-​familja u l-​ħbieb tiegħu?

⁹ Jekk l-​istudent hu miżżewweġ, il-​mara tiegħu qed tistudja? Jekk le, stieden lill-​mara tiegħu biex toqgħod magħkom għall-​istudju. Inkuraġġih biex jaqsam dak li qed jitgħallem mal-​familja u l-​ħbieb tiegħu. (Ġw. 1:40-​45) Kif? Forsi billi tistaqsih: “Kif tispjega dan il-​punt?” jew “Liema skrittura tuża biex turi li hu minnu?” B’dan il-​mod tkun qed tittrennja lill-​istudent isir għalliem.  Imbagħad meta jikkwalifika, hu jistaʼ jibda jipprietka bħala pubblikatur mhux mgħammed. Tistaʼ tistaqsih ukoll jekk jafx lil xi ħadd li jixtieq jitgħallem il-​Bibbja. Jekk iva, flimkien tistgħu tirranġaw biex tiltaqgħu mal-​persuna u turuha l-​vidjow X’jiġri matul studju tal-​Bibbja? *

10. Għalliem kif jistaʼ japplika l-​1 Tessalonikin 2:7, 8?

¹⁰ L-​għalliema għandhom jieħdu interess personali fl-​istudenti. Ftakar li huma dalwaqt jistgħu jsiru ħutek spiritwali. (Aqra l-​1 Tessalonikin 2:7, 8.) Għalihom mhuwiex faċli biex jitilqu l-​ħbieb tad-​dinja u jagħmlu l-​bidliet li hemm bżonn biex jaqdu lil Ġeħova. Irridu ngħinuhom isibu ħbieb tajbin fil-​kongregazzjoni. Kun ħabib tal-​istudent tiegħek billi tqattaʼ l-​ħin miegħu tagħmel affarijiet oħra u mhux l-​istudju biss. Telefonata, messaġġ, jew billi tgħaddi sa ħdejh bejn studju u ieħor se turih li vera jimpurtak minnu.

11. L-​għalliem kif jistaʼ jgħin lill-​istudent iħossu komdu fil-​kongregazzjoni, u għala?

¹¹ Proverbju Afrikan jgħid: “Biex trabbi tifel hemm bżonn in-​nies tar-​raħal kollu.” Aħna nistgħu ngħidu: “Biex student jitgħammed hemm bżonn kongregazzjoni sħiħa.” Għalhekk, għalliem tajjeb se jgħin lill-​istudent tiegħu jsir jaf lill-​aħwa tal-​kongregazzjoni. Imbagħad, l-​istudent jistaʼ jibda jgawdi l-​ħbiberija tal-​aħwa, u dawn l-​aħwa jistgħu jgħinuh isir ħabib aħjar taʼ Ġeħova u jinkuraġġuh meta jiffaċċja l-​problemi. Aħna rriduh iħossu komdu u parti mill-​kongregazzjoni. Ukoll, irriduh jara l-​imħabba li għandna bejnietna u jsir parti mill-​organizzazzjoni. Imbagħad se jkun iktar faċli għalih li ma jibqax jagħmilha maʼ nies li mhumiex se jgħinuh iħobb lil Ġeħova. (Prov. 13:20) U jekk il-​ħbieb tiegħu jwarrbuh, hu se jkun jaf li jistaʼ jsib ħbieb tajbin fl-​organizzazzjoni taʼ Ġeħova.—Mk. 10:29, 30; 1 Pt. 4:4.

12. Għala għandna nitkellmu spiss dwar id-​dedikazzjoni u l-​magħmudija mal-​istudent tagħna?

¹² Bħala għalliem, mal-​istudent tiegħek spiss semmi kemm hu importanti li xi ħadd jiddedika ħajtu lil Ġeħova  u  jitgħammed. Wara kollox, aħna għalhekk nistudjaw man-​nies. Wara li jkun studja għal ftit xhur u mbagħad jibda jiġi l-​laqgħat, hu jrid jifhem li aħna rridu ngħinuh isir wieħed mix-​Xhieda taʼ Ġeħova.

13. Student x’għandu jagħmel biex jitgħammed?

¹³ Hemm diversi affarijiet li student tal-​Bibbja li jrid jitgħammed għandu jagħmel. L-​ewwel, l-​istudent għandu jsir jaf lil Ġeħova u jkollu fidi fih. (Ġw. 3:16; 17:3) Hu mbagħad isir ħabib taʼ Ġeħova u tal-​aħwa fil-​kongregazzjoni. (Ebr. 10:24, 25; Ġak. 4:8) B’hekk, l-​istudent se jiddispjaċih għall-​affarijiet ħżiena li jkun għamel u ma jibqax  jagħmilhom. (Atti 3:19) Ukoll, hu jibda jitkellem m’oħrajn dwar dak li qed jemmen issa. (2 Kor. 4:13) Imbagħad, hu jiddedika lilu nnifsu lil Ġeħova u juri d-​dedikazzjoni tiegħu permezz tal-​magħmudija. (1 Pt. 3:21; 4:2) X’ġurnata taʼ ferħ tkun din għal kulħadd! Meta l-​istudent jagħmel l-​affarijiet li jkollu bżonn jagħmel biex jitgħammed, ibqaʼ inkuraġġih u faħħru ħalli jkompli jagħmilhom.

14. L-​għalliem kif jistaʼ jara l-​progress tal-​istudent?

¹⁴ Irridu nkunu paċenzjużi meta nkunu qed ngħinu lil student jikkwalifika għall-​magħmudija. Imma rridu naraw ukoll jekk għandux ix-​xewqa li jaqdi lil Alla Ġeħova. Qed juri li qed jipprova jobdi l-​kmandamenti taʼ Ġesù? Jew sempliċiment irid jitgħallem affarijiet interessanti mill-​Bibbja?

15. X’se juri lill-​għalliem li l-​istudent qed jagħmel progress li se jwasslu għall-​magħmudija?

¹⁵ B’mod regolari ara xi progress qed jagħmel l-​istudent. Pereżempju, juri li qed isir iħobb lil Ġeħova? Jitlob lil Ġeħova? (Salm 116:1, 2) Jieħu pjaċir jaqra l-​Bibbja? (Salm 119:97) Qed jattendi l-​laqgħat b’mod regolari? (Salm 22:22) Għamel xi bidliet f’ħajtu li juru li qed japplika dak li qed jitgħallem? (Salm 119:112) Qiegħed jaqsam dak li qed jitgħallem mal-​ħbieb u l-​familja tiegħu? (Salm 9:1) U l-​iktar ħaġa importanti, jixtieq isir wieħed mix-​Xhieda taʼ Ġeħova? (Salm 40:8) Jekk l-​istudent mhux qed jagħmel progress, ipprova sir af  għala u tkellem miegħu b’mod ċar u bi mħabba. *

16. Meta għandek twaqqaf studju?

¹⁶ Minn żmien għal żmien, aħseb dwar għandekx tibqaʼ tistudja mal-​istudent. Saqsi lilek innifsek: ‘L-​istudent jipprepara għall-​istudju? Irid jibda jattendi l-​laqgħat? Qataʼ l-​vizzji ħżiena li kellu? Qataʼ lilu nnifsu mir-​reliġjon li kellu qabel?’ Jekk it-​tweġibiet għal dawn il-​mistoqsijiet huma le, li tibqaʼ tistudja miegħu hu bħallikieku qed tipprova tgħallem lil xi ħadd jgħum imma ma jridx jixxarrab! Jekk l-​istudent ma japprezzax dak li qed jitgħallem u mhux lest li jagħmel bidliet, għala tkompli tistudja miegħu?

17. Skont l-​1 Timotju 4:16, għalliem tal-​Bibbja x’għandu jagħmel?

¹⁷ Għalina huwa importanti ħafna li nagħmlu dixxipli, u għalhekk nixtiequ ngħinu lill-​istudenti tagħna jaslu għall-​magħmudija. Aħna nużaw il-​Bibbja biex ngħallmu, u nagħmlu dan bil-​qalb għax konvinti minn dak li nemmnu. Irridu ninkuraġġixxu lill-​istudent biex isir ħabib mal-​aħwa fil-​kongregazzjoni, u spiss insemmulu d-​dedikazzjoni u l-​magħmudija. Minn żmien għal żmien, naraw il-​progress li qed jagħmel l-​istudent. (Ara l-​kaxxa  “Għalliem X’Għandu Jagħmel Biex Jgħin Student Jasal għall-​Magħmudija?”) Aħna kuntenti li nistgħu nieħdu sehem fix-​xogħol tal-​ippritkar li jsalva l-​ħajjiet! Jalla nkunu determinat li nagħmlu l-​almu tagħna biex ngħinu lill-​istudenti jikkwalifikaw għall-​magħmudija.