ARTIKLU GĦALL-ISTUDJU 36
Apprezza s-Saħħa taż-Żgħażagħ
“Is-sbuħija taʼ l-irġiel żgħażagħ hija l-qawwa tagħhom.”—PROV. 20:29.
GĦANJA 88 Għarrafni triqatek
ĦARSA BIL-QUDDIEM a
1. Meta nibdew nikbru fl-età, x’mira nistgħu nagħmlu?
META nibdew nikbru, jaf nibdew inħossuna li m’għadniex utli għal Ġeħova bħalma konna qabel. Minkejja li m’għadniex b’saħħitna daqs kemm konna, xorta nistgħu nużaw l-esperjenzi u l-abbiltajiet tagħna biex ngħallmu lil uħud iżgħar biex b’hekk jaċċettaw iktar responsabbiltajiet u jkunu utli fl-organizzazzjoni taʼ Ġeħova. Ħu li ilu jaqdi bħala anzjan jgħid, “Meta ma stajtx nagħmel daqs kemm kont nagħmel qabel minħabba l-età, jiena kont ferħan li kien hemm aħwa iżgħar ikkwalifikati biex jagħmlu x-xogħol li ma stajtx nibqaʼ nagħmel jien.”
2. X’se niddiskutu f’dan l-artiklu?
2 Fl-artiklu taʼ qabel dan iddiskutejna kif iż-żgħażagħ jibbenefikaw meta jsiru ħbieb m’aħwa kbar fl-età. F’dan l-artiklu se naraw kif kwalitajiet bħall-umiltà, il-modestja, l-apprezzament, u l-ġenerożità jistgħu jgħinu lill-aħwa kbar fl-età jaħdmu maż-żgħażagħ u kif dan se jgħin lill-kongregazzjoni.
KUN UMLI
3. Skont Filippin 2:3, 4, l-umiltà x’inhi u kif tistaʼ tgħin lil persuna?
3 L-aħwa kbar fl-età għandhom ikunu umli jekk jixtiequ jgħinu liż-żgħażagħ. Persuna umli tqis lil oħrajn importanti jew kapaċi iktar minnha. (Aqra Filippin 2:3, 4.) Uħud kbar fl-età li huma umli se jifhmu li hemm diversi modi kif jistaʼ jsir ix-xogħol u li kollha huma fi qbil mal-Bibbja. Għalhekk, huma ma jippretendux li kulħadd jagħmel ix-xogħol kif kienu jagħmluh huma qabel. (Ekk. 7:10) Huma jistgħu jgħinu lil uħud iżgħar billi jgħidulhom dak li jkunu tgħallmu huma. Imma jifhmu li “x-xena taʼ din id-dinja qed tinbidel” u għalhekk jaf ikollhom bżonn jaddattaw għaċ-ċirkostanzi ġodda.—1 Kor. 7:31.
Aħwa kbar fl-età jaqsmu l-esperjenza tagħhom m’oħrajn (Ara paragrafi 4-5) b
4. L-indokraturi li jżuru l-kongregazzjonijiet kif juru l-istess attitudni li kellhom il-Leviti?
4 Aħwa kbar fl-età li huma umli jifhmu li minħabba l-età tagħhom ma jkunux jistgħu jagħmlu daqs kemm kienu jagħmlu. Pereżempju, aħseb dwar l-indokraturi li jżuru l-kongregazzjonijiet. Meta jagħlqu 70 sena jkollhom jibdlu l-inkarigu tagħhom. Dan jistaʼ jkun taʼ sfida għalihom. Huma kienu jieħdu pjaċir jgħinu lill-aħwa. L-inkarigu tagħhom kien għal qalbhom u għadhom jixtiequ jagħmlu dak ix-xogħol. Imma jifhmu li issa jkun aħjar li aħwa iżgħar jagħmlu dan ix-xogħol minflokhom. Huma juru l-istess attitudni li kellhom il-Leviti f’Iżrael. Il-Leviti kellhom jieqfu jaqdu fit-tabernaklu meta jagħlqu 50 sena. Kien x’kien l-inkarigu tagħhom, il-Leviti li kienu jagħlqu 50 sena kienu jkunu ferħanin. Huma kienu jagħmlu dak kollu li jistgħu biex jgħinu liż-żgħażagħ. (Num. 8:25, 26) Illum, meta l-indokraturi li jżuru l-kongregazzjonijiet jagħlqu 70 sena, huma jieqfu mill-inkarigu tagħhom. Imma xorta jibqgħu jgħinu u jinkuraġġixxu lill-kongregazzjoni tagħhom.
5. X’titgħallem mill-eżempju taʼ Dan u Katie?
5 Ikkunsidra l-eżempju taʼ Dan, li qeda bħala indokratur li jżur il-kongregazzjonijiet għal 23 sena. Meta Dan għalaq 70 sena, hu u l-mara tiegħu Katie ġew mitluba biex jaqdu bħala pijunieri speċjali. Kif inhuma sejrin? Dan jgħid li issa għandu x’jagħmel iżjed minn qabel! Hu jieħu ħsieb ir-responsabbiltajiet tiegħu fil-kongregazzjoni, jgħin lil aħwa jikkwalifikaw bħala qaddejja ministerjali, u jittrennja lil oħrajn kif għandhom jippritkaw bl-istands fil-bliet u fil-ħabsijiet. Intom aħwa kbar fl-età, sew jekk qegħdin fis-servizz full-time u sew jekk le, tistgħu tagħmlu ħafna biex tgħinu lil oħrajn. Kif? Ħudu pjaċir biċ-ċirkostanzi li għandkom bħalissa, agħmlu miri ġodda, u ffokaw fuq dak li tistgħu tagħmlu mhux fuq dak li ma tistgħux.
KUN MODEST
6. Għala hu importanti li nkunu modesti? Agħti eżempju.
6 Persuna modesta tkun taf il-limitazzjonijiet tagħha. (Prov. 11:2) Għalhekk, hi mhux se tippretendi li tagħmel iktar milli tiflaħ. Dan se jgħinha biex hi tibqaʼ ferħana u tkompli tagħmel ix-xogħol. Nistgħu nqabblu persuna modesta maʼ xi ħadd li jkun qed isuq karozza għat-telgħa. Biex jitlaʼ t-telgħa, ix-xufier ikollu bżonn inaqqas il-gerijiet. Veru li se jitlaʼ bil-mod imma se jasal. Bl-istess mod, persuna modesta tkun taf li għandha bżonn tagħmel il-bidliet u tnaqqas il-pass biex tkompli taqdi lil Ġeħova u tgħin lil oħrajn.—Flp. 4:5.
7. X’juri li Barżillaj kien modest?
7 Innota l-eżempju taʼ Barżillaj, li kellu 80 sena meta s-Sultan David qallu biex jaqdi fil-palazz irjali. Imma Barżillaj kien modest u m’aċċettax l-offerta tas-Sultan David. Hu kien jaf li minħabba l-età tiegħu ma setax jagħmel ħafna xogħol. Għalhekk issuġġerixxa biex jintgħażel iż-żagħżugħ jismu Kimħam. (2 Sam. 19:35-37) Bħal Barżillaj, aħwa kbar fl-età jieħdu pjaċir jagħtu x-xogħol liż-żgħażagħ.
Is-Sultan David aċċetta li Alla għażel lil ibnu Salamun biex jibni t-tempju (Ara paragrafu 8)
8. Is-Sultan David kif wera li kien modest meta ried jibni t-tempju?
8 Is-Sultan David ukoll hu eżempju eċċellenti taʼ persuna modesta. Hu vera xtaq jibni t-tempju lil Ġeħova. Imma meta Ġeħova qallu li x-xogħol kien ħa jingħata liż-żagħżugħ Salamun, hu aċċetta d-deċiżjoni taʼ Ġeħova u għamel dak kollu li setaʼ biex jgħin fil-proġett. (1 Kron. 17:4; 22:5) David ma ħasibx li setaʼ jagħmel xogħol aħjar fil-bini tat-tempju għax Salamun kien għadu “żagħżugħ u bla esperjenza.” (1 Kron. 29:1) David kien jaf li l-bini tat-tempju ma kienx jiddependi mill-età jew l-esperjenza taʼ dawk li kienu se jagħmlu x-xogħol, imma l-bini kien se jitlesta bil-barka taʼ Ġeħova. Bħal David, l-aħwa kbar fl-età xorta jibqgħu jaħdmu iebes għal Ġeħova anki meta l-inkarigu tagħhom jinbidel. U huma jafu li Ġeħova se jbierek liż-żgħażagħ li qegħdin jagħmlu x-xogħol li kienu jagħmlu huma qabel.
9. Shigeo kif wera li kien modest?
9 Anke fi żmienna hawn aħwa modesti. Ħu l-eżempju taʼ Shigeo. Fl-1976, meta kellu 30 sena, hu ġie inkarigat biex jaqdi bħala membru tal-Kumitat tal-Fergħa. Fl-2004, hu sar il-koordinatur tal-Kumitat tal-Fergħa. Iktar tard induna li m’għadux b’saħħtu bħalma kien qabel u ma bediex ilaħħaq max-xogħol li kellu. Hu talab dwar is-sitwazzjoni tiegħu u beda jaħseb jekk kienx aħjar li jagħti l-inkarigu tiegħu lil ħu iżgħar. Għalkemm illum Shigeo m’għadux jaqdi bħala koordinatur, imma hu xorta għadu jaqdi flimkien mal-membri tal-Kumitat tal-Fergħa. L-eżempji taʼ Barżillaj, is-Sultan David, u Shigeo, juruna li xi ħadd umli u modest jaħseb dwar dak li jafu jagħmlu ż-żgħażagħ, mhux fuq dak li ma jafux. Hu jqishom bħala ħaddiema sħabu u mhux bħala wħud li se jiħdulu xogħlu.—Prov. 20:29.
URI L-APPREZZAMENT
10. L-aħwa kbar fl-età kif iħossuhom dwar iż-żgħażagħ?
10 L-aħwa kbar fl-età jqisu liż-żgħażagħ bħala rigal mingħand Ġeħova u japprezzaw dak li jagħmlu. Meta saħħithom tibda tonqos, huma japprezzaw li dawk li għandhom is-saħħa jkunu lesti biex jgħinu u jagħmlu x-xogħol fil-kongregazzjoni.
11. Rut 4:13-16 kif juri li l-aħwa kbar fl-età jibbenefikaw meta jaċċettaw l-għajnuna minn uħud iżgħar?
11 Fil-Bibbja, Nagħomi hi eżempju eċċellenti taʼ persuna kbira fl-età li apprezzat l-għajnuna taʼ xi ħadd iżgħar. Wara li t-tifel tagħha miet, hi qalet lil Rut biex tmur lura għand il-familja tagħha. Imma Rut ma telqitx lil Nagħomi u marret lura magħha f’Betlem. Nagħomi kienet ferħana ħafna li Rut baqgħet magħha u hi aċċettat l-għajnuna tagħha. (Rut 1:7, 8, 18) Din kienet barka għat-tnejn li huma! (Aqra Rut 4:13-16.) L-aħwa kbar fl-età li huma umli se jimitaw l-eżempju taʼ Nagħomi.
12. L-appostlu Pawlu kif wera l-apprezzament?
12 L-appostlu Pawlu apprezza l-għajnuna li rċieva mingħand l-aħwa. Pereżempju, hu rringrazzja lill-aħwa Filippin għall-affarijiet materjali li kienu bagħtulu. (Flp. 4:16) Hu wriehom li kien japprezza dak li Timotju għamel miegħu. (Flp. 2:19-22) Pawlu rringrazzja lil Alla għall-inkuraġġiment li rċieva meta hu kien sejjer lejn Ruma bħala priġunier. (Atti 28:15) Pawlu kien bniedem b’saħħtu u kien jivvjaġġa ħafna biex jipprietka u jinkuraġġixxi lill-kongregazzjonijiet. Imma hu kien umli u aċċetta l-għajnuna tal-aħwa.
13. L-aħwa kbar fl-età kif jistgħu juru li japprezzaw liż-żgħażagħ?
13 Intom aħwa kbar fl-età tistgħu turu li tapprezzaw iż-żgħażagħ fil-kongregazzjoni b’diversi modi. Jekk joffru li jwassluk xi mkien, jagħmlulek xi xiri, jew jgħinuk f’affarijiet oħrajn, apprezza u aċċetta l-għajnuna tagħhom. Ftakar kif l-għajnuna tagħhom hi mod wieħed kif Ġeħova jurik li jħobbok u dan jistaʼ jgħinek biex intom issiru ħbieb kbar. Għinhom jersqu eqreb lejn Ġeħova u għidilhom li tieħu pjaċir tarahom jaħdmu iebes biex jgħinu fil-kongregazzjoni. U ħu l-opportunità biex tqattaʼ l-ħin magħhom u tgħidilhom l-esperjenzi tiegħek. Meta tagħmel hekk, ‘turi li int grat’ lejn Ġeħova li dawn iż-żgħażagħ jagħmlu parti mill-organizzazzjoni tiegħu.—Kol. 3:15; Ġw. 6:44; 1 Tess. 5:18.
KUN ĠENERUŻ
14. Is-Sultan David kif wera li kien ġeneruż?
14 Fl-eżempju tas-Sultan David insibu kwalità importanti oħra li l-aħwa kbar fl-età għandhom juru. Din hija l-ġenerożità. Hu ta ħafna flus u affarijiet prezzjużi biex Salamun ikun jistaʼ jużahom għall-bini tat-tempju. (1 Kron. 22:11-16; 29:3, 4) Hu għamel dan minkejja li n-nies bdew isejħulu t-tempju taʼ Salamun. Meta ma jkollniex iżjed saħħa biex ngħinu fix-xogħol taʼ kostruzzjoni fl-organizzazzjoni taʼ Ġeħova, nistgħu nibqgħu ngħinu f’dawn il-proġetti permezz tad-donazzjonijiet tal-flus li nkunu nistgħu nagħtu. U nistgħu ngħinu liż-żgħażagħ billi naqsmu magħhom dak li tgħallimna matul is-snin.
15. L-appostlu Pawlu liema affarijiet prezzjużi qasam ma’ Timotju?
15 Aħseb dwar l-eżempju taʼ ġenerożità li tana l-appostlu Pawlu. Hu stieden lil Timotju biex imur miegħu fuq vjaġġi missjunarji. U Pawlu qasam miegħu modi taʼ kif jipprietka u jgħallem. (Atti 16:1-3) Pawlu ttrennja lil Timotju biex ikun effettiv fl-ippritkar dwar l-aħbar tajba. (1 Kor. 4:17) Imbagħad, Timotju uża dak li tgħallem mingħand Pawlu biex jittrennja lil oħrajn.
16. Shigeo għala ttrennja lil oħrajn?
16 L-aħwa kbar fl-età ma jibżgħux li mhux se jkunu iktar utli jekk jittrennjaw lil aħwa iżgħar biex jagħmlu x-xogħol tal-kongregazzjoni. Pereżempju, matul is-snin, Shigeo li semmejna fil-bidu, ta t-trejning lil aħwa iżgħar li kienu jagħmlu parti mill-Kumitat tal-Fergħa. Hu għamel dan biex ikun jistaʼ jgħin fix-xogħol tas-Saltna fil-pajjiż fejn kien qed jaqdi. B’hekk, meta hu ma setax jibqaʼ l-koordinatur, ħu ieħor li kien ittrennjat b’mod tajjeb setaʼ jieħu postu. Shigeo ilu jaqdi bħala membru tal-Kumitat tal-Fergħa għal iktar minn 45 sena. U hu jkompli juża dak li tgħallem biex jgħin lil aħwa iżgħar. Aħwa bħal Shigeo huma barka għall-organizzazzjoni taʼ Ġeħova!
17. Skont il-prinċipju li nsibu f’Luqa 6:38, l-uħud kbar fl-età x’jistgħu jagħtu?
17 L-aħwa kbar fl-età kollha huma prova li meta naqdu lil Ġeħova bil-fidi u l-lealtà hu l-aqwa mod taʼ ħajja. Pereżempju, intom turu li hu għall-ġid tagħna li ngħixu u napplikaw il-prinċipji tal-Bibbja f’ħajjitna. Mill-esperjenza tagħkom intom tafu kif kienu jsiru l-affarijiet fil-passat, imma tafu wkoll li għandkom tadattaw ruħkom għal ċirkostanzi ġodda. U jekk intom kbar fl-età u m’ilkomx mgħammdin ukoll tistgħu tgħinu lil oħrajn. Intom tistgħu tgħidulhom li minħabba li sirtu tafu lil Ġeħova, għandkom iżjed ferħ fil-ħajja tagħkom. Iż-żgħażagħ se jieħdu pjaċir jisimgħu l-esperjenzi tagħkom u dak li tgħallimtu. Jekk ‘tidraw tagħtu’ billi tużaw il-lezzjonijiet li tgħallimtu fil-ħajja tagħkom biex tittrennjaw lil oħrajn, Ġeħova se jberikkom b’ħafna modi.—Aqra Luqa 6:38.
18. L-aħwa kbar fl-età u dawk iżgħar kif jistgħu jgħinu lil xulxin?
18 Għeżież aħwa kbar fl-età, meta intom tkabbru l-ħbiberija tagħkom ma’ wħud iżgħar, se jkun taʼ benefiċċju għalikom u għalihom. (Rum. 1:12) Kulħadd għandu xi ħaġa li oħrajn m’għandhomx. Intom uħud kbar fl-età, għandkom l-esperjenza li ġibtu matul is-snin u ż-żgħażagħ għandhom is-saħħa u l-enerġija. Meta wħud żgħar u wħud kbar fl-età jaħdmu flimkien bħal aħwa, dan iġib tifħir lil Missierna tas-sema u se tibbenefika l-kongregazzjoni kollha.
GĦANJA 90 Inkuraġġixxu lil xulxin
a Aħna ferħanin ħafna li fil-kongregazzjonijiet tagħna għandna ħafna żgħażagħ li jagħmlu l-almu tagħhom biex jgħinu lill-organizzazzjoni taʼ Ġeħova. Hi x’inhi l-kultura tagħhom, l-aħwa kbar fl-età jistgħu jinkuraġġixxu liż-żgħażagħ biex jużaw saħħithom fix-xogħol taʼ Ġeħova.
b X’TGĦIDILNA L-ISTAMPA: Peress li indokratur li jżur il-kongregazzjonijiet għalaq 70 sena, hu u l-mara tiegħu rċivew inkarigu ieħor. Huma qed jużaw l-esperjenza tagħhom biex jgħinu lill-aħwa tal-kongregazzjoni li qed jaqdu fiha issa.