1. L-​adoraturi taʼ Ġeħova kif juru li jħobbu lil xulxin?

L-​ADORATURI taʼ Ġeħova madwar id-​dinja huma parti minn familja. Huma aħwa li jħobbu lil xulxin. (1 Ġwanni 4:16, 21) Kultant jagħmlu sagrifiċċji kbar għal ħuthom, imma fil-​biċċa l-​kbira juru mħabbithom bil-​ħafna affarijiet żgħar li jagħmlu għalihom. Pereżempju, għandhom mnejn jgħidu xi ħaġa sabiħa lil ħuthom jew jittrattawhom b’qalb tajba. Meta nuru konsiderazzjoni lejn oħrajn, aħna nimitaw lil Missierna tas-​sema.—Efesin 5:1.

2. Ġesù kif imita l-​imħabba taʼ Missieru?

² Ġesù imita lil Missieru perfettament. Hu dejjem tratta lil oħrajn b’qalb tajba. Hu qal: “Ejjew għandi, intom ilkoll li mħabbtin u mgħobbijin, u jien inserraħkom.” (Mattew 11:28, 29) Meta nimitaw lil Ġesù u nuru “konsiderazzjoni mal-​batut,” aħna se nferrħu lil Ġeħova, u nkunu ferħanin ukoll. (Salm 41:1) F’dan l-​artiklu, se naraw kif nistgħu nuru konsiderazzjoni lejn il-​membri tal-​familja tagħna, lejn ħutna, u  lejn dawk li niltaqgħu magħhom fil-​ministeru.

3. Raġel miżżewweġ kif jistaʼ juri konsiderazzjoni lejn martu? (Ara l-​ewwel stampa.)

³ L-​irġiel miżżewġin għandhom bżonn ikunu taʼ eżempju u juru kemm jimpurtahom mill-​familja tagħhom. (Efesin 5:25; 6:4) Il-​Bibbja tgħid li l-​irġiel miżżewġin għandhom juru konsiderazzjoni lejn marthom u jifhmuha. (1 Pietru 3:7) Raġel miżżewweġ li jagħmel dan jaf li għalkemm hu differenti minn martu f’ħafna affarijiet, mhuwiex aħjar minnha. (Ġenesi 2:18) Hu juri konsiderazzjoni lejn il-​mod kif tħossha u jittrattaha b’dinjità u unur. Mara miżżewġa fil-​Kanada tgħid dwar żewġha: “Hu qatt ma jċekken il-​mod kif inħossni jew jgħid, ‘M’għandekx tħossok b’dan il-​mod.’ Hu semmiegħ tajjeb ukoll. Meta jgħinni nirranġa l-​ħarsa tiegħi dwar xi ħaġa, hu jagħmel dan b’qalb tajba.”

4. Raġel miżżewweġ kif għandu juri konsiderazzjoni għall-​emozzjonijiet taʼ martu bil-​mod kif jittratta nisa oħra?

⁴ Raġel li juri konsiderazzjoni għall-​emozzjonijiet taʼ martu qatt ma jifflertja maʼ nisa oħra jew juri interess mhux xieraq fihom, kemm jekk wiċċ imb wiċċ, fuq il-​midja soċjali, jew fuq l-​Internet. (Ġob 31:1) Hu ma jarax websajts mhux xierqa. Iva, hu jibqaʼ leali lejn martu għax iħobbha u għax iħobb lil Ġeħova u jobgħod dak li hu ħażin.—Aqra Salm 19:14; 97:10.

5. Mara miżżewġa kif tistaʼ turi konsiderazzjoni lejn żewġha?

⁵ Meta raġel miżżewweġ jimita l-​eżempju taʼ mħabba tal-​kap tiegħu, Ġesù Kristu, se jkun iktar faċli għal martu biex ikollha “rispett profond” għalih. (Efesin 5:22-25, 33) U meta tirrispettah, hi se tipprova tifhem kif iħossu u tittrattah b’qalb tajba meta jkollu x’jagħmel fl-​affarijiet tal-​kongregazzjoni jew meta jkollu jittratta mal-​problemi. Raġel miżżewweġ fil-​Brittanja jgħid: “Kultant marti tinduna li nbidlet xi ħaġa fl-​imġiba tiegħi u li allura hemm xi ħaġa li qed tinkwetani. Imbagħad, hi tapplika l-​prinċipju li nsibu fi Proverbji 20:5, anke meta dan ifisser li jkollha tistenna għall-​ħin it-​tajjeb biex ‘ittellaʼ’ l-​ħsibijiet tiegħi, jekk tkun xi ħaġa li nistaʼ niddiskutiha magħha bil-​libertà.”

6. Kif kulħadd fil-​kongregazzjoni jistaʼ jinkuraġġixxi lit-​tfal biex jaħsbu f’ħaddieħor u jkunu qalbhom tajba, u t-​tfal kif se jibbenefikaw?

⁶ Meta l-​ġenituri jittrattaw lil xulxin b’konsiderazzjoni, huma jagħtu eżempju tajjeb lil uliedhom. Ukoll, għandhom bżonn jgħallmu lil uliedhom biex jaħsbu f’oħrajn u jkunu qalbhom tajba. Pereżempju, il-​ġenituri jistgħu jgħallmu lit-​tfal tagħhom biex ma jiġrux fis-​Sala tas-​Saltna. Jew meta jkunu f’get-​together, jistgħu jgħidu lil uliedhom biex jistennew lil min hu ikbar minnhom biex jieħu l-​ikel l-​ewwel. Bla dubju, kulħadd  fil-​kongregazzjoni jistaʼ jappoġġja lill-​ġenituri. Allura, għandna nfaħħru lit-​tfal meta jagħmlu xi ħaġa li biha juru li qed jaħsbu f’oħrajn, bħal pereżempju, meta jiftħulna l-​bieb. Dan se jagħmel lit-​tfal iħossuhom tajjeb u se jgħinhom jitgħallmu li “hemm iktar hena meta tagħti milli meta tirċievi.”—Atti 20:35.

7. Ġesù kif wera konsiderazzjoni lejn raġel nieqes mis-​smigħ, u x’nistgħu nitgħallmu mill-​eżempju taʼ Ġesù?

⁷ Jum fost l-​oħrajn, Ġesù kien fl-​inħawi tad-​Dekapoli meta n-​nies ġabulu raġel nieqes mis-​smigħ u li kellu diffikultà biex jitkellem. (Marku 7:31-​35) Ġesù fejqu, imma mhux quddiem oħrajn. Għala le? Peress li r-​raġel kien nieqes mis-​smigħ, probabbilment ħassu skomdu fost folol kbar. Ġesù fehem kif kien iħossu, u “ħadu waħdu” f’post fejn ma kienx hemm nies madwarhom u fejqu hemm. M’għandniex xi ngħidu, aħna ma nistgħux nagħmlu mirakli, iżda għandna naħsbu dwar il-​bżonnijiet u l-​emozzjonijiet taʼ ħutna u nkunu qalbna tajba magħhom. L-​appostlu Pawlu kiteb: “Ħa nagħtu kas xulxin biex nitqanqlu għall-​imħabba u l-​għemejjel tajbin.” (Ebrej 10:24) Ġesù fehem kif ħassu r-​raġel nieqes mis-​smigħ u trattah b’qalb tajba. X’eżempju tajjeb għalina!

8, 9. Kif nistgħu nuru li jimpurtana mill-​anzjani u l-​persuni b’diżabilità? Agħti eżempji.

⁸ Uri konsiderazzjoni lejn l-​anzjani u l-​persuni b’diżabilità. L-​iktar karatteristika importanti tal-​kongregazzjoni Kristjana hi l-​imħabba, mhux l-​effiċjenza, jew kemm wieħed kapaċi jagħmel xogħol mingħajr telf taʼ żmien. (Ġwanni 13:34, 35) L-​imħabba ġġegħelna nagħmlu kulma nistgħu biex ngħinu lil ħutna ikbar minna jew li għandhom xi diżabilità biex jiġu l-​laqgħat u jippritkaw. Aħna ngħinuhom anke jekk mhux konvenjenti għalina jew saħansitra anke jekk ma jistgħux jagħmlu ħafna. (Mattew 13:23) Michael, li juża siġġu tar-​roti, iħossu grat ħafna għall-​għajnuna li jikseb mill-​familja tiegħu u mill-​aħwa tal-​kongregazzjoni. Hu jgħid: “Grazzi għall-​għajnuna li lkoll jagħtuni, nistaʼ nattendi kważi l-​laqgħat kollha u nieħu sehem regolari fil-​ministeru. L-​iktar li jogħġobni hu l-​ippritkar f’postijiet pubbliċi.”

⁹ F’ħafna djar Betel, hemm aħwa rġiel u nisa leali li huma anzjani jew li għandhom xi diżabilità. Indokraturi li jimpurtahom juruhom imħabba billi jirranġawlhom ħalli jkunu jistgħu jippritkaw permezz taʼ li jiktbu ittri u jużaw it-​telefown. Bill, li għandu 86 sena, jikteb lil nies li joqogħdu ’l bogħod u jgħid: “Aħna napprezzaw il-​privileġġ taʼ li nistgħu niktbu l-​ittri.” Nancy, li għandha kważi 90 sena, tikkummenta: “Jien ma nqisx l-​għoti taʼ xhieda bl-​ittri bħala  sempliċement li nimla envelop bil-​karti. Dan xorta hu servizz tal-​għalqa. In-​nies għandhom bżonn ikunu jafu l-​verità!” Ethel, li twieldet fl-​1921, tgħid: “L-​uġigħ hu parti minn ħajti. Ċerti ġranet tassew nagħmel sforz biex saħansitra nilbes.” Minkejja dan, hi tieħu pjaċir tipprietka billi tuża t-​telefown u għandha xi ftit żjajjar lura tajbin. Barbara, li għandha 85 sena, tispjega: “Minħabba s-​saħħa batuta tiegħi nsib li hu diffiċli ferm inkun regolari fis-​servizz tal-​għalqa. Imma l-​għoti taʼ xhieda bit-​telefown jgħinni nkellem lil oħrajn. Grazzi, Ġeħova!” F’inqas minn sena, dawn l-​erbaʼ anzjani kienu fost grupp prezzjuż t’aħwa mill-​istess Betel li qattgħu 1,228 siegħa fil-​ministeru, kitbu 6,265 ittra, għamlu ’l fuq minn 2,000 telefonata, u qassmu 6,315-​il pubblikazzjoni! Nistgħu nibqgħu ċerti li l-​isforzi tagħhom ferrħu bil-​kbir lil Ġeħova!—Proverbji 27:11.

10. Kif nistgħu ngħinu lil ħutna jibbenefikaw kemm jistaʼ jkun mil-​laqgħat?

¹⁰ Uri konsiderazzjoni fil-​laqgħat Kristjani. Meta nuru konsiderazzjoni, aħna ngħinu lil ħutna jibbenefikaw kemm jistaʼ jkun mil-​laqgħat. Kif? Mod wieħed hu billi naslu fil-​ħin biex ma ntellfuhomx. Kultant, affarijiet mhux mistennijin għandhom mnejn iġegħluna naslu tard. Imma, jekk spiss naslu tard, aħna għandna naħsbu dwar kif dan jaffettwa lil ħutna u dwar liema bidliet nistgħu nagħmlu biex nuru li jimpurtana minnhom. Ftakar ukoll li huma Ġeħova u Ibnu li jistidnuna għal-​laqgħat. (Mattew 18:20) Żgur li għandna nuruhom rispett billi nkunu fil-​ħin!

11. Għala l-​aħwa li jkollhom sehem f’xi parti tal-​laqgħa jsegwu d-​direzzjoni li nsibu fl-​1 Korintin 14:40?

¹¹ Jekk nuru konsiderazzjoni lejn ħutna, aħna se nsegwu d-​direzzjoni tal-​Bibbja: “Ħa jsir kollox bid-​deċenza u bl-​ordni.”  (1 Korintin 14:40) L-​aħwa li jkollhom sehem f’xi parti tal-​laqgħa jkunu qed isegwu din id-​direzzjoni meta jispiċċaw fil-​ħin. B’hekk, huma juru konsiderazzjoni mhux biss lejn il-​kelliem li jmiss imma wkoll lejn il-​kongregazzjoni kollha. Aħseb dwar kif oħrajn jistgħu jiġu affettwati jekk il-​laqgħa tispiċċa tard. Xi aħwa għandhom mnejn jivvjaġġaw fit-​tul biex jaslu lura d-​dar. Oħrajn ikollhom bżonn jaqbdu karozza tal-​linja jew minibus. U oħrajn għandhom is-​sieħeb jew is-​sieħba tagħhom fiż-​żwieġ li ma tkunx tal-​istess twemmin u dawn jistennewhom jaslu d-​dar sa ċertu ħin.

12. L-​anzjani għala jistħoqqilhom ir-​rispett u l-​imħabba tagħna? (Ara l-​kaxxa “ Uri konsiderazzjoni lejn dawk li qed jieħdu t-​tmexxija.”)

¹² L-​anzjani jaħdmu iebes fil-​kongregazzjoni u fil-​ministeru, u għalhekk jistħoqqilhom ir-​rispett u l-​imħabba tagħna. (Aqra l-​1 Tessalonikin 5:12, 13.) Żgur li int grat ħafna għal dak kollu li jagħmlu għalik. Int tistaʼ turi dan billi minn jeddek tobdihom u tappoġġjahom, għaliex “huma qed jgħassulkom ruħkom bħala dawk li għad iridu jagħtu kont.”—Ebrej 13:7, 17.

13. X’nistgħu nitgħallmu mill-​mod kif Ġesù tratta lin-​nies?

¹³ Fi profezija dwar Ġesù, Isaija qal: “Qasba miksura ma jaqsamhiex; ftila tal-​kittien tnemnem ma jitfihiex.” (Isaija 42:3) L-​imħabba li Ġesù kellu għan-​nies ġegħlitu jħoss għalihom. Hu fehem kif iħossuhom dawk li kienu skuraġġiti u dgħajfin bħal “qasba miksura” jew “ftila tal-​kittien tnemnem,” allura ttrattahom b’qalb tajba u b’paċenzja. Anke t-​tfal riedu jkunu maʼ Ġesù. (Marku 10:14) Naturalment, aħna ma nistgħux nifhmu jew ngħallmu lin-​nies bħalma għamel Ġesù! Imma nistgħu nuru konsiderazzjoni lejn in-​nies fit-​territorju tagħna bil-​mod kif inkellmuhom, meta nkellmuhom, u kemm indumu nkellmuhom.

14. Għala għandna naħsbu dwar kif nitkellmu man-​nies?

¹⁴ Kif għandna nitkellmu man-​nies? Illum, miljuni bla għadd taʼ nies ġew “maltrattati u mferrxin” minn negozjanti, politikanti, u mexxejja tar-​reliġjon li huma korrotti u bla qalb. (Mattew 9:36) B’hekk, ħafna nies ma jafdaw lil ħadd u m’għandhomx tama. Huwa għalhekk li l-​kliem u t-​ton tal-​vuċi li nużaw jeħtieġ li juruhom li aħna qalbna tajba u jimpurtana minnhom! Ħafna nies iridu jisimgħu l-​messaġġ tagħna mhux biss għax nużaw il-​Bibbja tajjeb imma wkoll għax ġenwinament ninteressaw ruħna fihom u nuruhom rispett.

15. Liema huma xi modi kif nistgħu nuru konsiderazzjoni lejn in-​nies fit-​territorju tagħna?

¹⁵ Hemm ħafna modi kif nistgħu nuru konsiderazzjoni lejn in-​nies fit-​territorju tagħna. Hemm bżonn li nistaqsu mistoqsijiet b’qalb tajba u b’rispett. Pijunier qeda f’territorju fejn ħafna nies  kienu jistħu, allura evita mistoqsijiet li jġegħluhom iħossuhom imbarazzati jekk ma kinux jafu t-​tweġiba t-​tajba. Hu ma kienx jistaqsi, “Taf x’jismu Alla?” jew “Taf x’inhi s-​Saltna t’Alla?” Minflok, kien jgħid xi ħaġa bħal, “Jien tgħallimt mill-​Bibbja li Alla għandu isem personali. Nistaʼ nurik x’inhu dan l-​isem?” Dan il-​metodu ma japplikax għal kullimkien, għax in-​nies u l-​kulturi huma differenti. Imma aħna dejjem għandna nittrattaw lin-​nies fit-​territorju tagħna b’qalb tajba u b’rispett. Biex nagħmlu dan, jeħtieġ li nsiru nafuhom sew.

16, 17. Kif nistgħu nuru qalb tajba meta niddeċiedu (a) x’ħin inżuru lin-​nies? (b) kemm indumu nkellmuhom?

¹⁶ Meta għandna nżuru lin-​nies? Meta mmorru minn dar għal dar, in-​nies ma jkunux qed jistennewna għax huma ma stidnuniex. Għalhekk, hu importanti ħafna li nżuruhom f’ħin meta għandhom mnejn ikunu iktar lesti li jkellmuna. (Mattew 7:12) Pereżempju, in-​nies fit-​territorju tiegħek iħobbu jdumu reqdin fi tmiem il-​ġimgħa? Mela forsi tistaʼ tibda l-​ministeru billi tagħti xhieda fit-​toroq, tipprietka f’postijiet pubbliċi, jew tagħmel żjajjar lura għand nies li taf li huma disponibbli biex ikellmuk.

¹⁷ Kemm għandna ndumu nkellmuhom? In-​nies ikollhom ħafna x’jagħmlu, allura jkun tajjeb li ż-​żjajjar tagħna jkunu qosra, speċjalment għall-​bidu. Ikun aħjar li nispiċċaw il-​konversazzjoni malajr milli ndumu nkellmuhom iżżejjed. (1 Korintin 9:20-23) Meta n-​nies jaraw li aħna konxji taċ-​ċirkustanzi jew l-​iskedi mimlijin tagħhom, għandu mnejn meta jarawna darb’oħra jkunu iktar lesti li jkellmuna. Jekk nuru l-​kwalitajiet li jiġu mill-​ispirtu t’Alla, aħna verament se nsiru “ħaddiema sħab m’Alla.” Ġeħova jistaʼ saħansitra jużana biex ngħinu lil xi ħadd jitgħallem il-​verità!—1 Korintin 3:6, 7, 9.

18. Meta nuru konsiderazzjoni lejn oħrajn, liema barkiet nistgħu nittamaw li nirċievu?

¹⁸ Mela ejja nagħmlu dak kollu li nistgħu biex nuru konsiderazzjoni lejn il-​membri tal-​familja tagħna, lejn ħutna rġiel u nisa, u lejn dawk li niltaqgħu magħhom fil-​ministeru. Imbagħad, se jkollna ħafna barkiet, kemm issa u kemm fil-​futur. Bħalma jgħid Salm 41:1, 2: “Hieni min jaġixxi b’konsiderazzjoni mal-​batut; fi żmien il-​gwaj Ġeħova jeħilsu. Ġeħova nnifsu se jħarsu u jżommu ħaj. Se jiġi dikjarat hieni fl-​art.”