1. Ħafna nies għala jaħsbu li hu impossibbli li jgħixu għal dejjem?

 ĦAFNA nies joqogħdu attenti x’jieklu u jagħmlu l-eżerċizzju biex jibqgħu b’saħħithom u jibqgħu ħajjin kemm jistaʼ jkun. Imma huma xorta jafu li se jixjieħu u jmutu. Probabbli jafu li ma jistgħux jgħixu għal dejjem minħabba l-problemi li jiġu mix-xjuħija. Imma Ġesù fi Ġwanni 3:16 u 5:24 qal li jistaʼ jkollna “l-ħajja taʼ dejjem.”

2. Ġwanni kapitlu 6 x’jgħid dwar il-ħajja taʼ dejjem? (Ġwanni 6:​39, 40)

² Ġesù b’miraklu tema’ eluf taʼ nies bi ftit ħobż u ħut. a Din kienet xi ħaġa tal-għaġeb, imma n-nies kellhom iktar għalfejn jistagħġbu b’dak li qal l-għada f’Kafarnahum. Ġesù qal li se jirxoxta lil dawk li mietu u se jtihom il-ħajja taʼ dejjem. (Aqra Ġwanni 6:​39, 40.) Aħseb dwar il-ħbieb u tal-familja tiegħek li mietu. Minn dak li qal Ġesù, tistaʼ tkun ċert li huma se jerġgħu jqumu u se tgħixu għal dejjem flimkien! Imma dak li Ġesù qal wara kien diffiċli għan-nies biex jifhmuh dak iż-żmien, u anke għan-nies illum jistaʼ jkun diffiċli. Ejja naraw x’qal.

3. Ġesù x’għallem fi Ġwanni 6:51?

 ³ Wara li Ġesù tahom l-ikel, il-folla bdiet tiftakar dwar il-manna li Ġeħova ta lill-Iżraelin fid-deżert. In-nies li Ġesù kien qed jitkellem magħhom kienu jafu li l-Iskrittura ssejjaħ il-manna “ħobż mis-sema.” (Slm. 105:40; Ġw. 6:31) Imma issa Ġesù għallem lill-folla xi ħaġ’oħra importanti dwar il-ħobż. Kien hemm differenza kbira bejnu u bejn il-manna. Għalkemm il-manna kienet miraklu mingħand Ġeħova, l-Iżraelin xorta mietu maż-żmien. (Ġw. 6:49) Imma Ġesù qal xi ħaġa differenti dwaru nnifsu: “Jien il-ħobż li niżel mis-sema u li jagħti l-ħajja. Jekk xi ħadd jiekol minnu jgħix għal dejjem.” (Aqra Ġwanni 6:51.) Dan gerfex lil-Lhud għax huma ma setgħux jifhmu kif Ġesù kien “ħobż” mis-sema u aħjar mill-manna tal-Iżraelin. Ġesù qalilhom: “Il-ħobż li se nagħti hu ġismi.” Ġesù x’ried ifisser? Għandu jimpurtana mit-tweġiba għax din tgħinna nifhmu kif aħna u dawk li nħobbu nistgħu ngħixu għal dejjem. Ejja naraw x’ried ifisser Ġesù.

IL-ĦOBŻ LI JAGĦTI L-ĦAJJA U ĠISEM ĠESÙ

4. Xħin semgħu dak li qal Ġesù, xi wħud għala ma setgħux jemmnu?

⁴ Xi wħud ma setgħux jemmnu meta Ġesù qal li kellhom ‘jieklu ġismu li kien se joffrih biex in-nies ikunu jistgħu jgħixu.’ Huma forsi ħasbu li kien qed jgħidilhom biex jieklu l-ġisem letterali tiegħu. (Ġw. 6:52) Imbagħad qalilhom xi ħaġ’oħra li setgħet ħawdithom iktar. Hu qal: “Jekk ma tiklux il-ġisem tiegħi u ma tixorbux id-demm tiegħi, Bin il-bniedem, ma jkollkomx il-ħajja.”—Ġw. 6:53.

5. Għala nistgħu nkunu ċerti li Ġesù ma qalx li n-nies kellhom jixorbu d-demm letterali tiegħu?

⁵ Fi żmien Noè, Alla qal lin-nies li ma setgħux jieklu d-demm. (Ġen. 9:​3, 4) Imbagħad meta ta l-Liġi lill-Iżraelin reġaʼ qal l-istess kmand: “Kull persuna li tiekol xi demm, għandha tiġi maqtula.” (Lev. 7:27) Ġesù qal lil-Lhud biex jobdu l-liġijiet kollha fil-Liġi taʼ Mosè. (Mat. 5:​17-19) Allura żgur li ma riedx li l-Lhud jieklu l-ġisem u jixorbu d-demm letterali tiegħu. B’dak li qal, avolja kien stramb, ried jgħallem lin-nies kif setaʼ jkollhom “il-ħajja taʼ dejjem.”—Ġw. 6:54.

6. Kif nafu li fi Ġwanni 6:​53, Ġesù kien qed juża eżempju?

⁶ B’dak li qal fi Ġwanni 6:​53, Ġesù kien qed juża eżempju, bħal meta tkellem mal-mara Samaritana. Hu qalilha: “Kull min jixrob mill-ilma li nagħtih jien qatt iktar ma jerġaʼ jaqbdu għatx, anzi l-ilma li nagħtih isir bħal għajn tal-ilma fih li jagħtih il-ħajja taʼ dejjem.” (Ġw. 4:​7, 14) b Ġesù ma kienx qed jgħid lill-mara li jekk tixrob minn xi bir speċjali se tgħix għal dejjem. B’mod simili, Ġesù ma kienx qed jgħid lill-folla f’Kafarnahum li kellha tiekol ġismu u tixrob demmu letterali biex tgħix għal dejjem.

ŻEWĠ DIFFERENZI BEJN ŻEWĠ OKKAŻJONIJIET

7. Xi nies x’jgħidu dwar dak li qal Ġesù fi Ġwanni 6:53?

⁷ Xi nies jgħidu li fi Ġwanni 6:​53, Ġesù kien qed jispjega xi rridu nagħmlu  fl-Ikla taʼ Filgħaxija tal-Mulej. Dan għax meta għamel l-ikla, hu uża kliem simili. (Mat. 26:​26-28) Dawn in-nies jgħidu li kull min jattendi l-Ikla taʼ Filgħaxija tal-Mulej għandu jieħu mill-ħobż u l-inbid. Imma dan veru? Hu importanti li nkunu nafu għax kull sena miljuni taʼ nies madwar id-dinja jattendu din il-laqgħa. Ejja naraw xi differenzi li hemm bejn dak li qal Ġesù fi Ġwanni 6:​53, u dak li qal fl-Ikla taʼ Filgħaxija tal-Mulej.

8. X’hemm differenti bejn iż-żewġ okkażjonijiet? (Ara l-istampi.)

⁸ Ejja naraw żewġ differenzi bejn dawn l-okkażjonijiet. L-ewwel, Ġesù meta qal il-kliem fi Ġwanni 6:​53-56, u fejn kien? Hu kien fil-Galilija fis-sena 32. Din kienet madwar sena qabel għamel l-Ikla taʼ Filgħaxija tal-Mulej f’Ġerusalemm. It-tieni, maʼ min kien qed jitkellem? Hu tkellem mal-folla li iktar kienu interessati f’li jieklu milli li jitgħallmu dwar Ġeħova u s-Saltna tiegħu. (Ġw. 6:26) Fil-fatt, meta huma ma fehmux xi ħaġa li qal Ġesù, ma baqgħux jemmnu fih. Anke ftit mid-dixxipli ma baqgħux miegħu. (Ġw. 6:​14, 36, 42, 60, 64, 66) Imma din il-folla kienet differenti ħafna mill-11-il appostlu leali li kienu maʼ Ġesù madwar sena wara, fl-Ikla taʼ Filgħaxija tal-Mulej. Huma baqgħu miegħu avolja  ma fehmux kulma kien qed jgħallimhom. L-appostli m’għamlux bħal ħafna min-nies fil-Galilija, imma huma kienu konvinti li Ġesù kien l-Iben t’Alla li niżel mis-sema. (Mat. 16:16) Għalhekk, Ġesù faħħarhom u qalilhom: “Intom bqajtu miegħi fil-provi.” (Luqa 22:28) Dawn iż-żewġ differenzi juru li fi Ġwanni 6:​53, Ġesù ma kienx qed jispjega x’kien se jiġri fl-Ikla taʼ Filgħaxija tal-Mulej. Imma hemm iktar differenzi x’naraw.

XI JFISSER KLIEM ĠESÙ GĦALIK?

9. Il-patt li semma Ġesù fl-Ikla taʼ Filgħaxija tal-Mulej għal min japplika?

⁹ Fl-Ikla taʼ Filgħaxija tal-Mulej, Ġesù ta lill-appostli l-ħobż bla ħmira u qal li jirrappreżenta lil ġismu. Imbagħad tahom tazza nbid u qal li jirrappreżenta “d-demm tiegħi li bih se jibda jgħodd il-patt t’Alla.” (Mrk. 14:​22-25; Luqa 22:20; 1 Kor. 11:24) Dak li qal dwar il-patt hu importanti ħafna. Dan hu “patt ġdid” li sar biss maʼ dawk li se jmexxu maʼ Ġesù fis-Saltna t’Alla, u mhux man-nies kollha. (Lhud 8:​6, 10; 9:15) F’dak il-ħin l-appostli ma fehmux kollox dwar dan il-patt, imma dalwaqt kienu se jiġu magħżulin mill-ispirtu qaddis u jsiru parti mill-patt il-ġdid biex ikunu maʼ Ġesù fis-sema.—Ġw. 14:​2, 3.

10. X’inhi differenza oħra bejn dak li Ġesù qal fl-Ikla taʼ Filgħaxija tal-Mulej u dak li qal lill-folla fil-Galilija? (Ara l-istampa.)

¹⁰ Dak li Ġesù qal fl-Ikla taʼ Filgħaxija tal-Mulej kien japplika għall-“merħla żgħira.” L-appostli leali li kienu miegħu għal din l-okkażjoni kienu l-ewwel nies f’dan il-grupp. (Luqa 12:32) Allura, huma kellhom jieklu mill-ħobż u jixorbu mill-inbid. Imma anke nies oħra li fil-futur kellhom isiru parti minn dan il-grupp għandhom jieklu mill-ħobż u jixorbu mill-inbid waqt l-Ikla taʼ Filgħaxija tal-Mulej. Dan il-grupp se jkun maʼ Ġesù fis-sema. Mela din hi differenza oħra bejn iż-żewġ okkażjonijiet li tkellem fihom Ġesù. Dak li qal fl-Ikla taʼ Filgħaxija tal-Mulej kien japplika għal grupp żgħir taʼ nies biss. Imma dak li qal lill-folla fil-Galilija kien japplika għal ħafna iktar nies.

11. Dak li qal Ġesù fil-Galilija kif juri li ma kienx qed jirreferi għal ftit nies biss?

¹¹ Ħafna mil-Lhud fil-Galilija li Ġesù kien qed jitkellem magħhom, kulma riedu kien li Ġesù jtihom l-ikel. Imma Ġesù ried jgħinhom jifhmu li hemm xi ħaġa aħjar mill-ikel u li tistaʼ ttihom ħajja taʼ dejjem. Hu qal ukoll li dawk li mietu setgħu jiġu rxoxtati fl-aħħar jum u jgħixu għal dejjem. Ġesù ma kienx qed jitkellem dwar xi ħaġa li se jibbenefikaw minnha ftit nies biss, bħalma għamel fl-Ikla taʼ Filgħaxija tal-Mulej. Minflok, tkellem dwar xi ħaġa tal-għaġeb li n-nies kollha jistgħu jgawdu minnha. Fil-fatt hu qal: “Il-ħobż li se nagħti hu ġismi li se noffrih biex in-nies ikunu jistgħu jgħixu.”—Ġw. 6:51.

12. Ġesù x’qal li hemm bżonn biex xi ħadd ikollu l-ħajja taʼ dejjem?

¹² Ġesù ma qalx li kull persuna li qatt għexet se jkollha l-ħajja taʼ dejjem. Hu qal li dawk li se jgawdu mill-ħajja taʼ  dejjem huma n-nies li ‘jieklu l-ħobż,’ jiġifieri juru fidi f’Ġesù. Ħafna nies li jgħidu li huma Kristjani jemmnu li biex jiġu salvati kulma għandhom bżonn hu li ‘jemmnu f’dak li [Alla] bagħat’ u jemmnu li Ġesù hu s-salvatur tagħhom. (Ġw. 6:​29, Il-Bibbja, Għaqda Biblika Maltija) Imma, anke fi żmien Ġesù kien hemm ħafna nies li emmnu fih imma mbagħad ma baqgħux. Għala?

13. Xi jfisser li tkun dixxiplu veru taʼ Ġesù?

¹³ Ħafna nies fil-folla fil-Galilija emmnu f’Ġesù għax hu tahom li xtaqu. Huma riedu li jfejjaqhom, li jtihom l-ikel, u jgħallimhom affarijiet li xtaqu jisimgħu. Imma Ġesù wera li hu ġie biex jgħallimhom xi jridu jagħmlu biex ikunu dixxipli vera tiegħu u mhux biex itihom li xtaqu. Huma kellhom ‘imorru għandu’ billi jisimgħu u jobdu dak kollu li għallimhom.—Ġw. 5:40; 6:44.

14. Xi rridu nagħmlu biex nibbenefikaw mill-ġisem u d-demm taʼ Ġesù?

¹⁴ Ġesù għallem lill-folla kemm hu importanti li jemmnu li hu kien se jissagrifika ġismu u demmu biex ikunu jistgħu jgħixu għal dejjem. Bħalma kien importanti għal-Lhud li jkollhom fidi f’dan is-sagrifiċċju, hu importanti għalina wkoll. (Ġw. 6:40) Mela dak li Ġesù qal fi Ġwanni 6:​53, ifisser li biex ikollna l-ħajja taʼ dejjem irid ikollna fidi fil-fidwa. Dan is-sagrifiċċju hu xi ħaġa li kulħadd jistaʼ jgawdi minnu.—Efes. 1:7.

15-16. X’lezzjonijiet importanti tgħallimna minn Ġwanni kapitlu 6?

 ¹⁵ Fi Ġwanni kapitlu 6 tgħallimna ħafna affarijiet importanti u inkuraġġanti. Tgħallimna kemm Ġesù jimpurtah min-nies. Hu fejjaq lill-morda, għallimhom dwar is-Saltna t’Alla, u meta kienu bil-ġuħ temagħhom. (Luqa 9:11; Ġw. 6:​2, 11, 12) Imma l-iktar ħaġa importanti li għallimhom kienet li hu “l-ħobż li jagħti l-ħajja.”—Ġw. 6:​35, 48.

¹⁶ In-“nagħaġ oħra” m’għandhomx jieħdu mill-ħobż u l-inbid waqt l-Ikla taʼ Filgħaxija tal-Mulej. (Ġw. 10:16) Però, huma xorta jibbenefikaw mill-ġisem u d-demm taʼ Ġesù Kristu. Huma jagħmlu hekk billi juru fidi fis-sagrifiċċju taʼ Ġesù u fl-affarijiet tal-għaġeb li l-mewt tiegħu għamlet possibbli. (Ġw. 6:53) Dawk li jieħdu mill-ħobż u l-inbid juru li huma parti mill-patt il-ġdid u għalhekk għandhom it-tama li jmexxu fis-Saltna t’Alla. Mela, kemm jekk nagħmlu parti mill-magħżulin u kemm jekk nagħmlu parti min-nagħaġ oħra, ir-rakkont fi Ġwanni 6 fih ħafna lezzjonijiet għalina. Jgħallimna li biex ngħixu għal dejjem irid ikollna fidi fis-sagrifiċċju taʼ Ġesù bħala fidwa.