1-2. X’jistaʼ jgħinna nifhmu kif iħossu Ġeħova dwar il-gideb li ntqal dwaru?

 IMMAĠINA li ħabib li tħobbu ħafna jgħid xi ħaġa kerha dwarek. Int taf li hi gidba, imma xi nies jemmnuha. Imbagħad jibdew jgħiduha lil nies oħrajn. U dawn ukoll jibdew jemmnuha. Kieku kif tħossok? Jekk int jimpurtak mill-ħbiberija tiegħek man-nies u dwar ir-reputazzjoni tiegħek, din il-gidba ħa tweġġgħek.—Prov. 22:1.

² Dan l-eżempju jgħinna nifhmu kif ħassu Ġeħova meta pprovaw iħammġu r-reputazzjoni tiegħu. Wieħed mill-anġli gideb lill-ewwel mara, Eva, dwar Ġeħova. Hi emmnet din il-gidba, u minħabba f’hekk, Adam u Eva rribellaw kontra Ġeħova. B’hekk, in-nies kollha jidinbu u jmutu. (Ġen. 3:​1-6; Rum. 5:12) Il-problemi kollha li hawn fid-dinja, bħall-mewt, il-gwerer, u t-tbatija, jeżistu minħabba l-gideb li qal Satana fil-ġnien tal-Għeden. Kif taħseb li jħossu Ġeħova minħabba dan il-gideb u l-problemi li ġab miegħu? Hu żgur li jħossu mweġġaʼ ħafna. Imma hu mhux irrabjat. Fil-fatt, hu “l-Alla l-hieni.”—1 Tim. 1:11.

3. Aħna xi prova nistgħu nagħtu?

³ Aħna nistgħu nagħtu prova li Satana gideb dwar Ġeħova. U dan nagħmluh billi nobdu l-kmand: “Faħħru isem Ġeħova.” (Salm 113:1) Aħna nfaħħru l-isem taʼ Ġeħova meta ngħidu l-verità dwaru. Int ħa tfaħħar l-isem t’Alla? Ejja naraw tliet raġunijiet tajbin għala  għandna nfaħħru l-isem t’Alla b’qalbna kollha.

ĠEĦOVA JKUN FERĦAN META AĦNA NFAĦĦRU ISMU

4. Ġeħova għala jieħu pjaċir meta nfaħħruh? Agħti eżempju. (Ara l-istampa.)

⁴ Ġeħova jkun ferħan meta aħna nfaħħru ismu. (Salm 119:108) Imma jfisser dan li Ġeħova hu bħan-nies imperfetti, li għandhom bżonn min ifaħħarhom biex iħossuhom inkuraġġiti? Le. Aħseb dwar dan l-eżempju. Immaġina tifla żgħira tgħannaq lil missierha u tgħidlu, “Pa, int l-aqwa wieħed!” Missierha vera jieħu pjaċir b’dan il-kliem. Għala? Għandna naħsbu li hu għandu bżonn l-inkuraġġiment u t-tifħir mingħand it-tifla tiegħu? Le. Hu qed jieħu pjaċir li hi turih li tħobbu u tapprezzah. Hu jaf li dawn il-kwalitajiet ħa jgħinuha tkun ferħana meta tikber. Bl-istess mod, Ġeħova, l-aqwa Missier, ikun ferħan meta nfaħħruh.

5. Meta nfaħħru lil Ġeħova xi nkunu qed nuru?

⁵ Meta nfaħħru lil Missierna tas-sema, inkunu qed nuru li dak li qal Satana dwarna mhuwiex vera. Satana jgħid li ħadd mhu ħa jiddefendi lil Ġeħova u li meta ngħaddu minn prova, ħadd mhu ħa jibqaʼ leali lejn Alla. Hu jgħid li aħna ħa nieqfu naqdu lil Alla jekk ikun jaqblilna. (Ġob 1:​9-11; 2:4) Imma Ġob baqaʼ leali lejn Alla u wera li Satana hu giddieb. Xi ngħidu għalik? Kull wieħed minna għandu ċ-ċans li jiddefendi lil Missieru u jferrħu billi jibqaʼ leali. (Prov. 27:11) Xi privileġġ kbir għandna!

6. Kif nistgħu nimitaw lir-Re David u l-Leviti? (Neħemija 9:5)

⁶ Dawk li jħobbu lil Ġeħova jixtiequ jfaħħru lil ismu b’qalbhom kollha. Ir-Re David kiteb: “Jien se nfaħħar lil Ġeħova; jien se nfaħħar lil ismu l-qaddis b’qalbi kollha.” (Salm 103:1) David fehem li meta nfaħħru isem Alla nkunu qed infaħħru lil Ġeħova stess. Meta naħsbu dwar l-isem taʼ Ġeħova, f’moħħna jiġina x’karattru għandu, il-kwalitajiet sbieħ tiegħu, u l-affarijiet sbieħ kollha li għamel. David qies l-isem taʼ Ġeħova bħala qaddis u faħħru. Hu ried jagħmel dan ‘b’qalbu kollha.’ Bl-istess mod, il-Leviti kienu minn taʼ quddiem f’li jfaħħru lil Ġeħova.  Huma ammettew li ma kellhomx kliem biżżejjed biex ifaħħru l-isem qaddis taʼ Ġeħova. (Aqra Neħemija 9:5.) Bla dubju, tifħir mill-qalb bħal dan għamel lil Ġeħova ferħan.

7. Kif nistgħu nfaħħru lil Ġeħova fil-ministeru u fil-ħajja tagħna taʼ kuljum?

⁷ Aħna nistgħu nfaħħru lil Ġeħova billi nitkellmu dwar kemm napprezzaw dak li għamel magħna u kemm inħobbuh. Meta nkunu fil-ministeru, il-mira tagħna għandha tkun li ngħinu lil oħrajn isiru ħbieb taʼ Ġeħova u ngħinuhom iħossuhom l-istess bħalna dwar Missierna tas-sema. (Ġk. 4:8) Aħna ferħanin li nistgħu nuru lin-nies x’tgħid il-Bibbja dwar il-kwalitajiet taʼ Ġeħova bħall-imħabba, il-ġustizzja, l-għerf, u l-qawwa. Aħna nfaħħru lil Ġeħova wkoll meta nagħmlu l-aħjar tagħna biex nimitawh, u dan jagħmlu ferħan. (Efes. 5:1) Meta nagħmlu hekk, nidhru differenti min-nies taʼ din id-dinja. In-nies jaf jindunaw u tiġihom kurżità għala aħna differenti. (Mt. 5:​14-16) Meta nkunu magħhom, nistgħu nispjegawlhom x’jagħmilna differenti. B’hekk nies onesti jistgħu jinġibdu lejh. Meta nfaħħru lil Ġeħova b’dawn il-modi aħna nferrħuh ħafna.—1 Tim. 2:​3, 4.

ĠESÙ JKUN FERĦAN META NFAĦĦRU ISEM ALLA

8. Ġesù għala hu l-aqwa eżempju taʼ xi ħadd li jfaħħar l-isem t’Alla?

⁸ M’hemm ħadd li jaf lil Ġeħova iktar minn Ġesù, la fis-sema u lanqas fl-art. (Mt. 11:27) Ġesù jħobbu ħafna lil Missieru, u hu l-aqwa eżempju taʼ xi ħadd li jfaħħar isem Alla. (Ġw. 14:31) Fil-lejl qabel ma miet, Ġesù talab lil Missieru u qallu dwar l-iktar ħaġa importanti li għamel matul il-ħajja tiegħu fuq l-art: “Jien għallimthom dwar ismek.” (Ġw. 17:26) Ġesù kif għamel dan?

9. Ġesù x’eżempju uża biex juri xi kwalitajiet għandu Missieru?

⁹ Ġesù għamel iktar milli sempliċement qal lin-nies li l-isem t’Alla hu Ġeħova. Il-Lhud fi żmien Ġesù diġà kienu jafu x’kien l-isem t’Alla, imma Ġesù kien minn taʼ quddiem f’li ‘jispjega min hu.’ (Ġw. 1:​17, 18) Pereżempju, l-Iskrittura Ebrajka tgħid li Ġeħova hu Alla ħanin u qalbu tajba. (Eżo. 34:​5-7) Ġesù għamel din il-verità iżjed ċara meta ġab l-eżempju tal-iben il-ħali u missieru. Dan l-eżempju jurina li meta l-missier ra lil ibnu ġej lura ddispjaċut, “waqt li kien għadu ’l bogħod,” hu telaq jiġri lejh, għannqu, u biesu b’tenerezza u ħafirlu mill-qalb. (Lq. 15:​11-32) B’dan l-eżempju, Ġesù għen lil oħrajn jifhmu aħjar il-kwalitajiet ta’ Ġeħova, jiġifieri l-ħniena u qalb tajba.

10. (a) Kif nafu li Ġesù uża l-isem taʼ Missieru u xtaq li n-nies jużawh ukoll? (Marku 5:19) (Ara l-istampa.) (b) Ġesù x’jixtieqna nagħmlu?

¹⁰ Ġesù ried li oħrajn jużaw l-isem taʼ Missieru? Iva. Xi mexxejja reliġjużi kienu jgħidu li jekk tuża l-isem t’Alla ma tkunx qed turih rispett. Imma Ġesù qatt ma ħalla dawn l-ideat iwaqqfuh milli jfaħħar l-isem taʼ Missieru. Aħseb dwar meta Ġesù fejjaq raġel li kellu d-demonji, fir-reġjun tal-Gerasin. In-nies bdew jibżgħu u riedu li Ġesù jitlaq minn hemmhekk. Allura hu hekk għamel. (Mk. 5:​16, 17) Imma Ġesù xorta ried li n-nies f’dak il-post ikunu jafu dwar Ġeħova.  Allura hu qal lir-raġel li fejjaq biex jgħid lin-nies x’kien għamel għalih Ġeħova. (Aqra Marku 5:19.) a Ġesù jrid li aħna wkoll ngħidu lin-nies madwar id-dinja kollha dwar Missieru! (Mt. 24:14; 28:​19, 20) Meta nagħmlu hekk, aħna nferrħu lir-Re tagħna, Ġesù.

11. Ġesù x’għallem lid-dixxipli tiegħu jitolbu, u dan għala hu importanti? (Eżekjel 36:23)

¹¹ Ġesù kien jaf li l-iskop taʼ Ġeħova hu li jnaddaf ismu, jiġifieri juri li dak li qal Satana dwaru hu gidba. Għalhekk, hu għallem lin-nies jitolbu: “Missierna tas-sema, ħa jitqaddes ismek.” (Mt. 6:9) Ġesù kien jaf li din hi l-iktar kwistjoni importanti li qatt kienet teżisti. (Aqra Eżekjel 36:23.) Ħadd qatt ma faħħar isem Ġeħova iktar milli għamel Ġesù. Imma meta arrestawh, in-nies akkużawh li hu wera diżrispett kbir lejn l-isem t’Alla bl-agħar mod. Ġesù kien jaf li l-ikbar dnub hu li ma tirrispettax l-isem t’Alla. Allura hu żgur li kien imdejjaq ħafna li kienu se jakkużawh b’din il-ħaġa u jsibuh ħati. Wisq probabbli, din kienet ir-raġuni għala Ġesù “kien inkwetat għall-aħħar” qabel ġie arrestat.—Lq. 22:​41-44.

12. Ġesù kif faħħar l-isem taʼ Missieru bl-aqwa mod?

¹² Biex ifaħħar l-isem taʼ Missieru, Ġesù ssaporta ħafna torturi, tgħajjir, u gideb. Hu kien jaf li obda lil Missieru f’kollox, u ma kellux minn xiex jistħi. (Ebr. 12:2) Kien jaf ukoll li Satana kien qed jattakkah apposta. (Lq. 22:​2-4; 23:​33, 34) Satana pprova jġiegħel lil Ġesù ma jibqax leali, imma ma rnexxilux! B’hekk, Ġesù wera li Satana hu giddieb, u li Ġeħova għandu qaddejja li jibqgħu leali anki meta jgħaddu minn provi vera diffiċli!

13. Int kif tistaʼ tagħmel lil Ġesù ferħan?

¹³ Int tixtieq tagħmel lil Ġesù ferħan? Mela ibqaʼ faħħar l-isem t’Alla u għin lil oħrajn jitgħallmu dwar il-kwalitajiet  tiegħu. B’hekk tkun qed timita lil Ġesù. (1 Pt. 2:21) U bħalu, tkun qed tagħmel lil Ġeħova ferħan u turi li Satana hu giddieb kbir!

META NFAĦĦRU L-ISEM T’ALLA NSALVAW IN-NIES

14-15. X’affarijiet sbieħ ħa naraw meta ngħallmu lin-nies dwar Ġeħova?

¹⁴ Meta nfaħħru l-isem t’Alla nsalvaw in-nies. Kif? Satana “għema l-imħuħ taʼ dawk li ma jemmnux.” (2 Kor. 4:4) B’hekk, huma jemmnu gideb bħal: Alla ma jeżistix, Alla ma jimpurtahx minna, Alla kattiv u jrid jittortura lill-ħżiena għal dejjem. Satana jgħid dan il-gideb għax jixtieq iħammeġ l-isem t’Alla u biex in-nies ma jkunux iridu jsiru l-ħbieb tiegħu. Imma meta nippritkaw inkunu qed inżommu lil Satana milli jilħaq il-mira tiegħu. Aħna ngħallmu lin-nies il-verità dwar Ġeħova, u b’hekk infaħħru lil ismu. Xi jkun ir-riżultat?

¹⁵ Il-verità li nsibu fil-Bibbja għandha ħafna saħħa. Meta ngħallmu lin-nies dwar Ġeħova, naraw xi ħaġa vera sabiħa tiġri. In-nies jibdew jaraw il-gideb taʼ Satana, u b’hekk jibdew jaraw il-kwalitajiet sbieħ taʼ Ġeħova. Huma jibqgħu mistagħġbin b’kemm għandu qawwa. (Is. 40:26) Jitgħallmu jafdawh għax hu ġust. (Dt. 32:4) U jitgħallmu ħafna mill-għerf kbir tiegħu. (Is. 55:9; Rum. 11:33) U huma jħossuhom tajjeb meta jitgħallmu dwar kemm Ġeħova juri mħabba. (1 Ġw. 4:8) Hekk kif isiru ħbieb tiegħu, huma jsiru ċerti li jistgħu jgħixu għal dejjem bħala t-tfal tiegħu. Xi privileġġ għandna li nistgħu ngħinu lin-nies isiru ħbieb taʼ Ġeħova! Meta nagħmlu hekk, Ġeħova jqisna bħala ‘ħaddiema sħabu.’—1 Kor. 3:​5, 9.

16. Xi nies kif iħossuhom meta jsiru jafu x’jismu Alla? Agħti eżempju.

¹⁶ Għall-ewwel, jaf ngħallmu lin-nies li l-isem t’Alla hu Ġeħova, u dan jistaʼ  jkollu effett kbir fuq xi ħadd sinċier. Pereżempju, żagħżugħa jisimha Aaliyah b trabbiet f’reliġjon mhux Kristjana. Imma hi ma kinitx kuntenta bir-reliġjon tagħha u ma ħassithiex qrib t’Alla. Imma meta bdiet tistudja l-Bibbja max-Xhieda taʼ Ġeħova, hi ma baqgħetx tħossha hekk. Hi bdiet tara lil Alla bħala Ħabib. U kienet maħsuda li f’ħafna Bibbji biddlu l-isem t’Alla ma’ titli, bħal Mulej. Meta saret taf l-isem t’Alla ħajjitha nbidlet. Hi qalet: “Jien naf li l-ikbar Ħabib tiegħi għandu isem, u issa nħossni vera trankwilla u ferħana li naf l-isem taʼ Ġeħova.” Eżempju ieħor hu taʼ Steve, mużiċist li ġej minn background Lhudi. Hu ma ried ikun parti minn l-ebda reliġjon għax kien ra ħafna ipokrisija fihom. Wara li mietet ommu, hu aċċetta li joqgħod jismaʼ studju tal-Bibbja li kienu qed jagħmlu x-Xhieda taʼ Ġeħova. Hu feraħ ħafna meta sar jaf l-isem t’Alla. Hu qal: “Qatt ma kienu qaluli x’jismu Alla. U għall-ewwel darba f’ħajti qed narah bħala persuna reali. Ħassejt li kont sibt Ħabib kbir.”

17. Għala tixtieq tkompli tfaħħar l-isem t’Alla? (Ara l-istampa.)

¹⁷ Meta tmur tipprietka, tgħidilhom lin-nies dwar l-isem qaddis t’Alla? Tgħinhom jaraw il-kwalitajiet sbieħ tiegħu? Meta tagħmel hekk, int tkun qed tfaħħar l-isem t’Alla. Jalla tibqaʼ tfaħħar lil Ġeħova billi tgħin lin-nies jaraw x’tip taʼ persuna hu. B’hekk int ħa tgħinhom isalvaw, u ħa tkun qed tobdi lil Kristu Ġesù, ir-Re tagħna. U l-iktar importanti, int ħa tagħmel lil Ġeħova ferħan. Jalla ‘tfaħħar lil ismu għal dejjem taʼ dejjem!’—Salm 145:2.