1. Ġesù x’qal lid-dixxipli tiegħu dwar it-tmiem, u x’wissiehom?

 FTIT ġranet qabel miet Ġesù, erbgħa mid-dixxipli tiegħu staqsewh: “X’se jkun is-sinjal . . . tat-tmiem taʼ din id-dinja?” (Mt. 24:3) Dawn id-dixxipli x’aktarx bdew jistaqsu biex ikunu jafu meta Ġerusalemm u t-tempju tagħha kienu se jinqerdu. Meta Ġesù wiġibhom ma semmiex biss il-qerda taʼ Ġerusalemm u t-tempju. Hu tkellem ukoll dwar “it-tmiem taʼ din id-dinja” li qed ngħixu fiha. Dwar dan Ġesù qal: “Imma dak il-jum u s-siegħa ma jafhom ħadd, la l-anġli fis-sema u lanqas l-Iben, ħlief il-Missier.” Imbagħad qal lid-dixxipli biex ‘jibqgħu mqajmin’ u ‘jibqgħu għassa.’—Mk. 13:32-37.

2. Għala kien importanti li l-Kristjani tal-bidu joqogħdu attenti?

² Il-Kristjani tal-bidu li kienu Lhud kellhom jibqgħu attenti biex isalvaw. Ġesù qalilhom x’kien se jiġri biex huma jkunu jafu meta Ġerusalemm u t-tempju kienu se jinqerdu. Hu qalilhom: “Meta taraw lil Ġerusalemm imdawra bil-kampijiet taʼ l-armati, imbagħad kunu afu li qorbot il-ħerba tagħha.” Huma kellhom jobdu t-twissija taʼ Ġesù u “jibdew jaħarbu lejn il-muntanji.” (Lq. 21:20, 21) In-nies li obdew lil Ġesù salvaw meta r-Rumani qerdu lil Ġerusalemm.

3. X’se niddiskutu f’dan l-artiklu?

³ Illum aħna qegħdin ngħixu fiż-żmien meta d-dinja ħażina dalwaqt se tispiċċa. Għalhekk aħna wkoll irridu noqogħdu attenti u nibqgħu għassa. F’dan l-artiklu se naraw kif nistgħu noqogħdu attenti waqt li naraw dak li qed jiġri fid-dinja, kif nistgħu noqogħdu attenti għalina nfusna,  u kif nużaw iż-żmien li baqaʼ bl-aħjar mod.

4. Għala għandna nkunu interessati fl-affarijiet li qed jiġru bħalissa fid-dinja?

⁴ Għandna raġunijiet tajbin biex inkunu interessati fl-affarijiet li qed jiġru fid-dinja bħalissa għax qed iwettqu l-profeziji tal-Bibbja. Pereżempju, Ġesù qalilna xi affarijiet biex jgħinna nkunu nafu li s-sistema taʼ Satana dalwaqt se tispiċċa. (Mt. 24:3-14) L-appostlu Pietru inkuraġġiena biex noqogħdu attenti għall-profeziji li qed jiġru ħalli l-fidi tagħna tibqaʼ b’saħħitha. (2 Pt. 1:19-21) L-aħħar ktieb tal-Bibbja jibda bil-kliem: “Rivelazzjoni minn Ġesù Kristu, li tahielu Alla, biex juri lill-ilsiera tiegħu dak li jrid iseħħ dalwaqt.” (Riv. 1:1) Għalhekk aħna interessati ħafna fl-affarijiet li qed jiġru bħalissa u kif qed iwettqu l-profeziji tal-Bibbja. U aħna nieħdu pjaċir nitkellmu dwar dawn l-affarijiet bejnietna.

5. X’għandna nevitaw, u x’għandna nagħmlu? (Ara l-istampi.)

⁵ Meta nkunu qed niddiskutu l-profeziji tal-Bibbja, m’għandniex nipprovaw naqtgħu x’se jiġri. Għala? Għax aħna ma rridux ngħidu xi ħaġa li ġġib il-firda fil-kongregazzjoni. Pereżempju, jistaʼ jkun nisimgħu gvernijiet jgħidu li se jsolvu xi problemi u jġibu paċi u sigurtà. Minflok ma ngħidu li dan qed iwettaq il-profezija tal-1 Tessalonikin 5:3, irridu nkunu nafu l-aħħar informazzjoni. Meta dak li ngħidu jkun ibbażat fuq il-pubblikazzjonijiet mill-organizzazzjoni taʼ Ġeħova, aħna nkunu qed ngħinu lill-aħwa fil-kongregazzjoni biex jibqgħu “bi ħsieb wieħed.”—1 Kor. 1:10; 4:6.

6. X’lezzjonijiet nistgħu nitgħallmu mit-2 Pietru 3:11-13?

⁶ Aqra t-2 Pietru 3:11-13. L-appostlu Pietru jgħinna naħsbu għala għandna nifhmu sew il-profeziji tal-Bibbja. Hu jgħidilna biex ‘inżommu dejjem f’moħħna l-preżenza tal-jum taʼ Ġeħova.’ Għala? Mhux għax qed nipprovaw inkunu nafu meta ġejja Armageddon, imma għax irridu nużaw il-ħin li għad fadal biex nagħmlu “atti taʼ kondotta qaddisa u għemejjel taʼ devozzjoni lejn Alla.” (Mt. 24:36; Lq. 12:40) Fi kliem ieħor, aħna rridu nagħmlu dak li jixtieq Ġeħova u nkunu ċerti li dak kollu li nagħmlu, nagħmluh għax inħobbuh. Biex inżommu dan f’moħħna, irridu noqogħdu attenti għalina nfusna.

7. Kif nuru li qed noqogħdu attenti għalina nfusna? (Luqa 21:34)

⁷ Ġesù qal lid-dixxipli tiegħu biex joqogħdu attenti għal dak li jkun qed jiġri fid-dinja, imma qalilhom ukoll biex joqogħdu attenti għalihom infushom. Dan jidher ċar fit-twissija taʼ Ġesù li nsibu f’​Luqa 21:34. (Aqra.) Ġesù qal: “Oqogħdu attenti għalikom infuskom.” Persuna li toqgħod attenta għaliha nfisha, toqgħod attenta għall-perikli li jistgħu jagħmlu l-ħsara lill-ħbiberija tagħha maʼ Ġeħova, u tipprova tevita kull periklu. B’dan il-mod, iżżomm ruħha fl-imħabba t’Alla.—Prov. 22:3; Ġuda 20, 21.

8. L-appostlu Pawlu liema parir tahom lill-Kristjani?

⁸ L-appostlu Pawlu qal lill-Kristjani biex joqogħdu attenti għalihom infushom.  Pereżempju, hu qal lill-Kristjani f’Efesu: “Oqogħdu attenti bis-sħiħ li ma timxux bħal nies bla għaqal imma bħal nies għorrief.” (Efes. 5:15, 16) Satana l-ħin kollu jipprova jkisser il-ħbiberija li għandna maʼ Ġeħova. Għalhekk il-Bibbja tgħidilna biex ‘nibqgħu nifhmu x’inhi r-rieda taʼ Ġeħova’ ħalli nkunu nistgħu nipproteġu lilna nfusna mill-attakki kollha taʼ Satana.—Efes. 5:17.

9. Kif nistgħu nifhmu x’inhi r-rieda taʼ Ġeħova?

⁹ Il-Bibbja ma tgħidilniex dak kollu li jistaʼ jagħmel il-ħsara lill-ħbiberija tagħna maʼ Ġeħova. Spiss ikollna nieħdu deċiżjonijiet dwar affarijiet li ma jissemmewx fil-Bibbja. Biex nieħdu deċiżjonijiet tajbin, aħna rridu nifhmu x’inhi “r-rieda taʼ Ġeħova.” Nistgħu nagħmlu hekk billi nistudjaw il-Bibbja b’mod regolari u nimmeditaw fuqha. Iktar ma nifhmu x’inhi r-rieda t’Alla u nipprovaw ikollna “l-moħħ taʼ Kristu,” iktar se nkunu nistgħu nimxu “bħal nies għorrief.” Dan se nagħmluh anki meta ma jkollniex regoli li jgħidulna x’għandna nagħmlu. (1 Kor. 2:14-16) Xi perikli huma faċli biex tinduna bihom, imma oħrajn le.

10. X’inhuma xi perikli li rridu nevitaw?

¹⁰ Xi perikli li rridu nevitaw huma flirting, xorb u ikel żejjed, kliem li jweġġaʼ lill-oħrajn, logħob u films vjolenti, pornografija, u affarijiet simili. (Salm 101:3) L-għadu tagħna, ix-Xitan, qiegħed il-ħin kollu jfittex opportunitajiet biex jagħmel il-ħsara lill-ħbiberija tagħna maʼ Ġeħova. (1 Pt. 5:8) Jekk ma noqogħdux attenti, Satana jistaʼ jdaħħlilna f’moħħna u f’qalbna l-għira, id-diżonestà, ir-regħba, il-mibegħda, il-kburija, u r-rabja. (Gal. 5:19-21) Għall-ewwel forsi taħseb li mhux perikoluż li tħossok b’dan il-mod. Imma jekk ma nipprovawx inneħħuhom mill-ewwel, jistgħu jikbru bħal pjanta velenuża u jagħmlu ħafna ħsara.—Ġak. 1:14, 15.

11. X’inhu periklu wieħed li nistgħu ma nindunawx bih u għala għandna nevitawh?

¹¹ Periklu wieħed hu kumpanija ħażina. Aħseb dwar din is-sitwazzjoni. Int taħdem maʼ xi ħadd li mhux Xhud taʼ Ġeħova. Int tixtieq tagħtih xhieda tajba u allura tkun qalbek tajba u tgħinu. Xi kultant anke tiekol fil-brejk miegħu. U malajr tibdew tieħdu l-brejk flimkien taʼ spiss. Xi kultant hu jibda jitkellem dwar affarijiet immorali. Għall-ewwel tibda tipprova ma tagħtix kas. Imma mbagħad, tant tidra li ma jibdiex idejqek dak li jkun qed jgħid. Imbagħad, hu jistiednek biex tmorru tieħdu drink flimkien, u inti tmur. Bil-mod, int tinduna li spiss taqbel maʼ dak li jgħid il-ħabib tax-xogħol. Ma tantx ikun baqagħlek biex tibda tagħmel l-affarijiet bħalma jagħmel hu. Vera li aħna nirrispettaw lil kulħadd, imma rridu niftakru li aħna niġu influwenzati minn dawk li nqattgħu l-ħin magħhom. (1 Kor. 15:33) Jekk noqogħdu attenti għalina nfusna bħalma qalilna Ġesù, mhux se nqattgħu ħin bla bżonn maʼ dawk li ma jobdux il-liġijiet taʼ Ġeħova. (2 Kor. 6:15) Aħna se nindunaw bil-periklu u nevitawh.

12. Id-dixxipli taʼ Ġesù x’kellhom jagħmlu waqt li jistennew it-tmiem jasal?

¹² Ġesù ried li d-dixxipli tiegħu jkollhom x’jagħmlu waqt li jkunu qed jistennew it-tmiem jasal u hu tahom xogħol x’jagħmlu. Hu kkmandahom biex  jippritkaw l-aħbar tajba “f’Ġerusalemm u fil-Lhudija kollha u fis-Samarija u sa l-iktar parti mbiegħda taʼ l-art.” (Atti 1:6-8) Dan kien ħafna xogħol! Billi għamlu dak kollu li setgħu biex jippritkaw lill-oħrajn, huma użaw il-ħin tagħhom bl-aħjar mod.

13. Għala rridu nużaw il-ħin tagħna bl-aħjar mod? (Kolossin 4:5)

¹³ Aqra Kolossin 4:5. Biex noqogħdu attenti għalina nfusna, irridu naħsbu sew kif nużaw il-ħin tagħna. “Ġrajjiet mhux mistennijin” jistgħu jiġru lil kulħadd. (Ekk. 9:11) Aħna ma nafux meta se mmutu.

14-15. Kif nistgħu nużaw il-ħin tagħna bl-aħjar mod? (Ebrej 6:11, 12) (Ara l-istampa.)

¹⁴ Aħna nistgħu nużaw il-ħin tagħna bl-aħjar mod billi nagħmlu dak li jrid Ġeħova u nsaħħu l-ħbiberija tagħna miegħu. (Ġw. 14:21) Aħna rridu ‘nibqgħu sodi, u ma nitħarrkux, waqt li dejjem ikollna ħafna x’nagħmlu fix-xogħol tal-Mulej.’ (1 Kor. 15:58) Imbagħad, jekk immutu jew jasal it-tmiem taʼ din id-dinja, mhux se jiddispjaċina li ma nkunux użajna l-ħin bl-aħjar mod.—Mt. 24:13; Rum. 14:8.

¹⁵ Illum, Ġesù qed ikompli jiggwida lid-dixxipli tiegħu waqt li jippritkaw l-aħbar  tajba tas-Saltna mad-dinja kollha. Hu żamm kelmtu. Fil-laqgħat u permezz tal-pubblikazzjonijiet, Ġesù jgħallimna kif nippritkaw l-aħbar tajba. Hu jagħtina wkoll dak kollu li għandna bżonn biex nagħmlu dan ix-xogħol. (Mt. 28:18-20) Aħna nagħmlu dak li jistenna minna Ġesù billi naħdmu iebes biex nippritkaw lill-oħrajn u ngħallmuhom. Barra minn hekk, irridu noqogħdu attenti waqt li qed nistennew lil Ġeħova biex iġib it-tmiem għal din is-sistema ħażina. Meta napplikaw il-parir li nsibu f’​Ebrej 6:11, 12, it-tama tagħna se tibqaʼ b’saħħitha “sat-tmiem.”—Aqra.

16. X’aħna determinati li nagħmlu?

¹⁶ Ġeħova għażel ġurnata u ħin meta se jeqred id-dinja taʼ Satana. Meta tasal din il-ġurnata, Ġeħova se jwettaq il-profeziji kollha li nsibu fil-Bibbja dwar id-dinja l-ġdida. Xi kultant, nistgħu naħsbu li t-tmiem baqagħlu biex jiġi. Però, il-ġurnata li għażel Ġeħova “mhix se tkun tard.” (Ħab. 2:3) Għalhekk, ejja nkunu determinati li ‘nibqgħu nfittxu lil Ġeħova’ u ‘nistennew b’attitudni xierqa lill-Alla tas-salvazzjoni tagħna.’—Mik. 7:7.