1. Skont l-​1 Tessalonikin 5:11, liema xogħol nagħmlu?

 IL-​KONGREGAZZJONI tiegħek ġieli kellha Sala tas-​Saltna ġdida jew irranġat li kellha? Jekk iva, żgur li tiftakar l-​ewwel darba li mort għal-​laqgħa fiha. Inti rringrazzjajtu ħafna lil Ġeħova. Forsi tant kont ferħan li kważi kont ħa tibki u lanqas stajt tkanta l-​ewwel għanja. Il-​mod kif inhuma mibnijin is-​Swali tas-​Saltna tagħna jfaħħru lil Ġeħova. Imma aħna nfaħħru iktar lil Ġeħova meta nieħdu sehem f’xogħol ieħor. Dan ix-​xogħol jinvolvi xi ħaġa iktar importanti mill-​bini letterali. Dan jinvolvi li nibnu, jiġifieri ninkuraġġixxu lin-​nies li jiġu f’dawn is-​Swali tas-​Saltna. L-​appostlu Pawlu kellu dan f’moħħu meta kiteb il-​kliem li nsibu fl-​iskrittura prinċipali tal-​1 Tessalonikin 5:11.—Aqra.

2. X’se niddiskutu f’dan l-​artiklu?

² L-​appostlu Pawlu hu eżempju mill-​aqwa taʼ xi ħadd li kien jaf kif jinkuraġġixxi lill-​aħwa. Hu kien iħoss għalihom. F’dan l-​artiklu se niddiskutu kif Pawlu għen lill-​aħwa biex (1) jissaportu l-​provi, (2) iżommu l-​paċi bejniethom, u (3) isaħħu l-​fidi tagħhom f’Ġeħova. Ejja naraw kif nistgħu nimitawh u ninkuraġġixxu lil ħutna.—1 Kor. 11:1.

3. Pawlu kif żamm il-​bilanċ f’ħajtu?

³ Pawlu kien iħobbhom ħafna lill-​aħwa. Hu kien esperjenza diversi provi. Għalhekk, meta l-​aħwa kienu għaddejjin mill-​provi, hu setaʼ jifhimhom u jħoss  għalihom. Darba waħda Pawlu spiċċa bla flus. Għalhekk, kellu jsib xogħol biex jgħix u jgħin lil dawk li kienu miegħu. (Atti 20:34) Hu kien jaf jagħmel it-​tined. Meta wasal f’Korintu, għall-​ewwel beda jaħdem ma’ Akwila u Prixilla li kienu jafu jagħmlu t-​tined ukoll. Imma “kull Sabat” hu kien jipprietka lil-​Lhud u lill-​Griegi. Imbagħad meta waslu Sila u Timotju, “Pawlu beda jkun okkupat bis-​sħiħ bix-​xandir tal-​kelma.” (Atti 18:2-​5) Pawlu qatt ma nesa l-​iktar ħaġa importanti f’ħajtu, li jaqdi lil Ġeħova. U hu kien t’eżempju tajjeb għax ħadem iebes fil-​ministeru u fl-​istess ħin ħa ħsieb il-​bżonnijiet tiegħu. Għalhekk, setaʼ jagħti parir tajjeb lill-​aħwa. Hu fakkarhom biex ma jħallux l-​ansjetajiet jew ir-​responsabbiltà biex jipprovdu għall-​familja ġġegħelhom jittraskuraw “dak li hu iktar importanti,” jiġifieri li jaqdu lil Ġeħova.—Flp. 1:10.

4. Pawlu u Timotju kif għenu lill-​aħwa biex ikampaw mal-​persekuzzjoni?

⁴ Ftit wara li fformat il-​kongregazzjoni f’Tessalonika, l-​aħwa ffaċċjaw oppożizzjoni ħarxa. Meta grupp taʼ rġiel li kienu kontra Pawlu u Sila ma sabuhomx, kaxkru “lil xi aħwa quddiem il-​ħakkiema tal-​belt” u bdew jgħajtu: “Dawn l-​irġiel kollha qed jaġixxu kontra d-​digrieti taʼ Ċesari.” (Atti 17:6, 7) Tistaʼ timmaġina kemm beżgħu dawn l-​aħwa ġodda meta saru jafu li n-​nies tal-​belt ħaduha kontrihom? Huma setgħu naqqsu minn dak li kienu qed jagħmlu għal Ġeħova, imma Pawlu ma riedx li jiġri hekk. Għalkemm Pawlu u Sila kellhom jitilqu, huma raw li l-​kongregazzjoni l-​ġdida kellha min jieħu ħsiebha. Pawlu fakkar lit-​Tessalonikin: “Bgħatna lil Timotju, ħuna . . . , sabiex jissodakom u jfarraġkom għall-​ġid tal-​fidi tagħkom, biex ħadd ma jitħarrek minħabba dawn it-​tribulazzjonijiet.” (1 Tess. 3:2, 3) X’aktarx Timotju wkoll esperjenza l-​persekuzzjoni fejn kien jgħix, f’Listra. Hu kien ra kif Pawlu inkuraġġixxa lill-​aħwa t’hemmhekk. Meta Timotju ra l-​għajnuna li tahom Ġeħova, hu setaʼ jserraħ moħħ dawn l-​aħwa ġodda li Ġeħova kien se jieħu ħsiebhom ukoll.—Atti 14:8, 19-​22; Ebr. 12:2.

5. Bryant kif ibbenefika mill-​għajnuna taʼ anzjan?

⁵ Pawlu x’għamel iktar biex jinkuraġġixxi lill-​aħwa? Meta Pawlu u Barnaba reġgħu marru lura Listra, Ikonju, u Antjokja, “ħatrulhom anzjani f’kull kongregazzjoni.” (Atti 14:21-​23) Bla dubju, dawn l-​anzjani kienu t’għajnuna għall-​kongregazzjonijiet, bħalma huma l-​anzjani llum. Innota x’qal ħu jismu Bryant. Hu jgħid: “Meta kelli 15-​il sena, missieri telaq mid-​dar u ommi ġiet maqtugħa mis-​sħubija. Ħassejtni waħdi u skuraġġit.” X’għen lil Bryant biex jissaporti dak iż-​żmien diffiċli? Hu jgħid: “Anzjan jismu Tony kien joqgħod jitkellem miegħi. Kien ikellimni dwar uħud li għaddew minn provi u xorta baqgħu ferħanin. Darba wrieni Salm 27:10, u spiss kien jitkellem miegħi dwar Ħeżekija, li baqaʼ leali lejn Ġeħova minkejja li missieru ma kienx eżempju tajjeb għalih.” Dan kif għen lil Bryant? Hu jgħid: “Bl-​inkuraġġiment li tani Tony, jien bdejt naqdi lil Ġeħova fis-​servizz full-​time.” Anzjani, oqogħdu attenti biex tgħinu lil dawk, li bħal Bryant, ikollhom bżonn kelma taʼ inkuraġġiment.—Prov. 12:25.

6. Pawlu kif uża l-​esperjenzi taʼ xi wħud biex jinkuraġġixxi lill-​aħwa?

 ⁶ Pawlu fakkar lill-​aħwa li “sħaba . . . kbira taʼ xhieda” ssaportew il-​persekuzzjoni minħabba li Ġeħova tahom iktar saħħa. (Ebr. 12:1) Pawlu fehem li l-​esperjenzi taʼ dawk li fil-​passat issaportew kull tip taʼ persekuzzjoni setgħu jinkuraġġixxu lill-​aħwa u jgħinuhom jibqgħu ffokati fuq “il-​belt taʼ l-​Alla l-​ħaj.” (Ebr. 12:22) Dan japplika għalina wkoll. Min ma jħossux inkuraġġit meta jaqra dwar kif Ġeħova għen lil Gidegħon, Barak, David, Samwel, u ħafna oħrajn? (Ebr. 11:32-​35) U xi ngħidu għall-​eżempji tajbin tal-​lum il-​ġurnata? Fil-​kwartieri ġenerali spiss nirċievu ittri mingħand aħwa biex jgħidulna li meta jaqraw il-​bijografiji taʼ aħwa leali li jaqdu lil Ġeħova, isaħħu l-​fidi tagħhom.

7. X’tistaʼ titgħallem mill-​parir taʼ Pawlu f’​Rumani 14:19-​21?

⁷ Aħna ninkuraġġixxu lill-​aħwa meta ngħidu u nagħmlu affarijiet li jġibu l-​paċi fil-​kongregazzjoni. Aħna ma nħallux l-​opinjonijiet differenti tagħna jġibu l-​firda. U ma nibqgħux ninsistu biex nieħdu r-​raġun fuq xi ħaġa meta ma jkunx hemm prinċipju tal-​Bibbja dwarha. Ejja naraw eżempju. Il-​kongregazzjoni f’Ruma kien fiha Kristjani Lhud u Ġentili. Meta l-​Liġi taʼ Mosè ma baqgħetx tgħodd, il-​qaddejja taʼ Ġeħova ma kellhomx għalfejn jobdu l-​liġi biex ma jiklux ċertu ikel. (Mk. 7:19) Minn dakinhar ’il quddiem, xi Kristjani Lhud ħassew li setgħu jieklu l-​ikel kollu li xtaqu. Imma oħrajn ħassew li ma kienx sew li jagħmlu hekk. Għalhekk, kien hemm il-​firda fil-​kongregazzjoni. Pawlu wriehom kemm hu importanti li jżommu l-​paċi u qal: “Hu sewwa li ma tikolx laħam jew li ma tixrobx inbid jew li ma tagħmel xejn li jistaʼ jfixkel lil ħuk.” (Aqra Rumani 14:19-​21.) B’hekk, Pawlu għenhom jindunaw kemm il-​ġlied jagħmel ħsara lill-​aħwa u lill-​kongregazzjoni. Hu kien lest ukoll li ma jibqax jagħmel ċertu affarijiet biex ma jfixkilx lil oħrajn. (1 Kor. 9:19-​22) B’mod simili, aħna nistgħu ninkuraġġixxu lil oħrajn u nżommu l-​paċi jekk ma niġġildux fuq kwistjonijiet persunali.

8. Pawlu x’għamel biex iżomm il-​paċi meta nqalgħet kwistjoni importanti fil-​kongregazzjoni?

⁸ L-​appostlu Pawlu ħalla eżempju tajjeb taʼ kif inżommu l-​paċi meta ma jkunx hemm qbil dwar kwistjoni importanti. Pereżempju, xi wħud fil-​kongregazzjoni tal-​bidu qalu li dawk li ma kinux Lhud u saru Kristjani kellhom jagħmlu ċ-​ċirkonċiżjoni. Dan setaʼ kien biex il-​Lhud ma jkollhomx xi jgħidu fuqhom. (Gal. 6:12) Pawlu ma qabilx ma’ dan ir-​raġunar, imma ma qagħadx jinsisti magħhom. Hu b’umiltà talab parir lill-​appostli u l-​anzjani f’Ġerusalemm. (Atti 15:1, 2) Peress li Pawlu ħa ħsieb dawn l-​affarijiet b’mod tajjeb, hu għen lill-​Kristjani biex ikunu kuntenti u jżommu l-​paċi fil-​kongregazzjoni.—Atti 15:30, 31.

9. Kif nistgħu nimitaw l-​eżempju taʼ Pawlu?

⁹ Jekk tinqalaʼ problema serja, aħna se nżommu l-​paċi jekk infittxu l-​gwida mingħand dawk li Ġeħova qed juża biex jieħdu ħsieb il-​kongregazzjoni. Spiss, insibu direzzjoni bbażata fuq il-​Bibbja  fil-​pubblikazzjonijiet tagħna u affarijiet oħra li tipprovdilna l-​organizzazzjoni. Meta niffokaw fuq din id-​direzzjoni u mhux ninsistu fuq l-​opinjoni tagħna, inkunu qed naħdmu biex inżommu l-​paċi fil-​kongregazzjoni.

10. Pawlu x’għamel iktar biex ikun hemm il-​paċi fil-​kongregazzjoni?

¹⁰ Pawlu ħadem għall-​paċi billi faħħar lill-​aħwa għall-​kwalitajiet sbieħ li kellhom u ma ffokax fuq in-​nuqqasijiet tagħhom. Pereżempju, lejn l-​aħħar tal-​ittra li kiteb lir-​Rumani, hu semma ħafna nies b’isimhom. U f’ħafna każijiet hu semma xi ħaġa sabiħa dwarhom. Aħna nistgħu nimitaw lil Pawlu billi nitkellmu dwar il-​kwalitajiet sbieħ li għandhom ħutna. Meta nagħmlu hekk, se nsaħħu l-​ħbiberija u l-​imħabba taʼ bejnietna.

11. Kif nistgħu nżommu l-​paċi meta jinqalgħu l-​problemi?

¹¹ Xi kultant, anki Kristjani maturi ma jaqblux jew ikollhom xi jgħidu bejniethom. Dan ġara lil Pawlu u l-​ħabib tal-​qalb tiegħu Barnaba. Huma ma qablux jekk kellhomx jieħdu magħhom lil Marku fil-​vjaġġ missjunarju li kienu se jagħmlu. Huma “kellhom xi jgħidu sew,” u għalhekk iddeċidew li ma jibqgħux jivvjaġġaw flimkien. (Atti 15:37-​39) Imma Pawlu, Barnaba, u Marku reġgħu għamlu paċi bejniethom. B’hekk urew li l-​paċi u l-​unità kienu importanti għalihom. Iktar tard Pawlu tkellem tajjeb dwar Barnaba u Marku. (1 Kor. 9:6; Kol. 4:10) Aħna wkoll irridu nirranġaw il-​problemi li jkollna mal-​aħwa fil-​kongregazzjoni u nkomplu niffokaw fuq il-​kwalitajiet tajbin tagħhom. B’dan il-​mod inkunu qed naħdmu għall-​paċi u l-​unità.—Efes. 4:3.

12. L-​aħwa minn liema provi qegħdin jgħaddu?

¹² Aħna ninkuraġġixxu lill-​aħwa meta ngħinuhom isaħħu l-​fidi tagħhom f’Ġeħova. Xi aħwa jiġu mwaqqgħin għaċ-​ċajt minn tal-​familja, minn dawk li jaħdmu magħhom, jew mit-​tfal tal-​iskola. Oħrajn qed jiffaċċjaw problemi serji taʼ saħħa jew qed iħossuhom imweġġgħin. U oħrajn li ilhom mgħammdin għal ħafna snin ilhom jistennew biex tispiċċa din is-​sistema ħażina. Dawn il-​provi jistgħu jittestjaw il-​fidi tagħna. Xi Kristjani tal-​bidu għaddew minn provi simili. Pawlu x’għamel biex jinkuraġġixxi lill-​aħwa?

13. Pawlu kif għen lill-​aħwa li kienu jiġu mwaqqgħin għaċ-​ċajt minħabba dak li jemmnu?

¹³ Pawlu uża l-​Kelma t’Alla biex isaħħaħ il-​fidi tal-​aħwa. Pereżempju, Kristjani Lhud forsi ma kinux jafu kif se jwieġbu lil tal-​familja li kienu jgħidu li r-​reliġjon tal-​Ġudaiżmu hija aħjar mir-​reliġjon tal-​Kristjani. Bla dubju, l-​ittra taʼ Pawlu lill-​Ebrej saħħet ħafna l-​fidi tagħhom. (Ebr. 1:5, 6; 2:2, 3; 9:24, 25) Ir-​raġunar tajjeb tiegħu għenhom ikunu jafu x’għandhom jgħidu lil dawk li jiħduha kontrihom. Illum, aħna nistgħu ngħinu lil dawk li jiġu mwaqqgħin għaċ-​ċajt biex jużaw il-​pubblikazzjonijiet ibbażati fuq il-​Bibbja ħalli jkunu jistgħu jispjegaw dak li jemmnu. U jekk it-​tfal jiġu mwaqqgħin għaċ-​ċajt għax jemmnu fil-​Ħallieq, nistgħu ngħinuhom isibu informazzjoni fil-​browxers Was Life Created? u The Origin of Life—Five Questions Worth Asking biex juru għala jemmnu f’Alla.

14. Pawlu x’għamel avolja kellu ħafna x’jagħmel fl-​ippritkar?

¹⁴ Pawlu inkuraġġixxa lill-​aħwa biex  juru l-​imħabba tagħhom b’“għemejjel tajbin.” (Ebr. 10:24) Hu mhux biss għen lill-​aħwa b’dak li qal imma anki b’dak li għamel. Pereżempju, hu għen lill-​aħwa fil-​Lhudija meta fil-​pajjiż kien hemm il-​ġuħ, billi ħadilhom xi affarijiet li kellhom bżonn. (Atti 11:27-​30) Fil-​fatt, Pawlu avolja kellu ħafna x’jagħmel fl-​ippritkar, dejjem ra kif se jgħin lil dawk li kellhom bżonn affarijiet materjali. (Gal. 2:10) B’dan il-​mod, Pawlu inkuraġġixxa lill-​aħwa biex ikunu iktar ċerti li Ġeħova se jieħu ħsiebhom. Illum, meta nkunu lesti li nagħtu mill-​ħin tagħna u nagħmlu sforz biex immorru ngħinu meta jseħħ xi diżastru, aħna wkoll insaħħu l-​fidi tal-​aħwa. Nistgħu nagħmlu dan ukoll billi b’mod regulari nagħtu donazzjonijiet għax-​xogħol taʼ madwar id-​dinja. B’dawn il-​modi u oħrajn, aħna nkunu qed ngħinu lill-​aħwa jkunu ċerti li Ġeħova qatt mhu se jabbandunahom.

15-16. Kif nistgħu ngħinu lill-​aħwa li l-​fidi tagħhom m’għadhiex b’saħħitha?

¹⁵ Pawlu baqaʼ jgħin lil dawk li l-​fidi tagħhom ma baqgħetx b’saħħitha. Hu ħass għalihom u tkellem b’mod pożittiv magħhom. (Ebr. 6:9; 10:39) Pereżempju fl-​ittra lill-​Ebrej, Pawlu inkluda lilu nnifsu biex juri li anki hu kellu japplika l-​parir li tahom. (Ebr. 2:1, 3) Bħal Pawlu, m’għandniex naqtgħu qalbna minn dawk li l-​fidi tagħhom m’għadhiex b’saħħitha. Minflok, aħna ninkuraġġuhom billi nuruhom li jimpurtana minnhom. B’hekk nuruhom li għadna nħobbuhom. Meta nitkellmu bil-​ħlewwa magħhom, jistaʼ jgħin daqs il-​kliem li ngħidulhom.

¹⁶ Pawlu għen lill-​aħwa jaraw li Ġeħova  kien jaf bl-​affarijiet tajbin li għamlu. (Ebr. 10:32-​34) Aħna nistgħu nagħmlu xi ħaġa simili meta nkunu qed ngħinu lil xi ħadd li l-​fidi tiegħu ma baqgħetx b’saħħitha. Nistgħu nistaqsuh kif daħal fil-​verità, jew ngħidulu jaqsam magħna esperjenzi meta ra l-​għajnuna taʼ Ġeħova. Nistgħu nużaw din l-​opportunità biex infakkruh li Ġeħova ma nesiex dak li għamel għalih fil-​passat. U Ġeħova mhux se jabbandunah fil-​futur. (Ebr. 6:10; 13:5, 6) Dawn il-​konversazzjonijiet jistgħu jinkuraġġixxu lill-​aħwa biex ikomplu jaqdu lil Ġeħova.

17. Fiex nistgħu nsiru aħjar?

¹⁷ Maż-​żmien ħaddiem isir kapaċi iktar fix-​xogħol tiegħu. Bl-​istess mod, maż-​żmien aħna wkoll nistgħu nitgħallmu ninkuraġġixxu iżjed lill-​aħwa. Aħna nistgħu ngħinu lill-​aħwa jissaportu l-​provi billi naqsmu magħhom eżempji t’oħrajn li ssaportew fil-​passat. Nistgħu naħdmu għall-​paċi billi nsemmu l-​kwalitajiet tajbin tal-​aħwa, inżommu l-​paċi meta jinqalgħu l-​problemi, u nagħmlu paċi meta jkollna nuqqas taʼ qbil m’oħrajn. Nistgħu wkoll inkomplu nsaħħu l-​fidi tal-​aħwa billi naqsmu magħhom veritajiet importanti mill-​Bibbja, nagħtuhom l-​għajnuna li jkollhom bżonn, u ngħinu lil dawk li l-​fidi tagħhom m’għadhiex b’saħħitha.

18. X’int determinat li tagħmel?

¹⁸ Dawk li jaħdmu fi proġetti taʼ kostruzzjoni jħossuhom ferħanin. Aħna nistgħu nħossuna ferħanin meta ngħinu biex insaħħu l-​fidi tal-​aħwa. Il-​bini letterali maż-​żmien jistaʼ jispiċċa, imma r-​riżultat tax-​xogħol li nkunu għamilna biex ninkuraġġixxu lill-​aħwa jistaʼ jibqaʼ għal dejjem! Jalla nkunu determinati li ‘nibqgħu ninkuraġġixxu lil xulxin u nibnu lil xulxin.’—1 Tess. 5:11.