Biex jagħmlu x-​xogħol tal-​ippritkar, l-​Istudenti tal-​Bibbja kellhom ikunu kuraġġużi. Huma kellhom jippritkaw kemm l-​“aħbar tajba” lin-​nies sewwa kif ukoll “jum il-​vendetta” lin-​nies ħżiena.

Ħuna John Henry Hoskin, li kien jgħix il-​Kanada, ipprietka bil-​kuraġġ minkejja l-​oppożizzjoni. Fl-​1921, hu ltaqaʼ maʼ qassis. Ħuna Hoskin beda jitkellem miegħu u qallu: “Aħna nistgħu nieħdu pjaċir nitkellmu dwar il-​Bibbja, u anki jekk ma naqblux fuq kollox, xorta waħda nistgħu nibqgħu ħbieb.” Imma mhux hekk ġara. Ħuna Hoskin jirrakkonta: “Kulma tkellimna ftit minuti, għax il-​qassis tant ta daqqa kbira mal-​bieb li l-​ħġieġa ħsibtha se tinkiser.”

Il-​qassis bir-​rabja qallu: “Għax ma tmurx titkellem maʼ dawk li mhumiex Kristjani?” Ħuna Hoskin ma wiġbux lura, imma xħin telaq, f’qalbu qal, ‘Int mhux wieħed minnhom?’

L-​għada, waqt li l-​qassis kien qed jgħallem fil-​knisja, beda jigdeb fuq Ħuna Hoskin. Ħuna Hoskin jiftakar: “Il-​qassis qal lin-​nies li jien kont l-​ikbar giddieb li qatt kien hemm fir-​raħal, u għalhekk kelli niġi maqtul.” Imma dan ma waqqafx lil Ħuna Hoskin milli jkompli jipprietka u jitkellem man-​nies. Hu qal: “Vera kont qed nieħu pjaċir nipprietka hemmhekk. Xi nies qaluli li jien kont qed nagħmel ix-​xogħol t’Alla, u anki kienu joffruli xi affarijiet bżonjużi.”

Biex jgħinu lin-​nies jifhmu l-​Bibbja aħjar, l-​Istudenti tal-​Bibbja b’mod regulari kienu jagħmlu mistoqsijiet u tweġibiet fir-​rivista li llum tissejjaħ Stenbaħ! F’din ir-​rivista kien ikun hemm mistoqsijiet dwar il-​Bibbja li l-​ġenituri setgħu jiddiskutu mat-​tfal tagħhom. Il-​ġenituri kienu “jistaqsu dawn il-​mistoqsijiet lit-​tfal tagħhom, imbagħad jgħinuhom isibu t-​tweġiba mill-​Bibbja.” Xi mistoqsijiet, bħal pereżempju “Kemm hemm kotba fil-​Bibbja?,” għallmu affarijiet bażiċi dwar il-​Bibbja. Mistoqsijiet oħrajn, bħal “Kull  Kristjan se jkun ippersegwitat?,” ippreparaw lill-​uħud żgħar biex jippritkaw bil-​kuraġġ.

Kien hemm ukoll mistoqsijiet u tweġibiet għal dawk in-​nies li kienu jafu iktar dwar il-​Bibbja. It-​tweġibiet setgħu jsibuhom fl-​ewwel ktieb ta’ Studies in the Scriptures. Ħafna nies tgħallmu ħafna affarijiet minn dawn il-​mistoqsijiet. Imma wara, sar avviż li dawn il-​mistoqsijiet ma kinux se jibqgħu jiġu ppubblikati. Għala kienet se ssir din il-​bidla?

L-​aħwa li kienu qegħdin imexxu fehmu li n-​nies għandhom bżonn jitgħallmu dwar il-​Bibbja b’mod iktar organizzat. Għalhekk, f’Novembru tal-​1921 ħarġu l-​ktieb li kien jismu The Harp of God. Dawk l-​uħud interessati li aċċettaw il-​ktieb setgħu jagħmlu wkoll l-​istudju weħidhom. Dan għen lin-​nies jitgħallmu “l-​iskop li għandu Alla għall-​bnedmin biex jgħixu għal dejjem.” Kif kien isir dan l-​istudju?

Meta persuna kienet taċċetta l-​ktieb, kienet tirċievi kard li fuqha kien ikun hemm miktub liema paġni għandha taqra. Il-​ġimgħa taʼ wara kienet tirċievi kard oħra bil-​posta, u fuqha kien ikun hemm mistoqsijiet dwar dak li tkun qrat. Imbagħad, fl-​aħħar tal-​kard kien ikun hemm imniżżel dak li kellha taqra l-​ġimgħa taʼ wara.

L-​istudent kien jirċievi 12-​il kard, waħda kull ġimgħa, u dawn kien jirċivihom bil-​posta mill-​kongregazzjoni viċin tiegħu. Spiss, dawn il-​kards kienu jintbagħtu minn aħwa li kienu kbar fl-​età jew li ma setgħux imorru jippritkaw minn dar għal dar. Pereżempju, Anna K. Gardner, mill-​Istati Uniti, tgħid: “Meta ħareġ il-​ktieb The Harp of God, oħti Thayle, li kienet tbati biex timxi, setgħet tagħmel iktar xogħol billi tibgħat il-​kards kull ġimgħa bil-​mistoqsijiet fuqhom.” Meta l-​persuna kienet tlesti l-​istudju, xi ħadd mill-​kongregazzjoni kien imur iżurha, biex b’hekk jgħinha titgħallem iktar dwar il-​Bibbja.

Fl-​aħħar tas-​sena, Ħuna J. F. Rutherford bagħat ittra lill-​kongregazzjonijiet kollha. Fl-​ittra qal li “l-​aħwa rnexxielhom jippritkaw u jkellmu lil iktar nies dwar is-​Saltna mis-​snin taʼ qabel.” Imbagħad, hu kompla jgħid: “Baqaʼ ħafna xogħol xi jsir. Inkuraġġixxu lill-​oħrajn biex jingħaqdu magħna f’dan ix-​xogħol mill-​isbaħ.” Jidher ċar li l-​Istudenti tal-​Bibbja għamlu dak li qal hu. Fl-​1922, huma ppritkaw bil-​kuraġġ dwar is-​Saltna iktar minn qatt qabel.