ARTIKLU GĦALL-ISTUDJU 42
Kun Ċert li Għandek il-Verità
“Aċċertaw ruħkom minn kollox; żommu sod mat-tajjeb.” —1 TESS. 5:21.
GĦANJA 142 Inżommu mat-tama tagħna sat-tmiem
ĦARSA BIL-QUDDIEM a
1. Illum għala ħafna nies huma mħawdin?
ILLUM il-ġurnata hawn ħafna reliġjonijiet li jgħidu li huma Kristjani u li jqimu lil Alla b’mod tajjeb. Għalhekk, ħafna nies huma mħawdin! Huma jistaqsu, “Reliġjon waħda hi tajba?” “Jew, ir-reliġjonijiet kollha jogħġbu lil Alla?” Bħala Xhieda taʼ Ġeħova aħna ċerti li ngħallmu l-verità u li kif naqdu lil Alla hu l-uniku mod li jogħġbu? Kif nistgħu nkunu ċerti minn dan? Ejja neżaminaw l-evidenza.
2. Skont l-1 Tessalonikin 1:5, l-appostlu Pawlu għala kien ċert li kellu l-verità?
2 L-appostlu Pawlu kien ċert li kellu l-verità. (Aqra l-1 Tessalonikin 1:5.) Hu ma kienx jemmen sempliċiment għax il-verità għenitu f’ħajtu. Pawlu studja sew il-Kelma t’Alla u emmen li “l-Iskrittura kollha hi mnebbħa minn Alla.” (2 Tim. 3:16) Pawlu x’tgħallem? Fl-Iskrittura, Pawlu sab evidenza ċara li Ġesù kien il-Messija mwiegħed, evidenza li l-mexxejja reliġjużi Lhud għażlu li jinjoraw. Huma qalu li kienu qegħdin jgħallmu lin-nies il-verità dwar Alla, imma huma kienu qed jagħmlu affarijiet li Alla jobgħod. (Titu 1:16) Pawlu ma kienx bħalhom. Hu għażel li jemmen dak kollu li kien hemm miktub fil-Kelma t’Alla u mhux dak li jaqbel lilu biss. Hu kien lest li jgħallem u japplika “l-iskop kollu t’Alla.”—Atti 20:27.
3. Biex inkunu konvinti li għandna l-verità, irridu nkunu nafu t-tweġibiet għall-mistoqsijiet kollha? (Ara wkoll il-kaxxa “ Ix-Xogħlijiet u l-Ħsibijiet taʼ Ġeħova Huma Ħafna Biex Tirrakkontahom.”)
3 Xi wħud jgħidu li r-reliġjon vera għandha twieġeb il-mistoqsijiet kollha, anke dawk il-mistoqsijiet li m’hemmx tweġiba għalihom fil-Bibbja. Imma dan huwa possibbli? Aħseb dwar dak li qal Pawlu. Hu qal lil sħabu l-Kristjani “aċċertaw ruħkom minn kollox,” imma hu qal ukoll li kien hemm ħafna affarijiet li ma setax jifhimhom. (1 Tess. 5:21) Fil-fatt, Pawlu qal li “l-għarfien li għandna hu limitat,” u kompla jgħid, “bħalissa naraw imċajpar b’mera tal-metall.” (1 Kor. 13:9, 12) Hu ma fehemx kollox u lanqas aħna llum. Imma Pawlu fehem il-veritajiet bażiċi dwar Ġeħova. Hu kien jaf biżżejjed biex ikun konvint li kellu l-verità!
4. Kif nistgħu nkunu iktar konvinti li għandna l-verità, u x’se nikkunsidraw f’dan l-artiklu?
4 Mod wieħed li jgħinna nkunu iktar konvinti li għandna l-verità hu billi nqabblu l-mod taʼ kif Ġesù kien jaqdi lil Alla maʼ dak li qegħdin jagħmlu x-Xhieda taʼ Ġeħova llum. F’dan l-artiklu, se naraw li l-Kristjani veri (1) ma jqimux statwi, (2) jirrispettaw l-isem t’Alla, (3) iħobbu l-verità, u (4) iħobbu ħafna lil xulxin.
AĦNA MA NQIMUX STATWI
5. X’nistgħu nitgħallmu mill-mod kif Ġesù ta qima lil Alla, u kif nistgħu napplikaw dak li għallem?
5 Minħabba li Ġesù kien iħobb ħafna lil Ġeħova, hu ta qima lilu biss, sew meta kien fis-sema u sew meta kien fuq l-art. (Lq. 4:8) Hu għallem lid-dixxipli tiegħu biex iqimu lil Ġeħova biss. La Ġesù u lanqas id-dixxipli tiegħu qatt ma użaw statwi. Alla ma jidhirx, għalhekk, ħadd ma jistaʼ jagħmel xi ħaġa li tixbah lilu! (Is. 46:5) Imma xi ngħidu għall-istatwi tal-qaddisin u t-talb li jitolbu lilhom? It-tieni kmandament li ta Ġeħova jgħid: “Tagħmilx għalik xi xbieha skolpita jew forma bħal xi ħaġa li hemm fis-smewwiet ’il fuq, jew li hemm fuq l-art taħt . . . Tmilx quddiemhom.” (Eżo. 20:4, 5) Għalhekk, dawk in-nies li jridu jogħġbu lil Alla jifhmu li hu ma jridhomx jagħtu qima lill-istatwi.
6. Illum, ix-Xhieda taʼ Ġeħova kif iqimu lil Alla?
6 Nies li studjaw l-istorja jgħidu li fi żmien l-appostli l-Kristjani kienu jagħtu qima biss lil Alla. Pereżempju, ktieb tal-istorja jgħid li dawn il-Kristjani “kienu jobogħdu” l-idea li jintużaw statwi fil-postijiet taʼ qima. Illum, ix-Xhieda taʼ Ġeħova jqimu lil Alla bl-istess mod li kienu jqimuh il-Kristjani tal-bidu. Aħna ma nitolbux quddiem statwi taʼ qaddisin jew anġli; u lanqas nitolbu lil Ġesù. Aħna ma nsellmux lill-bandiera u ma nqimu l-ebda ħaġa li tirrappreżenta lill-pajjiż. Anke jekk jippruvaw jisforzawna, aħna determinati li nobdu l-kliem taʼ Ġesù: “Qim lil Ġeħova Alla tiegħek.”—Mt. 4:10.
7. Ix-Xhieda taʼ Ġeħova kif inhuma differenti ħafna minn reliġjonijiet oħrajn?
7 Illum, ħafna nies jieħdu pjaċir jisimgħu lill-mexxejja reliġjużi popolari. Huma tant ikunu jammiraw lil dawn in-nies, li kważi jaslu biex iqimuhom. Ħafna nies imorru fil-knejjes tagħhom, jixtru l-kotba tagħhom, u jagħtuhom ħafna flus biex jappoġġjawhom. Xi nies jemmnu dak kollu li jgħidu dawn l-għalliema reliġjużi. U huma jieħdu pjaċir bihom daqslikieku qegħdin jaraw lil Ġesù! Imma dawk li jqimu lil Alla b’mod tajjeb ma jagħmlux lill-mexxejja reliġjużi tagħhom bħala allat. Għalkemm aħna nirrispettaw lil dawk li jmexxu fl-organizzazzjoni, aħna naċċettaw dak li qalilna Ġesù: “Intom ilkoll aħwa.” (Mt. 23:8-10) Aħna ma nagħtux qima lin-nies, sew jekk huma mexxejja reliġjużi u sew jekk huma politikanti. Aħna ma nieħdu sehem fl-ebda attività li jagħmlu huma. Minflok, nibqgħu newtrali u b’hekk ma nkunux parti mid-dinja. Dan kollu jurina li aħna differenti ħafna minn reliġjonijiet oħrajn li jgħidu li huma Kristjani.—Ġw. 18:36.
NIRRISPETTAW L-ISEM T’ALLA
8. Kif nafu li Ġeħova jridna nużaw ismu u ngħallmuh lil oħrajn?
8 Darba waħda, Ġesù talab: “Missier, igglorifika lil ismek.” Ġeħova wieġeb din it-talba b’leħen qawwi mis-sema u wiegħdu li se jigglorifika lil ismu. (Ġw. 12:28) Matul il-ministeru tiegħu, Ġesù dejjem għallem isem Missieru lil oħrajn. (Ġw. 17:26) Għalhekk, il-Kristjani veri jħossuh taʼ privileġġ li jistgħu jużaw isem Alla u jgħallmuh lil oħrajn.
9. Il-Kristjani tal-bidu kif urew li jirrispettaw l-isem t’Alla?
9 Ftit wara li kien hemm l-ewwel kongregazzjoni Kristjana, Ġeħova “dawwar l-attenzjoni tiegħu lejn il-ġnus biex jieħu minnhom poplu għal ismu.” (Atti 15:14) Dawn il-Kristjani kienu kburin li bdew jużaw l-isem t’Alla u bdew jgħallmuh lil oħrajn. L-appostli u d-dixxipli użaw l-isem t’Alla meta ppritkaw u kitbu l-kotba tal-Bibbja. b B’dan il-mod urew li huma biss kienu qed jużaw l-isem t’Alla.—Atti 2:14, 21.
10. Kif nafu li x-Xhieda taʼ Ġeħova biss qed ixandru l-isem t’Alla?
10 Kif nafu li x-Xhieda taʼ Ġeħova biss qed ixandru l-isem t’Alla? Ejja nikkunsidraw il-provi. Illum, ħafna mexxejja reliġjużi għamlu minn kollox biex jaħbu l-isem t’Alla. F’xi każijiet, huma neħħewh mill-Bibbja u m’aċċettawx li jintuża l-isem t’Alla fil-knejjes tagħhom. c Jidher ċar li x-Xhieda taʼ Ġeħova biss għandhom rispett kbir lejn ismu. Aħna qegħdin inxandru isem Alla iktar minn kull reliġjon oħra! Aħna qed nagħmlu l-almu tagħna biex nagħtu xhieda lin-nies dwar Ġeħova biex b’hekk ikun jixirqilna li nissejħu x-Xhieda taʼ Ġeħova! (Is. 43:10-12) Aħna ppubblikajna iktar minn 240 miljun kopja tat-Traduzzjoni tad-Dinja l-Ġdida ta’ l-Iskrittura Mqaddsa, li fiha l-isem taʼ Ġeħova f’postijiet fejn kien tneħħa minn Bibbji oħrajn. U nippubblikaw ukoll pubblikazzjonijiet li fihom l-isem taʼ Ġeħova f’iktar minn 1,000 lingwa!
AĦNA NĦOBBU L-VERITÀ
11. Il-Kristjani tal-bidu kif urew l-imħabba tagħhom għall-verità?
11 Ġesù ħabb il-verità, jiġifieri, il-verità dwar Alla u dwar dak li se jagħmel. Ġesù għex ħajtu fi qbil mal-verità, u hu għallem din il-verità lil oħrajn. (Ġw. 18:37) Is-segwaċi taʼ Ġesù wkoll kienu jħobbu ħafna l-verità. (Ġw. 4:23, 24) Fil-fatt, l-appostlu Pietru sejjaħ ir-reliġjon tal-Kristjani “t-triq tal-verità.” (2 Pt. 2:2) Minħabba li huma ħabbew ħafna l-verità, il-Kristjani tal-bidu m’aċċettawx tradizzjonijiet reliġjużi u opinjonijiet tan-nies li jmorru kontra l-verità. (Kol. 2:8) Bl-istess mod illum, il-Kristjani veri jaħdmu iebes biex ‘ikomplu mexjin fil-verità’ billi t-tagħlim kollu tagħhom u l-mod kif jgħixu ħajjithom ikunu bbażati fuq il-Bibbja.—3 Ġw. 3, 4.
12. X’jiġri meta l-Ġemgħa li Tiggverna tinduna li hemm bżonn inbiddlu l-mod taʼ kif nifhmu xi ħaġa, u għala tagħmel dan?
12 Ix-Xhieda taʼ Ġeħova ma jgħidux li huma jifhmu dak kollu li hemm fil-Bibbja. Kien hemm drabi meta ħadu żball fil-mod taʼ kif spjegaw it-tagħlim tal-Bibbja jew kif għamlu l-affarijiet fl-organizzazzjoni tagħhom. Però, m’għandniex għalfejn niħduha bi kbira. Il-Bibbja turi b’mod ċar li n-nies t’Alla, iktar ma jgħaddi żmien, iktar se jifhmu l-Bibbja. (Kol. 1:9, 10) Ġeħova jagħtina l-verità bil-mod u aħna rridu nkunu paċenzjużi sakemm inkunu nistgħu nifhmu l-verità aħjar. (Prov. 4:18) Meta l-Ġemgħa li Tiggverna ssir taf li rridu nibdlu l-mod taʼ kif nifhmu jew nagħmlu xi ħaġa, huma mill-ewwel jagħmlu l-bidla. Illum, ħafna knejjes ibiddlu t-tagħlim tagħhom għax iridu jogħġbu lill-membri tagħhom jew lin-nies fid-dinja. Imma x-Xhieda taʼ Ġeħova jagħmlu l-bidliet għax iridu jersqu eqreb t’Alla u jqimuh bħal Ġesù. (Ġak. 4:4) Meta l-organizzazzjoni tagħmel xi bidla, ma tagħmilhiex biex taqbel mal-opinjoni tan-nies, imma għax tifhem il-Bibbja b’mod aħjar. Aħna nħobbu l-verità!—1 Tess. 2:3, 4.
AĦNA NĦOBBU ĦAFNA LIL XULXIN
13. Liema hi l-iktar kwalità importanti li juru l-Kristjani u x-Xhieda taʼ Ġeħova kif juruha?
13 Il-Kristjani tal-bidu kienu magħrufin għall-ħafna kwalitajiet tajbin, imma l-iktar kwalità importanti li kienu magħrufin għaliha kienet l-imħabba. Ġesù qal: “B’dan ikun jaf kulħadd li intom dixxipli tiegħi, jekk ikollkom l-imħabba bejnietkom.” (Ġw. 13:34, 35) Illum, ix-Xhieda taʼ Ġeħova madwar id-dinja kollha jgawdu unità u mħabba vera bejniethom. Aħna differenti minn kull reliġjon oħra għax minkejja li niġu minn pajjiżi u kulturi differenti, aħna familja waħda. Nistgħu naraw dan fil-laqgħat, l-assembleat, u l-konvenzjonijiet tagħna. Dan ikompli jikkonvinċina li aħna qed inqimu lil Ġeħova bil-mod kif jixtieq hu.
14. Skont Kolossin 3:12-14, x’inhu mod wieħed kif nuru li nħobbu ħafna lil xulxin?
14 Il-Bibbja tgħidilna “ħa jkollkom imħabba profonda lejn xulxin.” (1 Pt. 4:8) Mod wieħed kif nuru l-imħabba hu billi naħfru lil xulxin mill-qalb u nissaportu lil xulxin. Barra minn hekk, aħna nfittxu opportunitajiet biex inkunu ġenerużi u ospitabbli mal-aħwa kollha, anke maʼ dawk li forsi weġġgħuna. (Aqra Kolossin 3:12-14.) Meta nuru mħabba bħal din, nagħtu prova li aħna Kristjani veri.
“FIDI WAĦDA”
15. B’liema modi aħna nqimu lil Alla bħalma kienu jqimuh il-Kristjani tal-bidu?
15 Aħna nqimu lil Alla bħall-Kristjani tal-bidu b’modi oħrajn. Pereżempju, aħna organizzati bħalma kienu huma. Aħna għandna l-indokraturi li jżuru l-kongregazzjonijiet, l-anzjani, u l-qaddejja ministerjali, eżatt bħalma kellhom huma. (Flp. 1:1; Titu 1:5) U bħalhom, aħna nirrispettaw il-liġi taʼ Ġeħova dwar is-sess, iż-żwieġ, u d-demm. U aħna nipproteġu l-kongregazzjoni minn dawk l-uħud li ma jkunux iridu jobdu l-liġi t’Alla.—Atti 15:28, 29; 1 Kor. 5:11-13; 6:9, 10; Ebr. 13:4.
16. L-iskrittura t’Efesin 4:4-6 x’tgħallimna?
16 Ġesù qal li se jkun hemm ħafna nies li jgħidu li huma dixxipli tiegħu, imma mhux kollha se jkunu tajbin. (Mt. 7:21-23) Il-Bibbja tgħidilna wkoll li fl-aħħar jiem ħafna nies “ikollhom [biss] għamla taʼ devozzjoni lejn Alla.” (2 Tim. 3:1, 5) Però, il-Bibbja turina ċar li hemm “fidi waħda” li Alla jaċċetta.—Aqra Efesin 4:4-6.
17. Illum min għandu l-fidi vera u għala?
17 Illum min għandu l-fidi vera? Matul dan l-artiklu rajna l-evidenza. Rajna l-mod taʼ kif Ġesù għallem lin-nies biex iqimu lil Alla u l-mod taʼ kif il-Kristjani tal-bidu mxew fuq l-eżempju tiegħu. Mela, ix-Xhieda taʼ Ġeħova biss għandhom il-fidi vera, għax huma jqimu lil Alla kif jogħġob lilu. Xi privileġġ għandna li nagħmlu parti mill-familja taʼ Ġeħova u li nafu l-verità dwaru u dwar l-iskop tiegħu! Jalla nibqgħu ċerti li għandna l-verità.
GĦANJA 3 Ġeħova jqawwina, ifarraġna, u jtina tama
a F’dan l-artiklu, se naraw l-eżempju li ħallielna Ġesù taʼ kif għandha tkun il-qima vera, u kif il-Kristjani tal-bidu pprattikaw din il-qima. Ukoll, se naraw evidenza li x-Xhieda taʼ Ġeħova llum qegħdin iqimu lil Alla bil-mod li jogħġob lilu.
b Ara l-kaxxa “Did the First Christians Use God’s Name?” f’It-Torri tal-Għassa bl-Ingliż tal-1 taʼ Lulju 2010, paġna 6.
c Pereżempju, fl-2008, il-Papa Benedettu Sittax qal li l-isem t’Alla “m’għandux jintuża” fir-reliġjon Kattolika, waqt il-quddiesa, fl-għanjiet, u fit-talb.
d X’TGĦIDILNA L-ISTAMPA: L-organizzazzjoni taʼ Ġeħova ħarġet it-Traduzzjoni tad-Dinja l-Ġdida f’iktar minn 200 lingwa biex b’hekk in-nies ikunu jistgħu jaqrawha bil-lingwa tagħhom. Din il-Bibbja fiha l-isem t’Alla, Ġeħova.