ARTIKLU GĦALL-ISTUDJU 38
“Ejjew għandi, . . . u jien inserraħkom”
“Ejjew għandi, intom ilkoll li mħabbtin u mgħobbijin, u jien inserraħkom.”—MT. 11:28.
GĦANJA 17 ‘Irrid żgur’
ĦARSA BIL-QUDDIEM *
1. Ġesù x’wiegħed, bħalma hu miktub f’Mattew 11:28-30?
ĠESÙ wiegħed xi ħaġa sabiħa lil folla li kienet qed tisimgħu. “Ejjew għandi,” hu qal, “u jien inserraħkom.” (Aqra Mattew 11:28-30.) Dan ma kienx kliem fil-vojt. Pereżempju, aħseb x’għamel għal mara li kellha marda serja.
2. X’għamel Ġesù għal mara marida?
2 Il-mara kellha bżonn l-għajnuna b’mod iddisprat. Kienet marret għand ħafna tobba bit-tama li tfiq. Wara 12-il sena taʼ qtigħ il-qalb, kienet għadha ma sabitx kura. Skont il-Liġi, ma kinitx nadifa. (Lev. 15:25) Imbagħad semgħet li Ġesù setaʼ jfejjaq lil dawk li kienu qed ibatu, allura marret tfittxu. Meta sabitu, messet tarf il-libsa tiegħu, u fieqet dak il-ħin stess. Ġesù mhux biss fejjaqha imma wkoll taha lura d-dinjità tagħha. Pereżempju, meta kellimha uża l-kelma “binti,” kelma t’affezzjoni u rispett. Żgur li dan saħħaħ lil din il-mara u kien taʼ serħan għaliha!—Lq. 8:43-48.
3. X’mistoqsijiet se nwieġbu?
3 Innota li kienet il-mara li marret għand Ġesù. Hi għamlet l-isforz biex tmur għandu. L-istess illum—għandna nagħmlu l-isforz biex immorru għand Ġesù. Fil-preżent, Ġesù mhux se jagħmel mirakli biex ifejjaq il-mard fiżiku taʼ dawk li jmorru għandu. Imma l-istedina tiegħu xorta għadha hemm: “Ejjew għandi, . . . u jien inserraħkom.” F’dan l-artiklu se nwieġbu ħames mistoqsijiet: Kif nistgħu mmorru għand Ġesù? X’ried ifisser Ġesù meta qal: “Ħudu l-madmad tiegħi fuqkom”? X’nistgħu nitgħallmu mingħand Ġesù? Ix-xogħol li tana nagħmlu għala jġib serħan?
U kif nistgħu nkomplu nsibu s-serħan taħt il-madmad taʼ Ġesù?“EJJEW GĦANDI”
4-5. Liema huma xi modi kif nistgħu mmorru għand Ġesù?
4 Mod wieħed kif immorru għand Ġesù hu billi nitgħallmu kemm nistgħu dwar l-affarijiet li qal u għamel. (Lq. 1:1-4) Ħadd ma jistaʼ jagħmel dan għalina. Hija r-responsabbiltà tagħna li nistudjaw dawn ir-rakkonti. Aħna mmorru wkoll għand Ġesù billi nieħdu d-deċiżjoni li nitgħammdu u nsiru dixxipli taʼ Kristu.
5 Mod ieħor kif immorru għand Ġesù hu billi mmorru għand l-anzjani tal-kongregazzjoni jekk neħtieġu l-għajnuna. Ġesù juża dawn l-“irġiel bħala għotjiet” biex jieħdu ħsieb in-nagħaġ tiegħu. (Efes. 4:7, 8, 11; Ġw. 21:16; 1 Pt. 5:1-3) Għandna nagħmlu l-isforz biex nitolbu l-għajnuna tagħhom. Ma nistgħux nistennew lill-anzjani jaqrawlna moħħna u jkunu jafu x’għandna bżonn. Innota x’jgħid ħu jismu Julian: “Jien kelli nħalli l-inkarigu taʼ Betel għal raġunijiet taʼ saħħa, u wieħed mill-aħwa ssuġġerieli nitlob lill-anzjani jżuruni biex jinkuraġġuni. Għall-ewwel ma ħsibtx li kelli bżonn. Imma iktar tard tlabt l-għajnuna, u dik iż-żjara kienet waħda mill-aħjar rigali li qatt qlajt.” Anzjani leali, bħal dawk it-tnejn li żaru lil Julian, jistgħu jgħinuna nkunu nafu “l-moħħ taʼ Kristu,” jiġifieri, li nifhmu u nimitaw il-ħsieb u l-attitudni tiegħu. (1 Kor. 2:16; 1 Pt. 2:21) Verament, dan hu wieħed mill-aħjar rigali li jistgħu jagħtuna!
“ĦUDU L-MADMAD TIEGĦI FUQKOM”
6. Ġesù x’ried ifisser meta qal: “Ħudu l-madmad tiegħi fuqkom”?
6 Meta Ġesù qal: “Ħudu l-madmad tiegħi fuqkom,” hu forsi ried ifisser “Aċċettaw l-awtorità tiegħi.” Forsi ried ifisser ukoll “Idħlu taħt il-madmad miegħi, u naħdmu flimkien għal Ġeħova.” Kien x’kien, il-madmad * ifisser xogħol.
7. Skont Mattew 28:18-20, liema xogħol ġejna mogħtijin nagħmlu, u dwar xiex nistgħu nkunu ċerti?
7 Aħna naċċettaw l-istedina taʼ Ġesù meta niddedikaw ħajjitna lil Ġeħova u nitgħammdu. Din l-istedina hi miftuħa għal kulħadd—Ġesù qatt mhu se jwarrab lil xi ħadd li sinċerament irid jaqdi lil Alla. (Ġw. 6:37, 38) Is-segwaċi taʼ Kristu kollha ngħataw il-privileġġ li jieħdu sehem fix-xogħol li Ġeħova qal lil Ġesù biex jidderieġi. Nistgħu nkunu ċerti li Ġesù dejjem se jkun hemm biex jgħinna nagħmlu dan ix-xogħol.—Aqra Mattew 28:18-20.
“TGĦALLMU MINNI”
Kun taʼ serħan għal oħrajn bħal Ġesù (Ara paragrafi 8-11) *
8-9. Nies umli għala kienu jinġibdu lejn Ġesù, u x’mistoqsijiet għandna nistaqsu lilna nfusna?
8 Nies umli kienu jinġibdu lejn Ġesù. (Mt. 19:13, 14; Lq. 7:37, 38) Għala? Innota l-kuntrast bejn Ġesù u l-Fariżej. Il-Fariżej ma kellhomx imħabba u kienu kburin. (Mt. 12:9-14) Ġesù kellu mħabba u kien umli. Il-Fariżej kienu jħobbu jkunu magħrufin u importanti. Ġesù ma inkuraġġiex dawn l-affarijiet. Hu għallem lid-dixxipli tiegħu jkunu umli u jaqdu lil oħrajn. (Mt. 23:2, 6-11) Il-Fariżej iddominaw lin-nies għax dawn kienu jibżgħu minn dak li setaʼ jiġrilhom jekk ma jobduhomx. (Ġw. 9:13, 22) Ġesù kien taʼ serħan għal oħrajn b’dak li qal u għamel bi mħabba u qalb tajba.
9 Tgħallimthom int dawn il-lezzjonijiet minn Ġesù? Staqsi lilek innifsek: ‘Magħruf li jien ġwejjed u umli? Nagħmel xogħol sempliċi minn jeddi għal oħrajn? Jien qalbi tajba m’oħrajn?’
10. Liema atmosfera ħoloq Ġesù għal dawk li ħadmu miegħu?
10 Ġesù ħoloq atmosfera li tiġbdek u taʼ paċi għal dawk li ħadmu miegħu, u kien jieħu gost iħarriġhom. (Lq. 10:1, 19-21) L-attitudni taʼ Ġesù ġiegħlet lid-dixxipli jħossuhom komdi biex jistaqsuh mistoqsijiet. Ukoll, Ġesù ried jismaʼ l-opinjonijiet tagħhom. (Mt. 16:13-16) Bħal pjanti fis-serer, id-dixxipli mxew ’il quddiem. Huma qagħdu attenti għal-lezzjonijiet li Ġesù għallem u pproduċew il-frott, jiġifieri, xogħlijiet tajbin.
Kun avviċinabbli u dħuli
Kun attiv u żeluż
Kun umli u ħabrieki *
11. X’mistoqsijiet għandna nistaqsu lilna nfusna?
11 Għandek int xi pożizzjoni t’awtorità? Jekk iva, staqsi lilek innifsek: ‘Xi kwalità t’atmosfera noħloq fuq il-post tax-xogħol jew id-dar? Jien nippromwovi paċi? L-attitudni tiegħi tagħmilha komda għal oħrajn biex jistaqsuni mistoqsijiet? Lest li nismaʼ l-opinjonijiet tagħhom?’ Aħna qatt ma rridu nkunu bħall-Fariżej, li ma kinux jieħdu pjaċir b’dawk li kienu jiddubitaw it-tagħlim tagħhom, u ppersegwitaw lil min esprima xi opinjoni kuntrarju għal tagħhom.—Mk. 3:1-6; Ġw. 9:29-34.
“INTOM ISSIBU SERĦAN”
12-14. Ix-xogħol li tana nagħmlu Ġesù għala hu taʼ serħan?
12 Għala hu taʼ serħan għalina li nagħmlu x-xogħol li tana Ġesù? Hemm ħafna raġunijiet, imma se niddiskutu ftit biss.
13 Aħna għandna l-aħjar indokraturi. Ġeħova, għalkemm hu l-Iktar Għoli, mhuwiex xi sid ingrat u kattiv. Hu japprezza x-xogħol li nagħmlu. (Ebr. 6:10) U jagħtina l-qawwa li għandna bżonn biex inġorru t-tagħbija tagħna. (2 Kor. 4:7; Gal. 6:5) Ġesù, is-Sultan tagħna, ħallielna l-eżempju perfett taʼ kif nittrattaw lil oħrajn. (Ġw. 13:15) U l-anzjani li jieħdu ħsiebna jipprovaw jimitaw lil Ġesù, “ir-ragħaj il-kbir.” (Ebr. 13:20; 1 Pt. 5:2) Huma jistinkaw biex ikunu qalbhom tajba, inkuraġġanti, u kuraġġużi hekk kif jgħallmuna u jipproteġuna.
14 Aħna għandna l-aħjar ħbieb. M’hemmx poplu ieħor li għandu xogħol bi skop u mħabba bħal tagħna. Aħseb ftit: Aħna għandna l-privileġġ li naħdmu maʼ nies li għandhom l-ogħla livelli morali imma li ma jqisux lilhom infushom aħjar minn ħaddieħor. Huma għandhom ħafna abbiltajiet imma ma jiftaħrux bihom, u jqisu lil ħaddieħor aħjar minnhom. Huma ma jqisuniex biss bħala wħud li naħdmu magħhom imma wkoll bħala ħbiebhom. U din l-għaqda tant hi b’saħħitha li huma lesti li jagħtu ħajjithom għalina!
15. Kif għandna nħossuna dwar ix-xogħol li qegħdin nagħmlu?
15 Aħna għandna l-aħjar xogħol. Aħna ngħallmu lin-nies il-verità dwar Ġeħova u nikxfu l-gideb li qal ix-Xitan. (Ġw. 8:44) Satana jgħabbi lin-nies b’tagħbijiet taʼ gideb li ma jistgħux iġorru. Pereżempju, iridna nemmnu li Ġeħova mhux se jaħfrilna għad-dnubiet li għamilna u li m’aħniex taʼ min iħobbna. X’tagħbija li tkompli tgħakkisna, u x’gidba qarrieqa din! Meta mmorru għand Kristu, dnubietna jinħafru. U l-verità hi li Ġeħova jħobbna ħafna. (Rum. 8:32, 38, 39) Iġibilna ferħ kbir li ngħinu lin-nies jistrieħu fuq Ġeħova u li narawhom itejbu ħajjithom!
KOMPLI SIB IS-SERĦAN TAĦT IL-MADMAD TAʼ ĠESÙ
16. It-tagħbija li Ġesù jgħidilna nġorru kif inhi differenti minn tagħbijiet oħra li għandna?
16 It-tagħbija li Ġesù jgħidilna nġorru hi differenti minn tagħbijiet oħra li għandna. Pereżempju, wara ġurnata xogħol, xi wħud mhux biss iħossuhom għajjenin ħafna imma wkoll mhux sodisfatti. Għall-kuntrarju, wara li nqattgħu l-ħin naqdu lil Ġeħova u Kristu, aħna nħossu sodisfazzjon kbir. Forsi nkunu għajjenin mejta wara ġurnata xogħol u jkollna nagħmlu sforz biex nattendu laqgħa tal-kongregazzjoni dakinhar. Imma mhux l-ewwel darba li mmorru lura d-dar mimlijin serħan u enerġija. Nistgħu ngħidu l-istess għal meta nagħmlu l-isforz biex nippritkaw u nagħmlu l-istudju personali tagħna tal-Bibbja. Il-premju li nirċievu hu ikbar mill-isforz li nkunu għamilna.
17. X’għandna nirrealizzaw dwar is-sitwazzjoni tagħna u dwar xiex għandna noqogħdu attenti?
17 Aħna għandna nirrealizzaw li kull wieħed minna għandu biss ċertu ammont taʼ enerġija. Allura rridu noqogħdu attenti x’nipprovaw nagħmlu. Pereżempju, forsi naħlu l-enerġija f’li nipprovaw ikollna ħafna affarijiet materjali. Innota x’qal Ġesù lil żagħżugħ sinjur li staqsieh: “Xi rrid nagħmel biex niret il-ħajja taʼ dejjem?” Iż-żagħżugħ kien diġà qed josserva l-Liġi. Bilfors li kien raġel tajjeb għax ir-rakkont tal-Evanġelju taʼ Marku speċifikament jgħid li Ġesù “ħass imħabba għalih.” Ġesù għamel stedina lil dan il-mexxej żagħżugħ. “Mur, bigħ dak li għandek,” Ġesù qal, “u ejja kun segwaċi tiegħi.” Ir-raġel kien bejn ħaltejn, imma jidher li ma setax jitlaq il-“ħafna ġid” li kellu. (Mk. 10:17-22) B’hekk, hu m’aċċettax il-madmad li offrielu Ġesù u kompla jitjassar għall-“flus.” (Mt. 6:24) Kieku int x’kont tagħżel?
18. X’għandna nagħmlu kultant, u għala?
18 Minn żmien għal żmien, ikun tajjeb li nerġgħu neżaminaw x’qed inpoġġu l-ewwel f’ħajjitna. Għala? Sabiex inkunu ċerti li qed nużaw l-enerġija tagħna bil-għaqal. Ara x’jgħid żagħżugħ jismu Mark: “Għal ħafna snin ħsibt li kont qed ngħix ħajja sempliċi. Kont pijunier, imma kont qed nuża ħafna ħin u enerġija nipprova jkolli iktar flus, biex inkun nistaʼ ngħix iktar komdu. Ma stajtx nifhem għala ħajti kienet saret diffiċli. Imbagħad irrealizzajt li fil-biċċa l-kbira kont qed infittex l-interessi tiegħi l-ewwel u nagħti lil Ġeħova l-ħin u l-enerġija li kien jibqaʼ.” Mark irranġa l-mod kif kien jaħseb u jgħix, u għamel lilu nnifsu disponibbli biex ikun jistaʼ jagħmel iktar fis-servizz taʼ Ġeħova. Hu jgħid: “Kultant inħossni ansjuż, imma bl-għajnuna taʼ Ġeħova u l-appoġġ taʼ Ġesù għelibt l-isfidi tiegħi.”
19. Għala hu daqstant importanti li jkollna l-ħarsa t-tajba?
19 Aħna se nkomplu nsibu serħan taħt il-madmad taʼ Ġesù jekk nagħmlu tliet affarijiet. L-ewwel, żomm il-ħarsa t-tajba. Aħna qed nagħmlu x-xogħol taʼ Ġeħova, allura għandu jsir kif irid hu. Aħna l-ħaddiema, u Ġeħova hu s-Sid. (Lq. 17:10) Jekk nipprovaw nagħmlu x-xogħol tiegħu kif jidhrilna aħna, se nsibu ruħna niġġieldu kontra l-madmad. Anke barri b’saħħtu x’aktarx iweġġaʼ u jgħejji lilu nnifsu jekk il-ħin kollu jipprova jmur fejn irid hu u jiġġieled kontra l-madmad li sidu jikkontrolla. Min-naħa l-oħra, nistgħu nagħmlu affarijiet straordinarji u negħlbu kwalunkwe ostaklu jekk insegwu l-gwida taʼ Ġeħova. Ftakar li ħadd ma jistaʼ jwaqqaf ir-rieda tiegħu milli sseħħ!—Rum. 8:31; 1 Ġw. 4:4.
20. X’għandu jkun il-mottiv tagħna f’li nidħlu taħt il-madmad taʼ Ġesù?
20 It-tieni, agħmel ix-xogħol bil-mottiv it-tajjeb. Il-mira tagħna hi li nġibu glorja lil Missierna taʼ mħabba, Ġeħova. In-nies fi żmien Ġesù li kienu mmotivati mir-regħba jew l-interess personali malajr tilfu l-ferħ u abbandunaw il-madmad taʼ Ġesù. (Ġw. 6:25-27, 51, 60, 66; Flp. 3:18, 19) Għall-kuntrarju, dawk li kienu mmotivati minn imħabba mhix egoistika għal Alla u mill-imħabba għall-proxxmu, ġarrew bil-ferħ dak il-madmad matul ħajjithom fuq l-art, bit-tama li jaqdu maʼ Kristu fis-sema. Bħalhom, aħna se nibqgħu ferħanin billi nġorru l-madmad taʼ Ġesù bil-mottiv it-tajjeb.
21. Skont Mattew 6:31-33, x’nistgħu nistennew li jagħmel Ġeħova?
21 It-tielet, stenna li Ġeħova se jkun hemm għalik. Aħna għażilna ħajja taʼ sagrifiċċju personali u xogħol iebes. Ġesù wissiena li kellna niġu persegwitati. Imma nistgħu nistennew li Ġeħova se jagħtina s-saħħa biex nissaportu kwalunkwe sfida. Iktar ma nissaportu, iktar se tissaħħaħ il-fidi tagħna. (Ġak. 1:2-4) Nistgħu nistennew ukoll li Ġeħova se jipprovdilna dak li jkollna bżonn, li Ġesù se jieħu ħsiebna, u li ħutna se jinkuraġġuna. (Aqra Mattew 6:31-33; Ġw. 10:14; 1 Tess. 5:11) Verament, x’għandna bżonn iktar?
22. Għal xiex nistgħu nkunu grati?
22 Il-mara li Ġesù fejjaq sabet serħan fl-istess ġurnata li tfejqet. Imma hi kien se jkollha serħan għal dejjem biss jekk saret dixxiplu leali taʼ Kristu. X’taħseb li għamlet? Jekk tassew għażlet li tidħol taħt il-madmad taʼ Ġesù, immaġina l-premju—hi tistaʼ saħansitra qed taqdi maʼ Ġesù fis-sema! Kwalunkwe sagrifiċċju li kienet għamlet biex issegwi lil Ġesù ma jistax jitqabbel maʼ din il-barka. Hi x’inhi t-tama li għandna, ħajja taʼ dejjem fis-sema jew fuq l-art, nistgħu nkunu grati ferm li aċċettajna l-istedina taʼ Ġesù: “Ejjew għandi!”
GĦANJA 13 Kristu, l-eżempju tagħna
^ par. 5 Ġesù jistidinna mmorru għandu. X’hemm involut f’li naċċettaw l-istedina tiegħu? Dan l-artiklu jwieġeb din il-mistoqsija, u se jfakkarna kif nistgħu nsibu serħan billi naħdmu flimkien maʼ Kristu.
^ par. 6 ESPRESSJONI SPJEGATA: Il-kelma madmad tirreferi għal injama li tinġarr fuq l-ispallejn taʼ persuna u mat-truf tagħha jkollha tagħbijiet imdendlin. Tistaʼ tirreferi wkoll għal injama li titpoġġa fuq l-għonq taʼ żewġ annimali biex jiġbdu moħriet.