1-2. (a) Armageddon għala hi aħbar tajba għall-​umanità? (b) Liema mistoqsijiet se nikkunsidraw f’dan l-​artiklu?

XI NIES jemmnu li d-​dinja se tinqered jew b’xi gwerra nukleari jew b’xi diżastru naturali. Imma dan mhuwiex dak li tgħallem il-​Bibbja. Minflok, din tgħallem li dalwaqt se jkun hawn gwerra li se ġġib riżultati sbieħ. Din il-​gwerra tissejjaħ Armageddon, u dak li l-​Bibbja tgħid dwar din il-​gwerra għandu jferraħna! (Riv. 1:3) Il-​gwerra t’Armageddon mhux se teqred lill-​umanità imma se ssalvaha! Kif?

² Il-​Bibbja turi li l-​gwerra t’Armageddon se ssalva lill-​umanità billi ttemm it-​tmexxija mill-​bniedem, u billi teqred lill-​ħżiena u ssalva lill-​ġusti. Ukoll, din il-​gwerra se ssalva lill-​umanità billi teqred lil dawk li qed jeqirdu l-​Art. (Riv. 11:18) Biex nifhmu aħjar dawn il-​punti, ejja nikkunsidraw erbaʼ mistoqsijiet: X’inhi Armageddon? X’se jiġri eżatt qabilha? Kif nistgħu nkunu fost dawk li jiġu salvati f’Armageddon? Kif nistgħu nibqgħu leali waqt li riesaq it-​tmiem?

3. (a) Il-​kelma “Armageddon” xi tfisser? (b) Rivelazzjoni 16:14, 16 kif juri li Armageddon mhijiex post li jeżisti veru fid-​dinja?

³ Aqra Rivelazzjoni 16:14, 16. Il-​kelma “Armageddon” tidher biss darba fl-​Iskrittura, u din ġejja minn terminu Ebrajk li jfisser “Muntanja taʼ Megiddo.” (Riv. 16: 16, ntt.) Megiddo kienet belt f’Iżrael tal-​qedem. (Ġoż. 17:11) Imma Armageddon ma tirreferix għal post li jeżisti veru fid-​dinja. Biex inkunu eżatti, Armageddon tirreferi għas-​sitwazzjoni li għaliha “s-​slaten taʼ l-​art abitata kollha” jinġabru biex jopponu lil Ġeħova. (Riv. 16:14) Però, f’dan l-​artiklu, se nużaw ukoll it-​terminu “Armageddon” biex jirreferi għall-​gwerra li tiġi eżatt wara li s-​slaten tal-​art  jinġabru. Kif nafu li Armageddon mhijiex post li jeżisti veru fid-​dinja? L-​ewwel, il-​Muntanja taʼ Megiddo ma teżistix. It-​tieni, l-​art taʼ madwar Megiddo hija żgħira wisq biex tesaʼ “s-​slaten taʼ l-​art abitata kollha” u s-​suldati u l-​armamenti tagħhom. It-​tielet, kif se naraw iktar tard fl-​artiklu, il-​gwerra t’Armageddon se tibda meta “s-​slaten” tad-​dinja jattakkaw lin-​nies t’Alla mxerrdin madwar id-​dinja.

4. Ġeħova għala sejjaħ il-​gwerra finali kbira tiegħu bl-​istess isem taʼ Megiddo?

⁴ Ġeħova għala sejjaħ il-​gwerra finali kbira tiegħu bl-​istess isem taʼ Megiddo? Fiż-​żminijiet Bibliċi, ħafna gwerer ġew miġġildin f’Megiddo u fil-​Wied taʼ Ġeżragħel, li kien fil-​viċin. Xi kultant, Ġeħova għen lin-​nies tiegħu biex jirbħu. Pereżempju, “biswit l-​ilmijiet taʼ Megiddo,” Alla għen lill-​imħallef Iżraeli Barak jirbaħ lill-​armata taʼ Kangħan immexxija minn kap jismu Sisera. Barak u l-​profetessa Debora rringrazzjaw lil Ġeħova għar-​rebħa mirakoluża tagħhom. Huma kantaw: “Mis-​sema ġġieldu l-​kwiekeb . . . kontra Sisera. Il-​wied taʼ Kison kaxkarhom.”—Mħ. 5:19-21.

5. Il-​gwerra t’Armageddon b’liema mod importanti se tkun differenti mill-​gwerra li Barak iġġieled?

⁵ Barak u Debora spiċċaw l-​għanja tagħhom bil-​kliem: “B’hekk, ħa jgħibu l-​għedewwa kollha tiegħek, O Ġeħova, u ħa jkunu dawk li jħobbuk bħal meta x-​xemx toħroġ fl-​aqwa tagħha.” (Mħ. 5:31) Matul il-​gwerra t’Armageddon, l-​għedewwa t’Alla se jinqerdu wkoll, filwaqt li dawk li jħobbu lil Alla se jiġu salvati. Imma hemm differenza importanti bejn dawn iż-​żewġ gwerer. Matul il-​gwerra t’Armageddon, in-​nies t’Alla mhux se jiġġieldu. Huma lanqas biss se jkollhom armi! Huma se jkunu ‘setgħanin jekk ma jinkwetawx u jkollhom il-​fiduċja’ f’Ġeħova u fl-​armati tiegħu tas-​sema.—Is. 30:15; Riv. 19:11-15.

6. X’għandu mnejn juża Ġeħova biex jeqred lill-​għedewwa tiegħu fil-​gwerra t’Armageddon?

⁶ Fil-​gwerra t’Armageddon, Alla kif se jeqred lill-​għedewwa tiegħu? Hu għandu mnejn juża ħafna modi differenti. Pereżempju, għandu mnejn juża terremoti, silġ, u sajjetti. (Ġob 38:22, 23; Eżek. 38:19-22) Forsi jdawwar lill-​għedewwa tiegħu kontra xulxin. (2 Kron. 20:17, 22, 23) U jistaʼ jkun li juża l-​anġli tiegħu biex joqtol lill-​ħżiena. (Is. 37:36) Ikun xi jkun dak li Alla juża, se jirbaħ żgur. In-​nies kollha li jopponu lil Alla se jiġu meqrudin u l-​ġusti kollha se jiġu salvati.—Prov. 3:25, 26.

7-8. (a) Skont l-​1 Tessalonikin 5:1-6, liema stqarrija mhux tas-​soltu se jgħidu l-​mexxejja tad-​dinja? (b) Din l-​istqarrija għala se tkun gidba perikoluża?

⁷ Qabel “jum Ġeħova” se jkun hemm l-​istqarrija taʼ “paċi u sigurtà.” (Aqra l-​1 Tessalonikin 5:1-6.) Fl-​1 Tessalonikin 5:2, “jum Ġeħova” jirreferi għat-​“tribulazzjoni l-​kbira.” (Riv. 7:14) Aħna kif se nkunu nafu li din it-​tribulazzjoni tkun se tibda? Il-​Bibbja tgħid li se jkun hemm stqarrija mhux tas-​soltu li se sservi taʼ sinjal li t-​tribulazzjoni l-​kbira se tibda.

⁸ L-​istqarrija mhux tas-​soltu li l-​Bibbja bassret hi taʼ “paċi u sigurtà.” Il-​mexxejja tad-​dinja għala se jgħidu dan? Ma nafux eżatt. Il-​mexxejja reliġjużi se jieħdu sehem? Jistaʼ jkun. Jiġri x’jiġri, din l-​istqarrija se tkun gidba oħra li tiġi mid-​demonji. Imma din il-​gidba se tkun speċjalment perikoluża għax se ġġiegħel lin-​nies jaħsbu li huma protetti, meta fil-​fatt l-​akbar tribulazzjoni fl-​istorja tal-​bniedem tkun għadha se tibda. Iva, “tiġi fuqhom minnufih  qerda f’daqqa bħall-​weġgħa tal-​ħlas fuq mara tqila.” X’se jiġri lill-​qaddejja leali taʼ Ġeħova? Għalkemm jum Ġeħova se jibda f’daqqa, huma se jkunu lesti, mhux se jinqabdu fuq sieq waħda.

9. Se jeqred Ġeħova d-​dinja kollha taʼ Satana f’daqqa? Spjega.

⁹ Ġeħova mhux se jeqred lid-​dinja kollha taʼ Satana f’daqqa, kif għamel fi żmien Noè. Minflok, hu se jeqridha f’żewġ partijiet. L-​ewwel, se jeqred lil Babilonja l-​Kbira, li hi r-​reliġjonijiet foloz kollha. Imbagħad, matul il-​gwerra t’Armageddon, hu se jeqred il-​kumplament tad-​dinja taʼ Satana, inkluż is-​sistemi politiċi, militari, u kummerċjali tagħha. Ejja niddiskutu fid-​dettall dawn iż-​żewġ ġrajjiet importanti.

10. Skont Rivelazzjoni 17:1, 6 u 18:24, Ġeħova għala se jeqred lil Babilonja l-​Kbira?

¹⁰ “Il-​ġudizzju fuq il-​prostituta l-​kbira.” (Aqra Rivelazzjoni 17:1, 6; 18:24.) Babilonja l-​Kbira ġabet diżrispett kbir fuq l-​isem t’Alla. Hi għallmet il-​gideb fuqu. Bħal mara prostituta, ir-​reliġjon falza kienet żleali lejn Ġeħova billi ssapportjat lil gvernijiet umani. Hi użat il-​qawwa u l-​influwenza tagħha biex tieħu vantaġġ mill-​membri tagħha. U r-​reliġjon falza qatlet ħafna nies, inkluż lil uħud mill-​qaddejja t’Alla. (Riv. 19:2) Ġeħova kif se jeqred lil Babilonja l-​Kbira?

11. (a) X’tirrappreżenta l-​“bhima salvaġġa lewn l-​iskarlat”? (b) Alla kif se jużaha kontra Babilonja l-​Kbira?

¹¹ Ġeħova se jeqred lill-​“prostituta l-​kbira” permezz tal-​“bhima salvaġġa lewn l-​iskarlat” u l-​“għaxart iqrun” tagħha. Din il-​bhima salvaġġa tirrappreżenta lill-​Ġnus Magħquda. L-​għaxart iqrun jirrappreżentaw lill-​gvernijiet li jissapportjaw lil din l-​organizzazzjoni. Fiż-​żmien stabbilit t’Alla, il-​gvernijiet tad-​dinja u l-​Ġnus Magħquda se jattakkaw lil Babilonja l-​Kbira. Huma se “jħarbtuha u jneżżgħuha” billi jiħdulha ġidha u juru lil kulħadd kemm hi mill-​agħar. (Riv. 17:3, 16)  Din il-​qerda tant se tkun f’daqqa li se tidher qisha seħħet “f’jum wieħed.” Għalhekk, dawk li ssapportjaw lir-​reliġjon falza se jkunu xxokkjati, speċjalment minħabba li hi spiss ftaħret u qalet: “Jien qiegħda bil-​qiegħda bħala sultana, u m’iniex armla, u qatt ma se nara niket.”—Riv. 18:7, 8.

12. Alla x’mhux se jħalli lill-​ġnus jagħmlu, u għala?

¹² Alla mhux se jħalli lill-​ġnus jeqirdu lin-​nies tiegħu. Huma kburin li jġorru ismu, u obdew il-​kmand tiegħu biex joħorġu minn Babilonja l-​Kbira. (Atti 15:16, 17; Riv. 18:4) Huma anki ħadmu iebes biex jgħinu n-​nies joħorġu minnha. Allura, il-​qaddejja taʼ Ġeħova mhux se ‘jirċievu parti mill-​kastigi tagħha.’ Xorta waħda, se jkollhom bżonn fidi b’saħħitha biex jissaportu dak li se jiġri wara.

13. (a) Min hu Gog? (b) Skont Eżekjel 38:2, 8, 9, meta se tibda l-​gwerra t’Armageddon?

¹³ L-​attakk taʼ Gog. (Aqra Eżekjel 38:2, 8, 9.) Wara l-​qerda tar-​reliġjonijiet foloz kollha, in-​nies t’Alla se jispikkaw bħal siġra li tibqaʼ wieqfa wara maltempata qalila. Satana, bla dubju, se jifferoċja. Hu se jiżvoga r-​rabja tiegħu billi juża ‘espressjonijiet imnebbħin mhux nodfa.’ Dawn se jkunu informazzjoni falza mid-​demonji li se ġġiegħel lill-​grupp taʼ ġnus jattakkaw lill-​qaddejja taʼ Ġeħova. (Riv. 16:13, 14) Dan il-​grupp taʼ ġnus jissejjaħ “Gog taʼ l-​art taʼ Magog.” Meta l-​ġnus jattakkaw lin-​nies taʼ Ġeħova, tibda l-​gwerra t’Armageddon.—Riv. 16:16.

14. X’se jirrealizza Gog?

¹⁴ Gog se jafda fid-​“driegħ tal-​laħam” tiegħu, jiġifieri fil-​qawwa militari tiegħu. (2 Kron. 32:8.) Aħna se nafdaw f’Alla tagħna Ġeħova—waqfa li se tidher li ma tagħmilx sens għall-​ġnus. Għala? Għax Babilonja l-​Kbira kienet b’saħħitha, imma l-​allat tagħha ma salvawhiex mill-​“bhima salvaġġa” u l-​“għaxart iqrun” tagħha! (Riv. 17:16) Għalhekk, Gog jaħseb li se jeqridna faċilment. “Bħal sħab li  jiksi l-​pajjiż,” hu se jattakka lin-​nies  taʼ Ġeħova. (Eżek. 38:16) Imma Gog malajr se jinduna li nqabad f’nassa. Bħall-​Fargħun ħdejn il-​Baħar l-​Aħmar, Gog se jirrealizza li qed jiġġieled kontra Ġeħova.—Eżo. 14:1-4; Eżek. 38:3, 4, 18, 21-23.

15. X’se jagħmel Ġesù fil-​gwerra t’Armageddon?

¹⁵ Kristu u l-​armati tiegħu tas-​sema se jiddefendu lin-​nies t’Alla u jeqirdu għalkollox lil Gog u s-​suldati tiegħu. (Riv. 19:11, 14, 15) Imma x’se jiġri lil Satana, l-​akbar għadu taʼ Ġeħova, li gideb lill-​ġnus u ġegħelhom jattakkaw lin-​nies t’Alla fil-​gwerra t’Armageddon? Ġesù se jixħet lilu u lid-​demonji tiegħu fl-​abbiss, fejn se jiġu msakkrin għal elf sena.—Riv. 20:1-3.

16. (a) Kif nuru li ‘nafu lil Alla’? (b) Li nkunu nafu lil Ġeħova għala se jkun barka għalina f’Armageddon?

¹⁶ Jekk ilniex ħafna snin fil-​verità jew le, biex niġu salvati f’Armageddon, għandna nuru li ‘nafu lil Alla’ u li ‘nobdu l-​aħbar tajba dwar il-​Mulej tagħna Ġesù.’ (2 Tess. 1:7-9) Aħna nuru li ‘nafu lil Alla’ meta nkunu nafu xi jħobb, x’jobgħod, u l-​livelli tiegħu. Ukoll, nuru li nafuh meta nħobbuh, nobduh, u nqimu lilu biss. (1 Ġw. 2:3-5; 5:3) Jekk nagħmlu dawn l-​affarijiet, Alla wkoll se jkun jafna, jiġifieri se jkollna l-​approvazzjoni tiegħu. (1 Kor. 8:3) B’riżultat taʼ dan, aħna se niġu salvati matul il-​gwerra t’Armageddon!

17. Xi jfisser li ‘nobdu l-​aħbar tajba dwar il-​Mulej tagħna Ġesù’?

¹⁷ “L-​aħbar tajba dwar il-​Mulej tagħna Ġesù” tinkludi l-​veritajiet kollha li Ġesù għallem u li nsibu fil-​Kelma t’Alla. Aħna nobdu l-​aħbar tajba meta napplikawha f’ħajjitna. Din l-​ubbidjenza tinkludi li npoġġu s-​servizz taʼ Ġeħova l-​ewwel f’ħajjitna, nobdu l-​livelli ġusti t’Alla, u nippritkaw dwar is-​Saltna t’Alla. (Mt. 6:33; 24:14) Tinkludi wkoll li nissapportjaw lill-​aħwa midlukin taʼ Kristu hekk kif jieħdu ħsieb l-​inkarigu taʼ responsabbiltà tagħhom.—Mt. 25:31-40.

18. B’liema mod l-​aħwa midlukin taʼ Kristu se jkunu jistgħu jippremjaw lil dawk li wrew qalb tajba magħhom?

 ¹⁸ Il-​qaddejja midlukin t’Alla dalwaqt se jkunu jistgħu jippremjaw il-​qalb tajba li n-​“nagħaġ oħrajn” urew magħhom. (Ġw. 10:16) Dan kif se jagħmluh? Qabel tibda l-​gwerra t’Armageddon, il-​144,000 kollha se jkunu telgħu fis-​sema bħala spirti immortali. Imbagħad, se jkunu parti mill-​armati tas-​sema li se jeqirdu lil Gog u jipproteġu lil “folla kbira” taʼ wħud bħal nagħaġ. (Riv. 2:26, 27; 7:9, 10) Iva, xi privileġġ se jkun għall-​folla l-​kbira li ssapportjat lill-​qaddejja midlukin taʼ Ġeħova waqt li dawn kienu għadhom fuq l-​art!

19-20. Minkejja l-​provi tagħna, kif nistgħu nibqgħu leali waqt li riesaq it-​tmiem?

¹⁹ Matul dawn l-​aħħar jiem diffiċli, ħafna min-​nies taʼ Ġeħova qed jesperjenzaw provi. Minkejja dan, nistgħu nissaportu bil-​ferħ. (Ġak. 1:2-4) Xi ħaġa li se tgħinna ħafna hi li nitolbu mill-​qalb. (Lq. 21:36) Aħna mhux biss għandna nitolbu imma wkoll għandna nistudjaw il-​Kelma t’Alla kuljum u nimmeditaw fuqha. Dan jinkludi l-​profeziji tal-​għaġeb li se jiġru dalwaqt. (Salm 77:12) Dawn l-​attivitajiet, flimkien maʼ li nagħmlu l-​aħjar li nistgħu fil-​ministeru, se jżommu l-​fidi u t-​tama tagħna b’saħħithom!

²⁰ Aħseb x’ferħ u eċitament se jkollok meta Babilonja l-​Kbira tkun meqruda u l-​gwerra t’Armageddon tkun għaddiet! Iżjed importanti minn hekk, aħseb kemm se tkun ferħan meta kulħadd se jirrispetta isem Alla u d-​dritt tiegħu li jmexxi! (Eżek. 38:23) Iva, Armageddon hi aħbar tajba għal dawk li jafu lil Alla, jobdu lil Ibnu, u jissaportu sat-​tmiem.—Mt. 24:13.