ARTIKLU GĦALL-ISTUDJU 39
Meta Xi Ħadd li Tħobb Jitlaq lil Ġeħova
“Kemm-il darba . . . ġegħluh iħossu mweġġaʼ.”—SALM 78:40.
GĦANJA 102 ‘Għinu lid-dgħajfin’
ĦARSA BIL-QUDDIEM a
1. Kif tħossha persuna meta xi ħadd fil-familja jiġi maqtugħ mis-sħubija?
GĦANDEK lil xi ħadd li tħobb maqtugħ mis-sħubija? Jekk iva, żgur li hu taʼ wġigħ kbir. Oħt jisimha Hilda tgħid, “Meta r-raġel miet wara 41 sena taʼ żwieġ, ħsibt li kienet l-agħar ħaġa li qatt setgħet tiġrili. b Imma meta t-tifel tiegħi telaq lil Ġeħova, lill-mara, u lit-tfal, l-uġigħ kien ħafna ikbar għalija.”
2-3. Skont Salm 78:40, 41, Ġeħova kif iħossu meta wieħed mill-qaddejja tiegħu jitilqu?
2 Immaġina kemm ħassu mweġġaʼ Ġeħova meta xi wħud mill-anġli li kienu parti mill-familja tiegħu telquh. (Ġuda 6) U aħseb kemm ħassu mdejjaq meta l-Iżraelin, li hu tant kien iħobb, irribellaw kontrih għal ħafna drabi. (Aqra Salm 78:40, 41.) Tistaʼ tkun ċert li Missierna tas-sema wkoll iweġġaʼ meta xi ħadd li inti tħobb jitilqu. Hu jifhem l-uġigħ li qed tħoss u bi mħabba se jipprovdilek l-inkuraġġiment u l-għajnuna li għandek bżonn.
3 F’dan l-artiklu se niddiskutu x’nistgħu nagħmlu biex nirċievu l-għajnuna taʼ Ġeħova meta xi ħadd li nħobbu jieqaf jaqdih. Se neżaminaw ukoll kif nistgħu ngħinu lil oħrajn fil-kongregazzjoni li għandhom lil xi ħadd maqtugħ mis-sħubija. Imma l-ewwel, ejja naraw xi ħsibijiet negattivi li għandna nevitaw.
TAĦSIBX LI HU T-TORT TIEGĦEK
4. Ħafna ġenituri kif iħossuhom meta t-tifel jew it-tifla tagħhom titlaq lil Ġeħova?
4 Meta tifel jew tifla titlaq lil Ġeħova, spiss il-ġenituri jaħsbu li setgħu għamlu iżjed biex it-tfal tagħhom jibqgħu jaqduh. Wara li t-tifel tiegħu ġie maqtugħ mis-sħubija, ħu jismu Luke jgħid: “Jien ħsibt li kien it-tort tiegħi. Kont anki noħlom ikrah fuq hekk. Xi kultant kont nibki ħafna u nħoss qalbi maqsuma.” Elizabeth, oħt li t-tifel tagħha wkoll ġie maqtugħ mis-sħubija, spiss kienet tistaqsi: “X’għamilt ħażin bħala omm? Ħassejt li m’għamiltx dak kollu li kelli nagħmel biex isir iħobb lil Ġeħova.”
5. Meta persuna titlaq lil Ġeħova, taʼ min ikun it-tort?
5 Irridu niftakru li Ġeħova ta lil kull wieħed u waħda minna l-libertà tal-għażla. Dan ifisser li hija l-għażla tagħna jekk nobdux lil Ġeħova. Xi żgħażagħ ma kellhomx ġenituri t’eżempju tajjeb, imma huma għażlu li jaqdu lil Ġeħova u jibqgħu leali lejh. Oħrajn kellhom ġenituri li ħadmu iebes biex jgħallmuhom iħobbu lil Ġeħova, imma iktar tard telqu mill-verità. Għalhekk, kull wieħed u waħda minna jrid jiddeċiedi jekk hux se jaqdi lil Ġeħova. (Ġoż. 24:15) Għalhekk, ġenituri, jekk tħossukom imdejqin minħabba li t-tifel jew it-tifla tagħkom waqfet taqdi lil Ġeħova, taħsbux li huwa t-tort tagħkom!
6. It-tfal kif jistgħu jħossuhom meta xi ħadd mill-ġenituri jitlaq lil Ġeħova?
6 Xi kultant, omm jew missier jitlaq lil Ġeħova u saħansitra jitlaq lill-familja. (Salm 27:10) Dan jistaʼ jkun taʼ wġigħ kbir għat-tfal li jkunu jirrispettaw u jħobbu lill-ġenituri tagħhom. Esther, li missierha ġie maqtugħ mis-sħubija, tgħid: “Kont nibki ħafna għax indunajt li missieri mhux kien qiegħed jitbiegħed minn Ġeħova, imma għażel li ma jibqax jaqdih. Jien inħobbu lil missieri u ninkwieta għalih. Ġieli kienu jtuni attakki taʼ paniku.”
7. Ġeħova kif iħossu dwar it-tfal li wieħed mill-ġenituri tagħhom ġie maqtugħ mis-sħubija?
7 Tfal, jekk xi ħadd mill-ġenituri tagħkom ġie maqtugħ mis-sħubija, aħna jiddispjaċina ħafna għalikom! U tinsewx li Ġeħova jaf kemm iġibilkom uġigħ dan. Hu jħobbkom u ferħan ħafna minħabba li intom bqajtu taqduh lealment. U l-aħwa fil-kongregazzjoni jħobbukom ukoll. Ftakar li inti m’intix responsabbli għad-deċiżjoni li ħadet ommok jew missierek. Kif diġà semmejna, Ġeħova ħalliena fil-libertà biex nagħżlu jekk irridux naqduh. U kull min iddedika ħajtu lil Ġeħova u tgħammed, għandu “jġorr it-tagħbija tiegħu.”—Gal. 6:5.
8. Il-membri leali tal-familja x’jistgħu jagħmlu waqt li jkunu qed jistennew lil xi ħadd li jħobbu jerġaʼ jiġi lura għand Ġeħova? (Ara wkoll il-kaxxa “ Erġaʼ Lura Għand Ġeħova.”)
8 Meta xi ħadd li tħobb jitlaq lil Ġeħova, huwa normali li tibqaʼ tittama li hu se jerġaʼ jiġi lura. Sadanittant x’tistaʼ tagħmel? Agħmel dak kollu li tistaʼ biex iżżomm il-fidi tiegħek b’saħħitha. Jekk tagħmel hekk se tkun t’eżempju għall-membri leali tal-familja u anki għal min ikun telaq lil Ġeħova. Dan se jgħinek ukoll biex inti tkun b’saħħtek u tissaporti l-uġigħ li jkollok. Allura, x’tistaʼ tagħmel biex iżżomm il-fidi tiegħek b’saħħitha?
X’TISTAʼ TAGĦMEL BIEX IŻŻOMM IL-FIDI TIEGĦEK B’SAĦĦITHA?
9. X’tistaʼ tagħmel biex iżżomm il-fidi tiegħek b’saħħitha? (Ara wkoll il-kaxxa “ Skritturi li Jinkuraġġuk Jekk Xi Ħadd li Tħobb Telaq lil Ġeħova.”)
9 Agħmel dak kollu li tistaʼ biex iżżomm il-fidi tiegħek b’saħħitha. Hu importanti ħafna li tkompli ssaħħaħ lilek innifsek u l-familja tiegħek. Kif tistaʼ tagħmel dan? Billi taqra l-Kelma t’Alla, timmedita fuqha, u tattendi l-laqgħat Kristjani. Joanna, li missierha u oħtha telqu mill-verità, tgħid: “Meta naqra dwar karattri li nsibu fil-Bibbja bħal Abigajl, Ester, Ġob, Ġużeppi, u Ġesù, inħossni kalma. L-eżempju tagħhom jinkuraġġini u jgħinni biex inkun pożittiva. U l-kanzunetti oriġinali wkoll jinkuraġġuni ħafna.”
10. Salm 32:6-8 kif jgħinna nissaportu?
10 Għid lil Ġeħova dwar dak kollu li jinkwetak. Meta tħossok imdejjaq tiqafx titlob. Ibqaʼ itlob lil Alla kollu mħabba biex jgħinek taħseb bil-mod kif jaħseb hu u biex ‘jagħtik id-dehen u jistruwik dwar it-triq li għandek taqbad.’ (Aqra Salm 32:6-8.) Bla dubju, jistaʼ jkun taʼ wġigħ kbir biex tgħid lil Ġeħova kif qed tħossok. Imma Ġeħova jifhem sew l-uġigħ li għandek f’qalbek. Hu jħobbok ħafna u jridek tiftaħ qalbek miegħu.—Eżo. 34:6; Salm 62:7, 8.
11. Skont Ebrej 12:11, għala għandna nafdaw fid-dixxiplina li jagħti Ġeħova bi mħabba? (Ara wkoll il-kaxxa “ Qtugħ mis-Sħubija—Il-Mod Kif Ġeħova Jiddixxiplina lil Xi Ħadd.”)
11 Ikkopera mad-deċiżjoni li jieħdu l-anzjani. Il-qtugħ mis-sħubija huwa mod wieħed kif Ġeħova bi mħabba jikkoreġi lil xi ħadd. Dan huwa taʼ ġid għal kulħadd, inkluż għal min ikun għamel dnub serju. (Aqra Ebrej 12:11.) Meta l-anzjani jaqtgħu lil xi ħadd mis-sħubija, xi wħud fil-kongregazzjoni forsi jgħidu li ma ħadux deċiżjoni tajba. Imma ftakar li kultant dawn l-uħud ma jsemmux il-ħażin li l-persuna tkun għamlet. Aħna ma nkunux nafu l-fatti kollha, għalhekk ikun tajjeb li nafdaw lill-anzjani li jkunu fil-kumitat ġudizzjali u joqogħdu attenti li japplikaw il-pariri tal-Bibbja u jiġġudikaw “għal Ġeħova.”—2 Kron. 19:6.
12. Xi wħud kif ibbenefikaw minħabba li huma kienu ubbidjenti għad-dixxiplina taʼ Ġeħova?
12 Billi tikkopera mad-deċiżjoni li jieħdu l-anzjani meta jaqtgħu mis-sħubija lil xi ħadd li tħobb, inti tistaʼ tgħin lill-persuna terġaʼ tiġi lura għand Ġeħova. Elizabeth, li semmejna qabel, tgħid: “Kien diffiċli ħafna għalija biex ma nikkuntattjax lit-tifel tiegħi. Imma wara li reġaʼ ġie lura, hu stess ammetta li kien ħaqqu li ġie maqtugħ mis-sħubija. Iktar tard hu qal li tgħallem ħafna lezzjonijiet tajbin. Jien tgħallimt li d-dixxiplina li jagħti Ġeħova hi dejjem għall-ġid tagħna.” Ir-raġel tagħha, Mark, ikompli jgħid: “It-tifel qalli li waħda mir-raġunijiet għala ried jiġi lura kienet minħabba li aħna ma kellniex kuntatt miegħu. Jien vera kuntent li Ġeħova għenna biex inkunu ubbidjenti.”
13. X’jistaʼ jgħinek tkampa mal-uġigħ li jkollok?
13 Tkellem m’aħwa li jistgħu jifhmuk. Qattaʼ l-ħin m’aħwa maturi li jistgħu jgħinuk ma taqtax qalbek. (Prov. 12:25; 17:17) Joanna, li diġà ssemmiet, tgħid: “Kont inħossni waħdi, imma mbagħad, meta kont nitkellem maʼ dawk l-aħwa li nħossni komda magħhom, kont inħossni aħjar.” Imma xi ngħidu jekk xi aħwa fil-kongregazzjoni jgħidu kliem li jġiegħlek tħossok agħar?
14. Għala għandna bżonn ‘inkomplu nissaportu lil xulxin u naħfru lil xulxin mill-qalb’?
14 Kun paċenzjuż mal-aħwa. Ir-realtà hi li kultant kulħadd jgħid xi ħaġa li ma tkunx f’waqtha. (Ġak. 3:2) Aħna lkoll imperfetti, għalhekk tiħodhiex bi kbira jekk xi wħud ma jkunux jafu x’se jaqbdu jgħidulek jew mingħajr ma jridu jgħidulek xi ħaġa li tweġġgħek. Ftakar fil-parir li tana l-appostlu Pawlu: “Komplu ssaportu lil xulxin u aħfru lil xulxin mill-qalb jekk xi ħadd għandu għalxiex jilmenta kontra ħaddieħor.” (Kol. 3:13) Oħt li t-tifel tagħha ġie maqtugħ mis-sħubija tgħid: “Ġeħova għenni biex naħfer lil dawk l-aħwa li pprovaw jinkuraġġuni, imma minflok, weġġgħuni.” L-aħwa fil-kongregazzjoni x’jistgħu jagħmlu biex jgħinu lill-membri leali tal-familja?
L-AĦWA KIF JISTGĦU JGĦINU?
15. X’nistgħu nagħmlu biex ngħinu membri taʼ familja li għadu kif kellhom lil xi ħadd li ġie maqtugħ mis-sħubija?
15 Kun qalbek tajba u dħuli mal-membri leali tal-familja. Oħt jisimha Miriam kienet tħossha ansjuża biex tmur il-laqgħat wara li ħuha ġie maqtugħ mis-sħubija. Hi tgħid, “Kont nibżaʼ dwar dak li kienu qegħdin jaħsbu l-aħwa. Kien hemm ħafna aħwa li bħali kienu mdejqin minħabba dak li ġara. U qatt ma qalu xi ħaġa negattiva dwar ħija li kien ġie maqtugħ mis-sħubija. Bl-għajnuna tagħhom, jien qatt ma ħassejtni waħdi.” Oħt oħra tgħid: “Wara li t-tifel ġie maqtugħ mis-sħubija, aħwa li jħobbuna ġew biex jinkuraġġuna. Xi wħud minnhom qalulna li lanqas biss kienu jafu x’se jaqbdu jgħidulna. Oħrajn bkew miegħi u xi wħud bagħtuli ittri biex jinkuraġġuni. Dak li għamlu kien t’għajnuna kbira għalija!”
16. L-aħwa fil-kongregazzjoni kif jistgħu jibqgħu jinkuraġġixxu lill-membri tal-familja?
16 Ibqaʼ inkuraġġixxi lill-membri leali tal-familja. Issa, iktar minn qatt qabel, għandhom bżonn l-inkuraġġiment u l-imħabba tiegħek. (Ebr. 10:24, 25) Xi kultant, xi aħwa fil-kongregazzjoni jispiċċaw ma jkellmux lill-familja kollha, bħallikieku huma wkoll ġew maqtugħin mis-sħubija. Qatt m’għandna nħallu dan jiġri! Aħna rridu nfaħħru u ninkuraġġixxu lil żgħażagħ li l-ġenituri tagħhom waqfu jaqdu lil Ġeħova. Maria, li r-raġel tagħha ġie maqtugħ mis-sħubija u telaq lill-familja, tgħid: “Xi aħwa ġew id-dar tiegħi, sajrulna x’nieklu, u għenuni biex nagħmel l-istudju mat-tfal tiegħi. Huma ddispjaċiehom ħafna għalija u bkew miegħi. Huma dejjem qabżu għalija meta semgħu lil xi ħadd jgħid xi ħaġa kontrija. U dan vera inkuraġġieni!”—Rum. 12:13, 15.
17. L-anzjani x’jistgħu jagħmlu biex jinkuraġġixxu lil dawk li huma ansjużi?
17 Anzjani, użaw kull opportunità li jkollkom biex tgħinu u ssaħħu lill-membri leali tal-familja. Intom għandkom responsabbiltà speċjali biex tinkuraġġixxu lill-familji li għandhom lil xi ħadd maqtugħ mis-sħubija. (1 Tess. 5:14) Biex tinkuraġġuhom, tkellmu magħhom qabel u wara l-laqgħat. Żuruhom id-dar tagħhom u itolbu għalihom. Oħorġu fuq il-ministeru magħhom u xi kultant stidnuhom biex tagħmlu l-qima bħala familja flimkien. L-anzjani għandhom jieħdu ħsieb lil dawk li huma ansjużi, u juruhom l-imħabba li għandhom bżonn.—1 Tess. 2:7, 8.
IBQGĦU TTAMAW LI JIĠU LURA U KOMPLU AFDAW F’ĠEĦOVA
18. Skont it-2 Pietru 3:9, Ġeħova x’jixtieq li jagħmlu dawk li waqfu jaqduh?
18 Ġeħova “ma jixtieqx li xi ħadd jinqered imma jixtieq li kulħadd jasal għall-indiema.” (Aqra t-2 Pietru 3:9.) Minkejja li persuna jaf tkun għamlet dnub serju, għal Alla xorta tibqaʼ prezzjuża. Ftakar li Ġeħova ħallas prezz għoli—il-ħajja taʼ Ibnu l-għażiż għal kull wieħed u waħda minna. Ġeħova bi mħabba jipprova jgħin lil dawk li telquh biex jiġu lura għandu. Hu jittama li huma jieħdu din l-azzjoni, kif nistgħu naraw mit-tixbiha taʼ Ġesù tal-iben il-ħali. (Lq. 15:11-32) Ħafna li telqu mill-verità reġgħu ġew lura għand Ġeħova. U l-aħwa tal-kongregazzjoni kienu ferħanin. Elizabeth, li semmejna diġà, ħassitha ferħana ħafna meta t-tifel ġie aċċettat lura. Hi tgħid: “Jiena vera kuntenta li ħafna inkuraġġewni biex nibqaʼ nittama.”
19. Għala nistgħu nibqgħu nafdaw f’Ġeħova?
19 Aħna għandna dejjem nafdaw f’Ġeħova. Il-pariri tiegħu dejjem se jgħinuna. Hu Missier ġeneruż u għandu mħabba kbira għal dawk li jħobbuh u jaqduh. Kun ċert li Ġeħova mhux se jitilqek meta tkun għaddej minn dan iż-żmien taʼ wġigħ. (Ebr. 13:5, 6) Mark, li semmejna qabel, jgħid: “Ġeħova qatt ma jabbandunana. Hu dejjem jgħinna meta nkunu għaddejjin minn żmien diffiċli.” Ġeħova se jkompli jagħtik “il-qawwa iktar min-normal.” (2 Kor. 4:7) Iva, inti tistaʼ tibqaʼ leali u tibqaʼ tittama li dik il-persuna li tħobb tistaʼ terġaʼ tiġi lura għand Ġeħova.
GĦANJA 44 Talba taʼ min ikun imnikket
a Aħna vera nħossuna mdejqin meta xi ħadd li nħobbu jitlaq lil Ġeħova! F’dan l-artiklu se naraw kif iħossu Ġeħova meta jiġri hekk. Se niddiskutu xi affarijiet li l-membri tal-familja jistgħu jagħmlu biex ikunu jistgħu jkampaw mal-uġigħ u jżommu l-fidi tagħhom b’saħħitha. F’dan l-artiklu se niddiskutu wkoll kif l-aħwa fil-kongregazzjoni jistgħu jinkuraġġixxu u jgħinu lill-familja.
b Xi ismijiet f’dan l-artiklu ġew mibdulin.