1. Ftit qabel miet, Ġesù x’qal lill-kriminal li kien ħdejh? (Luqa 23:39-43)

 ĠESÙ u ż-żewġ kriminali li kienu maġenbu batew ħafna waqt li kienu qed imutu. (Lq. 23:32, 33) Iż-żewġ kriminali waqqgħu għaċ-ċajt lil Ġesù u dan juri li ma kinux dixxipli tiegħu. (Mt. 27:44; Mk. 15:32) Imma wieħed minnhom biddel l-attitudni tiegħu. Hu qal: “Ġesù, ftakar fija meta tidħol fis-saltna tiegħek.” Ġesù wieġbu: “Tassew ngħidlek illum, Int tkun fil-Ġenna miegħi.” (Aqra Luqa 23:39-43.) Il-kriminal setaʼ semaʼ dwar il-messaġġ tas-“Saltna t’Alla” li pprietka Ġesù. Imma l-Bibbja ma tgħidx li hu sar dixxiplu tiegħu. U Ġesù ma qalx li r-raġel kien se jkun fis-Saltna fis-sema. (Mt. 4:17) Ġesù kien qed jitkellem dwar il-Ġenna tal-art li se jkun hawn fil-futur. Għala nistgħu ngħidu hekk?

2. Kif nafu li l-kriminal li ddispjaċieh x’aktarx kien Lhudi?

² Il-kriminal li ddispjaċieh wisq probabbli kien Lhudi. Hu qal lill-kriminal l-ieħor: “Lanqas minn Alla ma tibżaʼ, issa li qiegħed fl-istess ġudizzju?” (Lq. 23:40) Il-Lhud kienu jqimu Alla wieħed imma n-nies tal-pajjiż kienu jemmnu f’ħafna allat. (Eżo. 20:2, 3; 1 Kor. 8:5, 6) Kieku l-kriminali ma kinux Lhud, probabbli kien isaqsih: “Lanqas mill-allat ma tibżaʼ?” Iżjed minn hekk, Ġesù pprietka l-iżjed lil-Lhud għax intbagħat ‘għan-nies t’Iżrael biss, li kienu bħal nagħaġ mitlufin,’ u mhux għal nies oħrajn. (Mt. 15:24) Alla kien wera lill-Iżraelin li hu kien se jirxoxta lill-mejtin. Il-kriminal li ddispjaċieh forsi  kien jafu dan, u forsi ħaseb li Ġeħova kien se jirxoxta lil Ġesù biex imexxi s-Saltna t’Alla. Milli jidher ir-raġel xtaq li Alla jirxoxta lilu wkoll. Dan juri li x’aktarx il-kriminal kien Lhudi.

3. Meta Ġesù semma l-Ġenna, il-kriminal probabbli x’ħaseb? Spjega. (Ġenesi 2:15)

³ Peress li l-kriminal kien Lhudi, hu kien jaf dwar Adam u Eva u l-Ġenna tal-art li Ġeħova għamel għalihom. Allura probabbli kien jemmen li l-Ġenna li semma Ġesù kienet ġnien sabiħ hawn fuq l-art.—Aqra Ġenesi 2:15.

4. Dak li qal Ġesù lill-kriminal xi jġegħelna naħsbu?

⁴ Dak li Ġesù qal lill-kriminal iġegħelna naħsbu dwar kif se tkun il-ħajja fil-Ġenna tal-art. Nistgħu nitgħallmu iktar dwar il-Ġenna tal-art miż-żmien taʼ paċi li kellhom l-Iżraelin meta Salamun kien re. Il-Bibbja tgħid li Ġesù hu aqwa minn Salamun. Allura nistennew li Ġesù se jaħdem maʼ dawk li se jmexxu miegħu biex jagħmlu l-art Ġenna sabiħa. (Mt. 12:42) Mela n-“nagħaġ oħrajn” għandhom ikunu jafu x’għandhom jagħmlu biex jgħixu għal dejjem fil-Ġenna tal-art.—Ġw. 10:16.

5. Kif taħseb li se tkun il-ħajja fil-Ġenna tal-art?

⁵ Kif taħseb li se tkun il-ħajja fis-sistema l-ġdida? Forsi timmaġina ġnien sabiħ ħafna bħall-ġnien tal-Għeden. (Ġen. 2:7-9) Forsi tiftakar il-profezija taʼ Mikea li n-nies t’Alla ħa “joqogħdu bil-qiegħda, kull wieħed taħt id-dielja tiegħu u taħt is-siġra tat-tin tiegħu.” (Mik. 4:3, 4) X’aktarx tiftakar ukoll versi mill-Bibbja li jgħidu li se jkun hemm ħafna ikel. (Salm 72:16; Is. 65:21, 22) Forsi timmaġinak fi ġnien sabiħ bilqiegħda maʼ mejda mimlija b’ikel tajjeb. Timmaġina arja nadifa u riħa tfuħ taʼ pjanti u fjuri. U forsi timmaġina l-ħbieb u l-familja, inkluż dawk li ġew irxoxtati jidħqu flimkien. Din mhux ħolma! Nistgħu nkunu ċerti li dawn l-affarijiet kollha se jiġru fuq l-art. Fil-Ġenna tal-art se nagħmlu xogħol li se nieħdu pjaċir bih.

6. X’se nagħmlu fil-Ġenna tal-art? (Ara l-istampa.)

⁶ Ġeħova ħalaqna biex nieħdu pjaċir bix-xogħol li nagħmlu. (Ekk. 2:24) Matul l-Elf Sena li se jkun qed imexxi Ġesù se jkollna ħafna x’nagħmlu. Dawk li se jgħaddu mit-tribulazzjoni l-kbira u l-miljuni taʼ nies li se jiġu rxoxtati se jkollhom bżonn x’jilbsu, x’jieklu, u fejn joqogħdu. Biex ikollna dawn l-affarijiet irridu nagħmlu ħafna xogħol  sabiħ. L-istess bħalma Adam u Eva kellhom jieħdu ħsieb l-art, aħna se jkollna x-xogħol sabiħ li nagħmlu l-art Ġenna. U immaġina kemm se nieħdu pjaċir ngħallmu lill-miljuni taʼ nies li se jiġu rxoxtati dwar Ġeħova u l-iskop tiegħu. Se ngħinu wkoll lil nies leali li għexu qabel Ġesù jitgħallmu x’ġara wara li mietu.

7. Minn xiex nistgħu nkunu ċerti u għala?

⁷ Nistgħu nkunu ċerti li fil-Ġenna tal-art se ngħixu fil-paċi, se jkollna dak kollu li għandna bżonn, u se nkunu organizzati. Għala? Għax Ġeħova diġà wriena kif se tkun il-ħajja taħt it-tmexxija taʼ Ġesù. Dan nistgħu narawh mir-rakkont tar-Re Salamun.

8. Dak li kiteb ir-Re David f’​Salm 37:10, 11, 29, kif ġara? (Ara Mistoqsijiet mill-Qarrejja f’din il-ħarġa.)

⁸ Ir-Re David kiteb dwar kif se tkun il-ħajja fil-futur meta jkun qed imexxi re għaref u leali. (Aqra Salm 37:10, 11, 29.) Normalment naqraw Salm 37:11 meta nkunu qed nitkellmu m’oħrajn dwar il-Ġenna tal-art. Tajjeb li nagħmlu dan għax Ġesù kkwota dan il-vers fil-Prietka ta’ Fuq il-Muntanja. Dan wera li kienet xi ħaġa li se tiġri fil-futur. (Mt. 5:5) Imma dak li qal David juri wkoll kif kellha tkun il-ħajja fi żmien ir-Re Salamun. Meta Salamun kien re f’Iżrael, in-nies t’Alla kellhom ħafna ġid u paċi f’art li “tipproduċi ħafna ħalib u għasel.” Alla kien qal: “Jekk tkomplu timxu skont il-liġijiet tiegħi . . . , nagħtikom il-paċi fuq l-art, u intom tmorru torqdu b’moħħkom mistrieħ.” (Lev. 20:24; 26:3, 6) Dawn il-wegħdi ġraw meta Salamun kien ir-Re t’Iżrael. (1 Kron. 22:9; 29:26-28) U Ġeħova wiegħed li n-nies ħżiena se “jispiċċaw.” (Salm 37:10) B’hekk, dak li hemm miktub f’​Salm 37:10, 11, 29 ġara fil-passat u se jiġri fil-futur ukoll.

9. X’qalet ir-reġina taʼ Xeba meta Salamun kien re?

⁹ Ir-reġina taʼ Xeba semgħet dwar il-ġid u l-paċi li kellhom l-Iżraelin meta Salamun  kien re. Għalkemm kienet tgħix ’il bogħod hi marret Ġerusalemm biex tara b’għajnejha stess. (1 Slat. 10:1) Meta rat il-ġid li kellu Salamun, hi qalet: “Lanqas in-nofs ma kienu qaluli! . . . Ferħanin huma n-nies tiegħek u ferħanin huma l-qaddejja tiegħek li jkunu miegħek kuljum u jisimgħu l-għerf tiegħek!” (1 Slat. 10:6-8) Dak li gawdew in-nies fi żmien Salamun kien eżempju taʼ dak li se jagħmel Ġeħova meta Ġesù jkun re.

10. Ġesù għala hu aħjar minn Salamun?

¹⁰ Ġesù hu aħjar minn Salamun f’kollox. Salamun kien raġel imperfett u għamel żbalji kbar li maż-żmien ġabu l-problemi għan-nies t’Alla. Imma Ġesù jmexxi b’mod perfett u ma jagħmilx żbalji. (Lq. 1:32; Ebr. 4:14, 15) Hu baqaʼ leali lejn Alla minkejja l-provi diffiċli li ffaċċja minn Satana. Kristu wera li qatt mhu se jagħmel dnubiet jew iweġġaʼ lin-nies tiegħu. Hu l-aqwa Re li jistaʼ jkollna.

11. Min se jgħin lil Ġesù jmexxi?

¹¹ Maʼ Ġesù se jmexxu l-144,000 u flimkien se jieħdu ħsieb lin-nies u jwettqu l-iskop taʼ Ġeħova għall-art. (Riv. 14:1-3) Meta kienu fuq l-art huma ffaċċjaw ħafna provi, allura se jifhmu lil dawk li se jkunu qed jgħixu fuq l-art. X’se jagħmlu l-144,000?

12. Ġeħova liema xogħol se jagħti lill-144,000?

¹² Ġesù u dawk li se jmexxu miegħu għandhom ħafna iżjed xogħol x’jagħmlu minn Salamun. Ir-Re Salamun kellu jieħu ħsieb miljuni taʼ nies f’pajjiż wieħed biss. Imma dawk li se jmexxu fis-Saltna t’Alla se jieħdu ħsieb lil biljuni taʼ nies mad-dinja kollha. Ġeħova ta lill-144,000 privileġġ mill-isbaħ!

13. Dawk li se jmexxu maʼ Ġesù liema responsabbiltà se jkollhom?

¹³ Il-144,000 se jkunu slaten u qassisin bħal Ġesù. (Riv. 5:10) Meta l-Iżraelin kellhom jobdu l-Liġi taʼ Mosè, il-qassisin kienu jgħinuhom jibqgħu b’saħħithom u qrib taʼ Ġeħova. Il-Liġi kienet “dell taʼ l-affarijiet tajbin li għandhom jiġu.” Għalhekk nistgħu ngħidu li dawk li se jmexxu maʼ Ġesù se jgħinu lin-nies t’Alla jkunu b’saħħithom u qrib Ġeħova. (Ebr. 10:1) Għalissa ma nafux kif dawn il-qassisin u slaten se jikkomunikaw maʼ dawk li se jgħixu fuq l-art taħt is-Saltna. Jagħmel x’jagħmel Ġeħova, nistgħu nkunu ċerti li fil-Ġenna tal-art in-nies se jirċievu d-direzzjoni li għandhom bżonn.—Riv. 21:3, 4.

14. Il-“merħla żgħira” u n-“nagħaġ oħrajn” x’qed jagħmlu u x’se jagħmlu fil-futur?

¹⁴ Ġesù rrefera għal dawk li se jmexxu miegħu bħala “merħla żgħira.” (Lq. 12:32) Hu tkellem ukoll dwar “nagħaġ oħrajn” li huma grupp ieħor. Dawn iż-żewġ gruppi huma merħla waħda. (Ġw. 10:16) Huma diġà qed jaħdmu flimkien bħalissa. U meta d-dinja ssir Ġenna se jibqgħu jaħdmu flimkien. F’dak iż-żmien, dawk tal-“merħla żgħira” se jkunu fis-sema u n-“nagħaġ oħrajn” se jkollhom it-tama li jgħixu għal dejjem fuq l-art. Imma hemm xi affarijiet li n-“nagħaġ oħrajn” iridu jagħmlu issa biex ikunu jistgħu jgħixu fil-Ġenna tal-art.

15. (a) In-“nagħaġ oħrajn” kif jaħdmu maʼ ħut Kristu? (b) Kif tistaʼ timita l-eżempju tal-ħu li qiegħed fil-ħanut? (Ara l-istampa.)

 ¹⁵ Il-kriminal li ddispjaċieh miet qabel ma kellu ċ-ċans juri li japprezza dak li Ġesù għamel għalih. Imma aħna bħala “nagħaġ oħrajn” għandna ħafna opportunitajiet biex nagħmlu dan. Pereżempju, aħna nuru li nħobbu lil Ġesù bil-mod kif nittrattaw lil ħutu l-midlukin. Ġesù qal li se jiġġudika lin-nagħaġ skont kif jittrattaw lil ħutu. (Mt. 25:31-40) Aħna nistgħu nissapportjaw lil ħut Kristu billi ngħinuhom jippritkaw u jagħmlu dixxipli. (Mt. 28:18-20) Għalhekk aħna nużaw l-għodda li jtuna bħall-ktieb Għix Ħajja Ferħana għal Dejjem! biex nagħmlu studji tal-Bibbja. Jekk għad m’għandekx studju tal-Bibbja, tistaʼ tagħmilha mira biex toffri studju tal-Bibbja lil kemm jistaʼ jkun nies?

16. X’nistgħu nagħmlu biex nippreparaw ħalli nkunu fid-dinja l-ġdida?

¹⁶ Biex insiru nies li Ġeħova jrid fil-Ġenna tal-art, m’għandniex nistennew sakemm inkunu hemm. Bħalissa nistgħu naħdmu biex dejjem inkunu onesti f’dak li ngħidu u nagħmlu u jkollna drawwiet tajbin. U nistgħu nibqgħu leali lejn Ġeħova, ir-raġel jew il-mara, u l-aħwa. Iżjed ma nobdu lil Ġeħova bħalissa waqt li qed ngħixu f’dinja mimlija ħażen, iżjed se jkun faċli biex nobduh fil-Ġenna tal-art. Nistgħu nitgħallmu wkoll nagħmlu affarijiet oħra u naħdmu fuq kwalitajiet biex nuru li nixtiequ ngħixu f’sistema ġdida. Ara l-artiklu “Qed Tħares ’il Quddiem Biex Tgħix għal Dejjem Fuq l-Art?” f’din il-ħarġa.

17. Spjega għala m’għandniex inħossuna skuraġġiti minħabba d-dnubiet li nkunu għamilna.

¹⁷ Aħna rridu nipprovaw ma nibqgħux inħossuna skuraġġiti dwar id-dnubiet serji li għamilna fil-passat. Imma ma rridux nużaw is-sagrifiċċju tal-mewt taʼ Ġesù bħala skuża biex “nipprattikaw id-dnub għax irridu.” (Ebr. 10:26-31) Aħna nistgħu nkunu ċerti li Ġeħova ħafrilna  għalkollox jekk vera ddispjaċiena għad-dnub serju li għamilna, tlabna l-għajnuna lil Ġeħova u lill-anzjani, u ma bqajniex nagħmlu dak li hu ħażin. (Is. 55:7; Atti 3:19) Ftakar x’qal Ġesù lill-Fariżej: “Ma ġejtx biex ngħin lin-nies tajbin jindmu, imma lill-midinbin.” (Mt. 9:13) Is-sagrifiċċju tal-fidwa għandu l-qawwa biex jgħatti d-dnubiet kollha tagħna.

18. X’tixtieq tgħidlu lill-kriminal li miet ħdejn Ġesù?

¹⁸ Timmaġinak fil-Ġenna tal-art titkellem mal-kriminal li tkellem maʼ Ġesù? Żgur li tgħidu lil xulxin kemm tapprezzaw is-sagrifiċċju taʼ Ġesù. Forsi ssaqsih biex jgħidlek iktar x’ġara fl-aħħar sigħat qabel miet Ġesù u kif ħassu meta Ġesù wieġbu. Hu jaf jistaqsik kif kienet il-ħajja matul l-aħħar żminijiet tad-dinja taʼ Satana. Xi privileġġ se jkun li nistudjaw il-Kelma t’Alla maʼ nies bħalu!—Efes. 4:22-24.

19. Għala mhux se niddejqu fil-Ġenna tal-art? (Ara l-istampa tal-qoxra.)

¹⁹ Qatt mhu se niddejqu ngħixu fil-Ġenna tal-art. Se niltaqgħu maʼ ħafna nies interessanti u se jkollna xogħol sabiħ x’nagħmlu. U l-iktar ħaġa importanti, kuljum se nkunu nistgħu nsiru nafu aħjar lil Missierna tas-sema u ngawdu dak li jipprovdilna. Se nibqgħu nitgħallmu dwaru u se jkun hemm ħafna affarijiet x’nitgħallmu dwar il-ħolqien. Iktar ma ngħixu iktar se nsiru nħobbu lil Alla. Aħna nirringrazzjaw lil Ġeħova u lil Ġesù talli wegħduna li nistgħu ngħixu f’Ġenna tal-art!