ARTIKLU GĦALL-ISTUDJU 38
Qed Tuża l-Libertà li Għandek bil-Għaqal?
“L-art ma kellhiex tfixkil; u ma kien hemm ebda gwerra kontrih matul dawn is-snin, għax Ġeħova tah il-mistrieħ.”—2 KRON. 14:6.
GĦANJA 60 Hemm ħajjithom fin-nofs
ĦARSA BIL-QUDDIEM *
1. Meta jistaʼ jkun l-iktar diffiċli biex naqdu lil Ġeħova?
META jistaʼ jkun l-iktar diffiċli biex taqdi lil Ġeħova? Meta jkollok ħafna problemi jew meta ma jkollokx problemi? Ħafna jsibuha eħfef biex jistrieħu fuq Ġeħova meta jkollhom il-problemi. Imma xi ngħidu meta kollox ikun miexi sew fil-ħajja tagħna? Xi kultant, nistgħu ninsew kemm hu importanti li naqdu lil Ġeħova. Ġeħova lill-Iżraelin wissiehom li setaʼ jiġrilhom hekk.—Dt. 6:10-12.
2. Is-Sultan Asa x’eżempju ħallielna?
2 Is-Sultan Asa huwa eżempju eċċellenti taʼ raġel li aġixxa bil-għaqal. Hu qeda lil Ġeħova u straħ kompletament fuqu mhux biss fi żmien diffiċli, imma anki fi żmien taʼ paċi. Matul ħajtu, qalbu “baqgħet sħiħa maʼ Ġeħova.” (1 Slat. 15:14) Asa wera dan meta neħħa l-qima falza minn Ġuda. Il-Bibbja tgħid li hu “neħħa l-artali barranin u l-postijiet għall-qima u kisser il-pilastri sagri u qaċċat l-arbli sagri.” (2 Kron. 14:3, 5) Hu neħħa anki lil nanntu, Magħka, mill-pożizzjoni prominenti li kellha. Għala? Għax hi ħeġġet lin-nies biex jaduraw l-idoli.—1 Slat. 15:11-13.
3. X’se nikkunsidraw f’dan l-artiklu?
3 Asa mhux biss qered l-idoli, imma hu għen lin-nies taʼ Ġuda biex jerġgħu jibdew iqimu lil Ġeħova. Imbagħad, Ġeħova bierek kemm lil Asa kif ukoll lin-nies taʼ Ġuda * Għal perjodu taʼ għaxar snin matul it-tmexxija taʼ Asa, “l-art ma kellhiex tfixkil.” (2 Kron. 14:1, 4, 6) F’dan l-artiklu, se nikkunsidraw x’għamel Asa f’dak iż-żmien. Imbagħad se nikkunsidraw l-eżempju tal-Kristjani tal-bidu li, bħal Asa, ħadu vantaġġ miż-żmien taʼ paċi. Fl-aħħar se nwieġbu din il-mistoqsija: Jekk int tgħix f’pajjiż fejn hemm il-libertà, kif tistaʼ tieħu vantaġġ minn dan iż-żmien?
billi tahom żmien taʼ paċi.ASA X’GĦAMEL FI ŻMIEN TAʼ PAĊI?
4. Skont t-2 Kronaki 14:2, 6, 7, Asa x’għamel fi żmien taʼ paċi?
4 Aqra t-2 Kronaki 14:2, 6, 7. Asa qal lin-nies li kien Ġeħova li ‘tahom il-mistrieħ minn kullimkien.’ Imma Asa ma ħasibx li kien żmien biex joqgħod igawdi l-ħajja. Minflok, hu beda jibni l-bliet, is-swar, it-torrijiet, u l-bibien. Hu qal lin-nies taʼ Ġuda: “L-art għadha għad-dispożizzjoni tagħna.” X’ried ifisser Asa b’dan il-kliem? Hu ried ifisser li ma kienx se jkun hemm għedewwa fil-pajjiż li se jwaqqfuhom mix-xogħol tal-bini. Hu ħeġġeġ lin-nies biex jieħdu vantaġġ minn dan iż-żmien.
5. Asa għala saħħaħ l-armata tiegħu?
5 Asa uża wkoll iż-żmien taʼ paċi li kellu biex isaħħaħ l-armata tiegħu. (2 Kron. 14:8) Kien dan ifisser li ma kienx jafda f’Ġeħova? Le. Anzi, Asa kien jaf li kienet ir-responsabbiltà tiegħu bħala sultan li jipprepara lin-nies għall-problemi li setgħu jiffaċċjaw fil-futur. Hu kien jaf li dan iż-żmien taʼ paċi f’Ġuda ma kienx ħa jibqaʼ għal dejjem, u hekk ġara.
IL-KRISTJANI TAL-BIDU X’GĦAMLU FI ŻMIEN TAʼ PAĊI?
6. Il-Kristjani tal-bidu x’għamlu fi żmien taʼ paċi?
6 Għalkemm il-Kristjani tal-bidu spiss ġew ippersegwitati, huma wkoll gawdew żmien taʼ paċi. X’għamlu matul dak iż-żmien? Dawn l-irġiel u nisa leali ppritkaw l-aħbar tajba bla waqfien u baqgħu ffokati fuq li jaqdu lil Ġeħova. B’hekk, huma ‘baqgħu jiżdiedu.’ Dan wera li Ġeħova bierek iż-żelu tagħhom fiż-żmien taʼ paċi.—Atti 9:26-31.
7-8. Pawlu u Kristjani oħrajn x’għamlu meta kellhom l-opportunità? Spjega.
7 Il-Kristjani tal-bidu ppritkaw l-aħbar tajba kull meta setgħu. Pereżempju, meta Pawlu rrealizza li setaʼ jipprietka lil ħafna nies f’Efesu, hu ħa l-opportunità u baqaʼ jipprietka hemm.—1 Kor. 16:8, 9.
8 Ukoll, fis-sena 49, meta l-appostli u l-anzjani f’Ġerusalemm ħadu d-deċiżjoni dwar iċ-ċirkonċiżjoni, Pawlu u Kristjani oħrajn setgħu jippritkaw lil ħafna nies. (Atti 15:23-29) Wara, Pawlu u oħrajn qalu lill-kongregazzjonijiet b’din id-deċiżjoni u l-aħwa ħadmu iebes biex jippritkaw “l-aħbar tajba tal-kelma taʼ Ġeħova.” (Atti 15:30-35) X’kien ir-riżultat? Il-Bibbja tgħid li “l-kongregazzjonijiet komplew jissodaw fil-fidi u jiżdiedu fl-għadd minn jum għall-ieħor.”—Atti 16:4, 5.
KIF NISTGĦU NUŻAW IL-LIBERTÀ LI GĦANDNA?
9. X’inhi s-sitwazzjoni tal-ippritkar f’ħafna pajjiżi llum, u aħna x’għandna nsaqsu lilna nfusna?
9 F’ħafna pajjiżi llum, aħna għadna nistgħu nippritkaw bil-libertà. Int tgħix f’wieħed minn dawn il-pajjiżi? Jekk iva, staqsi lilek innifsek, ‘Kif qed nuża din il-libertà?’ Għan-nies taʼ Ġeħova, l-aħħar jiem huma eċċitanti għax qed jaħdmu iebes fl-iktar xogħol importanti li qed isir fid-dinja. Dan hu x-xogħol tal-ippritkar u t-tagħlim. (Mk. 13:10) Hemm ħafna affarijiet li nistgħu nagħmlu f’dan ix-xogħol!
10. It-2 Timotju 4:2, x’jinkuraġġina nagħmlu?
10 Kif tistaʼ tieħu vantaġġ minn dan iż-żmien favorevoli? (Aqra t-2 Timotju 4:2.) Ikkunsidra jekk int jew xi ħadd fil-familja tiegħek jistax jagħmel xi bidliet biex ikun jistaʼ jipprietka iktar, forsi anki jaqdi bħala pijunier. Issa mhuwiex iż-żmien li nsiru sinjuri, għax dak li għandna mhux se nkunu nistgħu niħduh magħna fit-tribulazzjoni l-kbira.—Prov. 11:4; Mt. 6:31-33; 1 Ġw. 2:15-17.
11. Xi pubblikaturi x’għamlu biex ikunu jistgħu jgħinu lil kemm jistaʼ jkun nies?
11 Ħafna pubblikaturi tgħallmu lingwa ġdida biex ikunu jistgħu jgħinu oħrajn jitgħallmu dwar Ġeħova. L-organizzazzjoni tiegħu qed tipprovdi ħafna materjal biex tgħinna nkunu nistgħu nippritkaw b’lingwi differenti. Pereżempju, fl-2010, il-letteratura tagħna kienet disponibbli f’madwar 500 lingwa. Illum, dak in-numru telaʼ għal iktar minn 1,000 lingwa!
12. In-nies kif jibbenefikaw meta jisimgħu l-aħbar tajba bil-lingwa tagħhom? Agħti eżempju.
12 Kif taħseb li jħossuhom in-nies meta jisimgħu l-aħbar tajba mill-Bibbja bil-lingwa tagħhom? Ikkunsidra kif oħt ibbenefikat mill-konvenzjoni reġjonali li saret Memphis, f’Tennessee, fl-Istati Uniti. Hi attendiet dil-konvenzjoni li saret bil-lingwa tagħha, Kinyarwanda. Din il-lingwa tintuża f’xi partijiet fl-Afrika.
Wara l-konvenzjoni qalet: “Kemm ili li ġejt l-Amerika, din kienet l-ewwel darba li fi 17-il sena stajt nifhem il-programm kollu.” Jidher ċar li dak li semgħet messilha qalbha, għax kien bil-lingwa tagħha. Jekk iċ-ċirkustanzi tiegħek jippermettu, tistaʼ int titgħallem lingwa barranija li xi nies fil-pajjiż tiegħek jitkellmu? Meta tkellem lil xi ħadd bil-lingwa tiegħu, ma taħsibx li se jkun irid jismaʼ iktar il-messaġġ? L-isforz li tagħmel se jġiblek ħafna ferħ.13. Ħutna fir-Russja kif użaw il-libertà li kellhom?
13 F’xi pajjiżi l-aħwa ma jistgħux jippritkaw bil-libertà għax il-gvernijiet waqqfu x-xogħol tal-ippritkar. Pereżempju, ikkunsidra l-aħwa fir-Russja. Huma kienu ilhom jiġu ppersegwitati għal ħafna snin, imbagħad f’Marzu tal-1991, il-gvern tahom il-libertà. Dak iż-żmien, kien hemm 16,000 Xhud fir-Russja. Għoxrin sena wara, in-numru telaʼ għal 160,000! Bla dubju, ħutna aġixxew bil-għaqal meta kellhom il-libertà biex jippritkaw. Imma dan iż-żmien ma tantx dam! Minkejja li f’dan il-pajjiż l-affarijiet inbidlu, l-aħwa għadhom żelużi fix-xogħol taʼ Ġeħova. Huma qed ikomplu jagħmlu dak kollu li jistgħu biex jaqduh.
IL-LIBERTÀ LI GĦANDNA MHUX SE DDUM!
14-15. Ġeħova kif uża s-saħħa tiegħu biex jgħin lil Asa?
14 Fi żmien Asa, iż-żmien taʼ paċi spiċċa. Armata kbira taʼ iktar minn miljun suldat ġiet mill-Etjopja. Il-kmandant, Żeraħ, kien ċert li hu u l-armata tiegħu kienu se jirbħu lil Ġuda. Imma, is-Sultan Asa ma beżax mill-ammont taʼ suldati 2 Kron. 14:11.
għax fada f’Ġeħova. Hu talab: “Għinna, O Ġeħova Alla tagħna, għax fuqek nistrieħu aħna, u f’ismek ġejna kontra din il-kotra.”—15 Għalkemm l-armata Etjopjana kienet kważi d-doppju mill-armata taʼ Asa, Asa kien jaf li Ġeħova hu b’saħħtu u setaʼ jgħinhom. U Ġeħova hekk għamel. L-armata Etjopjana ġiet megħluba.—2 Kron. 14:8-13.
16. Kif nafu li l-libertà li għandna mhux se ddum?
16 Aħna ma nafux eżatt x’se jiġri lil kull wieħed u waħda minna fil-futur, imma nafu żgur li l-libertà li għandna mhux se ddum. Ftakar, Ġesù bassar li fl-aħħar jiem id-dixxipli tiegħu kienu se jkunu “mibgħudin mill-ġnus kollha.” (Mt. 24:9) Anki l-appostlu Pawlu qal li “kulmin jixtieq jgħix bid-devozzjoni lejn Alla fi sħubija maʼ Kristu Ġesù [se] jkun persegwitat ukoll.” (2 Tim. 3:12) Satana għandu “rabja kbira,” u hu impossibbli li nevitaw ir-rabja tiegħu.—Riv. 12:12.
17. Il-fidi tagħna kif tista’ tiġi ttestjata?
17 Il-fidi taʼ kull wieħed u waħda minna dalwaqt se tiġi ttestjata. Għax se jkun hawn “tribulazzjoni kbira li qatt ma kien hawn bħalha mill-bidu tad-dinja s’issa, le, lanqas jerġaʼ jkun hawn.” (Mt. 24:21) Matul dak iż-żmien, jistaʼ jkun li anki tal-familja tagħna jiħduha kontrina u x-xogħol tal-ippritkar ma nkunux nistgħu nagħmluh. (Mt. 10:35, 36) Se tagħmel int bħal Asa, tafda f’Ġeħova għall-għajnuna u l-protezzjoni?
18. Skont Ebrej 10:38, 39, x’se jgħinna nkunu lesti għall-futur?
18 Ġeħova qed jippreparana minn issa biex il-fidi tagħna tkun b’saħħitha. Hu qed juża “l-ilsir leali u għaqli” biex jagħtina “l-ikel fiż-żmien xieraq,” ħalli b’hekk ikollna dak kollu li għandna bżonn biex nibqgħu b’saħħitna. (Mt. 24:45) Imma kull wieħed u waħda minna għandu jaħdem iebes biex ikollu fidi b’saħħitha f’Ġeħova.—Aqra Ebrej 10:38, 39.
19-20. Wara li taqra l-1 Kronaki 28:9, liema mistoqsijiet għandek tistaqsi, u għala?
19 Bħas-Sultan Asa, aħna rridu ‘nfittxu lil Ġeħova.’ (2 Kron. 14:4; 15:1, 2) Aħna bdejna nfittxu lil Ġeħova meta tgħallimna dwaru u tgħammidna. Imma rridu nagħmlu l-almu tagħna biex imħabbitna għal Ġeħova tkompli tikber. Biex naraw kif aħna sejrin, nistgħu nsaqsu lilna nfusna, ‘Nattendi l-laqgħat b’mod regolari?’ Fil-laqgħat aħna nirċievu l-għajnuna biex inkomplu naqdu lil Ġeħova u niġu inkuraġġiti minn ħutna. (Mt. 11:28) Għandna nsaqsu lilna nfusna wkoll, ‘Naqra l-Bibbja kuljum?’ Jekk tgħix mal-familja, qed twarrbu ħin kull ġimgħa għall-qima bħala familja? Jew jekk tgħix waħdek, qiegħed twarrab il-ħin biex tagħmel l-istudju bħalma kieku tagħmel mal-familja? U tagħmel l-almu tiegħek biex tipprietka u tgħallem lil oħrajn?
20 Għala għandna nistaqsu dawn il-mistoqsijiet? Għax il-Bibbja tgħidilna li Ġeħova jeżamina l-ħsibijiet tagħna u dak li hemm f’qalbna, allura aħna rridu nagħmlu l-istess. (Aqra l-1 Kronaki 28:9.) Jekk naraw li għandna bżonn nagħmlu xi bidliet fil-miri, l-attitudni, u l-ħsibijiet tagħna, għandna nitolbu lil Ġeħova biex jgħinna nagħmluhom. Issa huwa ż-żmien biex nippreparaw lilna nfusna għal dak li ġej. Tħalli xejn iwaqqfek milli tuża bil-għaqal il-libertà li għandek!
GĦANJA 62 L-għanja l-ġdida
^ par. 5 Int tgħix f’pajjiż fejn tistaʼ taqdi lil Ġeħova bil-libertà? Jekk iva, kif qed tuża l-ħin tiegħek f’dan iż-żmien? Dan l-artiklu se jgħinek tikkunsidra kif tistaʼ timita lis-Sultan Asa taʼ Ġuda u l-Kristjani tal-bidu. Huma użaw il-ħin tagħhom bil-għaqal fi żmien taʼ paċi.
^ par. 3 ESPRESSJONI SPJEGATA: Il-kelma “paċi” ma tfissirx biss li ma jkunx hemm il-gwerer. Il-kelma Ebrajka fiha l-ħsieb ukoll taʼ li wieħed ikun kuntent, ikollu saħħa tajba, u jkun protett.
^ par. 57 X’TGĦIDILNA L-ISTAMPA: Is-Sultan Asa neħħa lil nanntu mill-pożizzjoni li kellha għax hi ħeġġet lin-nies biex jaduraw l-idoli. Dawk li appoġġjaw lil Asa għamlu bħalu u qerdu l-idoli.
^ par. 59 X’TGĦIDILNA L-ISTAMPA: Koppja żeluża qed jissimplifikaw ħajjithom biex ikunu jistgħu jmorru jgħinu fejn hemm il-bżonn.